Vahe 7
Ko e Ngāue Nāunauʻia ʻo e Fakatomalá mo e Papitaisó
ʻOku mahuʻinga ʻa e fakatomalá mo e papitaisó ki heʻetau hoko ko e ngaahi ʻea-hoko ʻo e puleʻanga fakasilesitialé.
Mei he Mo’ui ‘a Siosefa F. Sāmitá
Naʻe papitaiso ʻa Siosefa F. Sāmita he ʻaho 21 ʻo Mē 1852 ʻi he Kiʻi Anovai ʻo e Koló (City Creek) ofi ki he tuliki fakatokelau hahake ʻo e Temipale Sikueá ʻi Sōleki Siti. Naʻe fakahoko ʻa e ouaú ni ʻe Palesiteni Hiipa C. Kimipolo, ko ha mēmipa ʻo e Kau Palesitenisī ʻUluakí pea mo e kaumeʻa mamae ʻo e tamai ʻa Siosefa ne fakapōngí. ʻI heʻene fakamatalaʻi ʻa e ʻaho ko iá, ne pehē ai ʻe Siosefa F. Sāmita: “Ne ongoʻi ʻe hoku laumālié kapau ne u faiangahala—pea ʻoku moʻoni pē ia ʻoku ʻikai ke taʻe ʻi ai haʻaku angahala—ka kuo ʻosi fakamolemoleʻi au ia ai; pea kuo ʻosi fakamaʻa moʻoni au mei he angahalá; naʻe ongoʻi ia ʻe hoku lotó, peá u ongoʻi he ʻikai ke u teitei fakamamahiʻi ʻa e kiʻi ʻinisēkite siʻisiʻi tahá ʻi hoku lalo vaʻé. Ne u ongoʻi ʻo hangē ʻoku ou fie fai lelei ʻi he feituʻu kotoa pē ki he tokotaha kotoa pea mo e meʻa kotoa pē. Ne u ongoʻi ha moʻui foʻou, ha loto holi foʻou ke fakahoko ʻa e meʻa ʻoku totonú. Naʻe ʻikai ha kihiʻi meʻi holi ia ʻe taha ke fai ha kovi ne kei toe ʻi heʻeku moʻuí. Ko e moʻoni ia, ko ha tamasiʻi kei siʻi pē au, ʻi he taimi ne papitaiso ai aú; ka ko e faʻahinga mālohi ʻeni ne hoko kiate aú, pea ʻoku ou ʻiloʻi naʻe haʻu ia mei he ʻOtuá, pea naʻe hoko pea ʻe kei hoko maʻu ai pē ia ko ha fakamoʻoni moʻui kiate au ʻa hono tali au ʻe he ʻEikí.”1
ʻI heʻene moʻuí kotoa, ne feinga ai ʻa Palesiteni Sāmita ke ne tauhi ʻene ngaahi fuakava ne ne fai ʻi hono papitaisó. Naʻá ne akoʻi ʻoku mahuʻinga ʻa e fakatomala mei he angahalá ki hono tauhi ʻo e ngaahi fuakava ko ʻeni: “ ʻOku ou tui ki he tefitoʻi moʻoni ʻo e fakatomalá, kuoʻuhí he kuó u ʻosi ʻahiʻahiʻi ia ʻo u ʻiloʻi ʻoku lelei. Kapau ne ʻi ai ha mōmēniti kovi ne u leaʻaki ai pe fai ha meʻa ne fakfatupu loto mamahi ki hoku tokouá, ne ʻikai ke u teitei fiemālie pe ongoʻi tauʻatāina mei he faʻahinga tuʻunga pōpula ko iá kae ʻoua kuó u ʻalu ki hoku tokoua ko ia ne u fai hala ki aí, fakatomala mei heʻeku angahalá pea fakalelei mo ia. Ko e toki taimi ia ʻoku toʻo atu ai e kavenga mafasiá ni peá u ongoʻi he taimi ko iá hono ola lelei ʻo e fakatomala mei he angahalá.” 2
Ngaahi Akonaki ‘a Siosefa F. Sāmitá
Ko e fakatomalá mo e papitaisó ko ha ongo tefitoʻi moʻoni ia ʻo e ongoongoleleí.
ʻOku ou loto ke u tala atu kia kimoutolu ko e ngaahi tefitoʻi moʻoni ʻo e ongoongoleleí ʻoku moʻoni maʻu pē—ko e ngaahi tefitoʻi moʻoni ʻo e tui ki he ʻOtuá, ʻo e fakatomala mei he angahalá, ʻo e papitaiso ki he fakamolemole ʻo e ngaahi angahalá ʻi he mafai ʻo e ʻOtuá, pea mo e hlifakinima ki he foaki ʻo e Laumālie Māʻoniʻoní; ʻoku moʻoni maʻu pē ʻa e ngaahi tefitoʻi moʻoni ko ʻení pea ʻoku nau mātuʻaki mahuʻinga moʻoni ki hono fakamoʻui ʻo e fānau ʻa e tangatá, ʻo tatau ai pē pe ko hai kinautolu pea mo e feituʻu ʻoku nau ʻi aí…. He ʻikai lava ha tangata ʻo hū ki he puleʻanga ʻo e langí tuku kehe kapau e toki fanauʻi foʻou ʻi he vaí pea mo e Laumālié. Ko e ngaahi tefitoʻi moʻoní ni ʻoku ʻikai lava ia ke siʻaki, he kuo ʻosi fakamahinoʻi ia ʻe he ʻOtuá. Naʻe ʻikai ngata pē hono fakamahinoʻi kinautolu ʻe he leʻo ʻo Kalaisí, pea ʻe heʻene kau ākongá mei he toʻutangata ki he toʻutangata, ʻi he kuonga muʻá, ka ʻi he ngaahi ʻaho ki mui ní foki, kuo nau toe toʻo hake ʻa e ngaahi fakamoʻoni tatau pē ʻo toe fakamahinoʻi ʻa e ngaahi meʻá ni ki māmani. ʻOku nau moʻoni ʻi he ʻahó ni ʻo tatau pē mo ia ʻi muʻá, pea kuo pau ke tau talangofua ki he ngaahi meʻa ko ʻení. 3
Kuo pau ke tau talangofua ki he finangalo ʻo e Tamaí. ʻOku ou faʻa fanongo ki he pehē ʻe he kakaí, “Ko e meʻa pe ʻoku fie maʻu ia mei ha tangata ʻi he māmaní ke ne faitotonu mo lelei ki he taha kotoa,” ko e faʻahinga tangata peheé te ne maʻu ʻa e hakeakiʻí mo e nāunaú. Ka ko kinautolu ʻoku nau lea ʻaki ʻení ʻoku ʻikai ke nau manatuʻi e folofola ʻa e ʻEikí, ka “ ʻIkai fanauʻi foʻou ʻa e tangatá he ʻikai mamata ia ki he puleʻanga ʻo e langí.” [Vakai, Sione 3:3.] … Tatau ai pē ia pe ko e hā hano lahi ʻene leleí, pe ko e hā hano faʻahinga fakaʻeiʻeiki, pe ko e hā hano lahi ʻo ʻene faitotonú, kuo pau ke ne fou atu ʻi he matapā ko iá kae lava ke hū ki he puleʻanga ʻo e ʻOtuá. ʻOku fie maʻu ia ʻe he ʻEikí. Ko ia ai, kapau te ne fakasītuʻaʻai pe fakafisi ke hū ʻi he matapā ki he tākangá, he ʻikai teitei lava ia ʻo hoko ko ha ʻea hoko ʻo e ʻOtuá pe kaungā-ʻea hoko fakataha mo Sīsū Kalaisi.4
Ko e fakatomala mei he angahalá ko ha tefitoʻi moʻoni taʻengata ia, pea ʻoku mahuʻinga ia ʻi hono tuʻungá, pea ʻoku mahuʻinga tatau pē ʻene hoko ko e konga ʻo e ongoongolelei ʻo Sīsū Kalaisí mo e: “ ʻoua naʻá ke fakapoó,” pe, “ ʻoua naʻá ke maʻu mo au ha ʻotua kehe ʻi hoku ʻaó.”
Ko e papitaiso ke fakamolemole ʻo e angahalá ʻe ha taha ʻokú ne maʻu ʻa e mafaí, ko ha tefitoʻi moʻoni taʻengata ia, he ko e ʻOtuá naʻá ne faʻu mo tuʻutuʻuni iá, pea naʻe aʻu kia Kalaisi ʻene talangofua ki aí; naʻe pau ke talangofua ki ai kae lava ke ne fakakakato ʻa e fono ʻo e angatonú.5
Naʻe akoʻi ʻe he ʻEikí ʻo fakafou ʻia Siosefa Sāmita; ko e fakatomala mei he angahalá, pea hoko ai mo e papitaiso ʻi he fakauku fakataha mo Kalaisí, ʻo tanu fakataha mo ia ʻi he vaí, ʻi he faʻitoka vai ko ʻení, pea toetuʻu mai mei he faʻitoka vai ko ʻení ʻi he tatau ʻo ʻene toetuʻu mei he maté ki he moʻuí, hili e papitaiso ʻi he fakaukú, pea mo e papitaiso ʻi he Laumālie Māʻoniʻoní, ʻi he hilifaki ʻo e nimá; ʻoku fie maʻu ʻa e ngaahi meʻá ni ki he fakamoʻui ʻo e fānau ʻa e tangatá.6
Ko e fakatomala moʻoní pē ʻoku tali ʻe he ʻOtuá.
ʻE toki lava pē ke fakamoʻui mo hakeakiʻi ʻa e tangatá ʻi he puleʻanga ʻo e ʻOtuá ʻi he angatonu, ko ia kuo pau ai ke tau fakatomala mei heʻetau ngaahi angahalá, pea ʻaʻeva ʻi he māmá ʻo hangē ko e ʻaʻeva ʻa Kalaisi ʻi he māmá, koeʻuhí ke fakamaʻa kitautolu ʻe hono taʻataʻá mei he angahala kotoa, pea ke tau lava ʻo feohi mo e ʻOtuá mo maʻu ʻa hono nāunaú mo e hakeakiʻí.7
ʻOku kau nai ʻi he fakatomalá ʻa e ongoʻi loto mamahi ʻi he fai ʻo e meʻa ʻoku halá? ʻIo, ka ko hono kakato ia? ʻIkai ʻaupito. Ko e fakatomala moʻoní pē ʻoku tali ʻe he ʻOtuá, pea ʻoku ʻikai ha meʻa ia ʻe siʻi ange ai te ne lava ke fakakakato ʻa e taumuʻa totonu ʻo e fakatomalá. Ko e fē leva ʻa e fakatomala moʻoní? ʻOku ʻikai ko e fakatomala moʻoní pē ke ongoʻi mamahi ʻi he angahalá, pe fakameʻapangoʻia ʻi he anga fakatōkilalo mo angamalū ʻi he ʻao ʻo e ʻOtuá, ka ʻoku kau ai ʻa e fie maʻu ke tafoki fakaʻaufuli mei he ngaahi angahalá, ʻo taʻofi ʻa e ngaahi ʻulungaanga mo e ngaahi tōʻonga kovi kotoa pē, ʻa ia ko ha liliu moʻoni ʻo e moʻuí, ko ha liliu mātuʻaki mahuʻinga mei he koví ki he leleí, mei he angaʻulí ki he angamaʻá, mei he fakapoʻulí ki he māmá. ʻIkai ngata ai, ka ke fai ha totongi huhuʻi, ʻi he meʻa ko ē ʻe ala lavá, ʻi he ngaahi fehālaaki kotoa pē kuo tau faí, ke totongi hotau ngaahi moʻuá, pea fakafoki ki he ʻOtuá pea ki he tangatá ʻa ʻena ngaahi totonú—ʻa e ngaahi totonu ko ē ʻoku totonu ke nau maʻu meia kitautolú. Ko e fakatomala moʻoní ʻeni, pea ʻoku fie maʻu ke ngāueʻaki ai ʻa e loto mo e mālohi kotoa ʻo e sinó mo e ʻatamaí, ke fakahoko ʻa e ngāue nāunauʻia ko ʻeni ʻo e fakatomalá; pea ʻe toki tali leva ʻe he ʻOtuá.8
ʻOku ʻikai tali ʻe he ʻOtuá ha fakatomala fakamatalaʻi pē ʻe he ngutú, tuku kehe ka toki fakahoko ia ʻi he ngāue. Kuo pau ke tau ngāue ʻo hangē pē ko ʻetau fie maʻu ʻa e tuí; kuo pau ke tau fakahoko kae ʻikai hangē ko ʻetau faʻa fakangalingali ʻoku tau faʻa faí.9
Ko hai ia te ne lava ʻo pehē ʻi hono lotó, pea ʻi he ʻao ʻo e ʻOtuá mo e tangatá, “Kuó u fakatomala moʻoni mei heʻeku ngaahi angahalá kotoa.”… ʻOku lahi fau haku ngaahi vaivai mo haʻaku ngaahi fehālaaki. ʻOku lahi fau hoku ngaahi vaivaí ʻo hangē ko ha tokolahi ʻo kimoutolu, pea ʻoku ʻikai ke u fakapapauʻi kae mahalo ʻoku lahi ange haʻakú ia ʻi ha tokolahi ʻo kimoutolu…. Kuo teʻeki ke u lava ʻo tauhi kakato mo fakahoko ʻa e tefitoʻi moʻoni ko ʻeni hono ua ʻo e ongoongolelei ʻo Sīsū Kalaisí; ka ʻoku ou fie mamata ki ha tangata kuó ne lava. ʻOku ou fie mamata ki ha tangata malanga kuó ne lava ʻo fakahoko ia. Ka ʻoku ou kei feinga, ʻoku ou loto pē ke mahino ʻeni kia kimoutolu, ʻe hoku ngaahi tokoua mo e tuofāfine, ʻoku ou kei fāifeinga pē.10
He ʻikai ke mou lava ʻo ʻomai ha tokotaha fakapō, … ha tokotaha tono, ha taha loi, pe ko ha taha naʻe pe ʻoku mātuʻaki anga fakalielia ʻi heʻene moʻui ʻi hení, ʻo pehē ko hano fakahoko pē ha foʻi ouau ʻo e ongoongoleleí, ki ai kuo fakamaʻa ai ia mei heʻene angahalá pea fakafeʻao atu ai ia ki he ʻao ʻo e ʻOtuá. Kuo teʻeki ke fokotuʻu ʻe he ʻOtuá ia ha faʻahinga palani pehē, pea he ʻikai lava ke fakahoko ia. Kuó ne folofola kuo pau ke mou fakatomala mei hoʻomou ngaahi angahalá. Kuo pau ke fakatomala ʻa e kau angahalá mei heʻenau ngaahi faiʻangahalá. Ko kinautolu ne nau mate ʻoku teʻeki ke nau ʻilo ki he ongoongoleleí kuo pau ke nau ʻilo ki ai, pea ko kinautolu kuo nau faiangahala ki he māmá kuo pau ke nau totongi kakato ki heʻenau maumau fonó pea mo ʻenau mavahe mei he ongoongoleleí, ki muʻa pea toki faifaiangé pea nau lava ʻo foki mai ki ai. ʻOua naʻa ngalo ia. ʻOua naʻa ngalo ia ngaahi kaumātuʻa ʻo ʻIsileli, pe ko kimoutolu ngaahi faʻē ʻi ʻIsilelí; pea ka mou ka feinga ke fakahaofi ʻa e kakai moʻui pe kau pekiá, manatuʻi te mou toki lava pē ke fakahoko ia ʻi he tefitoʻi moʻoni ʻo e fakatomalá pea mo hono tali ʻo e palani ʻo e moʻuí.11
Kuo hokosia e taimi ʻo e fefakalelei ʻakí… . ʻa ia kuo pau … ke tau kole fakamāotato ai ki he ʻEikí ke maʻu ʻa e laumālie ʻo e fakatomalá, pea ʻi heʻetau maʻu iá, muimui ki heʻene ngaahi ueʻí; he ʻi heʻetau fakamāʻulaloʻi kitautolu ʻi hono ʻaó pea mo kole fefakamolemole ʻakí, te tau ʻoatu ai ʻa e ʻofa faka-Kalaisí pea mo e angaʻofá kia kinautolu ʻoku nau fuʻu fie maʻu ʻetau fakamolemole ʻoku tau kole mo ʻamanaki ʻe maʻu mei he Langí.12
ʻI he lolotonga ʻo e kei ʻi ai ʻa e moʻuí ʻoku kei maʻu pē ha ʻamanaki lelei, pea ʻi he kei ʻi ai ʻa e fakatomalá ʻoku kei maʻu pē ha faingamālie ke fakamolemoleʻi; pea kapau ʻoku ʻi ai ha fakamolemole, ta ʻoku ʻi ai ha faingamālie ke ʻi ai ha tupulaki mo ha fakalakalaka kae ʻoua kuo tau maʻu ʻa e ʻilo kakato ki he ngaahi tefitoʻi moʻoni te ne hākeakiʻi mo fakamoʻui kitautolú pea mo teuteuʻi kitautolu ke tau hū ki he ʻao o e ʻOtua ko e Tamaí.13
ʻI he papitaisó ʻoku tau hū ai ki he Siasí pea mo e puleʻanga ʻo e ʻOtuá.
ʻI he hili ʻo e fakatomalá, ko e meʻa leva hono hoko ʻoku fie maʻú ko e papitaiso, ʻa ia ko ha tefitoʻi moʻoni mahuʻinga ia ʻo e ongoongoleleí—he ʻikai ha tangata ia ʻe lava ke ne fai ha fuakava ʻo e ongoongoleleí taʻe tomuʻa mau ʻeni. Ko e matapā ia ʻo e Siasi ʻo Kalaisí, he ʻikai ke tau lava ʻo hū ki ai ʻi ha toe faʻahinga founga kehe, he kuo ʻosi folofola ʻa Kalaisi, , ko e “afuhí,” pe “lilingí,” ʻoku ʻikai ko ha papitaiso ia. Ko e ʻuhinga ʻo e papitaisó ko e fakangalo hifo ʻi he vai, pea kuo pau ke fakahoko ia ʻe ha tokotaha ʻokú ne maʻu ʻa e mafaí, ʻi he huafa ʻo e Tamaí, pea mo e ʻAló, pea mo e Laumālie Māʻoniʻoní. ʻOku ʻikai hano ʻaonga ʻo e papitaiso taʻe kau ai ʻa e mafai fakalangí. Ko ha fakataipe ia ʻo e telio pea mo e toetuʻu ʻa Sīsū Kalaisí, pea kuo pau ke fakahoko ia ʻi hono tataú, ʻe ha taha kuo tuʻutuʻuni ʻe he ʻOtuá, ʻi he founga kuo fakamahinoʻi maí, he ka ʻikai pea ta ʻoku ʻikai totonu pea he ʻikai ke ne tali ia, pe ʻe lava ke hoko ai ha fakamolemole ia ʻo e angahalá, ʻa e kaveinga koē ne fakataumuʻa ki aí, ka ko ia fulipē ʻoku tuí, fakatomala moʻoni pea “tanu fakataha mo Kalaisi ʻi he papitaisó,” ʻe ha taha ʻokú ne maʻu ʻa e mafai fakalangí, te ne maʻu ha fakamolemole ʻo ʻene ngaahi angahalá, pea ʻoku ʻi ai ʻene totonu ke maʻu ʻa e meʻafoaki ʻo e Laumālie Māʻoniʻoní ʻi he hilifaki ʻo e nimá.14
ʻOku papitaiso kitautolu ʻi he huafa ʻo e Tamaí pea mo e ʻAló pea mo e Laumālie Māʻoniʻoní. ʻOku fakakau ai kitautolu ki he Siasi pea mo e Puleʻanga ʻo e ʻOtuá ʻi he huafa ʻo e Tamaí pea mo e ʻAló pea mo e Laumālie Māʻoniʻoní, pea ʻoku tau lotu ki he Tamaí. ʻOku tau feinga ke talangofua ki he ʻAló pea mo molomolomuivaʻe ʻiate ia.15
Ko e fatongia ia ʻo e Kau Māʻoniʻoni ʻi he Ngaahi ʻAho Kimui Ní ke nau akoʻi ki heʻenau fānaú ʻa e moʻoní, ke ohi hake kinautolu ʻi hala ʻoku totonu ke nau fou aí, ke akoʻi kia kinautolu ʻa e ngaahi ʻuluaki tefitoʻi moʻoni ʻo e ongoongoleleí, ʻa hono mahuʻinga ʻo e papitaiso ki he fakamolemole ʻo e ngaahi angahalá, pea mo ʻetau hoko ko e mēmipa ʻi he Siasi ʻo Kalaisí. 16
Ko e papitaiso ʻi he fakauku ki he fakamolemole ʻo e ngaahi angahalá, ʻe ha taha ʻokú ne maʻu ʻa e mafaí, ko ha tefitoʻi moʻoni totonu ia mo moʻoni, koeʻuhí he naʻe akoʻi ia ʻe Kalaisi; Naʻe talangofua ki ai ʻa Kalaisi, pea naʻe ʻikai te ne teitei tuku ha faʻahinga ʻuhinga ke ne taʻe fakahoko ai ia—ʻo ʻikai ko e ʻuhingá naʻe faiangahala pea naʻe fie maʻu ke papitaiso ke fakamolemole ai ʻene ngaahi angahalá, ka naʻá ne fie maʻu pē ʻe ia ke ne fakahoko ʻeni ke fakakakato ai ʻa e angatonu kotoa, ʻa ia ko hono, fakakakato ʻo e fonó.17
Naʻe fakahoko totonu kia Sīsū ʻa e ouau ʻo e papitaisó; naʻá ne fokotuʻu mo e sākalamēniti ʻo e ʻohomohe ʻa e ʻEikí, fakanofo kinautolu naʻa nau fakahoko iá; pea mo fakahoko mo ha ngaahi ouau kehe naʻá ne afioʻi ʻoku mahuʻinga ki he fakamoʻui ʻo e tangatá. Fekauʻaki mo Nikotīmasí, naʻá ne fakamamafaʻi ai ʻa e papitaisó ʻo ne ʻai ʻa e fanauʻi ʻi he vaí mo e Laumālié ko ha meʻa mahuʻinga ia ki he fakamoʻui ʻo e tangatá [vakai, Sione 3:1–5].18
ʻOku hangē ʻoku ʻi ha niʻhi ʻo hotau kakaí, ha fakakaukau taʻemaaʻusia ki hono toputapu ʻo ha ngaahi ouau ʻe niʻihi ʻo e Lakanga Fakataulaʻeikí. ʻOku moʻoni pē ia, ko e ngāue ʻanautolu ko ē ʻoku maʻu mafaí ʻoku ʻikai fakahoko ia ʻaki … ha founga fakahāhā pe ouau fakaemāmani… , ka koeʻuhí ko e foʻi moʻoni ko ia ʻoku maʻu ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e Lakanga Fakataulaʻeikí, ʻoku feʻunga pē ia ke lau ai ha taha pē pe ko hono kotoa ʻo e ngaahi ouaú ʻi he mafai totonu ʻi he Siasí, ko ha meʻa ʻoku mātuʻaki mahuʻinga fau. ʻI hano fakahoko ha faʻahinga ouau pehē ʻoku ʻikai lea mo fakahoko ai ʻe he tokotaha ʻokú ne fakahoko ʻa e ouaú, ʻiate ia pē pe ʻi hano mafai ʻoʻona pē, ka ʻi he mafai ʻo hono fakanofó pea mo hono fokotuʻu ia ko e fakafofonga ʻo e ngaahi mālohi ʻo e langí. ʻOku ʻikai ke tau … ʻai ʻa e ouau ʻo e papitaisó ko ha meʻa ke fakahāhaaʻi hono fakahokó; ka ʻi he angangofua ʻo e faʻunga kuo fokotuʻu ʻi he Siasi ʻo Kalaisí ʻoku totonu ke ne tānaki atu ai kae ʻikai ko haʻane toʻo ʻa e natula toputapu ʻo e ngaahi ouaú.19
ʻE hākeakiʻi ʻe he ʻOtuá kinautolu ʻoku fakatomala, papitaiso, pea hoko atu ʻi he fai velengá.
ʻOku ʻi ai ha ngaahi tāpuaki fekauʻaki mo e ongoongolelei ʻo Sīsū Kalaisí pea mo e maama ka haʻú, he ʻikai lava ʻo puke ia ʻe ha mālohi fakafoʻituitui, pe ʻe fakatau ʻaki ha paʻanga, pea he ʻikai lava ʻe ha tangata ʻi heʻene ʻiló pe potó ʻo maʻu ia tukukehe pē ka toki fai pau ki he ngaahi ouau, ngaahi fono mo e ngaahi fekau kuo ʻosi foaki maí. Pea ʻoku lelei pē ia, ʻi he anga ʻo ʻeku fakakaukaú, ke kei manatuʻi maʻu pē ʻe he Kau Māʻoniʻoni ʻi he Ngaahi ʻAho Kimui Ní, ko e ngaahi tāpuaki mahuʻinga fau ʻo e ongoongoleleí kuo ʻosi ʻomi ki māmani ʻo makatuʻunga ʻi he tuí, pea ko e fakamolemole ʻo e angahalá kuo maʻu ia ʻi he papitaisó mo e fakatomalá, pea ʻoku toki makatuʻunga ʻi he fai velenga taʻe tukú haʻatau lava ʻo pukepuke ʻa e ngaahi meʻafoaki mo e ngaahi tāpuaki ʻoku fekauʻaki mo e moʻui taʻengatá.20
Pea, ʻoku mau pehē ai kia kimoutolu kuo fakatomala mei hoʻomou ngaahi angahalá, ʻa ē kuo ʻosi tanu fakataha mo Kalaisi ʻi he papitaisó, ʻa kimoutolu kuo fokotuʻu hake mei he faʻitoka ʻo e vaí ki ha moʻui ʻoku foʻoú, ʻa ia kuo fanauʻi foʻou ʻi he vaí mo e Laumālié, pea kuo fakahoko ko e fānau ʻa e Tamaí, ko e kau ʻea hoko ʻo e ʻOtuá pea mo e kaungā-ʻea hoko fakataha mo Sīsū Kalaisí—ʻoku mau pehē kia kimoutolu, kapau te mou tauhi e ngaahi fono ʻa e ʻOtuá, pea ʻikai toe fai kovi, … pea tui ki he ʻOtuá, tui ki he moʻoní pea maʻu ia, mo faitotonu ʻi he ʻao ʻo e ʻOtuá mo e tangatá, ʻe fakanofo kimoutolu ke māʻolunga, pea ʻe fokotuʻu kimoutolu ʻe he ʻOtuá ki muʻa, ʻo fakapapauʻi tatau pē ia mo hoʻomou tauhi ʻa e ngaahi fekau ko ʻení. Ko ia fulipē te ne tauhi e ngaahi fekau ʻa e ʻOtuá, ʻo tatau ai pē ia pe ko kimoutolu pe ko ha niʻihi kehe, te nau tuʻu ʻo ʻikai tō, te nau taki kae ʻikai muimui, te nau ʻalu hake kae ʻikai hifo. ʻE hākeakiʻi kinautolu ʻe he ʻOtuá mo langomaki kinautolu, pea mo lau ʻoku ʻaʻana kinau-tolu. Ko ʻeku fakamoʻoni ia kia kimoutolú.21
Ko e ongoongolelei ʻeni ʻo Sīsū Kalaisí, ke te ʻiloʻi ʻa e ʻOtua moʻoni pē tahá pea mo hono ʻAlo ne ne fekau maí ki he māmaní, ʻa ia ko e ʻilo ʻeni ʻoku maʻu ia ʻi he talangofua ki heʻene ngaahi fekaú kotoa, tui, fakatomala mei he angahalá, papitaiso ʻi he fakauku ki he fakamolemole ʻo e ngaahi angahalá, maʻu ʻa e meʻafoaki ʻo e Laumālie Māʻoniʻoní ʻi he hilifaki ʻo e nima ʻi he mafai fakalangí, kae ʻikai fakatatau mo e loto ʻo e tangatá. Ko e meʻá ni leva, ko e ongoongolelei ia ʻo Sīsū Kalaisí ʻa ia ko e mālohi ia ʻo e ʻOtuá ki he fakamoʻuí: talangofua ki he moʻoní, fakavaivai ki he faʻunga kuo fokotuʻu ʻe he ʻOtuá ʻi hono falé, he ko e fale ʻo e ʻOtuá ko e fale ia ʻo e maau ka ʻoku ʻikai ko ha fale ʻo e moveuveu.22
ʻOku mau fakamoʻoni ko e ʻā-vahevahe ʻokú ne fakamavaheʻi ʻa e tangatá mei he ʻOtuá kuo ʻosi ikunaʻi, pea kuo toe fakahoko mai ʻe he ʻEikí ʻa hono finangaló ki he tangatá. Ne pehē ʻe ha taha, “Ka ʻe anga fēfē haʻatau maheni mo e ngaahi meʻá ni? ʻE anga f’ēfē haʻamau ʻiloʻi ʻoku ʻikai ke ke kākā?” ʻOku mau lea ki he faʻahinga peheé, fakatomala mei hoʻomou ngaahi angahalá ʻi he loto fakamātoato moʻoni, pea laka atu ʻo papitaiso, mo tuku ke hilifaki ʻa e ngaahi nimá ki homou ʻulú ke mou maʻu ʻa e meʻafoaki ʻo e Laumālie Māʻoniʻoní, pea ʻe fakamoʻoniʻi ʻe he laumālie ko iá ki hono moʻoni ʻo ʻemau fakamoʻoní, pea te mou hoko ko e kau fakamoʻoni ki ai ʻo hangē ko kimautolú, pea te mou malava ai ke tuʻu taʻe toe heliaki ʻo fakamoʻoni ki māmani ʻo hangē ko ia ʻoku mau faí.23
Ngaahi Fokotu’u ki he Akó
-
Ko e hā ʻa e “fakatomala moʻoni”? Ko e hā ʻoku muʻomuʻa ai ʻa e fakatomalá ʻi he papitaisó?
-
ʻOku uesia fēfē kitautolu ʻe heʻetau talangataʻa ki he fono ʻa e ʻOtuá? Ko e hā ʻoku lelei ange ai ke tau talangofua ki he ngaahi fono ʻa e ʻOtuá ʻi haʻatau faiangahala ʻo fakakaukau ke tau toki fakatomala ʻa muí?
-
ʻOku ʻomi fēfē ʻe he tefitoʻi moʻoni ʻo e fakatomalá ha ʻamanaki lelei kia kitautolu? (Vakai foki, Molonai 7:41.) ʻOku anga fēfē hono lau ʻo e fakatomalá ko ha “faingamālie ke tupulaki mo fakalakalaka”?
-
Ko e hā haʻo faʻahinga ongoʻi ʻi hoʻo ʻiloʻi ne papitaiso kitautolu ʻe ha taha ne ʻosi fakamafaiʻi ʻe Sīsū Kalaisi, ʻi he huafa ʻo e Tamaí pea mo e ʻAló pea mo e Laumālie Māʻoniʻoní? (Vakai foki, T&F 20:73.) Naʻá ke ongoʻi fēfē ʻi hono papitaiso koé pe ʻi ha taimi ne ke ʻalu ai ki hano papitaiso ʻo ha kakai kehe?
-
Ko e hā ʻoku mahuʻinga ange ai ʻa e mafai ʻo e lakanga fakataulaʻeikí ke fai papitaisó ki he ouau ʻo e papitaisó ʻi ha faʻahinga “faʻahinga ouau fakahāhā fakamāmani”? ʻE anga fēfē hano pukepuke ʻo e founga faingofua ʻoe ouau ʻo e papitaisó pea mo hono ngeiá?
-
Ko e hā ha faʻahinga ʻilo mo ha tāpuaki kuó ke maʻu tuʻunga ʻi he fakatomalá mo e papitaisó? ʻE anga fēfē haʻo pukepuke ʻo e ngaahi tāpuaki ko iá?
-
Ko e hā ʻa e ngaahi fuakava ʻoku tau fakahoko ʻi he taimi ʻoku tau papitaiso aí? (Vakai foki, Mōsaia 18:8–10; T&F 20:37.) Hili ho papitaisó, kuo anga fēfē hoʻo tauhi hoʻo ngaahi fuakava mo e Fakamoʻuí?