Unsaon nako sa pagsuporta og tawo kinsa naluwas gikan sa paghikog?

Ang mga minahal ug mga miyembro sa ward makahimo og importanting tahas aron maulian ang tawo nga naluwas gikan sa paghikog. Ang pagbati nga gimahal ug nahilakip makahatag og paglaum alang sa umaabut ngadto sa mga tawo nga naluwas gikan sa paghikog ug mahimong makatabang kanila nga molikay sa laing pagsulay sa paghikog. Samtang motanyag ka og tabang, pagmapuanguron ug pagmainampoon (tan-awa sa 1 Pedro 3:8). Ang Langitnong Amahan nasayud kon unsay ilang gikinahanglan ug makagiya sa imong mga paningkamot. Kon kabahin ka sa konseho sa usa ka ward, ikonsiderar kon sa unsang paagi makatabang ang mga miyembro sa ward ug stake. Ania ang pipila ka butang nga angay hinumduman samtang motanyag ka og suporta:

• Istorya nila kini. Tuguti ang mga tawo nga naluwas gikan sa paghikog sa pagbutyag sa ilang mga hagit sa ilang kaugalingong panahon ug ngadto sa mga tawo nga ilang gipili. Ayaw pagkasilo kon mobalibad sila sa imong mga pagdapit sa pagpaambit.

• Ipakita ang imong natural nga kinaiya. Pakig-istorya sa mga tawo nga naluwas gikan sa paghikog sa samang paagi nga imong gibuhat sa wala pa ang paghikog. Itanyag nga maminaw ka kon gusto silang moistorya. Ayaw ipaminos ang ilang kasakit o itandi ang ilang kasinatian ngadto sa laing tawo, lakip sa imong kaugalingon.

• Tuohi nga posible nga maulian. Samtang lisud tingali nga maulian gikan sa pagsulay og hikog, posible kini. Pagmapailubon ug pagmasinabtanon samtang ang tawo manlimbasug tadlas sa bisan unsang pisikal, emosyonal, ug espiritwal nga kasakit. Ayaw gayud kalimti nga sila, sama ni bisan kinsa, pwedeng mahimong mas himsog ug mas lig-on uban sa tabang sa Manluluwas.

• Ayoha pag-atiman ang imong kaugalingon. Paggahin og panahon sa pag-atiman sa imong kaugalingong espiritwal, pisikal, mental, ug sosyal nga kahimsog (tan-awa sa Mosiah 4:27). Palamboa ang imong pagtuo pinaagi sa pagtuon sa mga kasulatan ug sa pagtambong sa templo. Kaon og makahimsog nga mga pagkaon, pag-ehersisyo, ug katulog og sakto aron ikaw adunay pisikal ug emosyonal nga kalig-on. Bisitaha ang mentalhealth.ChurchofJesusChrist.org alang sa dugang nga mga ideya.

Mga Kapanguhaan sa Simbahan ug sa Komunidad

(Ang ubang mga kapanguhaan nga gilista sa ubos wala gihimo, wala gimintenar, o wala gikontrolar sa Ang Simbahan ni Jesukristo sa mga Santos sa Ulahing mga Adlaw. Kini nga mga materyal gituyo aron magsilbing dugang nga makatabang nga mga kapanguhaan samtang magtuon ka niini nga hilisgutan. Ang Simbahan wala moendorso og bisan unsang sulod [content] nga wala mahisubay sa mga doktrina ug mga pagtulun-an niini.)

• “Pagdawat sa Atong Sagrado nga Katungod,” Bonnie D. Parkin, Liahona, Nob 2004, 106–8.

• “Dawata ang Balaang Espiritu isip Inyong Giya,” Larry Y. Wilson, Liahona, Mayo 2018, 75–77.