ʻOku ʻI Ai Nai Ha Ngaahi Fakangatangata ʻi he Meʻa-fakaʻeikí pe Malangaʻi hono Tanu ʻo ha Taha ʻOku Pekia ʻi he Taonakitá?

ʻI he taimi ʻoku pekia ai ha taha ʻi he taonakitá, ʻoku totonu ke tau ʻoange ʻa e fakaʻapaʻapa tatau ki hono sinó, pea mo e kau mēmipa ʻo e fāmilí ʻoku moʻuí, ʻo tatau pē mo haʻatau fai ia ki ha toe taha kehe. ʻOku akoʻi ʻi he (General Handbook: Serving in The Church of Jesus Christ of Latter-day Saints): “ʻOku totonu ke fealeaʻaki mo fakafiemālie‘i ʻe he kau takí ʻa e kau mēmipa ‘o e fāmili ʻo ha taha ʻoku pekia ʻi he taonakitá. ʻE feongoongoi e fāmilí mo e pīsopé pea nau fili pē ʻa e feituʻu mo e faʻahinga natula hono malangaʻi ʻo e meʻa-fakaʻeiki ʻo e tokotaha ko iá. ʻE lava ke fakaʻaongaʻi ʻa e ngaahi fale ʻo e Siasí. Kapau naʻe maʻu ʻe he tokotahá ʻa e ʻenitaumeni ʻo e temipalé, ʻe lava ke tanu ia ʻi hono teunga fakatemipalé” (General Handbook, 38.6.18).

Naʻe kole kia Palesiteni M. Lāsolo Pālati ke ne lea ʻi he malangaʻi ʻo e meʻa-fakaʻeiki ʻo ha kaungāmeʻa ne pekia ʻi he taonakitá. Naʻá ne pehē: “ʻI hono ʻiloʻi ʻa e tokotahá pea mo e ngaahi tūkunga hangē ko ia ne u fakahokó, pea mo hono kumi ʻo e tokāteline fekauʻaki mo e kaveingá, ne ʻi ai ha ngaahi momeniti faingataʻa ʻe niʻihi ʻi hono teuteu ʻeku leá. … Ne u maʻu ha nonga ʻi he taimi pē ne u fakatokangaʻi ai ko e ʻEikí pē te Ne lava ke fakahoko ʻa e fakamaau totonú. Ko Ia toko taha pē naʻá Ne maʻu kotoa ʻa e ngaahi meʻa moʻoní, pea ko Ia pē naʻá Ne ʻafioʻi ʻa e taumuʻa ʻo e loto ʻo hoku kaungāmeʻá. Naʻe fakaleleiʻi au ʻe he fakakaukau ko e lelei mo e ngāue tokoni ki he niʻihi kehé ʻi he kotoa ʻo e moʻuí kuo pau moʻoni ke fakakaukauʻi ʻe he ʻEikí ʻi hono fakamāuʻi ʻa e moʻui ʻa ha taha” (“Suicide: Some Things We Know, and Some We Do Not,” Ensign, Oct. 1987, 7).

Ngaahi Maʻuʻanga Tokoni ʻa e Siasí mo e Koló

(Ko e niʻihi ʻo e ngaahi maʻuʻanga tokoni ʻoku hiki atu ʻi laló ʻoku ʻikai faʻu, tauhi, pe puleʻi ia ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ‘Oku fakataumuʻa ‘a e ngaahi naunau ko ʻení ke hoko ko ha toe ngaahi maʻuʻanga tokoni ʻaonga ‘i hoʻo ako ‘a e tefito ko ʻení. ʻOku ʻikai poupouʻi ʻe he Siasí ha faʻahinga meʻa ʻoku ʻikai fenāpasi mo hono ngaahi tokāteliné mo e ngaahi akonakí.)

• “Meʻafakaʻeikí mo e Ngaahi Ouau Kehe ʻi he Taimi ʻo e Pekiá,” General Handbook, 29.6.

•  :

•  :