Fitsipiky ny fampianarana tahaka ny an’i Kristy: Ampianaro ny fotopampianarana

Ampio ny mpianatra hahita zavatra mifandray amin’ny toe-javatra iainany ao amin’ny fotopampianaran’i Jesoa Kristy.

Fahaiza-manao

Manomàna fanasana sy fanehoan-kevitra izay manampy ny mpianatra hahita zavatra azony ampifandraisina amin’ny toe-javatra iainany manokana ao amin’ny andian’andinin-tsoratra masina iray.

Mamaritra

Afaka mahita zavatra mifandray amin’ny zavatra iainany ao amin’ny soratra masina ny mpianatra rehefa dinihin’izy ireo ny fomba ahafahan’ny zavatra halalinin’izy ireo ho manan-danja sy mahasoa amin’ny toe-javatra iainany. Fomba iray ahafahan’ny mpampianatra manampy ny mpianatra ao anatin’izany dingana izany ny fanomanana fanasana sy fanehoan-kevitra izay ahitana izao manaraka izao:

• Fahafahana ho an’ny mpianatra hieritreretany ny toe-javatra iainan’izy ireo amin’izao fotoana izao.

• Fotoana hamakian’ny mpianatra andinin-tsoratra masina.

• Fanehoan-kevitra izay manampy ny mpianatra hitady ny zavatra mitovy eo amin’ny toe-javatra iainany sy ny toe-javatra iainan’ireo olona izay vakiny ao amin’ny soratra masina ny momba azy. Ohatra: “Mitovy amin’ny an’i Petera ny zavatra iainako satria …”

• Fahafahana ho an’ny mpianatra mba hisaintsaina ny fomba ahafahana mitaona azy ireo haneho fihetsika feno fahatokiana amin’izao fotoana izao amin’ny alalan’ny fanehoan’ireo olona ao amin’ny soratra masina fihetsika feno fahatokiana.

Ny fanaovana izany dia hanampy ny mpianatra hianatra ny fomba ianarana avy amin’ny soratra masina sy hamela ny Fanahy Masina hanampy azy ireo hahita zavatra azony ampifandraisina amin’ny zavatra iainany.

Ireo lamina hakan-tahaka sy fanazaran-tena etsy ambany dia ohatra ankapobeny. Hahomby kokoa ny fanofanana raha toa ka mifandray amin’ireo lesona manaraka izay horesadresahina ao amin’ny fandaharam-pampianarana ny lamina hakan-tahaka sy ny fanazaran-tena.

Lamina hakan-tahaka

Rehefa manomana ny lesony ho an’ny Asan’ny Apostoly 4–5 Rahavavy Williams dia ampidiriny ao amin’ny drafiny izao manaraka izao:

• Anontanio ny mpianatra hoe: “Inona no zavatra ilanao fanampiana eo amin’ny fiainanao amin’izao fotoana izao?”

• Asao ny mpianatra hamaky sy hamaly: “Rehefa mamaky ny Asan’ny Apostoly 4:1–13 ianareo dia mba miomàna hamita ity fanehoan-kevitra manaraka ity: -Tahaka ny an’i Petera sy i Jaona ny fiainako satria …-”

• Anontanio ny mpianatra hoe: “Inona no zavatra ianaranao avy amin’ny fihetsika nasetrin’i Petera sy i Jaona izay afaka manampy anao?”

Tsindrio eto raha hijery horonan-tsary maneho io lamina hakan-tahaka io.

Manazatra tena

• Manomàna fanasana sy fanehoan-kevitra izay manampy ny mpianatra hahita zavatra azony ampifandraisina amin’ny toe-javatra iainany manokana ao amin’ny lesona iray vao hatao amin’ity herinandro ity. Zarao amina namana iray, na olona ao amin’ny fianakaviana, na mpiara-miasa iray ny fanasana sy ny fanehoan-kevitra nataonao, dia angataho ny hevitr’izy ireo momba izany.

Mifanakalo hevitra na misaintsaina

• Ahoana no hanampian’ny famoronana ireo karazana fanasana sy fanehoan-kevitra ireo ny mpianatra hahita zavatra azony ampifandraisina amin’ny zavatra iainany?

• Ahoana no hanatsaran’ireo karazana fanasana sy fanehoan-kevitra ireo ny traikefa amin’ny fianarana?

• Inona avy ireo fomba hafa azonao anampiana ny mpianatra hahita zavatra azony ampifandraisina amin’ny tenany ao amin’ny soratra masina?

Mampiditra fahalalana

• Mamoròna drafitra mba hanaovana fanazaran-tena mamorona fanasana sy fanehoan-kevitra izay hanampy ny mpianatra hahita zavatra azony ampifandraisina amin’ny tenany ao amin’ny fotopampianarana sy fitsipiky ny filazantsara izay ampianarinao.

Te hianatra misimisy kokoa ve ianao?

• Chad H Webb, “Tsy hoe efa tonga amin’izao dingana lavitra izao isika vao hijanona (Fampitana ny fivoriam-piofanana fanao isan-taona ho an’ny Seminera sy Institiota Fianarana ny Filazantsara, 9 jona 2020), broadcasts.ChurchofJesusChrist.org

• “Fifanakalozan-kevitra” (Fampitana ny fivoriam-piofanana fanao isan-taona ho an’ny Seminera sy Institiota Fianarana ny Filazantsara, 9 jona 2020), broadcasts.ChurchofJesusChrist.org

• “Mametraha fanontaniana nentanim-panahy,” Mampianatra araka ny fomban’ny Mpamonjy (2016), 31–32

Fahaiza-manao

Manomboha sahanasa fianarana amin’ny alalan’ny fanasana ny mpianatra hisaintsaina toe-javatra iainana iray manokana.

Mamaritra

Nijoro ho vavolombelona ny Filoha J. Reuben Clark Jr. tao amin’ny The Charted Course of the Church in Education fa nanana traikefa ara-panahy ireo mpianatsika rehefa nilaza izy hoe: “Averiko lazaina indray fa vitsy dia vitsy ny zatovo izay miditra ny varavaran’ny kilasin’ny seminera na ny institiota ampianarinao no mety tsy hahatsapa ho tsy nisitraka fitahiana ara-panahy” (9). Alohan’ny hanasana ny mpianatra hamaky andinin-tsoratra masina iray dia angataho izy ireo hisaintsaina raha toa ka efa nanana traikefa tamin’ny fahamarinana izay handeha ianaran’izy ireo. Azon’ny mpampianatra atao ny manasa ireo mpianatra hizara hevitra, saingy tsy ilaina ny hizaran’ny mpianatra ny zavatra eritreretiny momba izany. Izany dia manome fahafahana ny Fanahy Masina mba hanolotra zavatra mahakasika ny tena manokana any am-piandohan’ny sahanasa fianarana.

Ireo lamina hakan-tahaka sy fanazaran-tena etsy ambany dia ohatra ankapobeny. Hahomby kokoa ny fanofanana raha toa ka mifandray amin’ireo lesona manaraka izay horesadresahina ao amin’ny fandaharam-pampianarana ny lamina hakan-tahaka sy ny fanazaran-tena.

Lamina hakan-tahaka

Ireto manaraka ireto dia fanontaniana azonao atomboka amin’ny lesona iray izay mifantoka amin’ny vavaka:

• Inona avy ireo zavatra niainana izay nampianatra anao ny lanjan’ny vavaka?

• Raha miainga avy amin’ny zavatra niainanao momba ny vavaka dia inona no tianao ho takatry ny mpianatra hafa ao an-dakilasy?

Manomboka ny fotoam-pianarana rahavavy Tanaka amin’ny filazana hoe: “Anio isika dia hiresaka momba ny Almà 36 sy ny fibebahan’i Almà. Alohan’ny hanombohantsika dia saintsaino ity fanontaniana ity: -Inona no zavatra lasa fantatrao momba ny fibebahana?-”

Tsindrio eto raha hijery horonan-tsary maneho io lamina hakan-tahaka io.

Manazatra tena

Inona no fanontaniana azonao apetraka mba hanampiana ny mpianatra hisaintsaina zavatra niainana manokana raha toa ianao ka mampianatra:

• Lesona momba ny fianarana.

• Malakia 3.

Ho an’ny lesona manaraka dia manorata fanontaniana iray azonao apetraka amin’ny mpianatrao izay hamela azy ireo hisaintsaina ny toe-javatra iainan’ny tena manokana izay mifamatotra amin’ny fitsipika na fahamarinana ara-potopampianarana iray ao amin’ilay andian-tsoratra masina izay hampianarinao.

Mifanakalo hevitra na misaintsaina

• Rehefa avy manao fanazaran-tena dia inona no maha-manan-danja ny fanasana ny mpianatra hisaintsaina ny toe-javatra iainan’ny tena manokana izay mifandray amin’ilay andian-tsoratra masina mba hanombohana ny fotoam-pianarana iray?

• Inona avy ireo fitsipika hafa azo dinihina rehefa manomboka ny fotoam-pianarana ianao amin’ny alalan’ny fanasana ny mpianatrao hisaintsaina toe-javatra iainana?

Mampiditra fahalalana

• Mandritra ireo herinandro manaraka dia hevero ny hametraka fanontaniana mba hanombohana ny fotoam-pianarana izay mamela ireo mpianatra hisaintsaina ireo zavatra niainana izay mifamatotra amin’ny fahamarinana na fitsipika iray ara-potopampianarana izay hita ao amin’ny andian-tsoratra masina hampianarinao.

Te hianatra misimisy kokoa ve ianao?

• J. Reuben Clark Jr., The Charted Course of the Church in Education, rev. ed. (1994; lahateny natao tamin’ireo mpampianatra ny filazantsara ao amin’ny Departemantan’ny Fampianarana an’ny Fiangonana, 8 Aog. 1993), Médiathèque de l’évangile