Ko e Ngāue ʻi he Siasí

Tuku ke tau ngāue faivelenga ʻi hotau ngaahi Fatongiá, ʻo fakatatau mo e fakahinohino ʻa e mafai ʻo e lakanga fakataulaʻeikí.

Mei he Mo’ui ‘a Siosefa F. Sāmitá

Ko e taimi ko ē naʻe hoko ai ʻa Palesiteni Siosefa F. Sāmita ko e ʻAposetoló ne feʻunga mo ha taʻu ʻe 44 pea hoko ʻi ha taʻu ʻe 9 ko e Palesiteni ʻo e Siasí, naʻe lea ai ʻi he konifelenisi lahi ʻo ʻOkatopa 1910 ʻo ne pehē, “ ʻOku ou ongoʻi ha fiefia ʻi he pongipongí ni ʻi heʻeku maʻu ʻa e faingamālié ni ke u lea atu ai kia kimoutolu, fekauʻaki mo ʻeku fakahoko mo e ʻOtuá pea mo hono kakaí ha fuakava ʻi he ngaahi ʻaho ʻo ʻeku kei siʻí pea mo ʻeku tupu haké, te u faitotonu kia kinautolu.” Naʻá ne fakamatala ai ʻo pehē, naʻe talu mei he taimi ko iá mo ʻene ngāue faivelenga ʻi he ngaahi fatongia kotoa pē ne foaki ange ki ai.

“ ʻI heʻeku vakai atu ki he ngaahi meʻa naʻe hoko ʻi heʻeku moʻuí, ʻoku ʻikai ke u lava ʻo sio atu he taimí ni, pea ʻoku ʻikai ke u manatuʻi ʻe au ha taimi, talu mei he kamata ʻo ʻeku ngāue ʻi he māmaní, ha taimi ne u holo ai pe fakafiefiemālie ʻi he fuakava ne u fai mo e ʻOtuá pea mo hono kakaí, ʻi heʻeku kei talavoú…. ʻi he taimi ne u hoko ai ko e kaumātuʻa ʻi ʻIsilelí, naʻá ku feinga ke u faitotonu ki he fatongia ko iá; naʻá ku fai ʻa hoku lelei tahá ke u fakalāngilangiʻi mo tauhi totonu ʻa e lakanga ko ia naʻe uiuiʻi au ki aí. ʻI he taimi naʻá ku hoko ai ko e fitungofulú, naʻá ku ongoʻi ʻi hoku lotó ke u tauhi totonu ki he uiuiʻi ko iá, pea naʻá ku feinga ʻaki ʻa e kotoa ʻo e poto pea mo e māfana naʻá ku ongoʻí ke u tauhi totonu ki ai. ʻOku ʻikai ke u ʻiloʻi pe manatuʻi ha faʻahinga meʻa naʻá ku fai, pe ha faʻahinga taimi ʻi heʻeku moʻuí ne u taʻe faitotonu ai pe taʻe faivelenga ʻi he ngaahi uiuiʻi ko ʻeni ʻi he Lakanga Taulaʻeiki ʻo e ʻAlo ʻo e ʻOtuá. ʻI he konga ki mui ʻo ʻeku moʻuí, ʻi hono uiuiʻi au ke u hoko ko e ʻAposetoló, pea mo hoku fakanofo mo vaheʻi ke u hoko ko e toko taha ʻo e Toko Hongofulu Mā Uá, naʻá ku feinga ke u fakalāngilangiʻi ʻa e uiuiʻi ko iá, ke u faitotonu ki ai, pea ki hoku kāingá, ki he fale ʻo e tuí, pea ki he ngaahi fuakava mo e ngaahi fakapapau naʻe fekauʻaki mo hono maʻu ʻo e Lakanga Taulaʻeiki māʻoniʻoni ko ʻení, ʻa ia ʻoku ʻi he Lakanga ʻo e ʻAlo ʻo e ʻOtuá. ʻOku ʻikai ke u ʻiloʻi ha taimi ne u maumauʻi ai ha taha ʻo ʻeku ngaahi palōmesi pe fuakava ʻi he ngaahi fatongia ko ʻeni ne uiuiʻi au ki aí. Kuó u feinga ke u faitotonu mo faivelenga ʻi he ngaahi meʻá ni kotoa.”¹

Naʻe naʻinaʻi ʻa Palesiteni Sāmita ki he Kāingalotú ke nau fakatukupaaʻi kinautolu ki he ngāue ʻa e ʻEikí pea ke nau ngāue mate-aki–ʻi he ngaahi fatongia ʻi he lakanga fakataulaʻeikí, ʻi he ngaahi houalotu ʻo e Siasí, pea ʻi he ngaahi ngāue taʻe siokita kehe kotoa pē–pea ke nau fakaʻapaʻapaʻi maʻu pē ʻa e mālohi ʻo e lakanga faka-taulaʻeiki naʻe uiuiʻi mo tataki ʻaki kinautolú.

Ngaahi Akonaki ‘a Siosefa F. Sāmitá

ʻOku foaki mai ʻa e lakanga fakataulaʻeikí koeʻuhí ko e ngāue tokoní.

ʻOku ʻikai foaki mai ʻa e lakanga fakataulaʻeikí ia ke fakalāngilangiʻi pe fakangeingeia ʻaki ʻa e tangatá, ka ke tokoniʻi ʻaki kinautolu, ʻe kinautolu kuo nau maʻu ʻa e fatongia toputapu ke tokoni kia kinautolú. Tuku muʻa ke tau manatuʻi naʻe aʻu pē ki hotau ʻEikí, ʻi he taimi naʻe mafasia ai hono sinó mo ongoʻi vaivai tuʻunga ʻi he lotu mo e ʻaukai hokohoko naʻá e faí, naʻá ne tekeʻi hono ʻahiʻahiʻi ia ʻe Sētane ke ne fakaʻaongaʻi ʻa e mafai mo e mālohi naʻá ne maʻu ʻi heʻene hoko ko e Mīsaiá, ke fakahoko ʻaki ʻa e ngaahi meʻa naʻá ne fie maʻu he taimi pē ko iá.

Ko e tuʻunga lāngilangi ʻoku foaki ʻe he ʻOtuá pea mo ia ʻoku mahulu hake ʻi he ngaahi fakahīkihiki ʻa e tangatá, ʻa ē ʻoku fekauʻaki mo e ngaahi fatongia ʻi he Lakanga Faktaulaʻeiki Māʻoniʻoní, ʻoku ʻikai totonu ke fakaʻaongaʻi pe fai ha fakakaukau ki ai ʻo pehē ko ha ngaahi tuʻunga ne fakatupu ʻe he tangatá; ʻoku ʻikai ʻuhinga kinautolu ko ha fakamatamatalelei pe ke fakahā ʻaki ha tuʻunga fakapule, ka ko hano fokotuʻu ke fakahoko ha tokoni ʻi he loto fakatōkilalo he ngāue ʻa e ʻEikí pē Taha ko ia ʻoku tau pehē ʻoku tau tauhí.²

Kuó u ʻiloʻi ha kau Kaumātuʻa ʻoku nau mateuteu maʻu pē ʻi heʻenau moʻuí ke ngāue ʻi ha faʻahinga taimi pē ʻe ui ai kinautolu; kuo teʻeki tuʻo taha ke nau nofo hifo ʻo fehuʻia ʻa e ngaahi ui kuo fai kiate kinautolú, pe te nau nofo hifo ʻo fakakaukauʻi ʻa e ngaahi meʻa fakamāmani ʻoku nau manako aí, ka kuo nau ō mo omi ʻi he taimi kotoa ʻoku kole ai ʻe honau kau takí ke nau ngāue ki hono tauhi ʻo e kakaí pea mo ngāue maʻá e ʻEikí…. ʻOku nau mateuteu maʻu pē mo loto fiemālie ʻo hangē ha tangata leʻo kuo mateuteú, ʻo ʻikai ke toe kiʻi nofo hifo ʻo fakakaukau ki heʻenau ngaahi fiemaʻu fakafoʻituituí…. Kuo nau fai ʻeni ʻaki honau lotó kotoa, pea kuo teʻeki tuʻotaha ke nau lau ko ha fakamafasia ʻa e ngaahi ngāue ʻoku nau faí; mole ke mamaʻo, naʻa nau fiefia ai, nēkeneka ai pea mo ongoʻi nonga mo fiemālie…. ʻOku nau kei mateuteu pē mo loto fiemālie ke ō pe omi, pea ke fai ha faʻahinga meʻa pē ʻe fie maʻu ke nau fai, mo lau he taimi kotoa pē honau fatongia ʻi he lakanga fakataulaʻeikí ko ha fangamālie mo ha meʻa ʻoku mahuʻinga ange ʻi heʻenau ngaahi fiemaʻu fakatāutahá.³

He ʻikai ngata pē ʻe hano hanga ʻe he ngaahi fakataha fakauike ʻa e ngaahi kōlomu ʻo e lakanga fakataulaʻeikí…. ʻo fakatupulaki ʻa e poto ʻoku maʻu ʻe he taha maʻu lakanga fakataulaʻeikí….ʻo tuʻunga ʻi he ngaahi meʻa kuo nau akó, ka ʻokú ne fakatahatahaʻi tuʻo taha mai ʻa e houʻeiki tangatá he uike, pea te nau angaʻaki ai ke ngāue maʻu pē ko ha kau tamaioʻeiki ʻa e ʻEikí.⁴

ʻE ʻOtua, tāpuakiʻi muʻa ʻa e Lakanga Fakataulaʻeikí, ʻa e kau tangata fakaʻeiʻeikí ni, ʻa e kau tangata maʻá ni, ko ha kau tangata anga-tonu, kau tangata lāngilangiʻia, kau tangata faitotonu, ʻa e kau tangata tokolahí ni kuo nau fakatahataha mai mei he ngaahi puleʻanga ʻo e māmaní koeʻuhi ko ʻenau ʻofa ʻi he ongoongolelei; pea ko honau tokolahi naʻe fanauʻi mai ʻa kinautolu ʻi he fuakava ʻo e Lakanga Fakataulaʻeiki, pea ʻoku ou lotua ki he ʻOtua, ʻe hoku ngaahi tokoua, ke ne tāpuakiʻi kimoutolu ʻo lahi ʻaupito ʻaki ʻa ʻEne anga-lelei, ʻa ʻEne ʻaloʻofa pea mo ʻene manavaʻofa, koeʻuhi ke mou tuʻumālie ʻi he fonua, pea ke mou hoko ko ʻEne kau tamaioʻeiki moʻoni.⁵

ʻOku tuku ʻe he ngaahi houalotu ki he tokotaha kotoa pē ke ne ngaue ʻi he malumalu ʻo e maʻu mafai pule ʻo e lakanga fakataulaʻeiki.

Ko e Lakanga Fakataulaʻeiki ʻoku ʻulú. ʻOku nau puleʻi ʻa e ngaahi meʻa kotoa pē. Ko e fatongia ia ʻo kinautolu ʻoku nau maʻu ʻa e Lakanga Fakataulaʻeiki ke nau tokangaʻi ʻa e ngaahi houalotu kotoa pē ʻa e Siasi; ʻo ʻikai ko e fokotuʻutuʻu pē ʻo e Lakanga Fakataulaʻeiki, ka ko hono kotoa ʻo e ngaahi houalotu ko ia kuo fokotuʻu ke maʻu mei ai ʻa e lelei fakakātoa ʻa e kakai–ʻa ʻetau ngaahi houalotu Fineʻofa, Mutuale [Kau Talavou mo e Kau Finemui], ngaahi Palaimeli,…. pea mo hono kotoa ʻo ʻetau ngaahi houalotu kuo faʻufaʻu ki hono langaki hake ʻo e kakai ʻa e ʻOtua pea mo e tupulaki ʻa e moʻoni mo e anga māʻoniʻoni ʻi he fonua. ʻOku totonu ke maʻu ʻe he ngaahi houalotu ni kotoa ʻa e fakahinohino mo e tokanga fakatamai pea mo e fuʻu tokanga lahi ʻa e kau maʻu mafai ʻo e Siasi, ʻo tatau ai pe ko ia ʻi he uōtí pe ʻi he kau taki māʻolunga ʻo e Siasi, koeʻuhi he ʻoku tokanga ʻa e Lakanga Fakataulaʻeiki ki he lelei ʻa e kakai ʻa e ʻOtua pea mo hono langa hake mo hono fokotuʻu ʻo Saione ʻi he māmaní. Pea ko e ngaahi houalotu kotoa ko ʻeni kuo ʻosi faʻufaʻu, fokotuʻu pea tuʻutuʻuni ʻe he ʻOtua, ʻoku totonu ke nau fakaongoongo ki he kau maʻu mafai pule ko ʻeni pea nau ngaue faaitaha mo kinautolu; ʻo nau fakaʻapaʻapaʻi ʻa kinautolu ʻi honau ngaahi tuʻunga.⁶

ʻOku ʻikai ha fokotuʻutuʻu ia ʻi he Siasi ʻo Sīsū Kalaisi ʻe mavahe, pe ʻi ʻolunga, pe ʻi tuʻa ʻi he Lakanga Fakataulaʻeiki māʻoniʻoní pe ʻi hono mafaí. ʻOku tau maʻu ʻa ʻetau ngaahi houalotu Fineʻofa, ʻetau ngaahi Mutuale, ngaahi houalotu Palaimeli mo e Lautohi Faka-Sāpaté,…. ka ʻoku ʻikai ko e ngaahi kōlomu pe ngaahi fakataha alēlea kinautolu ʻo e Lakanga Fakataulaʻeiki, ka ko e tokoni pē ki ai, pea fakaongoongo ki ai; kuo fokotuʻu ʻa kinautolu ʻi he mafai ʻo e Lakanga Fakataulaʻeiki māʻoniʻoni. ʻOku ʻikai ke nau ʻi tuʻa ʻi ai, pe ʻi ʻolunga ʻi ai, pe ʻikai lava ha aʻu ki ai. ʻOku nau fakamoʻoniʻi ʻe kinautolu ʻa e tefitoʻi moʻoni ʻo e Lakanga Fakataulaʻeiki. Pe ko e fē pē ha feituʻu ʻoku nau ʻi ai ʻoku nau kei tuʻu pē ke fakahoko ha lelei; ʻa hono fakamoʻui ʻo ha laumālie, pe ko e fakatuʻasino pe fakalaumālie.⁷

ʻOku ou fie fakahā atu ʻoku ʻi ai ʻa e fakaʻamu ki he Fineʻofa, kae tautautefito ʻeni ki he [kau ʻōfisa] fakalūkufua ʻo e houalotu mahuʻinga ko ia, ke nau hanga ʻo tokangaʻi fakakātoa ʻa ʻenau ngaahi houalotu ʻoku ʻi he lotolotonga ʻo e kau fefine ʻo Saione. Ko kinautolu ʻoku ʻi he ʻulu ʻo e ngaahi houalotu kotoa ko ʻeni; ʻoku totonu ke nau tuʻu ʻi ʻolunga, pea ʻoku totonu ke nau fua totonu honau uiuiʻi.⁸

Kuo tau lava ʻeni ke aʻu atu , ʻo fakafou pē ʻi he ngaahi houalotu, ke tokoni, pea mo tākiekina ki he lelei ʻa e tokolahi ʻo ʻetau kau talavou mo e kau finemui ʻa ia naʻe mei faingataʻa ke aʻu ki ai ʻo fakafou ʻi he ngaahi kōlomu ʻo e Lakanga Fakataulaʻeiki. Kuo fakahoko ʻe he ngaahi houalotu ko ʻeni ha tefitoʻi ngaue fakaʻofoʻofa moʻoni ʻo aʻu mai ki he taimi ni.⁹

ʻOku ou lotua ki he ʻOtua ke ne tāpuakiʻi kotoa ʻa ʻetau ngaahi houalotu, ʻo kamata pē mei he ʻuluaki ki he fakamuimui taha, koeʻuhi ke nau fai ʻa honau fatongia, ke ʻoua naʻa nau nofo noa pē ʻo ʻikai ke fai ha ngaue…. ʻOku tau kei malu pē kitautolu ko e ʻi ai ʻa e meʻa ʻoku tau fai, ʻi he taimi ʻoku tau ngaue ai, ʻi he taimi ʻoku tau fakamātoato ai, ʻi he taimi ʻoku tau femoʻuekina ai ʻi hono fakahoko ʻa hotau fatongia, pea ko e taimi ko ia ʻoku tau ʻi he tuʻunga ai ko ʻeni, ʻoku tau malu, he ko e taimi ia ʻoku tau ʻi he toʻukupu ai ʻo e ʻOtua kae ʻikai ʻi he nima ʻo e fili.¹⁰

ʻOku totonu ke tau ngaue kotoa pē ke maʻu ʻa e lelei pea ki hono fakamoʻui ʻo e niʻihi kehe.

Kapau ʻoku tau fai ʻa hotau fatongia, ʻoku tau kau ʻi ha ngaue lahi mo nāunauʻia moʻoni. ʻOku matuʻaki mahuʻinga ʻaupito ki heʻetau lelei fakafoʻituitui ke ongoʻi ʻe he tangata mo e fefine kotoa pē kuo ne kau ki he fuakava ʻo e ongoongolelei, ʻo fakafou ʻi he fakatomala mo e papitaiso, ko honau fatongia pau ia ke nau ngāueʻaki ʻa e ʻatamai poto ʻoku nau maʻu, mo e tauʻatāina ke fili kuo foaki ʻe he ʻEiki kiate kinautolu, ki hono hiki hake ʻo Saione pea mo hono fokotuʻu ʻa ʻene ngaue ʻi he māmaní.¹¹

ʻOku totonu ke tau loto fiemālie hono kotoa pē ke tau ngaue ke maʻu ʻa e lelei pea mo hono fakamoʻui ʻo e kakai–ke tau feilaulauʻi ʻa ʻetau ngaahi holi mo ʻetau ngaahi fie maʻu koeʻuhi ko e lelei fakakātoa, ʻo tau loto fiemālie kakato ke fai ʻa e finangalo ʻo e ʻOtua Māfimafi, ʻo tuku hotau loto ʻotautolu ka tau fakahoko ʻa e ngaahi taumuʻa ʻa e ʻEiki…. ʻOku tau ngaue ni ki hono fakamoʻui ʻo e ngaahi laumālie, pea ʻoku totonu ke tau ongoʻi ko e fatongia mahuʻinga taha ʻeni kuo fakafalala mai kiate kitautolu. Ko ia ai, ʻoku totonu ke tau ongoʻi loto fiemālie ke tau feilaulauʻi ʻa e meʻa kotoa pē ʻo kapau ʻe fie maʻu, koeʻuhi ko e ʻofa ʻa e ʻOtua, mo hono fakamoʻui ʻo e tangata, pea mo e ikuna ʻa e puleʻanga ʻo e ʻOtua ʻi he funga ʻo māmaní.¹²

ʻOku mau ʻamanaki atu ke mamata ki he ʻaho ko ia …. ʻe mahino ai ki he fakataha alēlea kotoa pē ʻo e Lakanga Fakataulaʻeiki ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ni ʻa hono fatongia; ʻo ne fakahoko pē ʻe ia ʻa hono fatongia ʻoʻona, fua totonu ʻa hono uiuiʻi, pea fakahoko ʻa hono tuʻunga ʻi he Siasi ki he lelei taha, ʻo fakatatau ki he ʻatamai poto pea mo e meʻa ʻokú ne malava ke fakahoko…. Naʻe fokotuʻutuʻu pea naʻe mahino ia ki he ʻEiki talu mei he kamataʻanga, pea kuo ne ʻosi ʻomai ha founga ʻi he Siasi ʻe lava ke feau ʻaki ʻa e ngaahi fie maʻu kotoa pē ʻo fakafou ʻi he ngaahi kōlomu ʻo e Lakanga Fakataulaʻeiki. ʻOku moʻoni pē ʻa e pehē ko ia ʻoku maau ʻaupito hono fokotuʻutuʻu ʻo e Siasi. Ko hono mele pē ko e ʻikai ke mahino kakato ki he ngaahi houalotu ko ʻeni ʻa e ngaahi ngafa ʻoku hilifaki atu kiate kinautolu. Ko e taimi ko e kuo nau ʻiloʻi lelei ai ʻa e ngaahi meʻa ʻoku fie maʻu ke nau fai, te nau faivelenga ange ʻi hono fakahoko ʻo honau ngaahi fatongia, pea ʻe hoko ʻo toe mālohi ange mo ivi lahi ange ʻa e ngaue ʻa e ʻEiki ʻi he māmaní.¹³

ʻOku totonu ke ongoʻi ʻe he tangata kotoa pē ʻi hono loto ʻa e fie maʻu ko ia ke ne fai ʻa ʻene konga ʻi he ngaue lahi ko ʻeni ʻo e ngaahi ʻaho fakaʻosi ni. ʻOku totonu ke fekumi ʻa e tokotaha kotoa pē ke kau ʻi hono tekaʻi atu ia. Ka ʻoku fakatautautefito ʻene hoko ko e fatongia ʻo e tokotaha kotoa pē ʻokú ne maʻu ha konga ʻo e mafai ʻo e Lakanga Fakataulaʻeiki māʻoniʻoni ʻa ʻene fua totonu ʻa e fatongia ko ia, pea ‘oku ʻikai mo ha toe feituʻu lelei ange ke tau kamata ai ka ʻi heni, ʻi hotau loto pea ʻi he taimi kuo tau ʻosi fufulu ai ʻa e lotoʻi ipu, fakamaʻa ʻa hotau ngaahi loto, fakatonutonu ʻetau ngaahi moʻui, tukutaha hotau ngaahi ʻatamai ki hono fai ʻa hotau fatongia kakato ki he ʻOtua mo e tangata, pea te tau mateuteu leva ke fakatupu ha lelei ʻi he siakale fakafāmili, ʻi he sōsaieti, pea ʻi he tapa kotoa pē ʻo e moʻui.¹⁴

Ko e kakai tangata mo fefine ko ia ʻoku nau faitotonu ʻi he ʻao ʻo e ʻOtua, ʻoku nau kei hokohoko atu ʻi he vilitaki ki muʻa, ʻo fai ʻa honau fatongia, totongi ʻenau vahehongofulu, pea nau moʻuiʻaki ʻa e lotu haohaoa ʻo ʻikai ʻuliʻi kinautolu ʻi he ʻao ʻo e ʻOtua mo e Tamai, ʻa ia ko ʻenau ʻaʻahi ki he tamai mate mo e kau uitou ʻi honau ngaahi faingataʻaʻia pea mo fakaʻehiʻehi ia mei māmaní ke taʻe hano mele [vakai, Sēmisi 1:27], pea ʻoku nau tokoni ʻi hono tokangaʻi ʻo e masiva, pea nau fakaʻapaʻapa ki he Lakanga Fakataulaʻeiki, ʻoku ʻikai ke nau tuli tonuhia, ʻoku nau faʻa lotu ʻi honau ngaahi fāmili, pea ʻoku nau tali ʻa e ʻEiki ʻi honau loto, te nau langa hake ʻe kinautolu ha tuʻunga ʻe ʻikai lavaʻi ʻe he ngaahi matapā ʻo heli: pea kapau ʻe ʻoho mai ʻa e ngaahi vai pea to mai ʻa e matangi ki honau fale, ʻe ʻikai holo ia, he naʻe langa ia ʻi he funga maka ʻo e moʻoni taʻe ngata [vakai, Mātiu 7:24–27].¹⁵

Ngaahi Fokotu’u ki he Akó

Ko e hā e meʻa ʻoku akoʻi mai ʻe he faʻifaʻitakiʻanga ʻa Kalaisi kiate kitautolu ʻo kau ki hono fakaʻaongaʻi ʻo e mafai ʻo e lakanga fakataulaʻeiki?
ʻOku hoko fēfē ʻa e fakanofo ki he lakanga fakataulaʻeiki ko ha “fili ke ngaue tokoni ʻi he anga fakatōkilalo”?
Ko e hā ʻa e ngaahi taumuʻa ʻo e ngaahi houalotu ʻo e Siasi? ʻOku nau tāpuekina fēfē ʻa e kāingalotu ʻo e Siasi? Ko e hā hono ʻuhinga ʻOku mahuʻinga ai ke ʻiloʻi ʻoku ngaue ʻa e ngaahi houalotu ʻo fakatatau ki he fakahinohino ʻa e lakanga fakataulaʻeiki?
Ko e hā ʻa e ngaahi lelei ʻoku mau mei he fepoupouʻaki pea mo e fefakaʻapaʻapaʻaki ʻi hotau ngaahi fatongia pea mo hotau ngaahi uiuiʻi ʻi he Siasi?
Ko e hā e ongo ʻoku totonu ke tau maʻu ʻo kau ki he “ngaue ki hono fakamoʻui ʻo e ngaahi laumālie”? Ko e hā ha niʻihi ʻo e ngaahi feilaulau ko ia kuo fai ʻe ha niʻihi ko ʻenau ngaue maʻa ho fakamoʻui? Ko e hā e meʻa ʻoku ke loto fiemālie ke ke feilaulauʻi koeʻuhi kae maʻu ha lelei ʻa ha niʻihi kehe?
ʻOku ʻuhinga ki he hā ʻa e “iloʻi kakato” ʻa hotau ngaahi fatongiá? Ko e hā hono olá ʻo kapau ʻe hoko ʻeni?
ʻOku ʻuhinga ki he ha ʻa e “vilitaki ki muʻa ʻi he anga fakatōkilalo”? Ko e hā e ngaahi tāpuaki ʻoku maʻu ʻe kinautolu ʻoku nau fai ʻeni?