Mataupu 10

O Tusitusiga Paia-—O Suesuega Aupito Aoga i Lo Suesuega Uma

“Ia taitasi i tatou … ma faalatalata atili atu i lo tatou Tama o i le Lagi ma Lona Alo Pele e ala i le suesue e le aunoa i tusitusiga paia.”

Mai le Soifuaga o Howard W. Hunter

O Peresitene Howard W. Hunter, sa tele lona fiafia i tusitusiga paia ma o ia o se tagata a’oga tuuto o tusitusiga paia. Sa atagia lea fiafia i ana aoaoga, lea sa faatumulia i tala, ma isi vaega mai tusitusiga faavae. O le tele o taimi pe a aoaoina se mataupu faavae o le talalelei, aemaise i konafesi aoao, na te filifilia e le itiiti ifo ma le tasi se tala mai tusitusiga paia, ma auiliili, ma aumai ai ni auala e faaaoga ai.

Mo se faataitaiga, ina ua ia aoao mai e uiga i le tuuto atu i le Atua, sa ia faamatalaina le tala ia Iosua, o Satarako, Mesako, ma Apeteniko; ma isi i le Feagaiga Tuai o e sa faaalia lea tuuto (tagai mataupu e 19). Ina ua ia aoao mai e uiga i le auauna atu, sa ia faaaogaina faataitaiga mai le Tusi a Mamona e faaalia ai nisi sa tau le faaviiviia ae “na le itiiti la latou auaunaga” nai lo isi o e sa sili ona aliali la latou tautua (tagai mataupu e 23). Ina ua ia aoao mai e uiga i le i ai o le filemu i le loto i taimi o mafatiaga, sa ia toe faaaogaina foi ia fuaitau mai tusitusiga paia, e aofia ai ma le tala ia Peteru sa savali i luga o le sami (tagai mataupu e 2). Ina ua ia aoao mai e uiga i le faamanatuga, sa ia aumaia faamatalaga e ala i le toe faamatalaina o le tala i le fanauga a Isaraelu ma le Paseka (tagai mataupu e 15).

Sa silafia e Peresitene Hunter le taua o tusitusiga paia e fesoasoani ai i se tagata ia maua se molimau ia Iesu Keriso. E tusa ai ma lena, e tele ina ia aoao mai tala o tusitusiga paia i le galuega a le Faaola, faasatauroga, ma le toetu. Na ia tautino mai:

“Ou te faafetai mo le faletusi o tusitusiga paia ua mafai ai ona aoaoina se malamalama sili atu ia Iesu Keriso e ala i suesuega tuuto. Ou te faafetai ona ua le gata i le Feagaiga Tuai ma le Feagaiga Fou, ae ua faaopoopo e le Alii e ala mai i perofeta o Le Ekalesia a Iesu Keriso o le Au Paia o Aso e Gata Ai isi tusitusiga paia faaalia, e fai ma molimau faaopoopo mo Keriso—le Tusi a Mamona, Mataupu Faavae ma Feagaiga, ma le Penina Tau Tele-—o nei tusi uma ua ou iloa o afioga ia a le Atua. Ua molimau mai nei tusi uma o Iesu o le Keriso, o le Alo o le Atua soifua.”¹

o le aiga o loo suesue i tusitusiga paia — “Matou te faamoemoe o loo outou faitauina ma suesueina tusitusiga paia i aso taitasi o ni tagata taitoatasi ma ni aiga.

O Aoaoga a Howard W. Hunter

O le suesue i tusitusiga paia o se suesuega aupito aoga lea i suesuega uma e mafai ona tatou faia.

E tutotonu i upumoni uma, o le molimau o Iesu le Nasareta o le Keriso, le Ieova Silisili, le Faaola o le Lalolagi, ma o le Alo Pele e Toatasi o le Atua Soifua. O le savali lenei a tusitusiga paia. I nei tusi paia uma taitasi, o loo i ai se valaaulia ia talitonu ma faatuatua i le Atua le Tama e Faavavau ma i lona Alo, o Iesu Keriso; ma mai lava i le tusi muamua seia oo atu i le tusi mulimuli o nei tusitusiga paia uma, o loo i ai le valaau ina ia faia le finagalo o le Atua ma tausi ana poloaiga.²

A tatou mulimuli i fautauga a o tatou taitai e faitau ma suesue i tusitusiga paia, o le a tele ituaiga o mea aoga ma faamanuiaga tatou te maua. O se suesuega aupito aoga lea i suesuega uma e mafai ona tatou faia. …

O tusitusiga paia o loo i ai faamaumauga o faaaliga patino a le Atua, ma o na faaaliga o loo fetalai mai ai le Atua i tagata. O gafea e mafai ona sili atu ai le faaaogaina o le taimi nai lo le faitau mai tusiga ma tusitusiga paia o loo aoao mai ai ia tatou iloa le Atua ma malamalama ai i la tatou sootaga ma ia? E taua tele le taimi i tagata pisi, ma e aveesea mai ia te i tatou lona taua pe a maimauina itula i le faitauina po o le matamata i mea e le aoga.³

Matou te faamoemoe o loo outou faitau ma suesue i tusitusiga paia i aso taitasi e le gata taitoatasi ae faapea foi faaleaiga. E le tatau ona tatou tuumamaina le poloaiga a le Alii, “E suesue outou i tusi aua ua outou manatu tou te maua ai le ola e faavavau: o tusi foi ia o loo molimau ia te au” Ioane 5:39). O le a ulufale mai le Agaga i o outou fale ma o outou olaga pe a outou faitau i le upu ua faaalia.⁴

Ua tatau ona i ai sa tatou Ekalesia e tumu i tamaitai ma alii ua iloa lelei tusitusiga paia, o e fefaasinoa’ia mau ma faailoga, o e ua faia ni lesona ma lauga mai le Taiala o Autu, o e foi ua masani i faafanua, o le Lomifefiloi o le Tusi Paia, ma isi fesoasoaniga o loo i ai i lenei seti matagofie o tusitusiga faavae. E tele atu mea o loo i ai e le mafai ona tatou vave iloaina uma. E moni lava o le fanua o tusitusiga paia ua “sinasina … ua saunia e selesele”[tagai MF&F 4:4]. …

E le o le tisipenisione lenei, e moni foi e le o se isi lava tisipenisione, o i ai tusitusiga paia—le afioga a le Atua e mausali, ma faapupula ai-—ua matua saunia lelei ma faatulagaina lelei mo le faaaogaina e alii uma, tamaitai, ma tamaiti o e o le a suesue i ai. O le afioga tusitusia a le Atua o se mamanu ua sili ona faigofie ona faitau ma maua, ua saunia mo tagata masani i le talafaasolopito o le lalolagi. O le a faamasinoina moni i tatou pe afai tatou te le faitauina.⁵

O le suesueina o tusitusiga paia e fesoasoani tatou te aoao ai ma usiusitai i le finagalo o le Atua.

Ina ia usiusitai i le tulafono o le talalelei ma aoaoga a Iesu Keriso, e tatau ona tatou malamalama muamua i le tulafono ma iloa le finagalo o le Alii. E sili ona ausia lea tulaga e ala i le suesue ma vailiili tusitusiga paia ma upu a perofeta. O lea faiga tatou te masani ai i mea ua faaalia mai e le Atua i tagata.

O loo i ai [i] Mataupu Faavae o le Faatuatua se tasi o loo tautino mai ai, “Matou te talitonu i mea uma na faaali mai e le Atua, mea uma ua ia faaali mai nei ma matou te talitonu foi o le a ia faaali mai le tele o mea silisili ma le taua i le Malo o le Atua i le lumanai” (Mataupu Faavae o le Faatuatua 1:9).

Ua faaalia mai le finagalo o le Atua i tusitusiga paia, ma ona o lea mafuaaga, ua poloaiina ai i tatou e faitau i ai ma iloa ai le upumoni. Sa faamatala e le Alii ia Oliva Kaotui le ala e iloa ai nei upumoni. Na Ia fetalai,“Faauta, Ou te tuu atu ia te oe se poloaiga, ia e faalagolago i mea ua tusia; ona ua tusia i totonu o i latou mea uma e faatatau i le faavae o la’u ekalesia, la’u talalalelei, ma la’u papa” (MF&F 18:3–4).

Na tusi Paulo i lana uo lelei o Timoteo, e uunaia o ia e faitau i tusi paia, ma i lana tusi na ia fai atu ai, “Talu foi ina o e tamaitiiti ua e iloa Tusi Paia, e mafai ona faapoto ai ia te oe e iu ai i le faaolataga e ala i le faatuatua ia Keriso Iesu.” Ona ia faaopoopo atu lea, “O tusipaia uma lava e mai le Agaga o le Atua ia e aoga foi ia e aoao ai, e aoai ai, e faatonu ai, e faapoto ai foi i le amiotonu” (2 Timoteo 3:15–16). …

Ua tuuina e o tatou taitai o le Ekalesia se faamamafa tele i le mataupu o le faitauina o tusitusiga paia ma upu a perofeta, o anamua ma ona po nei. Ua poloaiina tama ma tina ina ia faitau i tusitusiga paia ina ia mafai ai ona latou aoao faalelei i a latou fanau. Ua faitauina e a tatou fanau ia tusitusiga paia, o se taunuuga o le faataitaiga ua faia e matua. Tatou te suesue i tusitusiga paia i afiafi faaleaiga, a o nisi aiga e faitau faatasi a latou tusitusiga paia i se taimi o le taeao po. … O le ala lea tatou te aoao ai ma iloa le finagalo o le Alii, ina ia tatou usiusitai ai.⁶

Manatu i le faasologa mau lea e amata i le tuuina atu ma le maelega i le afioga a le Atua, ona faaauau ai lea i le folafolaga afai tatou te faia, e mafai ona tatou o atu i lona afioaga:

“Ma Ou te tuu atu nei ia te outou se poloaiga ia outou faaeteete e faatatau ia te outou lava ia outou gauaʼi ma le filiga i upu o le ola e faavavau.

“Ona ia outou ola i afioga uma e tulei mai le fofoga o le Atua

Aua o le afioga a le Alii o le upumoni lea ma o soo se mea ua moni o le malamalama lea, ma o soo se mea ua malamalama, o le Agaga lea, o le Agaga lava lea o Iesu Keriso. …

“Ma o tagata uma taitoatasi o e e faalogo i le siufofoga o le Agaga e o mai i le Atua le Tamā lava”(MF&F 84:43–45, 47).

O se malaga matagofie tele lenei ua amatalia i le afioga a le Atua ma o le a faaiu i le faaeaga. “O afioga a Keriso o le a taʼu mai ai ia te outou mea uma e tatau ona outou faia” (2 Nifae 32:3).⁷

Ou te fautuaina atu ia te outou faaaliga a le Atua o tulaga ia e ao ona tatou ola ai ma e tatau foi ona tatou fuatia ai a tatou filifiliga ma galuega uma lava. E tusa ai ma lea, a i ai ni o outou popolega ma ni luitau, ia taulima e ala i le liliu atu i tusitusiga paia ma perofeta.⁸

alii talavou o loo faitau tusitusiga paia — O le suesue i tusitusiga paia, “o se suesuega aupito aoga lea i suesuega uma e mafai ona tatou faia.”

O le malamalama i tusitusiga paia, e manaomia ai le suesue punouai, faifai pea, ma le lototatalo.

Matou te uunaia outou taitoatasi ina ia manatu ma le faaeteete pe o le a le tele o le taimi o loo e tuuina i le taimi nei i le mafaufau loloto ma le lototatalo i tusitusiga paia.

I le avea ai ma se tasi o auauna a le Alii, ou te tuu atu ai ia te outou se lu’i ina ia faia mea nei:

1. Faitau, manatunatu, ma tatalo e uiga i tusitusiga paia i aso taitasi o ni tagata taitoatasi o le Ekalesia.

2. Ia faia e le aunoa faitauga tusitusiga paia faaleaiga. Matou te faamalo atu ia i latou o loo faia lenei mea, ma uunaia i latou e lei amataina e amata nei loa e aunoa ma se faatuai. …

Ia tatou tofu o atu i luma ma se faaiuga mausali ina ia lototatalo atili; e saili ia ola atoatoa i le Agaga; ma ia faalatalata atili atu i lo tatou Tama i le Lagi ma lona Alo Pele e ala i le suesue e le aunoa i tusitusiga paia. ⁹

E matuai eseese lava mausa faitautusi. E i ai le aufaitau e vave e i ai foi le aufaitau e telegese, o nisi e na o ni nai mea e faitau ai i le taimi, a o isi e naunau lava e faitau e aunoa ma le malolo seia iu ina uma le tusi. Peitai, o i latou e pulunaunau e faitau i tusitusiga paia, ua iloa ina ia malamalama atili e manaomia ai taumafaiga e sili atu nai lo le na o le faitau faasamasamanoa po o le faatopelau—e tatau ona matua suesue toto’a i ai. Ua mautinoa, o se tasi e suesue i tusitusiga paia i aso uma, e tele mea na te ausia nai lo se tasi e tele se taimi e faaalu ai i le aso e tasi, ona taatia lea faatoa toe faaauau foi i se isi taimi. E le gata e tatau ona tatou suesue i aso taitasi, ae e tatau foi ona i ai se taimi masani atofaina, e mafai ai ona tatou punouai i ai e aunoa ma se faalavelaveina.

E leai se mea e sili atu ona fesoasoani nai lo le tatalo e tatala ai lo tatou malamalama i tusitusiga paia. O le tatalo e mafai ai ona taulai o tatou mafaufau e saili tali i a tatou sailiga. Fai mai le Alii “Ia outou ole atu ona foaiina mai ai lea ia te outou; ia outou saili ona outou maua ai lea; ia outou tuitui atu ona toina ai lea ia te outou”(Luka 11:9). O le faamautinoaga lea a Keriso, afai tatou te ole atu, saili, ma tuitui atu, o le a tatalaina e le Agaga Paia lo tatou malamalama pe afai ua tatou saunia ma naunau ia maua.

E toatele ua latou iloa o le taimi sili e suesue ai o le taeao pe a uma se malologa o le po, ua faamanino ai le mafaufau i le mau mea e faaluafesasi ai le mafaufau. O isi e sili ia i latou le suesue i itula paganoa pe a maea galuega ma popolega o le aso ma ua faataatia ese, ona faaiu ai lea o le aso i se filemu ma le toafimalie e maua mai i le fesootaiga ma tusitusiga paia.

Atonu o le mea e sili ona taua nai lo le itula o le aso, o le taimi faifai pea ua tuu ese mo le suesuega. E manaia pe afai e mafai ona faaalu se itula i aso taitasi; ae afai e le mafai le itula, o se afa itula i se faiga faifai pea o le a taunuu i se ausiaga tele. O se kuata itula o se taimi laitiiti, ae e maofa lava i le tele o le iloa ma le malamalama e mafai ona maua ai i se mataupu e ese le anoa. O le mea taua o le leai lea o se isi mea e faalavefau i la tatou suesuega.

O nisi e sili ai le suesue na o ia, ae o le suesue faatasi e aoga tele. E matuai faamanuiaina lava aiga pe a faapotopoto mai e tama ma tina atamamai a latou fanau, faitau faatasi mai se itulau o tusitusiga paia, ona talanoa saoloto lea i tala matagofie ma mafaufauga e tusa ai ma le malamalama o tagata uma. E tele taimi e i ai se malamalamaaga maoae o le autalavou ma le au laiti ma talisapaia ia tusiga faavae o le lotu.

E le tatau ona motumotu a tatou faitaugatusi ae ia atinae se fuafuaga faatulaga lelei mo le suesuega. E i ai nisi e faitau i se faasologa o le aofaiga o itulau pe faatulagaina foi ni mataupu mo aso taitasi po o le vaiaso. Atonu e talafeauga lelei lea ma fiafia ai foi pe afai e na o le fiafia e faitau, ae e le maua ai se suesuega anoa. E sili atu ai le fai o se taimi faatulagaina e faia ai suesuega i tusitusiga paia i aso taitasi, nai lo le seti o se aofaiga o mataupu e faitau. O nisi taimi e alu ai le taimi atoa i le suesueina o se fuaiupu e tasi. ¹⁰

O le mafaufau loloto i le tala puupuu faatusi paia ia Iairo, e maua ai se malamalama loloto ma le uiga.

O le olaga, taga, ma aoaoga a Iesu e mafai ona faitau faavavevave i ai. E faigofie tala i le tele o taimi ma e faigofie foi le faamatalaina. Sa faaaoga e le Matai nai upu itiiti i ana aoaoga, ae e ma’oti mea taitasi i uiga lea e atagia manino ai le ata i le tagata faitau. Peitai, o nisi taimi e tele itula e ono faaalu i le mafaufau loloto i manatu ogaoga e aumaia i ni nai upu faigofie.

Sa i ai se mea na tupu i le soifuaga o le Faaola na ta’ua e Mataio, Mareko, ma Luka. O loo faamatalaina se vaega tele o le tala e Mareko i le na o le lua fuaiupu ma upu e lima i le fuaiupu lea. …

“Faauta foi, ua sau le tasi o e pule i le sunako, o Iairo lona igoa; ua na iloa o ia [o lona uiga ina ua ia iloa Iesu], ona faapau ai lea i ona vae,

“Ua ia matua aioi mai ia te ia, ua faapea mai, O le a oti nei lava si o’u afafine: ina e maliu atu ma ia e faaee ou aao i luga ia te ia e malolo ai, ona ola ai lea o ia.

“Ona maliu atu lea o Iesu ma ia” (Mareko 5:22–24).

O le taimi na faitau ai lena vaega o le tala pe tusa e tolusefulu sekone. E puupuu ma e le faigata. E manino le ata vaaia ma e oo lava i se tamaitiiti e mafai ona ia toe faia e aunoa ma se faigata. Ae a o tatou faaaluina se taimi e mafaufau ma manatunatu i ai, e oo mai ia i tatou se loloto o le malamalama ma le uiga. …

… Faatoa toe laasia lava lea e Iesu ma i latou sa faatasi ma ia le Sami o Kalilaia, ma sa faafeiloai o ia e se motu o tagata sa faatalitali mo ia i le apitaogalu i talaane o Kapanaumi. “Ma, faauta foi, ua sau le tasi o le pule i le sunako.” O sunako tetele i na onapo, sa pulefaamalumalu ai se vaega o toeaina i lalo o le taitaiga a se taitai sinia po o se pule. O se tagata iloga lea ma le malualii e vaavaai atu i ai le au Iutaia ma le faaaloalo tele.

E le o ta’ua e Mataio le igoa o lea alii pule, ae ua faailoa mai e Mareko o ia i lona faaopoopoina i ai i lona tofi ia upu, ““o Iairo lona igoa.” E leai se isi mea o tusitusiga paia o ta’u mai ai le igoa o lenei tagata vagana ai i le taimi lea, ae o loo olaola pea le manatua o ia i le talafaasolopito ona o se fesootaiga puupuu ma Iesu. E tele naua ola ua lauiloa semanu e galoma atu, pe ana leai le pa’u atu o le aao o le Matai, lea na faia ai se suiga tele o manatu ma taga fai ma se olaga fou sili atu.

“Ma ina ua ia iloa atu o ia [o lona uiga ina ua iloa atu Iesu e Iairo] ona faapau ai lea i ona vae.”

O se tulaga lea e le masani ai mo se tamalii o se tulaga mamalu ma le taualoa, o se pule o le sunako, le tootuli i aao o Iesu—i aao o le ua manatu i ai o se faiaoga femalagaai o i ai le meaalofa e faamalolo ai ma’i. E toatele foi isi atamamai ma le taualoa sa vaai ia Iesu, ae sa le amanaiaina o ia. Sa tapunia o latou mafaufau. E leai lava se eseesega ma aso nei; o i ai mea faalavefau i le ala o le toatele e le talia ai o ia.

“Ma sa matua aioi atu [Iairo] ia te ia, ma faapea atu, O le a oti nei lava si o’u afafine.” O le mea masani lava lea e tupu soo pe a sau se tagata ia Keriso, e le mo sona lava manaoga, ae ona o se tulaga manaomia tele o se e pele ia te ia. O le gatete ua tatou faalogoina i le leo o Iairo a o tautala o ia ‘o si o’u afafine” ua gaepuina ai o tatou loto ma le lotofaavauvau pe a tatou mafaufau i lenei tagata tulaga maualuga i le sunako, ua faapau i ona tulivae i luma o le Faaola.

Ona oo mai ai lea o le faalauiloaga tele o le faatuatua: “Ina e maliu atu ia ma faaee ou aao i luga ia te ia e malolo ai; ona ola ai lea o ia.” E le gata o ni upu nei o le faatuatua o se tama ua tumu i le faanoanoa, ae o se faamanatu mai foi ia i tatou soo se mea lava e faaee i ai aao o Iesu, e ola. Afai e faaee e Iesu ona aao i luga o se faaipoipoga, e olaola. Afai e faatagaina ona tuu ona aao i luga o se aiga, e olaola.

O upu, “ona la maliu atu lea ma ia” o loo sosoo ai. Tatou te le manatu o lenei mea o se mea sa fuafuaina mo le aso. O lea ua toe foi mai le Matai mai le vasa, i le mea sa faatalitali atu ai le motu o tagata i le apitaogalu ia te ia e aoao i latou. … Sa faalavefau atu ia te Ia se aioiga a se tama. Semanu e mafai lava ona ia le amanaiaina le talosaga ona e toaele isi o loo faatalitali. Semanu e mafai lava ona ia fai atu ia Iairo, o le a alu atu e vaai lona afafine a taeao, peitai, “sa maliu atu Iesu ma ia.” Afai tatou te mulimuli i tulagaaao o le Matai, pe mata o le a tatou pisi tele ma le amanaiaina ai manaoga o o tatou uso a tagata?

Tatou te le tau faitaua le vaega o totoe o le tala. Ina ua la taunuu atu i le fale o le pule o le sunako, sa tago atu Iesu i le lima o le teineitiiti ma faatula’i o ia mai le oti. E faapena foi, o le a ia faatuina ma faatula’i mai tagata uma i se olaga fou ma le sili atu, o e o le a faatagaina le Faaola e taitai o ia¹¹,.

O le Tusi a Mamona ma le Mataupu Faavae ma Feagaiga o le a faalatalata atili maia i tatou ia Keriso.

O Le Tusi a Mamona

O se tasi o punavai e aupito sili ona taua ua saunia e le Alii e fesoasoani ai ia tatou faataunuuina lenei galuega paia o le Tusi a Mamona, ma lona soaautu “O Se Tasi Molimau ia Iesu Keriso.” Na tailua vaiaso ma apoapoai mai [Peresitene Ezra Taft Benson, ia aua nei o tatou le amanaiaina le faitauga ma le ola ai i mataupu o lenei voluma paia o tusitusiga paia. “O lana misiona sili.” na ia aoaoina ai i tatou, “o le aumaia lea o tagata ia Keriso [ma faapea ai i lona Tama], ma o isi mea uma e mulimuli mai.” (Ensign, Me 1986, i. 105.) Matou te faamoemoe ia te outou uso e ma tuafafine, o loo outou fafagaina o outou agaga i le faitauina lea e le aunoa o le Tusi a Mamona ma isi tusitusiga paia ma faaaoga i a outou auaunaga. ¹²

O le Tusi a Mamona o le afioga ia a le Atua. Matou te valaaulia outou e faitau i lenei faamaumauga ofoofogia. O le voluma aupito sili ona ofoofogia o loo i ai i onapo nei. Faitau i ai ma le lototatalo, ma a o outou faia lena mea, o le a avatu e le Atua ia te outou se molimau i lona moni e pei ona folafola mai e Moronae (tagai Moronae 10:4).¹³

O le faitauina ma le suesue i le Tusi a Mamona, ma saili ma le lototatalo le faamautuuga o ona anotusi, e mafai ai ona tatou maua se molimau o Iosefa Samita o se perofeta a le Atua ma o le Ekalesia a Iesu Keriso ua toefuatai mai i le lalolagi. ¹⁴

O le faitauina o [le Tusi a Mamona] o le a i ai se aafiaga maoae i lou olaga. O le a faalauteleina ai lou iloa o le ala e taulima ai e le Atua le tagata, ma o le a e maua ai se naunauga tele atu e ola ia ogatusa ma aoaoga o le talalelei. O le a e maua ai foi se molimau mamana ia Iesu. ¹⁵

O Le Mataupu Faavae ma Feagaiga

O le Mataupu Faavae ma Feagaiga o se tusi e tulagaese. Na o le pau lea o le tusi i luga o le fogaeleele, e i ai se faatomuaga na fofogaina e le Tufuga Foafoa lava ia. E le gata i lea, o lenei tusitusiga paia o loo i ai ni upusii tuusao mai le Alii nai lo se isi lava tusi o i ai o tusiga paia.

E le o se faaliliuga o se tusiga anamua, ae o ona ponei lava lona tupuga. O se tusi o faaaliga o o tatou taimi. O se fatuga tulagaese ma le musuia mai le lagi o faaaliga e ala mai i perofeta a le Atua i o tatou taimi, e tali ai fesili, o atugaluga, ma luitau sa latou feagai. O loo i ai tali mai le lagi i faafitauli moni e aofia ai tagata moni. …

Pe na e iloaina o le faitauina o le Mataupu Faavae ma Feagaiga e mafai ai ona e lagona le siufofoga o le Alii e ala mai i tusi paia? [tagai MF&F 18:33–36]. … O lena leo o le faamalamalamaina e masani ona oo mai i lou mafaufau o ni “manatu” ma i lou loto o ni “lagona” (tagai MF&F 8:1–3). O le folafolaga o lena molimau e … maua e alii agavaa uma, o tamaitai, ma tamaiti o e saili ma le lototatalo mo lena molimau. Pe ua le tatau ea ia i tatou taitoatasi ona faia se faaiuga e faitau, suesue, manatunatu loloto, ma tatalo e uiga i nei faaaliga paia¹⁶

Fautuaga mo Suesuega ma le Aoaoina Atu

Fesili

O a aafiaga ua fesoasoani ia te oe e iloa ai o le suesue i tusitusiga paia “o se suesuega aupito aoga lea i lo suesuega uma”? (Tagai vaega 1.) E mafai faapefea ona tatou faamalolosia la tatou tautinoga ina ia avea o ni “tamaitai ma ni alii e iloa lelei tusitusiga paia”?
E faapefea ona fesoasoani le suesue i tusitusiga paia e atili ai ona usiusitai? (Tagai vaega 2.) O faapefea ona e vaai atu i “upu a Keriso e ta’u atu ai ia te outou mea uma e tatau ona outou fai”? (2 Nifae 32:3).
O a itu o le fautuaga a Peresitene Hunter e uiga i le ala e suesue ai tusitusiga paia e mafai ona fesoasoani ia te oe? (Tagai vaega 3.) Ua faamanuiaina faapefea oe i le suesue e le aunoa, ma le lototatalo o tusitusiga paia?
O le a se malamalamaaga e mafai ona tatou maua mai i le tala a Peresitene Hunter i le faamaloloina e le Faaola o le afafine o Iairo? (Tagai vaega 4.) E mafai faapefea e le manatunatu loloto i ni nai fuaiupu e pei o lea ona faamauoa ai au suesuega o tusitusiga paia?
Ua fesoasoani faapefea le Tusi a Mamona ma le Mataupu Faavae ma Feagaiga e te latalata atili ai i le Faaola? (Tagai vaega 5.) O a nisi o auala e mafai e nei voluma paia ona faatosinaina oe? Mafaufau e faasoa lau molimau i lou aiga ma isi e uiga i mau nei.

Mau Fesootai

Iosua 1:8; Faataoto 30:5; 1 Nifae 15:23–24; 2 Nifae 3:12; Alema 31:5; 37:44; Helamana 3:29–30; MF&F 98:11

Fesoasoani mo Suesuega

“O le faitau, suesue, ma le manatunatu loloto e le tutusa. Tatou te faitau i upu ma mafai ona maua ai ni manatu. Tatou te suesue ma maua ai manatu ma sootaga o mau. Ae a tatou manatunatu loloto ua tatou valaaulia faaaliga e ala i le Agaga. Ia te au, o le manatunatu loloto, o le mafaufau lea ma le tatalo ou te faia pe a uma ona ou faitau ma suesue ma le faaeteete i tusitusiga paia” (Henry B.Eyring, “Auauna atu ma le Agaga,”Ensignpo oLiahonaNov. 2010, 59).