“Leksyon 27 Materyal sa Pagpangandam sa Klase: Hugot nga Pagtuo, Paglaom, ug Gugmang Putli,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021)
“Leksyon 27 Materyal sa Pagpangandam sa Klase,” Materyal sa Magtutudlo alang sa mga Pagtulun-an ug Doktrina sa Basahon ni Mormon
Leksyon 27 Materyal sa Pagpangandam sa Klase
Hugot nga Pagtuo, Paglaom, ug Gugmang Putli
Si Presidente Dieter F. Uchtdorf kanhi sa Unang Kapangulohan mitudlo, “Ang hugot nga pagtuo, ang paglaum, ug ang gugmang putli magkauban sa usag usa, ug samtang ang usa naglambo, ang uban usab molambo. … Kining tulo ka mga hiyas—hugot nga pagtuo, paglaum, gugmang putli—nagkahiusa, nga pinasikad diha sa kamatuoran ug kahayag sa gipahiuli nga ebanghelyo ni Jesukristo, modala kanato ngadto sa paghimo og maayong mga binuhatan.[tan-awa sa Alma 7:24]” (“Ang Walay Kinutoban nga Gahum sa Paglaum,” Liahona, Nob. 2008, 23, 24; tan-awa sa Moroni 10:20). Samtang magtuon ka niining materyal, ikonsiderar unsa ang imong mahimo aron mas hingpit nga malakip kining balaan nga hiyas nganha sa imong kinabuhi.
Seksyon 1
Sa unsang paagi nga ang akong paglaom miimpluwensya sa akong hugot nga pagtuo diha ni Jesukristo?
Human sa kalaglagan sa Nephite nga sibilisasyon, nag-inusarang nahibilin si Moroni sa pagkompleto sa Basahon ni Mormon. Midugang usab siya og pipila ka mga pagtulun-an gikan sa iyang amahan, si Mormon, nga gilakipan og usa ka wali bahin sa mga hiyas sa hugot nga pagtuo, paglaom, ug gugmang putli (tan-awa sa Moroni 7:1).
Pagtuon agi og Pagpangandam alang sa Klase
Basaha ang Moroni 7:33, 38, 40–43, ug mangita sa unsay gitudlo ni Mormon mahitungod sa relasyon tali sa hugot nga pagtuo ug paglaom.
Si Presidente M. Russell Ballard sa Korum sa Napulog Duha ka mga Apostoles nagtudlo mahitungod sa koneksyon tali sa hugot nga pagtuo ug paglaom:
Ang hugot nga pagtuo sa Ginoo nga si Jesukristo—tinuod nga hugot nga pagtuo, hingpit nga masaligon ug dili matarog—hilabihan kini ka gamhanan sa uniberso. Kini mahimong usa ka pwersa nga magaaghat diin pinaagi niini mahitabo ang mga milagro. O kini mahimong usa ka tinubdan sa kalig-on sa galamhan, diin pinaagi niini atong makaplagan ang kalinaw, kahupay, ug ang kaisog sa paglahutay.
Kon atong ibutang ang atong hugot nga pagtuo ug pagsalig diha sa buhat, mosangpot kini sa paglaom. Ang paglaom molambo gumikan sa hugot nga pagtuo ug mohatag og kahulogan ug katuyoan sa tanan nga atong buhaton. Gani makahatag kini kanato og malinawon nga kasiguroan nga kita malipayong mabuhi sa kalibotan nga hinog na sa pagkadaotan, sa kalamidad, ug sa kawalay kaangayan. (“The Joy of Hope Fulfilled,” Ensign, Nob. 1992, 32)
Pamalandong agi og Pagpangandam alang sa Klase
Unsa nga mga panalangin ang miabot o mahimong moabot sa inyong kinabuhi kon inyong isentro ang inyong hugot nga pagtuo ug paglaom diha ni Jesukristo?
Seksyon 2
Sa unsang paagi nga akong madugangan ang akong kapasidad aron makasinati og paglaom?
Sa dihang si Moroni mipamubo sa rekord sa Jaredite, gilakip niya ang mga pagtulun-an ni propeta Ether mahitungod sa hugot nga pagtuo. Dayon iyang giasoy pag-usab ang daghang milagro nga nahitabo pinaagi sa hugot nga pagtuo diha ni Jesukristo. (Tan-awa sa Ether 12:3–22.) Mipasabot si Moroni nga “ang hugot nga pagtuo mao ang mga butang nga gilauman ug dili makita” (bersikulo 6).
Pagtuon agi og Pagpangandam alang sa Klase
Basaha ang Ether 12:4, 32, ug ikonsiderar unsa ang imong malauman sa umaabot samtang imong ipakita ang hugot nga pagtuo diha sa Dios.
Si Presidente Uchtdorf misulti sa mosunod mahitungod sa walay kinutoban nga gahom sa paglaom:
Ang paglaum usa ka gasa sa Espiritu. [tan-awa sa Moroni 8:26]. Kini usa ka paglaum nga pinaagi sa Pag-ula ni Jesukristo ug sa gahum sa Iyang Pagkabanhaw, kita mabuhi ngadto sa kinabuhing dayon, ug kini tungod sa atong hugot nga pagtuo sa Manluluwas [tan-awa sa Moroni 7:41]. Kini nga matang sa paglaum usa ka prinsipyo sa saad, maingon man usab nga usa ka sugo [tan-awa sa Mga Taga-Colosas 1:21–23], ug, ingon sa tanan nga mga sugo, kita adunay responsibilidad sa paghimo niini nga buhing bahin sa atong mga kinabuhi ug pagbuntog sa tintasyon nga mawad-an og paglaum. Ang paglaum diha sa maloloy-ong plano sa kalipay sa atong Langitnong Amahan nagdala og kalinaw [tan-awa sa Mga Taga-Roma 15:13], kalooy [tan-awa sa Salmo 33:22], pagmaya [tan-awa sa Mga Taga-Roma 12:12], ug kalipay [tan-awa sa Mga Proverbio 10:28]. Ang paglaum sa kaluwasan sama sa usa ka panalipod nga helmet [tan-awa sa 1 Mga Taga-Tesalonica 5:8]; kini ang pundasyon sa atong hugot nga pagtuo [tan-awa sa Mga Hebreohanon 11:1; Moroni 7:40] ug angkla sa atong mga kalag [tan-awa sa Mga Hebreohanon 6:19; Ether 12:4]. (“Ang Walay Kinutoban nga Gahum sa Paglaum,” 21–22)
Pamalandong agi og Pagpangandam alang sa Klase
Unsa ang imong mahimo aron ang paglaom mahimong buhing bahin sa imong inadlaw-adlaw nga kinabuhi?
Seksyon 3
Unsa nga epekto ang mahimo sa gugmang putli sa akong mga relasyon sa uban ug ni Jesukristo?
Human maghisgot og hugot nga pagtuo ug paglaom, si Mormon mitapos sa iyang wali pinaagi sa pagtutok sa gugmang putli, o “ang tiunay nga gugma ni Kristo” (Moroni 7:47).
Pagtuon agi og Pagpangandam alang sa Klase
Basaha ang Moroni 7:43–48, ug ikonsiderar ang pagmarka sa mga pulong ug mga hugpong sa mga pulong nga nagtino ug naghulagway sa gugmang putli.
Si Presidente Jean B. Bingham, Kinatibuk-ang Presidente sa Relief Society, nag-ingon:
Si Jesukristo mao ang hingpit nga ehemplo sa gugmang putli. Ang Iyang pagtanyag sa premortal nga mahimo natong Manluluwas, ang Iyang pakig-inter-aksyon sa tibuok Niyang mortal nga kinabuhi, ang Iyang langitnong gasa sa Pag-ula, ug ang Iyang padayon nga paningkamot sa pagdala kanato og balik ngadto sa atong Langitnong Amahan mao gayud ang mga ekspresyon sa gugmang putli. Naglihok Siya nga usa ra ang tumong: gugma para sa Iyang Amahan nga gipahayag pinaagi sa Iyang gugma para kanatong tanan. …
Ako mosaksi nga kon sundon nato ang Iyang hingpit nga ehemplo, atong madawat ang gasa sa gugmang putli, nga maghatag kanato og kalipay niining kinabuhia ug sa gisaad nga panalangin sa kinabuhing dayon uban sa atong Amahan sa Langit. (“Akong Dad-on ang Kahayag sa Ebanghelyo sulod sa Akong Panimalay,” Liahona, Nob. 2016, 6, 9)
Pamalandong agi og Pagpangandam alang sa Klase
Paghunahuna og pipila ka mga ehemplo kon sa unsang paagi nga si Jesukristo mao “ang hingpit nga ehemplo sa gugmang putli.” Pangitaa ang mga asoy sa mga ehemplo diha sa mga kasulatan, ug mangandam sa pagpaambit og bisan usa sa mga ehemplo diha sa inyong klase.
Samtang maghunahuna kamo mahitungod sa ehemplo sa Manluluwas, ikonsiderar kon unsa kaha ang gugmang putli sa inyong inadlaw adlaw nga kinabuhi. Si Presidente Thomas S. Monson mitudlo:
Ania sa akong hunahuna ang gugmang putli nga mag-aghat kanato sa pagkamabination, ug kamanggiloy-on, dili lamang sa mga panahon sa mga sakit ug kapait ug mga kalisud, apan usab sa mga panahon sa kahuyang o kasaypanan alang sa uban.
Adunay seryusong panginahanglan sa gugmang putli nga naghatag og pagtagad sa mga wala matagad, paglaum alang sa mga nawad-an sa paglaum, tabang sa mga may sakit. Ang tinuod nga gugmang putli mao ang gugma nga inubanan sa buhat. Ang panginahanglan sa gugmang putli anaa sa tanang dapit.
Ang gikinahanglan mao ang gugmang putli nga magdumili sa pagpangita og katagbawan sa pagpaminaw o sa pagsubli sa mga report kabahin sa dautang palad nga miabut sa uban, gawas lamang kon ang paghimo sa ingon makaayo sa mga walay palad. Ang American educator ug politiko nga si Horace Mann makausa miingon, “Ang pagbati og kalooy sa kalisod usa ka tawhanon; ang paghupay diosnon.” [Horace Mann, Lectures on Education (1845), 297].
Ang gugmang putli mao ang pag-angkon og pailub ngadto sa tawo nga mipakaubos kanato. Kini ang pagbatok sa aghat sa pagkadaling masilo. Kini ang pagdawat sa kahuyang ug mga kasaypanan. Kini ang pagdawat sa mga tawo kon unsa man gayud sila. Kini ang pagtan-aw lapas sa pisikal nga panagway ngadto sa mga kinaiya nga dili mapalong sa pagdagan sa panahon. Kini ang pagbatok sa aghat sa pagkategoriya sa uban. (“Gugmang Putli Dili gayud Mapakyas,” Liahona, Nob. 2010, 124)
Irekord ang Imong mga Hunahuna
Unsa ang imong mahimo aron mas matinguhaong mangita sa gasa sa gugmang putli ug makapalambo og Kristohanong gugma alang sa uban? Kinsay nagkinahanglan nga mobati sa gugma sa Maluluwas pinaagi kanimo? Unsay imong mahimo aron matabangan kining tawo nga mobati sa Iyang gugma?