“Leksyon 24 Materyal sa Pagpangandam sa Klase: Ang Gahom sa Ginoo sa Pagluwas,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 24 Materyal sa Pagpangandam sa Klase,” Materyal sa Magtutudlo alang sa Mga Pagtulun-an ug Doktrina sa Basahon ni Mormon
Leksyon 24 Materyal sa Pagpangandam sa Klase
Ang Gahom sa Ginoo sa Pagluwas
Kon mag-atubang og pagsulay, nakapangutana ka na ba sa imong kaugalingon, “Nganong nahitabo man kini kanako?” o “Nganong dili man kuhaon sa Ginoo kini nga pagsulay gikan kanako?” Gikan sa Basahon ni Mormon makakat-on kita og importante nga mga leksyon mahitungod sa mga tinubdan sa atong mga pagsulay ug sa unsang paagi nga kita mapanalanginan samtang modangop kita sa Manluluwas alang sa tabang. Samtang magtuon ka agi og pagpangandam alang sa klase, ikonsiderar kon unsaon nimo nga mapalawoman ang imong pagsalig sa walay kinutuban nga gugma, gahom, ug kaalam ni Jesukristo samtang mosuporta Siya kanimo o moluwas kanimo gikan sa mga pagsulay nga imong giatubang.
Seksyon 1
Nganong ako adunay mga pagsulay, bisan og nagbuhat ko sa unsay husto?
Ang Basahon ni Mormon naghulagway nga ang mga pagsulay adunay lain-laing mga tinubdan. Ang ubang mga pagsulay resulta sa sala. Sama pananglit, nag-antos si Zeezrom og taas kaayo nga hilanat ug sakit nga resulta sa iyang pagbati nga sad-an alang sa iyang kaugalingong mga sala (tan-awa sa Alma 15:3). Ang mga Nephite ug mga Lamanite miagwanta og katuigan sa pakiggubat tungod sa daotan nga mga pagpili ni Amalickiah (tan-awa sa Alma 46:9–10). Apan, dili ang tanang mga pagsulay resulta sa pagkadaotan. Ang mga pamilya ni Lehi ug Ishmael nag-antos og daghang kalisdanan nga natural lamang nga bahin sa pagpanaw latas sa kamingawan (tan-awa sa 1 Nephi 16:9–17:4).
Si Elder Robert D. Hales sa Korum sa Napulog Duha ka mga Apostoles nakaobserbar sa mosunod mahitungod sa mga pagsulay:
Sa kinabuhi sa mortalidad, ang magtutudlo sa kasagaran mao ang kasakit ug kalisdanan, apan ang leksyon gituyo aron sa paghashas ug sa pagpanalangin kanato ug sa paglig-on kanato, dili sa paglaglag kanato. (“Hugot nga Pagtuo sa panahon sa Kalisdanan Magdala og Kalinaw ug Hingpit nga Kalipay,” Liahona, Mayo 2003, 17).
Ang pamahayag ni Elder Hales gihulagway diha sa kasinatian ni Alma ug sa iyang katawhan. Mituo sila sa mga pasidaan ni propeta Abinadi. Human nakabig ngadto sa Ginoo ug nabunyagan ni Alma, giabog ang katawhan didto sa kamingawan pinaagi sa kasundalohan sa daotan nga si Hari Noah. Human sa walo ka adlaw nga panaw, naabot sila sa bag-o nga yuta nga gitawag nila og Helam. Dinhi gisunod nila ang ebanghelyo ug “midaghan ug miuswag sa hilabihan” (Mosiah 23:20). Apan, ang ilang kalinaw sa kataposan nabalda sa Lamanite nga kasundalohan nga nakakaplag kanila ug miulipon kanila. (Tan-awa sa Mosiah 17–18; 23.)
Pagtuon agi og Pagpangandam alang sa Klase
Basaha ang Mosiah 23:21–24, nga mangita og mga rason nga ang Ginoo motugot bisan sa mga matarong nga makasinati og mga pagsulay.
Pamalandong agi og Pagpangandam alang sa Klase
Sa unsa nga mga paagi nga ang pagtinguha sa pagsabot sa mahangturong panglantaw sa Ginoo bahin sa mga pagsulay makatabang kanato sa paghunahuna og usab kon unsaon nato pagtan-aw ang atong kaugalingong mga pagsulay?
Seksyon 2
Nganong importante alang kanako nga mosalig sa panahon sa Ginoo atol sa akong mga pagsulay?
Human si Alma ug iyang katawhan namati sa tawag ni Abinadi nga maghinulsol ug milayas ngadto sa kamingawan, si Hari Noah ug ang nahibilin sa iyang katawhan misalikway sa propeta ug wala maghinulsol. Tungod sa ilang mga sala, nabuntog sila sa mga Lamanite ug naulipon. Atol sa pagmando ni Hari Limhi, anak nga lalaki ni Noah, gibuhisan og maayo sa mga Lamanite ang katawhan ug gidaogdaog sila og maayo. Ang katawhan ni Limhi napakyas og tulo ka higayon sa pagsulay og luwas sa ilang kaugalingon gikan sa pagkaulipon, ug daghang tawo ang nangamatay niini nga mga paningkamot. (Tan-awa sa Mosiah 12:2; 19:1–21:12.) Sa kataposan, midangop sila sa Ginoo alang sa tabang.
Pagtuon agi og Pagpangandam alang sa Klase
Basaha ang Mosiah 21:13–16, nga mangita kon sa unsang paagi nga ang Ginoo mipanalangin sa katawhan ni Limhi samtang nagtinguha sila sa Iyang tabang.
Samtang ang katawhan ni Limhi tinuoray nga nagpaubos sa ilang kaugalingon ug naghulat sa Ginoo, usa ka pundok sa mga tigpangita nga gipadala ni Hari Mosiah ang nakakaplag sa katawhan ni Limhi. Ang pundok sa mga tigpangita ug si Hari Limhi mikonsulta sa katawhan kon unsaon sa pag-eskapo sa pagkaulipon. Sa gitakda nga gabii ilang gihatagan og dugang nga bino ang mga Lamanite, kinsa nangahubog ug nakatulog. Mieskapo dayon ang katawhan ni Limhi ngadto sa kamingawan ug luwas nga miabot sa Zarahemla. (Tan-awa sa Mosiah 21:23–22:14.)
Segun sa gihulagway niini nga asoy, ang Ginoo adunay Iyang kaugalingon nga mga katuyoan ug panahon sa pagluwas sa katawhan ni Limhi.
Si Presidente Dallin H. Oaks sa Unang Kapangulohan mitudlo:
Ang unang baroganan sa ebanghelyo mao ang hugot nga pagtuo kang Ginoong Jesukristo. Ang hugot nga pagtuo nagpasabot sa pagsalig—pagsalig sa kabubut-on sa Dios, pagsalig sa Iyang paagi sa pagbuhat sa mga butang, ug pagsalig sa Iyang panahon. Dili nato kinahanglang ipamugos ang atong panahon diha sa Iyaha. Sama sa giingon ni Elder Neal A. Maxwell sa Korum sa Napulog Duha ka mga Apostoles:
“Ang isyu para nato mao ang igo nga pagsalig sa Dios aron mosalig usab sa Iyang panahon [timing]. Kon tinud-anay kitang makatuo nga naghunahuna Siya sa atong kaayohan, dili ba angay natong tugutan ang Iyang mga plano nga mahitabo base sa unsay Iyang gihunahuna nga labing maayo?” [Even As I Am (1982), 93.] (“Timing,” Ensign, Okt. 2003, 12)
Irekord ang Imong mga Hunahuna
Gamit ang unsay imong nakat-onan gikan sa kasinatian sa katawhan ni Limhi, irekord ang mga baroganan kon giunsa sa Ginoo pagsuporta o pagluwas niadtong kinsa modangop ngadto Kaniya sa ilang mga pagsulay. Pag-andam sa pagpaambit niini nga mga baroganan diha sa klase.
Seksyon 3
Sa unsang paagi nga ako makadawat og kalig-on gikan sa Ginoo samtang molahutay ko sa akong mga pagsulay?
Usa ka hut-ong sa mga sundalo nga Lamanite migukod sa katawhan ni Limhi apan nangasaag. Sa kataposan nakaplagan nila ang daotan nga mga pari ni Noah, kinsa miapil sa Lamanite nga kasundalohan. Samtang nagbiyahe sa kamingawan, nadiskobrehan nila ang matarong nga katawhan ni Alma ug miulipon kanila. Si Amulon, kinsa usa sa daotan nga mga pari ni Noah, gitudlo sa Lamanite nga hari sa pagmando sa katawhan ni Alma. Si Amulon mitudlo og mga amo sa katawhan ug mihulga sa pagpatay ni bisan kinsa nga masakpan nga mag-ampo. (Tan-awa sa Mosiah 22:15–16; 23:25–24:1; 24:8–11.)
Pagtuon agi og Pagpangandam alang sa Klase
Basaha ang Mosiah 24:10–16, nga mangita kon sa unsang paagi nga ang Ginoo mitabang sa katawhan ni Alma atol sa ilang kalisdanan. Mahimo kang mamalandong og kadiyot kon sa unsang paagi nga Siya mihupay ug midasig kanimo taliwala sa imong mga pagsulay ug mga kasakit.
Ang katawhan ni Alma mipakita og hugot nga pagtuo ug pailob, ug sa kataposan ang Ginoo miluwas kanila. Siya “mihimo nga usa ka lawom nga pagkatulog moabut diha sa mga Lamanite” (Mosiah 24:19), nga nagtugot ni Alma ug sa iyang katawhan sa pag-eskapo paingon ngadto sa yuta sa Zarahemla. (Tan-awa sa Mosiah 24:17–25.)
Si Elder David A. Bednar sa Korum sa Napulog Duha ka mga Apostoles mitudlo niini nga kasinatian:
Ang mga hagit ug mga kalisud wala dihadiha dayon gikuha gikan sa mga katawhan. Apan si Alma ug ang iyang mga sumusunod nalig-on, ug ang ilang nadugangan nga kapasidad mihimo sa mga alantuson nga mas magaan. …
Ang talagsaon nga mga luwan sa atong matag kinabuhi nagtabang kanato sa pagsalig diha sa mga maayong buhat, kalooy, ug grasya sa Balaang Mesiyas (tan-awa sa 2 Nephi 2:8). Ako nagpamatuod ug nagsaad nga ang Manluluwas motabang kanato sa pagpas-an sa atong mga luwan uban sa kasayon (tan-awa sa Mosiah 24:15). Ingon nga kita giyugo ngadto Kaniya pinaagi sa sagrado nga mga pakigsaad ug nagdawat sa [Iyang] makaabag nga gahum … sa atong mga kinabuhi, kita kanunay nga maningkamot sa pagsabut ug magpuyo sumala sa Iyang kabubut-on. Kita usab mag-ampo alang sa kalig-on nga makakat-on gikan sa, maka-usab, o modawat sa atong mga kahimtang kay sa mag-ampo sa walay puas nga usbon sa Dios ang atong mga kahimtang sumala sa atong kabubut-on. (“Makadaug sa Ilang mga Alantuson uban sa Kasayon,” Liahona, Mayo 2014, 89, 90)
Irekord ang Imong mga Hunahuna
Pamalandongi ang lain-laing paagi diin ang Langitnong Amahan ug si Jesukristo midugang sa imong kapasidad sa pagpas-an sa imong mga alantuson. Ikonsiderar ang pagpahayag sa imong pagpasalamat alang sa tabang Nila pinaagi sa pag-ampo.