Ko e Founga ke Tokoniʻi ʻAki ha Taha ʻoku Faingataʻaʻia

Toʻo fakamātoato e ngaahi fakaʻilonga fakatokanga ‘o e taonakitá mo ha fakamanamana ke feinga taonakita, ʻo tatau ai pē kapau ‘okú ke pehē ʻoku ‘ikai fakakaukau fakamātoato ʻa e fakafoʻituituí fekauʻaki mo e taonakitá pe ko e fekumi pē ki ha tokanga ʻa ha taha. Muimui he ngaahi sitepu ‘e tolu ko ʻení ke fai ha tokoni —ʻEke, Tokanga, Fakamatalaʻi.

Sitepu 1: ʻEke ʻEke fakahangatonu ki he tokotahá pe ʻoku nau fakakaukau nai fekauʻaki mo e taonakitá. Te ke ala fehuʻi ange, “ʻOku mou fakakaukau nai fekauʻaki mo hono fakangata ‘a hoʻomou moʻuí?” Kapau ʻoku nau pehē ‘oku nau fakakaukau fekauʻaki mo e taonakitá, ʻeke ange kiate kinautolu pe ʻoku ʻi ai haʻanau palani. ʻE lava ke ke fehuʻi ange, “ʻOku ʻi ai nai haʻo palani ke fakalaveaʻi koe?” Kapau ‘oku ʻi ai haʻanau palani, tokoniʻi leva kinautolu he taimi pē ko iá ke ʻave ki ha falemahaki pe kilīniki tokangaekina, pe telefoni ki ha maʻuʻanga tokoni ki he meʻa fakatuʻupakeé pe vaʻa tokoni ki he faingataʻá ‘i homou feituʻú. (Vakai, “Ngaahi Laine Tokoni ki he Faingataʻá” ki ha ngaahi fehokotaki’anga ki he ngaahi laine tokoni ʻi he funga ʻo e māmaní.) Kapau ʻoku ʻikai haʻanau palani, hoko ki he sitepu hono 2.

Sitepu 2: Tokanga Fakahaaʻi ‘oku ke tokanga ʻaki haʻo fakafanongo ki he meʻa ‘oku nau lea ʻakí. Tuku ange ha taimi ke nau fakamatalaʻi ʻenau ongó. Fakaʻapaʻapaʻi ʻenau ngaahi ongó ʻaki haʻo lea ʻaki ha meʻa hangē ko e, “Fakamolemole ko e mamahi lahi ʻokú ke ʻi aí” pe “naʻe ‘ikai te u ʻilo hono faingataʻa ‘o e ngaahi meʻa ko iá kiate koe.” Te ke ala lava ke tokoniʻi kinautolu ke faʻu ha palani fakahaofi ke fakaʻehiʻehi mei he taonakitá (vakai, “Founga ke Faʻu ha Palani Fakahaofi ke Fakaʻehiʻehi mei he TaonakitáDoug Thomas, Ensign,Sept. 2016, 63). ‘E lava ke tokoniʻi ʻe he palani fakahaofí ‘a e kakaí ke nau ʻiloʻi honau ngaahi mālohinga fakatāutahá, vā fetuʻutaki leleí mo e ngaahi taukei ki hono matuʻuaki e moʻui leleí. ‘E lava foki ai ke fakasiʻisiʻi ʻenau lava ‘o feinga ki he ngaahi founga ke fakalaveaʻi pē kitá, hangē ko e ngaahi meʻataú pe foʻi ʻakaú. Kapau te nau kole atu ke ‘oua naʻá ke tala ki ha taha fekauʻaki mo ʻenau ngaahi ongó, fakamatalaʻi ange te ke fakaʻapaʻapaʻi ‘enau totonu fakatāutahá ʻi he lahi taha te ke lavá ka ʻoku nau fie maʻu ha tokoni lahi ange ‘i he meʻa ʻe lava ke ke faí. ʻOua ʻaupito naʻá ke palōmesi te ke tauhi fakapulipuli ʻenau ngaahi fakakaukau taonakitá.

Sitepu 3: Fakamatalaʻi Poupouʻi e tokotaha ko iá ke fakamatala ki ha taha te ne lava ke ʻoange ha tokoni lahi ange. Vahevahe ʻa e fakamatala fetuʻutaki ki he ngaahi maʻuʻanga tokoni ʻi homou feituʻú. Lava ke kau ‘i he ngaahi maʻuʻanga tokoni ko ʻení ʻa e ngaahi falemahaki fakakoló, ngaahi kilīniki fakavavevavé, pe vaʻa tokoni palopalemá. Kapau he ʻikai te nau kumi tokoni, ʻoku fie maʻu ke ke talaange kiate kinautolu. Te ke lava ʻo pehē ange, “ʻOku ou tokanga atu kiate koe pea ʻoku ou fie maʻu ke ke malu. Te u fakahā ange ki ha taha te ne lava ke fai ʻa e tokoni te ke fie maʻú.” Fakaʻapaʻapaʻi ʻenau totonu fakatāutahá ʻi haʻo talaange ki ha taha pē ʻokú ke fakakaukau te ne lava ke tokoni, hangē ko ha mēmipa ofi ʻo e fāmilí, pīsope ʻo e tokotaha ko iá, faifaleʻi ʻo e ʻapiakó, toketā pe ko ha vaʻa fakapalofesinale ki hono tokangaekina e moʻui leleí. Kapau ʻoku ʻikai ke ke fakapapauʻi ʻa e tokotaha ke ke talanoa ki aí, talanoa ki hoʻo pīsopé pe telefoni ki ha laine tokoni taʻetotongi ʻi homou feituʻú. Manatuʻi, ‘oku ʻikai fie maʻu ke ke poupouʻi toko taha pē ʻiate koe ‘a e tokotaha ko iá.

Fakatokangaʻi ange: Kapau ʻokú ke tataki ha fealēleaʻaki, fakakaukau ke kole ki he mēmipá ke nau fakahoko ʻa e ngaahi sitepu ko ʻení. ʻOange kiate kinautolu ha meʻa ʻoku hoko ʻoku haʻu ai ha taha kiate kinautolu ʻo fakahaaʻi ha ngaahi fakakaukau taonakita pea kole ange ke nau akoako pe ʻe fēfē haʻanau tali.

Ngaahi Maʻuʻanga Tokoni Tānaki Maí

• Mōsaia 4:27; Molonai 7:45–47; Tokāteline mo e Ngaahi Fuakava 81:5.

• Vaʻa Tokoni Uelofeá (maʻá e kau palesiteni siteikí, kau pīsopé mo e kau palesiteni fakakoló)

• Tuku ha Taimi ke Talanoa Ai mo Fakafanongo,” Rosemary M. Wixom, Ensign,ʻEpeleli. 2012, 10–13

• “Fakaʻehiʻehi mei he Taonakitá ,” Carol F. McConkie (vitiō, suicide.ChurchofJesusChrist.org).

• “ʻOku ou Hohaʻa fekauʻaki mo ha Tokotaha,” suicide.ChurchofJesusChrist.org.

• “Suicide,” Counseling Resources, ChurchofJesusChrist.org (maʻá e kau mēmipa ʻo e fakataha alēlea ʻa e siteikí mo e uōtí).