Tanoakita
Ngaahi Fakaʻilonga Fakatokanga ʻo e Taonakitá

“Ngaahi Fakaʻilonga Fakatokanga ʻo e Taonakitá,” Ko e Founga ke Tokoni (2018).

“Ngaahi Fakaʻilonga Fakatokanga ʻo e Taonakitá,” Ko e Founga ke Tokoní.

Ngaahi Fakaʻilonga Fakatokanga ʻo e Taonakitá

‘Oku ʻikai loto ‘a e tokolahi ʻo e kakai ‘oku nau taonakitá ke mate; ʻoku nau faʻa fie maʻu tokoni fakatuʻasino, fakaʻatamai, fakaeloto, pe mamahi ʻi he laumālié ‘oku nau lolotonga fouá. ʻOku tokolahi e kakai faingataʻaʻia ʻoku faʻa hā mai ha ngaahi fakaʻilonga fakatokanga kimuʻa pea nau feinga taonakitá. Kapau te ke ako ke ke ʻiloʻi ʻa e ngaahi fakaʻilonga fakatokangá, te ke toe mateuteu lelei ange ke tokoni kia kinautolu ʻoku fie maʻu tokoní. Fakafanongo ki he ngaahi fakamatala hangē ko e “‘Oku ʻikai ke u tokanga au kapau te u mate” pe “ʻE sai ange ke u mate he ʻoku lelei ange ʻa e taha kotoa ʻiate au.” ʻOku kau ʻi he ngaahi fakaʻilonga fakatokangá ʻa e ngaahi ʻulungaangá ni:

  • Kumi ki ha founga ke tamateʻi pē ai kinautolu

  • Talanoa fekauʻaki mo e ongoʻi ‘oku ʻikai ha toe ‘amanaki pe kuo ʻikai ha ‘uhinga ia ke toe moʻui ai

  • Talanoa fekauʻaki mo e ongoʻi ‘oku fihia pe mamahi ʻikai toe lava ke makātakiʻi

  • Talanoa fekauʻaki mo e hangē ʻokú ne hoko ko ha fakakavenga ki he niʻihi kehé

  • Fakalahi ʻenau fakaʻaongaʻi ‘o e kava mālohí pe faitoʻo kona tapú

  • Foaki atu ‘o ha ngaahi meʻa fakatāutaha ʻo ʻikai ha ‘uhinga lelei

  • Tōʻonga vekeveke pe taʻemanonga pe ko e taʻetokanga

  • ʻIkai fie feohi mo e niʻihi kehé pe nofo toko taha ʻo mavahe mei he niʻihi kehé

  • Fakahaaʻi e tōlili pe talanoa fekauʻaki mo e feinga sāuní

  • Mātuʻaki fakaʻaliʻali ha feliliuaki ʻi he ngaahi ongó (vakai, National Suicide Prevention Lifeline)

ʻOku ʻikai ʻuhinga ia ʻoku ʻi ai ha faingataʻa ʻi ha hoko ha fakaʻilonga fakatokanga pē ʻe taha. Ka ʻo kapau ‘oku ʻi ai ha hisitōlia ia ‘o e fakafoʻituituí mo ʻene ngaahi feingá pe kapau ‘okú ke fakatokangaʻi ha liliu fakafokifā ʻi he tokotaha fakafoʻituituí pe kamata sio ki ha ngaahi fakaʻilonga lahi, ngāue leva he taimi pē ko iá. ʻOku maʻu taʻetotongi atu ʻi he vaʻa tokoni ki he faingataʻá mo ha toe fakamatala ʻi he suicide.ChurchofJesusChrist.org. (Vakai, “Founga ke Tokoniʻi ʻAki ha Taha ʻoku Faingataʻaʻia” ʻi he tohi fakahinohinó ni ki ha ngaahi fakaikiiki lahi ange.)

Neongo ʻemau tōtōiví, ʻe ʻikai ke lava ke taʻofi ʻa e taonakita kotoa pē. ‘Oku hoko ʻa e ngaahi taonakita ʻe niʻihi ne ʻikai ha ngaahi fakatokanga mahino ia. ‘Oku ʻikai ke ke fatongia ʻaki e fili ‘a ha taha ke fakangata ʻene moʻuí.

Ngaahi Maʻuʻanga Tokoni Tānaki Maí

Paaki