“Leksyon 11 Materyal sa Pagpangandam sa Klase: Padayon sa Paglahutay sa Unahan diha sa Dalan sa Pakigsaad,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 11 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 11 Materyal sa Pagpangandam sa Klase
Padayon sa Paglahutay sa Unahan diha sa Dalan sa Pakigsaad
Si Presidente Russell M. Nelson nagtudlo, “Ngadto sa matag miyembro sa Simbahan moingon ko, pabilin diha sa dalan sa pakigsaad. Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, babaye, ug mga bata bisan asa”(“Samtang Dungan Kita nga Magpadayon sa Unahan,” Liahona, Abr. 2018, 7). Samtang ikaw magpadayon sa imong pagtuon sa doktrina ni Kristo, hunahunaa kon unsaon ang paghimo ug pagsunod sa imong pakigsaad sa bunyag, pagdawat sa gasa sa Espiritu Santo, ug paglahutay hangtud sa katapusan pagtabang kanimo nga mahimong mas mahisama sa imong Amahan sa Langit.
Seksyon 1
Unsaon sa akong pakigsaad sa bunyag pagpanalangin kanako ug sa tanan niadtong akong nakauban?
Ang Ginoo mipadala ni propeta Abinadi ngadto ni Hari Noah ug sa iyang mga katawhan aron sa pagpasidaan kanila nga kon sila dili maghinulsol, sila ibutang sa pagkabihag. Midumili si Hari Noah sa mensahe ni Abinadi ug gipapatay siya. Si Alma, usa sa mga pari ni Noah, mi rekord, ug unya sa tago mitudlo sa mga pulong ni Abinadi taliwala sa mga katawhan. Samtang ang kang Alma nga pundok sa mga tumutuo midaghan, sila mipundok didto sa mga Katubigan sa Mormon ug misulod ngadto sa pakigsaad sa bunyag.
Pagtuon agi og Pagpangandam alang sa Klase
Basaha ang Mosiah 18:8–10, mangita alang sa unsay atong gisaad nga buhaton ug mahimo sa panahon nga kita bunyagan. Tan-awa usab kon unsay gitudlo ni Alma nga buhaton sa Ginoo isip kabahin niini nga pakigsaad.
Nagkomentaryo kabahin sa atong saad sa pagbangutan ug paghupay sa uban, si Elder Dale G. Renlund sa Korum sa Napulog Duha ka mga Apostoles mipasabut:
Diha sa Simbahan, aron epektibong makaserbisyo sa uban, kinahanglan ato silang makita pinaagi sa panan-aw sa usa ka ginikanan, pinaagi sa panan-aw sa Langitnong Amahan. Niana lamang nga masugdan nato pagsabut ang tinuod nga bili sa usa ka kalag. Niana lamang nga mabati nato ang gugma sa Langitnong Amahan alang sa tanan Niyang mga anak. Niana lamang nga mabati nato ang kahingawa sa Manluluwas alang kanila. Dili nato hingpit nga matuman ang atong obligasyon sa pakigsaad nga magbangutan uban niadtong nagbangutan ug sa paghupay niadtong nagkinahanglan og kahupayan gawas kon ato silang makita pinaagi sa panan-aw sa Dios. [Tan-awa sa Mosiah 18:8–10.] Kining gipalapdan nga panglantaw maghimo nato nga sensitibo sa mga kasagmuyo, kahadlok, ug kasub-anan sa uban. (“Pinaagi sa Panan-aw sa Dios,” Liahona, Nob. 2015, 94)
Pamalandong agi og Pagpangandam alang sa Klase
Paghunahuna og mga ehemplo nga imong nakita sa mga tawo nga nagtamud sa ilang pakigsaad sa bunyag. Unsa nga mga ehemplo ang imong mahunahuna diha sa kinabuhi sa Manluluwas diin Siya mipakita kon unsaon sa pagtamud sa pakigsaad sa bunyag? Pangandam sa pagpakigbahin sa imong mga ehemplo diha sa klase.
Seksyon 2
Unsaon sa gasa sa Espiritu Santo pag-usab sa akong kinabuhi?
Sa iyang mga panulat mahitungod sa doktrina ni Kristo, gitudlo ni Nephi nga kadtong kinsa nagsunod sa ehemplo ni Jesukristo ug nabunyagan pagahatagan sa Espiritu Santo gikan sa Langitnong Amahan (tan-awa sa 2 Nephi 31:12).
Pagtuon agi og Pagpangandam alang sa Klase
Basaha ang 2 Nephi 31:13, 17, mangita sa giunsa sa gasa sa Espiritu Santo pagbalaan sa imong kinabuhi.
Si Presidente Boyd K. Packer sa Korum sa Napulog Duha ka mga Apostoles miingon mahitungod niining pagpamulong uban sa pinulongan sa mga anghel:
Mipasabut si Nephi nga ang mga anghel mamulong pinaagi sa gahum sa Espiritu Santo, ug kamo makasulti sa pinulongan sa mga anghel, nga yanong nagpasabut nga kamo makasulti sa gahum sa Espiritu Santo. Hilom kini. … Pero ang gahum anaa. (“Ang Gasa sa Espiritu Santo: Unsa ang Angay nga Mahibaloan sa Matag Miyembro,” Liahona, Ago. 2006, 21)
Ug si Elder David A. Bednar sa Korum sa Napulog Duha ka mga Apostoles mipasabut sa bunyag sa kalayo.
Himoa ang usa o duha sa mosunod nga mga kalihokan:
-
Basaha ang mosunod nga pamahayag:
Ang Espiritu Santo usa ka tigbalaan nga molimpyo ug mosunog sa taya ug kadautan pagawas sa mga kalag sa tawo ingon og sama sa kalayo. [Tan-awa sa 3 Nephi 27:19–21]. …
Isip mga miyembro sa gipahiuli nga Simbahan sa Ginoo, nabulahan kita sa atong pagkalimpyo sa sala kalabut sa bunyag ug sa potensyal sa padayon nga paglimpyo gikan sa sala nga gihimong posible pinaagi sa pakig-uban ug gahum sa Espiritu Santo. …
… Samtang tinuoray kitang mangandam ug moapil diha [sa sakramento] uban sa usa ka mapainubsanong kasingkasing ug usa ka mahinulsulong espiritu, nan ang saad nga kita kanunay nga makabaton sa Espiritu sa Ginoo nga mag-uban kanato. Ug pinaagi sa makapabalaan nga gahum sa Espiritu Santo isip atong kanunay nga kauban, kita makahimo sa kanunay nga makabaton og kapasayloan sa atong mga sala. (“Kanunay nga Magbaton og Kapasayloan sa Inyong mga Sala,” Liahona, Mayo 2016, 59, 61–62)
Pamalandong agi og Pagpangandam alang sa Klase
Unsaon nimo pagpasabut ang kahulugan sa bunyag sa kalayo ug pagpamulong sa pinulongan sa mga anghel ngadto sa usa ka tawo nga nangandam alang sa bunyag? Sa unsa nga paagi ikaw nakasinati sa mga panalangin pinaagi sa Espiritu Santo?
Seksyon 3
Unsaon ko pagkakaplag og mas dako nga paglaum ug hingpit nga kalipay samtang naninguha ako sa paglahutay ngadto sa katapusan?
Uban sa hugot nga pagtuo, paghinulsol, bunyag, ug pagdawat sa gasa sa Espiritu Santo, gitudlo ni Nephi nga ang paglahutay ngadto sa katapusan usa ka importanting baruganan diha sa doktrina ni Kristo.
Pagtuon agi og Pagpangandam alang sa Klase
Basaha ang 2 Nephi 31:15–16, 19–21, mangita alang sa unsay kahulugan sa paglahutay ngadto sa katapusan.
Tan-awa o basaha ang mosunod nga mensahe gikan ni Elder Diether F. Uchtdorf sa Korum sa Napulog Duha ka mga Apostoles, ug hunahunaa kon unsaon nimo sa paglahutay ngadto sa katapusan uban ang mas dakong hingpit nga kalipay.
Basaha ang mosunod nga mensahe gikan ni Elder Dieter F. Uchtdorf sa Korum sa Napulog Duha ka mga Apostoles, ug hunahunaa kon unsaon nimo sa paglahutay ngadto sa katapusan uban ang mas dako nga hingpit nga kalipay.
Ang paglahutay sa katapusan, o ang pagpabilin nga matinud-anon sa mga balaod ug sa mga ordinansa sa ebanghelyo ni Jesukristo sa tibuok natong kinabuhi, maoy usa sa unang gikinahanglan alang sa kaluwasan diha sa gingharian sa Dios. Kini nga pagtuo nagpaila sa mga Santos sa Ulahing mga Adlaw gikan sa daghan nga lain nga Kristohanong mga tinuohan nga nagtudlo nga ang kaluwasan gihatag sa tanan kinsa motuo lamang ug mosulti nga si Jesus mao ang Kristo. Ang Ginoo klarong mipahayag, “Kon ikaw maghupot sa akong mga sugo ug molahutay ngadto sa katapusan ikaw makaangkon og kinabuhi nga dayon, diin nga gasa mao ang labing mahinungdanon sa tanan nga mga gasa sa Dios” (D&P 14:7).
Busa, ang paglahutay hangtud sa katapusan dili kay usa lamang ka matang sa pag-uyon sa malisud nga mga kahimtang sa kinabuhi o “magpabilin lamang diha.” Ang ato usa ka aktibo nga relihiyon, motabang sa mga anak sa Dios subay sa pig-ot ug higpit nga dalan aron pagpalambo sa ilang hingpit nga potensyal niini nga kinabuhi ug mobalik ngadto Kaniya sa umaabut.
Makita gikan niini nga panglantaw, ang paglahutay sa katapusan mabayawon ug mahimayaon, dili subo ug ngitngit. Kini usa ka malipayon nga relihiyon, usa sa paglaum, kalig-on, ug kalingkawasan. (“Wala ba Kita’s Rason nga Maglipay?” Liahona, Nob. 2007, 20)
Irekord ang Imong mga Hunahuna
Pag-ila og ehemplo sa unsay kahulugan sa paglahutay ngadto sa katapusan gikan sa kinabuhi sa Manluluwas, gikan sa usa ka tawo diha sa Basahon ni Mormon o gikan sa usa ka tawo nga imong kaila. I-rekord kon giunsa niini nga ehemplo pag-impluwensya sa imong pagsabut sa unsay kahulugan niini nga paglahutay ngadto sa katapusan.