Leksyon 9 Materyal sa Pagpangandam sa Klase

Hugot nga Pagtuo diha ni Jesukristo

Mibati ka ba sukad og usa ka lig-on nga tinguha sa pagpalambo ug pag-usab aron ikaw makahimo nga mas mahisama sa Manluluwas? Si Brother Brian K. Ashton, kanhi Ikaduhang Magtatambag sa Kinatibuk-ang Kapangulohan sa Sunday School, mitudlo, “Ang doktrina ni Kristo ang nagtugot kanato nga makagamit sa espirituhanong gahum nga mobayaw kanato gikan sa atong kasamtangang espirituhanong kahimtang ngadto sa usa ka kahimtang diin kita mahimong hingpit sama sa Manluluwas” (“Ang Doktrina ni Kristo,” Liahona, Nob. 2016, 106). Ang doktrina ni Kristo nagpasabut sa pagbaton og hugot nga pagtuo diha Kaniya ug sa Iyang Pag-ula, paghinulsol, pagbunyag, pagdawat sa gasa sa Espiritu Santo, ug sa paglahutay ngadto sa katapusan.(tan-awa sa 2 Nephi 31:2, 10–21; 3 Nephi 27:13–22). Samtang imong tun-an ang doktrina ni Jesukristo, pagsugod sa hugot nga pagtuo diha Kaniya, paghunahuna og mga paagi nga ikaw gustong mausab ug ang tawo nga ikaw gusto nga mahimo.

Seksyon 1

Unsa ang akong buhaton sa paglig-on sa akong hugot nga pagtuo diha ni Jesukristo?

Ang mosunod nga summary nagpasabut kon unsa ang kahulugan sa pagbaton og hugot nga pagtuo diha ni Jesukristo:

Ang pagbaton og hugot nga pagtuo diha ni Jesukristo nangahulugan og pagsalig sa hingpit diha Kaniya—pagsalig sa Iyang walay kinutubang gahum, kahibalo, ug gugma. Naglakip kini sa pagtuo sa Iyang mga pagtulun-an. Nangahulugan kini sa pagtuo nga bisan og kita wala makasabut sa tanang mga butang, Siya nakasabut. … Kanunay Siya nga andam sa pagtabang kanato samtang kita naghinumdom sa Iyang pakilooy: “Paghunahuna ngari kanako sa matag hunahuna; ayaw pagduha-duha; ayaw kahadlok” (Doktrina ug mga Pakigsaad 6:36). (”Hugot nga Pagtuo diha ni Jesukristo,” Gospel Topics, topics.ChurchofJesusChrist.org)

Si Bishop Richard C. Edgley, kanhi magtatambag sa Tigdumalang Bishopric, miingon nga “ang hugot nga pagtuo usa ka pagpili, ug kini kinahanglan gayud nga pagatinguhaon ug palamboon” (“Hugot nga Pagtuo—ang Pagpili Inyo,” Liahona, Nob. 2010, 32).

Si propeta Alma gamhanang mitudlo mahitungod sa baruganan sa hugot nga pagtuo. Naguol si Alma mahitungod sa mga Zoramite, kinsa mihunong sa pagtuo diha ni Jesukristo ug nahimulag gikan sa Iyang Simbahan. Samtang si Alma ug ang iyang misyonaryong mga kauban miadto sa pagsangyaw taliwala kanila, iyang nakita nga ang pipila sa mga Zoramite nahimong mapainubsanon tungod sa ilang kakabus ug naminaw sa iyang mensahe. Siya gusto nga sila makasabut kon unsaon sa Manluluwas pag-usab ang ilang mga kinabuhi. (Tan-awa sa Alma 31–32.)

Samtang nagtudlo sa mga Zoramite, gitandi ni Alma ang pulong sa Dios ngadto sa usa ka binhi ug gipasabut nga kini motubo kon ato kining itanom diha sa atong mga kasingkasing ug mainampingon nga amumahan kini pinaagi sa paggamit sa hugot nga pagtuo (tan-awa sa Alma 32:26–33).

Pagtuon agi og Pagpangandam alang sa Klase

Samtang ikaw nagbasa sa Alma 32:21, 27–30, hunahunaa ang pagmarka sa mga pulong o mga hugpong sa mga pulong nga nagtudlo kon sa unsa nga paagi kita makapatubo sa atong hugot nga pagtuo.

Nagkomentaryo sa pasumbingay ni Alma sa usa ka binhi nga nagrepresentar sa pulong sa Dios, si Presidente Uchtdorf, kaniadto sa Unang Kapangulohan, mitudlo:

Kasagaran kaayo atong gitan-aw ang ebanghelyo sama sa usa ka mag-uuma kinsa mitisok sa binhi diha sa yuta sa pagkabuntag ug nagpaabut nga mamunga sa pagkahapon. …

Ang pagkasayud nga ang binhi maayo dili igo. Kita kinahanglan gayud nga “moalima niini uban ang dako nga pag-amping, nga kini mogamot ” [Alma 32:37]. …

… Ang pagkadisipulo dili usa ka tigtan-aw sa dula. Dili kita makapaabut nga masinati ang mga panalangin sa hugot nga pagtuo pinaagi sa pagbarug sa mga daplin nga walay gibuhat ingon nga kita dili makasinati sa mga kaayohan sa maayong panglawas pinaagi sa paglingkod diha sa sopa nagtan-aw sa mga kalihokan sa sport diha sa telebisyon ug sa paghatag og tambag ngadto sa mga atleta. (“Ang Dalan sa Disipulo,” Liahona, Mayo 2009, 76)

Pamalandong agi og Pagpangandam alang sa Klase

Unsa nga tambag ang imong ihatag ngadto sa usa ka tawo kinsa nawad-an og kadasig tungod kay siya naglihok nga may hugot nga pagtuo apan wala pa makasinati sa mga bunga sa hugot nga pagtuo?

Seksyon 2

Sa unsa nga paagi nga ang pag-amuma sa pulong sa Dios pinaagi sa hugot nga pagtuo magdala kanako nga mas maduol ngadto ni Jesukristo?

Gitudlo ni Alma nga kon ang binhi mogitib ug mosugod sa pagtubo, kita masayud nga ang binhi maayo ug ang atong hugot nga pagtuo mahimong malig-on. Human niining pagsugod og tubo, mipasidaan si Alma nga “dili kamo mobiya sa inyong hugot nga pagtuo” ug mopasagad sa pag-amuma sa kahoy (tan-awa sa Alma 32:30–38).

Pagtuon agi og Pagpangandam alang sa Klase

Basaha ang Alma 32:41–43, mangita alang sa mga panalangin nga moabut kon atong amumahon ang kahoy uban sa gipadayon nga, tibuok kinabuhi nga hugot nga pagtuo.

Samtang nahuman na si Alma sa pagtudlo sa mga Zoramite mahitungod sa hugot nga pagtuo, gipasabut niya nga ang binhi nga gusto niyang ipatanom kanila diha sa ilang mga kasingkasing mao ang mensahe nga si Jesukristo mao ang Anak sa Dios, kinsa mohimo sa “pagtubos sa ilang mga sala; ug nga siya mobangon pag-usab gikan sa mga patay” (Alma 33:22–23). Si Elder Jeffrey R. Holland sa Korum sa Napulog Duha ka mga Apostoles mitudlo:

Dinhi niining nindot kaayo nga pakigpulong, gidala ni Alma ang mga magbabasa gikan sa usa ka kinatibuk-ang komentaryo kabahin sa hugot nga pagtuo nga gipakisama ang binhi sa pulong sa Dios ngadto sa pakigpulong nga gipunting sa hugot nga pagtuo diha ni Kristo isip ang Pulong sa Dios, gipatubo ngadto sa usa ka mamunga nga kahoy, usa ka kahoy kansang bunga sama gayud sa kang Lehi nga unang pagtan-aw sa gugma ni Kristo. … Si Kristo mao ang binhi, ang kahoy, ug ang bunga sa mahangturong kinabuhi. (Christ and the New Covenant: The Messianic Message of the Book of Mormon [1997], 169)

Pamalandong agi og Pagpangandam alang sa Klase

Sa unsa nga paagi nga ang paglihok diha sa hugot nga pagtuo ug ang pagtanom kang Jesukristo ug sa Iyang ebanghelyo diha sa imong kasingkasing miimpluwensya sa imong pagpamatuod ug pagkakabig?

Seksyon 3

Sa unsa nga mga paagi ako mapanalanginan pinaagi sa paggamit og hugot nga pagtuo diha ni Jesukristo?

Samtang gitapos ni Moroni ang iyang buhat sa Basahon ni Mormon, giapil niya ang usa ka pakigpulong nga ang iyang amahan, si Mormon, mihatag sa daghang katuigang milabay (tan-awa sa Moroni 7:1). Dinhi niini nga pakigpulong gitudlo ni Mormon kon unsa ang matuman pinaagi sa gahum sa hugot nga pagtuo.

Pagtuon agi og Pagpangandam alang sa Klase

Basaha ang Moroni 7:25–26, 33, ug hunahunaa ang mga panalangin ug mga milagro nga atong masinati samtang naggamit kita sa hugot nga pagtuo diha ni Jesukristo.

Si Elder Richard G. Scott sa Korum sa Napulog Duha ka mga Apostoles mitudlo kon sa unsa nga paagi ang atong hugot nga pagtuo diha ni Kristo magdala og dugang nga gahum nganhi sa atong mga kinabuhi:

Sa pag-angkon og dili matarug nga hugot nga pagtuo diha ni Jesukristo mao ang pagpuno sa imong kinabuhi sa masanag nga kahayag. Ikaw wala na mag-inusara sa pakigbisog sa mga hagit nga imong nahibaloan nga ikaw dili makasulbad o makapugong sa imong kaugalingon, kay Siya miingon, “Kon kamo adunay hugot nga pagtuo kanako kamo makabaton sa gahum sa pagbuhat sa bisan unsa nga butang nga maayo ngari kanako [Moroni 7:33; mga italic gidugang].

Kon ikaw walay kadasig, gihasol pinaagi sa kalapasan, masakiton, nag-inusara, o nagkinahanglan kaayo sa paghupay ug pagsuporta, ligdong akong mopamatuod nga ang Ginoo motabang kanimo kon ikaw mabinantayong mosunod sa espirituhanong balaod diha diin kana nga tabang makaplagan. Siya ang imong Amahan. Ikaw Iyang anak. Siya nahigugma kanimo. Dili ka gayud Niya pasagdan. Nasayud ako Siya mopanalangin kanimo. (“Obtaining Help from the Lord,” Liahona, Jan. 1992, 86)

Irekord ang Imong mga Hunahuna

Pag-ila og usa o duha ka mga tawo diha sa Basahon ni Mormon kinsa mipakita og hugot nga pagtuo ni Jesukristo, ug pagsulat mahitungod kon giunsa sila sa pagpanalangin. Pag-andam sa pagpakigbahin sa imong mga ehemplo atol sa klase. Mahimo usab nga maghunahuna ka og mga paagi nga imong nasinati ang gahum sa Ginoo samtang ikaw migamit og hugot nga pagtuo diha Kaniya.

Gusto pa og Dugang? (Opsyonal)

Asa ako makakat-on pa og dugang mahitungod sa doktrina ni Kristo?

Makakat-on ka og dugang pa mahitungod sa doktrina ni Kristo pinaagi sa pagtuon sa 2 Nephi 31:2, 10–21 ug sa 3 Nephi 27:13–22.

Gipasabut ni Brother Brian K. Ashton ang doktrina ni Kristo diha sa iyang pakigpulong “Ang Doktrina ni Kristo” (Liahona, Nob. 2016. 106–9).

Unsa ang matuman pinaagi sa hugot nga pagtuo diha ni Kristo?

Ingon nga na-rekord diha sa Ether 12:3–22, gitudlo ni Moroni ang mahitungod sa importansya sa hugot nga pagtuo ug mihatag og mga ehemplo sa mga milagro nga natuman pinaagi sa hugot nga pagtuo diha ni Jesukristo.