Leksyon 15 Materyal sa Pagpangandam sa Klase

Pagpangandam alang sa Pag-anhi ni Jesukristo

Kini nga yunit magatutok sa pagpakita ug pagpangalagad ni Jesukristo taliwala sa mga “katawhan ni Nephi” (3 Nephi 11:1). Kini nga pundok naglangkob sa matarong nga mga Nephite ug mga Lamanite kinsa nakabig ngadto sa Ginoo (tan-awa sa 3 Nephi 10:18–19). Samtang kamo mamalandong sa ilang kasinatian uban sa Manluluwas, tinguhaa nga mapalawman ang inyong kaugalingong pagpamatuod kabahin sa Iyang kinaiya, mga hiyas, ug balaan nga misyon.

Usa ka gilauman kaayo nga aspeto sa balaan nga misyon sa Ginoo mao ang Iyang Ikaduhang Pag-anhi. Si Presidente Ezra Taft Benson mitudlo nga “sa Basahon ni Mormon kita makakita og sumbanan sa pagpangandam alang sa Ikaduha nga Pag-anhi” (Mga Pagtulun-an sa mga Presidente sa Simbahan: Ezra Taft Benson [2014], 168). Niini nga leksyon kamo makabaton og oportunidad sa pagkonsiderar kon sa unsang paagi nga ang pagtuon sa mga propesiya ug mga panghitabo nga nag-una sa pagpakita sa Manluluwas taliwala niining mga katawhan makatabang kaninyo sa pagpangandam sa Iyang Ikaduhang Pag-anhi.

Seksyon 1

Unsa ako ka andam sa Ikaduhang Pag-anhi ni Jesukristo?

Sa mga henerasyon ang mga propeta sa Basahon ni Mormon nanagna sa pag-anhi ni Jesukristo sa yuta. Unom ka tuig sa wala pa matawo si Kristo duol sa Jerusalem, si Samuel ang Lamanite gipadala sa Ginoo aron sa pag-andam sa dautan nga mga Nephite alang sa pag-abot ni Kristo. Si Samuel nanagna kabahin sa daghang timailhan ug mga katingalahan nga modungan sa pagkatawo ug pagkamatay ni Jesukristo. (Tan-awa sa Helaman 13–15.)

Pagtuon agi og Pagpangandam alang sa Klase

Basaha ang Helaman 14:6–13, ug ikonsiderar kon sa unsang paagi nga ang mensahe gituyo aron sa pag-andam sa mga Nephite alang sa pag-anhi sa Ginoo.

Si Elder Robert D. Hales sa Korum sa Napulog Duha ka mga Apostoles mitudlo nga ang mga propeta makatabang kanato sa pag-andam alang sa pag-anhi sa Ginoo:

Sa wala pa kadtong sagradong gabii didto sa Bethlehem, ang mga panghitabo sa kasaysayan ug ang mga pulong sa mga propeta sa tanang dispensasyon miandam sa dalan alang sa unang pag-anhi sa Ginoo ug sa Iyang Pag-ula. … Aduna ba kitay mga mata nga makakita nga ang mga panghitabo ug mga panagna sa atong panahon nag-andam kanato alang sa Ikaduhang Pag-anhi sa Manluluwas? (“Mga Pagpangandam alang sa Pagpahiuli ug sa Ikaduhang Pag-anhi: ‘Ang Akong Kamot Anaa Ibabaw Kanimo,’” Liahona, Nob. 2005, 91–92)

Pagtuon agi og Pagpangandam alang sa Klase

Paggahin og pipila ka minuto sa pagtuon sa “Timailhan sa mga Panahon, Mga” nga tampo diha sa Giya ngadto sa mga Kasulatan (tan-awa sa scriptures.ChurchofJesusChrist.org), nga mangita kon unsa ang gipadayag sa mga propeta diha sa mga kasulatan isip mga timailhan sa Ikaduhang Pag-anhi sa Ginoo. Inyong mabantayan nga ang pipila niining mga panagna maoy makapabalaka o makapahadlok sa mga tawo. Hinoon, kining propetikanhong mga timailhan nakapakita usab sa gugma sa Dios alang sa Iyang mga anak.

Pamalandong agi og Pagpangandam alang sa Klase

Unsa nga propetikanhong pagtulun-an o timailhan sa Ikaduhang Pag-anhi ang makapadasig kaninyo aron mas makaandam alang sa pagbalik sa Ginoo? Unsa nga mga kausaban ang inyong gikinahanglang himoon aron mobati nga mas andam na alang sa pagbalik sa Manluluwas?

Seksyon 2

Unsay akong mahimo aron magpabilin nga matinud-anon kon akong madungog ang mga mensahe nga makamugna og mga pagduha-duha bahin sa pagkabalaan ni Jesukristo ug sa katinuod sa Iyang Ikaduhang Pag-anhi?

Ang uban sa mga Nephite mituo sa mga pulong ni Samuel. Ang uban misalikway sa mensahe ni Samuel ug misulay sa pagpatay kaniya gamit ang mga bato ug mga pana. Tungod kay sila dili makaigo kaniya, mas midaghan pa ang mituo sa iyang mensahe ug miadto ni Nephi aron magpabunyag. Sa wala madugay, sa dihang ang mga timailhan ug mga katingalahan nga modungan sa pagkatawo ni Kristo misugod sa pagkatuman, ang mga tumutuo nakasinati og kalipay ug ang mga dili tumutuo nagpatig-a sa ilang mga kasingkasing. (Tan-awa sa Helaman 16:1–15.)

Pagtuon agi og Pagpangandam alang sa Klase

Basaha ang Helaman 16:13–23 ug ikonsiderar ang pagmarka sa mga pulong nga maghulagway kon sa unsang paagi nga ang mga dili tumutuo nakamugna og pagduha-duha kabahin sa mga timailhan sa pagkatawo ni Kristo.

Sa pagtubag sa mga tingog sa pagduha-duha, si Presidente Bonnie L. Oscarson, kanhi Kinatibuk-ang Presidente sa Young Women, miingon:

Gikinahanglan lamang nato ang kanunayng pagbusog [sa bunga sa kahoy sa kinabuhi] ug dili maminaw niadtong mamugal-bugal sa atong gituohan o niadtong malipay nga ang uban magduha-duha o niadtong mangita og sayop sa mga lider ug doktrina sa Simbahan. Usa kini ka pagpili nga atong himoon sa matag adlaw—mopili sa pagtuo batok sa pagduha-duha. (“Mituo ba Ako?” Liahona, Mayo 2016, 89)

Pamalandong agi og Pagpangandam alang sa Klase

Unsa nga mga mensahe ang inyong nadungog nga gituyo aron sa pagmugna og pagduha-duha mahitungod ni Jesukristo, sa Iyang pinili nga mga lider, o sa Iyang gipahiuli nga Ebanghelyo?

Pagtuon agi og Pagpangandam alang sa Klase

Samtang maghunahuna kamo mahitungod sa mga mensahe sa pagduha-duha nga inyong nasugatan, basaha ang 3 Nephi 1:4–15, 22 ug pangitaa kon giunsa sa uban nga mga tumutuo nga mipabilin nga makanunayon bisan og ang mga dili tumutuo mibiaybiay sa ilang pagtuo.

Si Elder D. Todd Christofferson sa Korum sa Napulog Duha ka mga Apostoles mitudlo sa mosunod mahitungod sa pagpabilin nga makanunayon diha sa atong hugot nga pagtuo ni Kristo:

Sa pagpatunhay sa kalig-on ug sa pagkamakanunayon sa pagtuo kang Kristo magkinahanglan nga ang ebanghelyo ni Jesukristo modulot sa kasingkasing ug kalag sa usa ka tawo, nagpasabot nga ang ebanghelyo mahimong dili lamang usa sa daghang mga impluwensya sa kinabuhi sa tawo apan ang makahuluganong pagtutok sa iyang kinabuhi ug kinaiya. …

Hinumdumi kanunay ang saad sa maayong mga butang nga moabot, karon ug sa human dinhi, alang niadtong kinsa lig-on ug makanunayon sa hugot nga pagtuo kang Kristo. (“Lig-on ug Makanunayon diha sa Hugot nga Pagtuo kang Kristo,” Liahona, Nob. 2018, 31, 33)

Pamalandong agi og Pagpangandam alang sa Klase

Unsay inyong mahimo aron magpabilin nga makanunayon diha sa inyong hugot nga pagtuo kang Jesukristo samtang kamo mangandam alang sa Iyang pagbalik?

Gusto pa og Dugang? (Opsyonal)

Unsa ang gitudlo ni Jesukristo sa mga Nephite ug mga Lamanite mahitungod sa Iyang Ikaduhang Pag-anhi?

Sa 3 Nephi 24–25 inyong mabasa ang mga pulong ni propeta Malaquias sa Daang Tugon, diin ang Ginoo nagsugo nga ilakip diha sa Basahon ni Mormon.

Unsa man ang akong mahimo aron madugangan ang akong gahom sa pagbuntog sa pagduha-duha?

Diha sa Artikulo nga “Pagbuntog sa Kapeligro sa Pagduha-duha” (Liahona, Septyembre 2017, 44–47), si Elder Hugo Montoya sa Seventy mihatag og tambag kon unsaon sa paglikay sa pagduha-duha tungod sa paghuyang sa atong pagtuo kang Jesukristo ug sa Iyang ebanghelyo.

Makadugang kita sa atong gahom aron mabuntog ang pagduha-duha pinaagi sa paglantaw sa unahan uban sa hugot nga pagtuo sa Iyang Ikaduhang Pag-anhi. Paminawa ang Tabernacle Choir at Temple Square nga mokanta og “When He Comes Again [Kon Siya Moanhi Pag-usab]” (4:12) gikan sa kinatibuk-ang komperensya sa Oktubre 2013, ug hunahunaa kon unsa kaha kon ang Manlulwas sa kalibotan moanhi na pag-usab.

Asa ako makakat-on og dugang mahitungod sa unsay gisulti sa bag-ong mga propeta mahitungod sa pagpangandam alang sa Ikaduhang Pag-anhi?

Si Elder Christofferson naghatag og tukmang tambag aron sa pagtabang kanato nga maandam alang sa Ikaduhang Pag-anhi diha sa iyang pakigpulong nga “Pagpangandam alang sa Pagbalik sa Ginoo” (Liahona, Mayo 2019, 81–84).

Sa iyang pakigpulong nga “Pagpangandam alang sa Ikaduhang Pag-anhi” (Liahona, Mayo 2004, 7–10), Si Presidente Dallin H. Oaks sa Unang Kapangulohan namulong kabahin sa mga timailhan sa mga panahon ug kon sa unsang paagi nga kita makaandam alang sa pag-anhi sa Ginoo.