Talateú
Ne hoko ʻa Palesiteni Siosefa F. Sāmita ko ha Taki Māʻolunga ʻo e Siasí ʻi ha taʻu ʻe 52—ko ha mēmipa ʻo e kōlomu ʻo e Toko Hongofulu Mā Uá, ko ha Tokoni ki ha Kau Palesiteni ʻe toko fā ʻo e Siasí, pea taʻu ʻe 17 ko e Palesiteni ʻo e Siasí. Naʻá ne akoʻi mahino, pea ʻi he ʻofa, mo e ʻiloʻi pau ʻa e ongoongolelei ʻo Kalaisi kuo fakafoki maí, ʻo uki ʻa e kakaí ke nau “moʻui fakatatau mo e ngaahi palani ʻa ʻetau Tamai Hēvaní.”1 Naʻe fakaʻilongaʻi ʻaki ʻene ngāué ʻe ne fakamoʻoni mālohi kia Sīsū Kalaisí: “Kuó u ʻosi maʻu e fakamoʻoni ʻa e Laumālié ʻi hoku lotó, pea ʻoku ou fakamoʻoni ai ʻi he ʻao ʻo e ʻOtuá, kau ʻāngeló pea mo e tangata kotoa … ʻoku ʻou ʻiloʻi ʻoku moʻui hoku Huhuʻí.”2
ʻOku kei hokohoko ai pē ʻa ʻene ngaahi pōpoakí mo ʻene ngaahi malangá ʻi he ʻahó ni ke ne ʻomi ha ngaahi fakahinohino fakalangi ʻi hotau hala ʻo e fakalakalaka taʻengatá. Naʻe pehē ʻe Palesiteni Sāmita, ko ʻetau ngāue ʻi he māmaní, “ke fai ha lelei, ke moloki hifo ʻa e faiʻangahalá ʻi hotau lalo vaʻé, ke hakeakiʻi ʻa e angatonú, maʻá, pea mo e māʻoniʻoni ʻi he loto ʻo e kakaí, pea ke fakatō ki he ʻatamai ʻo ʻetau fānaú, ʻo māʻolunga ange ʻi ha toe meʻa, ha ʻofa ki he ʻOtuá pea mo ʻene folofolá.”3 Naʻá ne pehē koeʻuhí ke “te hoko ko ha Taha Māʻoniʻoni ʻi he Ngaahi ʻAho Kimui Ní, ʻoku fie maʻu ai ke feilaulauʻi ʻetau ngaahi taumuʻa mo ʻetau ngaahi fakahōhōloto fakamāmaní; ʻoku fie maʻu ai ke tau anganofo, tuʻu maʻu ʻetau tōʻongá, ʻofa he moʻoní, ngeia ʻi he tefitoʻi moʻoní, pea mo ha holi moʻoni ke mamata ki ha ikuna, ʻi he laka ki muʻa ʻa e moʻoní.”4
Kuo fokotuʻu ʻe he Kau Palesitenisī ʻUluakí mo e Kōlomu ʻo e Toko Hongofulu Mā Uá ʻa e ngaahi tohi ʻo e Ngaahi Akonaki ʻa e Kau Palesiteni ʻo e Siasí ke tokoni ʻi hono fakalahi ange ʻo e mahino ʻa e kāingalotú ki he ngaahi tokāteline ʻo e ongoongoleleí pea ʻunu ʻo ofi ange kia Sīsū Kalaisi ʻo fou ʻi he ngaahi akonaki ʻa e kau palōfita ʻo e kuonga fakakosipelí ni. ʻOku fakahā ʻi he tohí ni ʻa e ngaahi akonaki ʻa Palesiteni Siosefa F. Sāmita, ʻa ia ʻoku pehē: “Koeʻuhí ke tau hoko ko ha Kau Māʻoniʻoni ʻi he Ngaahi ʻAho Kimui Ní, kuo pau ke hoko ai ʻa e houʻeiki tangatá mo e houʻeiki fefiné ko ha kakai faʻa fakakaukau, mo ha kakai ʻoku ngāue; kuo pau ke nau hoko ko ha houʻeiki tangata mo ha houʻeiki fefine ʻoku nau fakakaukauʻi fakalelei ʻa e ngaahi meʻá ʻi honau ʻatamaí, ko ha houʻeiki tangata mo ha houʻeiki fefine ʻoku nau fakakakauʻi lelei honau ʻaluʻanga ʻi he moʻuí pea mo e ngaahi tefitoʻi moʻoni kuo nau talí…. Ko e taimi ʻoku mahino ai ki he kakaí ʻa e ongoongolelei ʻo Sīsū Kalaisí, te mou fakatokangaʻi ʻoku nau laka ki muʻa, ʻo fakatatau mo e folofola ʻa e ʻEikí, pea mo e fono ʻa e ʻOtuá, pea tatau matemātē mo ia ʻoku fenāpasi, totonu, māʻoniʻoni, pea mo fakahōifua ʻi he tapa kotoa pē ki he ʻEikí.”5
ʻOku konga fā ʻa e vahe kotoa pē ʻi he tohí ni: (1) ko ha kupuʻi lea ʻokú ne fakamatalaʻi nounou ʻa e taumuʻa ʻo e vahé; (2) “Mei he Moʻui ʻa Siosefa F. Sāmitá,” ʻa ia ʻokú ne fakamāʻalaʻala ʻa e ngaahi akonaki ʻi he vahé ʻaki ha sīpinga mei he moʻui pe poto ʻo Palesiteni Sāmitá; (3) “Ngaahi Akonaki ʻa Siosefa F. Sāmitá,” ʻa ia ʻokú ne ʻomi ha ngaahi tokāteline mahuʻinga mei heʻene ngaahi pōpoakí mo ʻene ngaahi malangá; pea mo e (4) “Ngaahi Fokotuʻu ki he Ako,” ʻa ia ʻokú ne fakaʻaiʻai ke toe vakaiʻi fakafoʻituitui pea mo fakatotolo, toe aleaʻi, pea mo fakaʻaongaʻi ʻi heʻetau moʻuí he ʻahó ni, ʻaki ha ngaahi fehuʻi.
Founga Fakaʻaongaʻi ʻo e Tohí
Ki he ako fakafoʻituituí. ʻOku fakataumuʻa ʻa e tohí ni ke ne fakaleleiʻi e mahino ʻa e mēmipa kotoa ʻo e ngaahi tefitoʻi moʻoni ʻo e ongongoleleí ne akoʻi mālohi ʻe Palesiteni Siosefa F. Sāmitá. Ka lau ʻi he faʻa lotu pea mo ako fakalelei ʻa e ngaahi moʻoní ni, ʻe lava ʻa e mēmipá fakatoʻituitui ke ne maʻu ha fakamoʻoni fakafoʻituitui ki ai. ʻE tānaki atu ʻa e tohí ni ki he laipeli fakafoʻituitui ʻo e ongoongoleleí ʻa e mēmipa kotoa pē pea ʻe hoko ko ha maʻuʻanga tokoni mahuʻinga ki hono fakahinohinoʻi ʻo e fāmilí pea mo e ako ʻoku fakahoko ʻi ʻapí.
Ki he fealēleaʻaki ʻi he ngaahi fakataha he Sāpaté. Ko e tohí ni ko e lēsoni ia ʻa e kōlomu ʻo e Lakanga Taulaʻeiki Faka-Melekisētekí pea mo e Fineʻofá ʻi heʻenau ngaahi fakataha Sāpaté. ʻOku totonu ke tokangataha pē ʻa e kau faiakó ki he kakano ʻo e lēsoní pea mo e ngaahi potu folofola ʻoku fekauʻaki mo iá, pea mo fakaʻaongaʻi ʻa e ngaahi fehuʻi ʻi he ngataʻanga ʻo e vahé ke fakaʻaiʻai ʻaki ʻa e ngaahi fealēleaʻaki ʻi he kalasí. ʻE ʻomai ʻe hano tomuʻa vakaiʻi ʻo e ngaahi fehuʻí ki muʻa pea mou toki ako ʻa e ngaahi lea ʻa Palesiteni Sāmitá, ha ʻilo makehe ki heʻene ngaahi akonakí.
ʻOku totonu ke tokangataha ʻa e ngaahi fakataha ʻo e Sāpaté ki he ngaahi tefitoʻi moʻoni ʻo e ongoongoleleí, ngaahi sīpinga lelei fakatāutaha ʻokú ne akoʻi ʻa e ngaahi tefitoʻi moʻoni ko ʻení, pea mo e ngaahi fakamoʻoni ki hono moʻoní. Kapau ʻe fekumi ʻa e kau faiakó ʻi he loto fakatō ki lalo ke maʻu ʻa e Laumālié ʻi he taimi te nau teuteu mo akoʻi ai ʻa e lēsoní, ʻe fakalahi ange ʻa e ʻilo ʻa e tokotaha kotoa ʻoku kau ʻi he lēsoní, ʻi heʻenau ʻiloʻi ʻa e moʻoní. ʻOku totonu ke fakamanatu ʻe he kau faiakó ki he kau mēmipa ʻo e kalasí ke nau omi mo ʻenau ngaahi tohí ki heʻenau ngaahi kalasí pea ʻoku totonu foki ke nau fakahoungaʻi e teuteu ʻa e kau mēmipa ʻo e kalasí ʻaki ʻenau akoʻi ʻa e ngaahi lea ʻa Palesiteni Siosefa F. Sāmitá. Kapau ne tomuʻa lau ki muʻa ʻa e vahé, ʻe mateuteu ai ʻa e kau mēmipa ʻo e kalasí ke akoʻi mo nau felangaki-hake ʻaki.
ʻOku ʻikai fie maʻu ia pe ʻe fokotuʻu atu ke fakatau ʻe he kāingalotú ha ngaahi tohi fakahinohino kehe pe ko ha ngaahi tohi fakamoʻoni folofola kehe ke poupouʻi ʻaki ʻa e lēsoní. ʻOku poupouʻi atu ʻa e kāingalotú ke nau huke ki he ngaahi folofola kuo ʻosi fokotuʻu atú ke nau ako lahi ange ai ki he tokāteliné.
Koeʻuhí naʻe faʻu ʻa e tohí ni ki he ngaahi ako fakafoʻituituí pea hoko ko ha fakamoʻoni ki he ongoongoleleí, ʻoku fuʻu lōloa ai ha ngaahi vahe ʻe niʻihi ke lava ʻo fakamatalaʻi kakato ʻi he kalasí. Ko ia ai, ʻoku mahuʻinga hono ako ʻi ʻapí ke ʻilo kakato ai ʻa e ngaahi akonaki ʻa Palesiteni Sāmitá.
ʻI hoʻo akó, ʻofa te ke ʻiloʻi lelei ai ʻa e palōfita anga fakatō-ki-lalo, fai-velenga, mo taʻe ilifia ko ʻeni ʻa e ʻOtuá ko Palesiteni Siosefa F. Sāmitá. ʻOfa ke ke tali ʻene faleʻí “ke ke fili ʻa e totonú koeʻuhí ko ʻene totonú, pea koeʻuhí ʻoku manako ho lotó ki he totonú, pea koeʻuhí he ʻoku mahuʻinga hake ia ʻi he toe meʻa pē.”6 ʻOfa ke ke kau fakataha mo Palesiteni Sāmita ʻi heʻene fakamoʻoniʻi e mā1ohi ʻo e ongoongolelei ʻo Sīsū Kalaisí: “Ko ʻetau tui ki he ngaahi tokāteline kuo ʻosi fakafoki maí… ʻokú ne fakamoʻoniʻi mo fakamālohia kitautolu pea mo fokotuʻu maʻu kitautolu ʻo ʻikai haʻatau toe fehuʻi pe fakaveiveiua, ʻi heʻetau tui mo falala ki he misiona fakalangi ʻo e ʻAlo ʻo e ʻOtuá.”7