Hikog
Unsaon nako pagsuporta og tawo kinsa nawad-an og usa ka minahal tungod sa paghikog?

“Unsaon nako pagsuporta og tawo kinsa nawad-an og usa ka minahal tungod sa paghikog?” Mga Kanunayng Gipangutana (2018).

“Unsaon nako pagsuporta og tawo kinsa nawad-an og usa ka minahal?” Mga Kanunayng Gipangutana.

Unsaon nako pagsuporta og tawo kinsa nawad-an og usa ka minahal tungod sa paghikog?

Ang mga higala ug mga miyembro sa Simbahan pwede nga mahimong dakong suporta sa mga pamilya kinsa nawad-an og usa ka minahal tungod sa paghikog. Ang paghikog kasagaran usa ka kalit, maka-trauma nga panghitabo ug makapagrabe sa pagbangutan niadtong naapektuhan. Sabta nga ang proseso sa pagbangutan mogahin og panahon.

Ang labing maayong pag-amuma nga atong mahatag mao ang pagtabang sa usa ka tawo nga makasinati sa mga panalangin sa gugma sa Langitnong Amahan ug sa kalooy ug grasya sa Manluluwas. Kon ang usa ka individwal o pamilya nawad-an og minahal tungod sa paghikog, pagmainampoon sa pag-obserbar sa ilang mga panginahanglan ug paningkamot sa pagsuporta kanila. Kasagaran ang atong pag-amuma sa usa ka tawo o pamilya magsugod pinaagi sa pagpaminaw uban sa gugma ug kamabination. Matnguni nga ang mga holiday ug mga anibersaryo tingali labing lisud.

Si Presidente M. Russell Ballard mitambag: “Pag-amping sa imong isulti mahitungod sa paghikog ug hibaloi nga wala kita masayud sa kompleto nga mga sirkumstansya nga naglibut sa matag paghikog. Ang Ginoo lamang ang aduna sa tanang detalye, ug Siya lamang ang nasayud sa tuyo sa kasingkasing sa tawo. Kinahanglang dili nato hukman kadtong mihunos sa ilang kaugalingong kinabuhi, ug kinahanglang atong suportahan ug hupayon kadtong nahibilin human sa kamatayon sa usa ka minahal” (“Questions and Answers” [debosyonal sa Brigham Young University, Nob. 14, 2017], 3, speeches.byu.edu).

Kon kabahin ka sa usa ka konseho sa ward, awhaga ang konseho sa paghisgot kon sa unsang paagi ang mga miyembro sa ward makahatag og tukma nga suporta ngadto sa tawo o pamilya. Awhaga ang mga sakop sa konseho sa pagreport kalabut sa suporta nga gitanyag. Ang pipila ka mga pangutana nga hisgutan naglakip sa:

  • Unsa ang naobserbahan sa tigpangalagad nga mga igsoon, ug unsa nga serbisyo ang ilang nahatag?

  • Unsa nga magpadayong suporta sa emosyonal ug espiritwal ang gikinahanglan sa tawo o pamilya? Kinsa ang labing andam nga makahatag niini nga suporta?

  • Unsa ang ilang temporal nga mga panginahanglan—transportasyon, pagkaon, ug uban pa?

  • Sa unsang paagi ang mga lider sa mga auxiliary sa ward, lakip sa mga lider sa Primary o kabatan-onan, makasuporta sa kabataan ug kabatan-onan nga naapektuhan?

Mga Kapanguhaan sa Simbahan ug sa Komunidad

(Ang ubang mga kapanguhaan nga gilista sa ubos wala gihimo, wala gimintenar, o wala gikontrolar sa Ang Simbahan ni Jesukristo sa mga Santos sa Ulahing mga Adlaw. Kini nga mga materyal gituyo aron magsilbing dugang nga makatabang nga mga kapanguhaan samtang magtuon ka niini nga hilisgutan. Ang Simbahan wala moendorso og bisan unsang sulod [content] nga wala mahisubay sa mga doktrina ug mga pagtulun-an niini.)