Hoko Ko e Kau Tangataʻi Fonua Mateaki

ʻOku totonu ke tau talangofua ki he ngaahi fono ʻa e ʻOtuá mo e tangatá, mo fakaʻapaʻapaʻi hotau tuʻunga mēmipa ʻi he Siasí pea mo hotau tuʻunga tangataʻi fonua ʻi he puleʻanga ʻoku tau nofo aí.

Mei he Moʻui ʻa Siosefa F. Sāmitá

Ne hoko e tuʻunga moʻui fakafoʻituitui ʻa Palesiteni Siosefa F. Sāmitá ko ha sīpinga lelei ia ʻo e tuʻunga fakatangataʻi fonuá pea mo e tokoni ki hono koló. Naʻe hoko ko ha taha falealea ʻi he Falealea Fakavahe ʻo ʻIutaá (Territorial Legislature) ʻi ha ngaahi vahaʻa taimi kehekehe mei he 1865 ki he 1882; ne kau ʻi he fakataha alēlea fakakoló ʻi he 1867; pea naʻe hoko ko ha mēmipa ʻo e kōmiti 1895, ʻa ia ne nau faʻu ʻa e konisitūtone ʻo e siteiti ʻo ʻIutaá.

Ne faʻa lea ʻa Palesiteni Sāmita, ʻa ia ne mamata tonu ʻi he maumau ʻa e kau fakatangá ʻi Nāvuú, ki hono mahuʻinga ʻo e pule ʻa e laó ʻi ha sōsaieti ʻoku sivilaisé. Ne naʻinaʻi mo hono Ongo Tokoni ʻi he Kau Palesitenisī ʻUluakí ki he Kāingalotú ke nau hoko ko ha kau tangataʻi fonua tauhi lao mo faimāteaki, ʻi ha feituʻu pē ʻoku nau nofo ai pea mo nau faivelenga ʻi hono poupouʻi honau ngaahi puleʻangá.¹ ʻI ha meʻa ʻe taha ne fakahaaʻi ai ʻe ha ʻōfisa fakapuleʻanga ʻene taʻe fiemālie ki he Konisitūtone ʻo e ʻIunaiteti Siteití, ka ne tali ange ʻe Palesiteni Sāmita: “ ʻOku ʻikai makātakiʻi ʻe he Kau Māʻoniʻoni ʻi he Ngaahi ʻAho Kimui Ní ʻa e faʻahinga loto hangē ko ʻení. Ko e fakamoveuveu ia. ʻOku iku ia ki he fakaʻauhá. Ko e faʻahinga loto ʻeni ʻo e fakamoveuveú, pea ʻoku ʻafioʻi ʻe he ʻEikí kuo feʻunga ʻetau faingataʻaʻia ʻi he ngaahi fakamoveuveú, pea ʻoku ʻikai ke mau toe fie maʻu ha meʻa pehē…. ʻOku ʻikai taau ke tau toe moʻulaloa ki he faʻahinga laumālie ko iá pe tokoni ki ai ʻi ha kihiʻi konga ʻe taha. ʻOku totonu ke tau tuʻu taʻe ueʻia mo mālohi ʻo fehangahangai mo e faʻahinga loto pe kalasi fakafepaki pe taʻe fakaʻapaʻapa kotoa ki he konisitūtone ʻo hotau puleʻangá mo e ngaahi lao fakakonisitūtone ʻo hotau fonuá.” ²

Ngaahi Akonaki ʻa Siosefa F. Sāmitá

Ko e Kau Māʻoniʻoni ʻi he Ngaahi ʻAho Kimui Ní ʻoku nau mateakiʻi honau fonuá.

Tau fai muʻa ʻa e meʻa ʻoku tonú, ʻo tauhi e ngaahi fono ʻa e ʻOtuá, mo e ngaahi lao ʻa e tangatá, fakalāngilangiʻi hotau tuʻunga mēmipa ʻi he puleʻanga ʻo e ʻOtuá, pea mo hotau tuʻunga tangataʻi fonua … ʻi he fonua ʻoku tau kau aí, pea ʻe toki poupouʻi mo maluʻi kitautolu ʻe he ʻOtuá, pea te kei tupulaki ai pē ʻo hangē ko ia ne hoko talu mei he kamataʻangá, ka ko ʻetau tupulaki ʻi he kahaʻú ʻe toe vave ange mo maʻongoʻonga ange mei he tuʻunga ne ʻi ai he kuo hilí.³

Akoʻi hoʻomou fānaú ke nau tauhi e fono ʻa e ʻOtuá pea mo e lao ʻo e vahefonuá, pea mo ia ʻo hotau puleʻangá. Akoʻi kinautolu ke nau fakaʻapaʻapa mo fakalāngilangiʻi kinautolu kuo fili ʻe he kakaí ke nau hoko ko honau kau taki pea mo e kau fakamaau pule mo fakahoko ʻa e laó. Akoʻi kinautolu ke nau mateakiʻi honau fonuá, mateakiʻi ʻa e angatonú mo e faitotonú pea mo e lāngilangí, pea te nau lava ai ʻo tupu hake ʻo hoko ko ha kau tangata mo ha kau fefine makehe hake ʻi he kau tangata mo e kau fefine kotoa ʻo māmaní.⁴

ʻOku ʻuhinga ʻo ʻete hoko ko ha Tokotaha Māʻoniʻoni ʻi he Ngaahi ʻAho Kimui Ní, ke te hoko ko ha taha ʻo e kakai lelei taha ʻo e ʻOtuá pe ko ʻene fānau ʻi māmaní, ʻi he tapa kotoa pēu ….. ʻE hoko ʻa e Tokotaha Māʻoniʻoni ʻi he Ngaahi ʻAho Kimui Ní ko ha tangataʻi fonua lelei, ʻo tatau ai pē pe ko ha tokotaha Pilitānia Lahi ia, ʻIuinaiteti Siteiti, Hōlani, Siamane pe ko ha toe faʻahinga fonua pē ʻi māmani. Kapau pē ʻe hoko ko ha Tokotaha Māʻoniʻoni ʻi he Ngaahi ʻAho Kimui Ní, kuo pau pē ke hoko ia ko ha tangataʻi fonua lelei ʻo e fonua ne fanauʻi aí pe ko ia kuo liliu kakai ki aí …..Ko e tangataʻi fonua ʻo e puleʻanga ʻo e ʻOtuá ʻoku totonu ke taaimuʻa ʻia kinautolu ʻoku hoko ko e kakai ʻo e ʻOtuá ʻi he funga māmaní kotoa.⁵

ʻOku ʻikai ke u lotua pē ʻa e tuʻumālie ʻo Saioné, ka ko e tuʻumālie foki ʻo hotau fonuá. Kuo pau ke tau manatuʻi maʻu pē ʻoku ʻikai ko ha kau tangataʻi fonua ʻataʻatā pē kitautolu ʻo e Puleʻanga ʻo e ʻOtuá, ka ko e kau tangataʻi fonua foki kitautolu ʻo e ngaahi fonua ʻoku tau nofo aí. ʻOfa ke tau māteakiʻi fakatouʻosi maʻu pē ʻa hotau Fonuá mo e Puleʻangá, pea pehē ki he Siasi ʻo e ʻOtuá…. Ne tau loto fiemālie ke tau maʻu hotau fonuá, ke maluʻi hono ngeiá, ke pukepuke mo poupouʻi hono ongoongó, pea ʻoku mau poupou atu ke hokohoko atu muʻa ʻa e mateakiʻi ko ʻeni hotau puleʻangá pea mo hotau kakaí ʻo aʻu ki he ngataʻangá.⁶

Kapau ko e mateakiʻi fonuá mo e fai mateakí ko ha ngaahi anga lelei ia ʻoku hāsino ʻi he taimi ʻo e melinó, ʻo fakamaau totonu, fakapotopoto, angaʻofa, nimameaʻa mo moʻui angamaʻa; pea ʻi he taimi ʻo e faingataá, ke faʻa-kātaki, mo toki fakafepaki ʻaki pē ha ngaahi founga ʻoku fakalao ki he ngaahi meʻa ʻoku hoko moʻoni pe ngaahi meʻa ʻoku pehē ʻoku halá, pea mo talangofua moʻoni ki he ngaahi lao ʻo e fonuá mo e puleʻangá, neongo ʻe ʻi ai ha taʻe fiemālie mo ha mamahi, ʻi he taimi ʻo e taú, ʻoku loto fiemālie pē ke tau maʻá e fonuá, —pea ta ʻoku ʻikai ha toe fehuʻia, ko e kau “Māmongá” ko ha kakai mateakiʻi fonua mo faimāteaki.⁷

ʻOfa ke tāpuakiʻi kimoutolu ʻe he ʻEiki Fungani Māfimafí. ʻOku fonu hoku lotó ʻi he ngaahi tāpuaki maʻá e Kau Māʻoniʻoni ʻi he Ngaahi ʻAho Kimui Ní. ʻOku ou ʻofa ʻi ha tangata, ʻaki hoku lotó kotoa, ʻa ia ʻoku ou ʻiloʻi ko ha Tokotaha Māʻoniʻoni ʻi he Ngaahi ʻAho Kimui Ní, ʻoku faitotonu, angatonu, pea mo fai moʻoni. Ko e tangata ʻokú ne maʻu ʻa e ngaahi ʻulungaanga ko ʻení ʻoku hoko ia ko e taha ʻo e kau tangataʻi fonua lelei taha ʻi ha faʻahinga fonua, ʻoku hoko ia ko ha tangataʻi fonua lelei taha ʻo ha faʻahinga kolo, ʻo ha faʻahinga fonua, ʻo ha potufonua pē, pe siteiti, pe ko ha toe faʻahinga fonua pē ʻe ʻi ai; pea ʻoku kau foki ia ʻi he kau lelei tahá. Ko e Tokotaha Māʻoniʻoni moʻoni ʻi he Ngaahi ʻAho Kimui Ní, ʻoku hoko ia ko ha husepāniti lelei, ko ha tamai lelei, ko ha kaungā-ʻapi lelei, ʻoku hoko ia ko ha tangataʻi fonua lelei, pea mo ha tangata lelei ʻi he taimi kotoa pē.⁸

ʻOku hākeakiʻi ʻe he angatonú ʻa e puleʻangá.

Ko e ʻapi “faka-Māmonga” mahení, ʻoku hoko ia ko ha temipale ʻo e fāmilí…. ʻOku akoʻi mo poupouʻi mālohi heni ʻa e ngaahi fakakaukau maʻá mo e moʻoni ʻa ia, kapau te na ō fakataha, te ne fakatupu ʻa e angatonu ko ia ʻokú ne hākeakiʻi ha puleʻanga, pea mo tekeʻi ʻa e angahala ʻoku hoko ko ha fakamā ki ha kakai tokolahi…. Ko ʻeni ʻoku momoi ai ʻe hotau ngaahi fohá mo e ngaahi ʻofefiné, kinautolu ki ha faʻahinga sivi pē ʻo e fakafehoanakí te mou loto ki ai; tokanga ki he moʻoní, fakaʻapaʻapaʻi ʻa e kau toulekeleká, ʻapasia ki he ʻOtuá, ʻofa ki he tangatá, mateakiʻi ʻa e fonuá, fakaʻapaʻapaʻi e laó, fakaleleiʻi ʻa e ʻulungaangá, pea ko hono fakaʻosí, … ko e maʻa ʻa e fakakaukaú mo e tōʻonga angamaʻá. ʻOku ʻikai ko ha fuʻu fakahīkihikiʻi lahi fēfē ia ʻokú te fai ki he ngaahi toʻutangata ʻo hotau kakaí, kuo fanauʻi mo ohi hake ʻi he ngaahi ʻapi “Māmongá,” ʻa e pehē ʻe lava ke fakafehoanaki lelei kinautolu, ʻi he ngaahi ʻulungaanga faka-Kalisitiané, pea mo e ngaahi meʻá kotoa ʻokú ne faʻu ha tangataʻi fonua leleí, pea mo ha niʻihi ʻi ha faʻahinga kolo pe ʻi ha toe faʻahinga fonua pē.⁹

ʻOku ʻi he māmaní ʻa e “Tui Faka-Māmongá” ke lelei ai ʻa e māmaní. Akoʻi ʻa e moʻoní, toutou akoʻi mo e angamaʻá, maluʻi ʻa e haohaoa ʻo e ʻapí, fakaʻapaʻapaʻi ʻa e maʻu mafaí mo e puleʻangá, poupouʻi ʻa e akó, pea hākeakiʻi ʻa e tangatá mo e fefiné, ʻoku ʻikai tali ʻe heʻetau tui fakalotú ʻa e faihiá, pea ʻokú ne fakafepakiʻi ha faʻahinga tuʻunga pē ʻo e pule fakamālohí. ʻOku feinga ʻa e “Tui Faka-Māmongá” ke langaki moʻui, kae ʻikai holoki ʻa e sosaietí.¹⁰

Ko e Tokotaha Siasi leleí ʻoku hoko ia ko ha tangataʻi fonua lelei ʻi he tapa kotoa pē. ʻOku ou loto ke u lea ki he kau talavou ʻo hotau koló: mou hoko ko ha sīpinga lelei ʻo e Kau Māʻoniʻoni ʻi he Ngaahi ʻAho Kimui Ní, pea ʻoua naʻa tuku ha faʻahinga meʻa ke ne fakafeʻātungiaʻi kimoutolu mei haʻa mou feinga ki he ngaahi tuʻunga māʻolunga taha ʻoku maʻu ʻi hotau fonuá. Ka hili haʻamou maʻu ha faʻahinga tuʻunga pehē, tuku hoʻo angamaʻá, ho ngeiá, hoʻo faitotonú, hoʻo lavameʻá, ho ngaahi akonaki fakalotú, ʻa ē ne fakatō ki homou lotó ʻi he veʻe vaʻe ʻo hoʻomou ngaahi faʻē “Māmonga” liʻaki moʻuí, “ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngaahi ngāue leleí, pea fakamālōʻia ʻa hoʻomou Tamai ʻoku ʻi he langí.” [Mātiu 5:16.]¹¹

ʻOfa ke tāpuekina ʻe he ʻEikí hotau puleʻangá mo tataki kinautolu ʻoku nau puke ʻa e mafaí ʻi honau nimá, ke nau fai ʻa ia ʻoku māʻoniʻoni, fakahōifua pea mo tali ʻe he ʻOtuá.¹²

ʻOku tau tui ki he tokāteline ʻo e māvahevahe ʻa e Siasí mo e puleʻangá.

ʻOku tuʻutuʻuni ki he kāingalotu ʻo e Siasí ʻi he fakahā Fakalangi … : “Ke ʻoua naʻa maumauʻi ʻe ha tangata ʻa e ngaahi lao ʻo e fonuá, he ko ia ia ʻokú ne tauhi ʻa e ngaahi fono ʻa e ʻOtuá, ʻoku ʻikai ʻaonga ke ne maumauʻi ʻa e ngaahi lao ʻo e fonuá.” [T&F 58:21.]¹³

Fekauʻaki mo e ngaahi fono ʻo e Siasí, ʻoku fakamahinoʻi ai: …

“Vakai ko e ngaahi fono ʻa ia kuo mou maʻu mei hoku nimá ko e ngaahi fono ia ʻo e Siasí, pea ke pehē hoʻomou fakahā iá.”[T&F 58:23.]

Ko hono fakalea ʻe tahá, ʻoku teʻeki ha fono pe tuʻutuʻuni kuo fai, pe ko ha fakahā kuo maʻu ʻe he Siasí, ne hoko ko ha fanongonongo ki he Puleʻangá. Ko e ngaahi lao mo e ngaahi fakahā peheé ʻi hono ʻomaí, naʻe fakataumuʻa taha pē ia ki hono puleʻi ʻo e Siasí.

ʻOku tui ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki he tokāteline ʻo e māvahevahe ʻa e Siasí mo e Puleʻangá; ʻo ʻoua naʻa kau noa ʻa e maʻu mafai ʻo e Siasí ʻi he ngaahi meʻa fakapolitikalé; pea mo e tauʻatāina kakato mo faʻiteliha ʻa e fakafoʻituituí ki hono fakahoko hono ngaahi fatongia fakapolitikalé. Kapau ne ʻi ai ha taimi ne kehe ai ha faʻahinga tōʻonga mo e tokāteline koʻení, naʻá ne maumauʻi ʻe ia ʻa e ngaahi tefitoʻi moʻoni mo e tuʻutuʻuni kuo fokotuʻutuʻu lelei ʻo e Siasí.

Mei he tefitoʻi moʻoní mo e tuʻutuʻuní, ʻoku mau fakahā ai ʻa ʻemau poupouʻi: Ke māvahevahe ʻaupito pē ʻa e Siasí mo e Puleʻangá; Ke ʻoua naʻa fakaehauaʻi ʻe he puleʻangá ʻa e Siasí; Ke ʻoua naʻa kaunoa ʻa e Siasí ʻi he ngaahi ngāue ʻa e puleʻangá; ʻOua naʻa kaunoa ʻa e puleʻangá ʻi he ngaahi ngāue ʻa e Siasí, pe ko e tauʻatāina ke fai ha faʻahinga lotú; Ke tauʻatāina kakato ʻa e fakafoʻituituí mei ha pule fakaaoao ki ai ʻa ha maʻu mafai fakalotu ʻi he ngaahi meʻa fakapolitikalé; Pea mo tuʻunga tatau ʻa e ngaahi Siasi kotoa pē ʻi he laó.¹⁴

ʻOku ʻikai kau ʻa e Siasí ʻi he ngaahi meʻa fakapolitikalé; ʻe kau hono kāingalotú ki he ngaahi fahaʻi fakapolitikalé ʻo fakatatau mo ʻenau faʻitelihá… . ʻOku ʻikai totonu ke kole, pe ʻe fie maʻu, ke nau fili ʻi he founga ko ʻení pe ko e founga ko ʻeé…. Ka he ʻikai ke ʻi ai ha ʻuhinga lelei ke taʻofi ai meia kinautolu ʻenau totonu fakatangataʻi fonuá, pea ʻoku ʻikai ha ʻuhinga ia ke nau pehē ai, he ko honau tokolahi ʻoku nau mateakiʻi, fakakaukau lelei, ako lelei, faitotonu, moʻumoʻua, angamaʻa, anga haohaoa, nimameaʻa, pea mo moʻui taau ʻi he tapa kotoa pē ʻo tatau mo ha toe faʻahinga kakai ʻi he fonuá, pe ʻi māmani.¹⁵

ʻOku tau moʻulaloa ki he kau pule ʻoku ʻi aí kae ʻoua kuo hokosia mai ʻa e puleʻanga ʻo e ʻOtuá.

Ko e Tohi Tapú, ʻa ia ko e taha ia ʻo e ngaahi folofola ʻo e Siasi “Māmongá,” ʻoku fonu ʻi he ngaahi kikite mo e ngaahi talaʻofa ʻo hono fokotuʻu ʻo e pule Fakalangi ʻi māmaní; ʻo e hokosia mai ʻo e pule ʻa e angatonú ʻi hono kotoa ʻo e funga māmaní. ʻE hoko ai ʻa Kalaisi ko e Tuʻi ʻo e puleʻanga kotoa pē pea kuo pau ke ngāue mo talangofua ki ai ʻa e kakaí. ʻE hoko moʻoni ia ko e Puleʻanga ʻo e ʻOtuá ʻi he tapa kotoa. ʻOku fokotuʻu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko ha tuʻunga teuteu ki he Puleʻanga ko iá. Ko hono ongoongoleleí ko e “ongoongolelei ia ʻo e puleʻangá.” Ko hono ngaahi tefitoʻi moʻoní, ngaahi ouaú, mafaí mo e ngaahi meʻafoakí ʻoku haʻu ia mei he langí. Ko ia kuo hoko ai ʻa e “puleʻanga fakalaumālie ʻo e langí,” ʻa ia ʻoku ʻi ai ʻa e ivi mo e mālohi te na fakaava ʻa e founga ke fakahoko ʻa e ngaahi kikite fekauʻaki mo e Pule aoniu ʻa e ʻAlo ʻo e ʻOtuá ʻi he māmaní.¹⁶

ʻOku faʻa pehē foki he taimi ʻe niʻihi, ʻoku nofoʻamanaki ʻa e kāingalotu ʻo e Siasí ki ha hokosia moʻoni mai ʻa e Puleʻanga ʻo e ʻOtuá ʻi māmani, pea ʻe fakatahatahaʻi ʻa e ngaahi puleʻanga kotoa ʻo e māmaní ki ha feituʻu mahino, mo ha puleʻanga fakalangi, ʻa ia e pule ai ʻa e Mīsaia kuo ʻosi toetuʻú.

Ko e ngaahi meʻá ni kotoa, ʻoku nau ʻai ke ʻikai lava ai ʻe ha taha “Māmonga” ʻo līʻoa moʻoni ki hono fonuá, pe ko ha toe puleʻanga fakamāmani pē.

…ʻOku mau fakaʻikaiʻi ʻa e pehē ʻoku fakavaivaiʻi ʻe heʻemau tui ki he fakahā fakalangí, pe ʻe heʻemau nofoʻamanaki ki he hokosia mai ʻa e puleʻanga ʻo e ʻOtuá, ʻa hono fakamātoato ʻo ʻemau mateakiʻi hotau fonuá. Ko e taimi ko ia ʻe fokotuʻu ai ʻa e puleʻanga fakalangí, ʻe lava pē ʻo ʻikai ke toe lahi ange ʻetau ʻiló ʻi he kau Kalisitiane ko ē ʻoku lotu ʻo pehē, “Ke hoko mai hoʻo pulé, Ke fai ho finangaló ʻi māmani, ʻo hangē ko ia ʻi he langí;” [Mātiu 6:10] ka ʻoku ʻikai foki ke tau ʻiloʻi ʻe tautolu ko ʻetau faimāteaki mo ʻetau mateakiʻi hotau fonuá ʻokú ne poupouʻi ʻa e foʻi moʻoni ko iá, ʻi he lolotonga ʻo ʻetau tatali ki he hokosia mai ʻa e puleʻangaʻo e Mīsaiá, ʻoku tau haʻisia heni ki he fekau mei he ʻOtuá ke tau talangofua ki he kau pule ʻoku ʻi aí, kae ʻoua ke hāʻele mai ʻa ia “ ʻoku ʻaʻana ʻa e totonu ke pulé.” [T&F 58:22.]¹⁷

Ngaahi Fokotuʻu ki he Akó

Ko e hā ʻoku totonu ai ki he Kau Māʻoniʻoni ʻi he Ngaahi ʻAho Kimui Ní ke nau mateakiʻi honau fonua ʻoku nau nofo aí? (Vakai foki, T&F 134:5.) Te tau fakahaaʻi fēfē ʻa ʻetau mateakiʻi mo ʻetau fakaʻapaʻapa ki hotau fonuá neongo ʻe lava pē ke tau taʻe loto ki ha niʻihi ʻo hono ngaahi tuʻutuʻuní?
ʻE founga fēfē haʻatau akoʻi ʻa ʻetau fānaú ke nau hoko ko ha kau tangataʻifonua lelei?
Ko e hā hotau ngaahi fatongia ʻi heʻetau hoko ko e kau tangataʻi fonuá? Ko e hā ʻoku totonu ai ke hoko ha tokotaha Siasi fai-velenga ko ha “taha ʻo e kau tangataʻifonua lelei taha ʻo ha faʻahinga fonua”?
ʻOku hakeakiʻi fēfeeʻi ʻe he angatonu fakafoʻituituí ha fonua? Ko e hā ʻoku hoko ai ʻa e angatonu fakafoʻituituí ko ha ʻelemēniti mahuʻinga ʻo e tangataʻifonua leleí? Ko e hā ha meʻa ʻoku totonu ke fakahoko ʻe he angatonu fakafoʻituití ʻi he moʻui ʻanautolu ʻoku feinga ke maʻu ha tuʻunga fakapuleʻangá?
ʻOku tokoni fēfē ʻa e mavahevahe ʻa e Siasí mo e puleʻangá ki hono fakaʻaongaʻi ʻe he kakaí ʻenau ngaahi tui fakalotú? (Vakai foki, T&F 134:7, 9.) Ko e hā ʻoku mahuʻinga ai ke ʻi ai ha tauʻatāina fakafoʻituitui mei he tokoaha maʻu mafai fakalotú ʻi he ngaahi meʻa fakapolitikalé?
ʻOku ʻuhinga ki he hā ʻa e puleʻanga ʻo e ʻOtuá ʻoku teu ke hoko maí, pea ko hai ʻe kau ʻi he puleʻanga ko iá?