Sitepu 3: Fokotuʻutuʻu e Ngaahi Ngāue ke Faí mo e Founga Ngāué

Palani e founga ʻe fokotuʻutuʻu mo fakahoko ʻaki ʻe he fakataha alēleá (kosilió) e ngāue takitaha ʻoku hiki hení, pea ʻiloʻi ko hai te ne tokangaʻi e ngāue takitaha mo e founga ngāue te nau muimui ki aí. Fokotuʻu ha tefitoʻi senitā mo ha senitā kehe, ʻe lava ke fakataha ki ai e kau mēmipa ʻo e fakataha alēleá (kosilió) hili e hoko ha meʻa fakatuʻupakē, ke tataki e ngāue tokoní.

Kimuʻa ʻi ha fakatamakí:

• Fakatupulaki ha vā fengāueʻaki mo e kau maʻu mafai fakapuleʻangá mo e ngaahi kautaha tokoni kehe ʻi he koló.

Hili pē ʻa e fakatamakí:

• Fakapapauʻi pea lipooti e tuʻunga ʻoku ʻi ai e kāingalotú mo e kau faifekaú. Meimei ko e ngaahi lipooti ki he ngaahi fie maʻu ʻa e mēmipá, ʻe ʻomi ia mei he kau tangata mo e kau fefine ngāue fakaetauhí, ki he kau taki ʻo e kōlomu kaumātuʻá mo e Fineʻofá pea te na toki lipooti ia ki he pīsopé. ʻE toki lipooti leva ia ʻe he pīsopé ki he palesiteni fakasiteikí.

• Tokoni ke ʻiloʻi mo fakatahaʻi e kau mēmipa ʻo ha fāmili ne nau mavahevahe.

• Maʻu e tokoni fakafaitoʻo ki ha niʻihi kuo lavea pe ʻi ai haʻanau palopalema fakaemoʻui lelei.

• Fakafekauʻaki e ngaahi tokoni ʻoku faí mo e kau maʻu mafai fakapuleʻangá mo e ngaahi kautaha tokoni kehe ʻi he koló.

• Vakavakaiʻi e ngaahi fie maʻú pea fokotuʻutuʻu ke maʻu atu e nāunau ki he fie maʻu mo e tokoni ʻoku vivilí—hangē ko e meʻakai, nofoʻanga fakataimi, haisiní mo e valá—maʻá e kau mēmipá mo ha niʻihi kehe. ʻE lava ke fai ha ui tokoni ki he kau taki uelofea fakaʻēliá, mo e ngāue fakauelofea ʻa e Siasí ke nau tokoni ʻi he nāunaú mo e ngāué.

• Fakapapauʻi pea lipooti e tuʻunga ʻoku ʻi ai e ngaahi fale mo e koloa ʻa e Siasí.

Hili e fakatamakí:

• Fai ha tokoni ki ha kāingalotu kuo maumau honau ngaahi ʻapí pe koloá, uesia fakaeloto pe uesia ʻa e moʻuí.

• Ngāue mo e kau taki fakapuleʻangá mo e ngaahi kautaha tokoní ʻo fai ha ngāue ki he ngaahi faingamālie ke tokoni ai e Siasí ki he ngaahi fie maʻu ʻa e koló.

Fakaʻaongaʻi e laʻipepa ngāue ko e Fakamatala Matuʻaki Mahuʻingá ke fakakakato e sitepu ko ʻení.