Mataupu 20

Savali i le Ala o le Alofa Mama o le Faaola

“O le fuamaa o le agaalofa o se fuataga o lo tatou avea ma soo; o se fuataga o lo tatou alofa mo le Atua ma mo le tasi i le tasi.

Mai le Soifuaga o Howard W. Hunter

Na aoao mai e Peresitene Howard W. Hunter e faapea, na “tuuina mai e le [Faaola] ia i tatou Lona alofa, o Lana tautua, ma Lona soifua. … E ao ina tatou taumafai e tuuina atu e faapei ona sa Ia tuuina mai.”¹ Ae maise ai, sa fautuaina mai e Peresitene Hunter tagata o le Ekalesia ia mulimuli i le faataitaiga a le Faaola o le alofa mama i o latou olaga i aso taitasi.

O faatinoga o le alofa mama o se vaega maioio o le matata a Howard W. Hunter i le galuega faaletulafono sa ia faia. Sa faamatala e se uso a loia:

“E tele ona taimi e faaalu e faia ai auaunaga faaletulafono [e le totogia]…ona e le manao o ia e ave se pili e totogi mai. … Sa vaaia atu ia te ia o se uo, taiala, faufautua, ma se polofesa sa sili atu lona popole e vaai ua maua e tagata le fesoasoani latou te manaomia, nai lo le totogia o ia mo le faia.”²

O le alofa mama o se tumutumuga foi lea o le auaunaga a Peresitene Hunter i le Ekalesia. Sa faamatala e se tamaitai lea na fai mai o ia o lona faiaoga sili ona tosina i ai, nisi o mafuaaga:

“Sa ou matauina pea lava lenei tamalii o alofa i isi e ala i lona tuu o le faamuamua maualuga ia te i latou, e ala i lona faalogo ia malamalama, ma le faasoa atu i isi o ona aafiaga, o se tasi o mea e sili ona ia fiafia ai. Na ia aoaoina au ia malamalama i le taua o nei amioga mama ma ia lagonaina le olioli i le ola ai.”³

Na saafi se isi tamaitai mai le siteki a Peresitene Hunter i Kalefonia:

“O Peresitene Howard W. Hunter, o lo matou peresitene o le siteki mo le tele o tausaga a o nonofo le matou aiga i le Siteki a Pasadena. Na oti lo’u tama, ae tuua lo’u tina e tausi ma’ua ma lo’u uso matua. E ui e le o i matou o se aiga taualoa i le siteki, lea e tele naua lona eria faafaafanua, ae sa iloa lelei lava i matou e Peresitene Hunter.

“O le mea e sili ona ou manatua ai o ia, o le mea lea sa saofaga i lo’u lagonaina o lo’u lava taua. Pe a uma konafesi faalesiteki taitasi, matou te faatalitali e faatalofa ma ia. E uu e ia le lima o lo’u tina i taimi uma ma fai mai, ‘O a mai oe, Sister Sessions, ae o faapefea mai foi ia Peti ma Karolina?’ Ou te mitamita ai lava i lo’u faalogo atu o ta’u mai o matou igoa. Sa ou iloaina na ia silafia i matou ma popole mo lo matou ola manuia. E mafanafana pea lo’u loto i lea manatua.”⁴

Na saunoa Peresitene Hunter i se tasi taimi, “Ua ou lagona o la tatou misiona o le tautua ma laveai, ia galueaiina ma faaeaina.”⁵ O faamatalaga mai ona Uso i le Toasefululua ua faaalia ai le lelei tele o lona faataunuuina o lena misiona. “E i ai lana auala e fai ai tagata ia toafimalie,” na lipoti mai ai se tasi; “na te le fuaaoina [pe pulepuletutu) ia i latou. O ia o se tamalii e lelei le faalogo.” Fai mai se isi, “A oulua malaga ma ia, na te mataituina i taimi uma ia mautinoa o la e lelei tagata uma, ma leai se tasi e faaletonu pe faiesea. Sa lipotia mai foi e se tasi, “E popole o ia ma nofouta mo isi. E lotoalofa ma lotofaamagalo. O ia o se tagata aoao o le talalelei, o tagata soifua, o le natura faaletagata soifua.”⁶

Na “aoao mai e [Iesu Keriso] ni lesona o le alofa ma sa faia faafia le auaunaga le manatu faapito i isi. Na maua e tagata uma lona alofa.”

O Aoaoga a Howard W. Hunter

O poloaiga sili e lua o fuamaa ia mo le avea ai o i tatou ma soo.

I aso anamua, o se tasi o suega o le moni a’ia’i o le auro sa faatinoina lea i se maa lamolemole, uliuli, ma iila sa ta’ua o le fuamaa. A olo i luga o le fuamaa, e tuu e le auro se tosi po o se maka i luga o le maa. E faatusatusa e le faiomea le maka lea i se lanu i luga o lana siata o le faatulagaga o lanu. E mumu malosi le maka pe a faateleina le aofaiga o le kopa po o le aloi, pe samasama malosi foi pe a faateleina le pasene o le auro. O lea faiga e iloa lelei ai le auro mao’i.

O le metotita o le fuamaa e sue ai le auro mao’i, sa vave ma sa faamalieina ai foi le tele o faamoemoega faatino. Ae o le faiomea lea e fesiligia pea le mao’i o le auro, na te faia se isi suega maoti e ala i le faaaogaina o le afi.

Ou te fautua atu ua saunia e le Alii se fuamaa mo oe ma au, o se fuataga aliali o mea o i totonu o o tatou loto i le avea ai ma soo, lea e iloa ai lo tatou faamaoni ma o le a sao mai le afi o le a oo mai.

I se tasi taimi a o aoao atu e Iesu ia tagata, sa alu atu ia te ia se loia ma tuu atu le fesili lea: “Le Alii e, o le a se mea ou te faia ina ia ou maua ai le ola e faavavau?”

Sa tali atu Iesu, le faiaoga o faiaoga, i lea alii, o le sa iloagofie le atamai i le tulafono, i se fesili, “O le a le mea ua tusia i le tulafono? o le a lau faitau i ai?”

Sa tali atu lea alii i le aotelega o poloaiga sili e lua: “Ia e alofa atu i le Alii lou Atua ma lou loto atoa, ma lou agaga atoa, ma lou malosi atoa, ma lou mafaufau atoa; ia e alofa atu foi i le lua te tuaoi ia pei o oe lava ia te oe.”

Na tali atu Keriso ma le faamaoniga, “Ia e faapea ona fai e te ola ai” (Luka 10:25–28).

O le ola e faavavau, le ola a le Atua, le ola o loo tatou sailia, o loo mauaa i poloaiga e lua. Ua ta’ua mai i tusitusiga paia e faapea “o na poloaiga e lua ua autu ai le tulafono uma ma le au perofeta”(Mataio 22:40). Alofa i le Atua ma alofa i lou tuaoi. E galulue faatasi le lua lea: e le mavavaeeseina. I lona faauigaga aupito maualuga, e mafai ona manatu i ai e tutusa. Ma o ni poloaiga e mafai ona ola ai i tatou taitoatasi.

O le tali a Iesu i le loia e ono manatu i ai o le fuamaa lea a le Alii. Fai mai o Ia i se tasi taimi, “Aua na faia e outou i le tasi o e aupito itiiti o ou uso nei, o au lea na outou faia i ai” (Mataio 25:40). O le a Ia fuaina lo tatou tuuto ia te ia i le ala tatou te alolofa ma auauna atu ai i o tatou uso a tagata. O le a se ituaiga o faailoga o loo tatou tuua i luga o le fuamaa a le Alii? Pe o tatou moni ea o ni tuaoi lelei? Pe o faaali mai i le suega o i tatou o ni auro e 24-karati, pe o la e mafai ona iloa ai o ni auro taufaavalea?⁷

Ua aoaoina i tatou e le Faaola ia fealofani, e aofia ai i latou atonu e faigata ona alolofa i ai.

E foliga mai e le aofia ai ia lava i le faia o se fesili faigofie i le Matai, lea sa saili ai le loia e tauamiotonuina ia lava i le toe fesili, “A o ai la lo’u tuaoi?” (Luka 10:29).

E ao ia i tatou uma ona faafetai e faavavau mo lena fesili, aua o le tali a le Faaola na oo mai ai se tasi o faataoto aupito mauoa ma sili ona talisapaia, ua tofu faitau i ai i tatou uma ma faalogo i ai faafia:

“O le tasi tagata na alu ifo mai Ierusalema i Ieriko, ua maua o ia e tagata faomea; ua latou toeseina ona ofu, ma fasi ia te ia, ua latou o, ua tuua ia, ua tali oti.

“Ua soona alu ifo le tasi faitaulaga i lea ala; ua iloa atu o ia ona ui ane lea o ia i le tasi ituala.

“Ua faapea foi le sa Levi, ua oo i lea mea, ua alu ane, ma matamata ai; ona ui ane foi lea o ia i le tasi ituala.

“Ao le tasi Samaria ua alu lana malaga, ua oo atu i le mea o i ai o ia, ua iloa o ia, ona mutimutivale ai lea o lona alofa;

“Ua alu atu,ma nonoa i ona manua,ua liligi foi i ai le suauu ma le uaina; ua faatietie ia te ia i lana lava manu, ma taitai ia te ia i le fale e tali ai malo, ma tausi ia te ia.

“O le taeao o le a alu ia, ona to ae lea o tenari e lua, ma avatu i le matai e ona le fale, ua fai atu ia te ia, Ina e tausi ia te ia; ai se mea e te toe faatau ai, ou te taui atu ia te oe pe a ou toe sau”(Luka 10:30–35).

Ona fesili lea o Iesu i le loia, “Pe ni a fa oe, o ai so latou nei o le toatolu ua fai ma tagata la te tuaoi ma le na maua e tagata faomea?” (Luke 10:36). O iina na faailo mai ai e le Matai le fuamaa o le FaaKerisiano. Ua Ia poloaiina i tatou ia fua i ai la tatou faailoga.

Sa tatau i le faitaulaga ma le sa Levi i le faataoto a Keriso ona manatua tulaga moomia o le tulafono: “Aua nei e iloa le asini a lou uso po o lana povi ua pau i le ala, ma e lafi ai; a ia oulua toalua ma ia e faatu ia te ia”Teuteronome 22:4. Afai la o se asini, pe ua le sili ea ona taua i se tasi ona naunau e fesoasoani i se uso o manaomia le fesoasoani. Ae na tusia e Elder James E. Talmage, “O ‘alofaga [ia le faia ai] e faigofie lava ona maua; e tulioso a’e i soo se taimi ma e anoanoai foi e pei o ni vao i tafaala” (Jesus the Christ, 3d ed., Salt Lake City: The Church of Jesus Christ of Latter-day Saints, 1916, i. 431).

Ua aumai e le Samaria ia i tatou se faataitaiga o le alofa mama faaKerisiano. Na i ai ia te ia le agaalofa; na alu atu o ia ma fusifusi manua o le tagata sa faamanualia e le au faomea. Na ia ave o ia i se faletalimalo, tausi ia te ia, totogi mea na faaalu ai, ma toe ofo atu pe afai e toe manaomia lana tausiga. O se tala lenei o le alofa o se tuaoi i lona tuaoi.

I se faaupuga o se mataupu faavae ua leva e faapea, o se tagata na te afifiina ia lava, e laitiiti si ana afifi. E i ai se ala faapitoa a le alofa e faatele ai se afifi laitiiti. O le ki o le alofa i o tatou tuaoi, e aofia ai le tuaoi e faigata ona alofa i ai. E ao ina tatou manatua e ui ina tatou filifilia a tatou uo, a o le Atua e filifilia o tatou tuaoi—ma e i ai i soo se mea. E le tatau ona i ai se tuaoi o le alofa; e le tatau ona vaapiapi lo tatou lotonuu. Na fetalai mai Keriso, “Aua afai tou te alolofa atu i e ua alolofa mai ia te outou, se a ea se taui tou te maua ai? e le faia ea e le au telona o lea lava mea? (Mataio 5:46 ).⁸

O le a “fuatia e le [Alii] lo tatou tuuto ia te ia i le ala tatou te alolofa ma auauna atu ai i o tatou uso a tagata.”

E ao ina tatou alolofa ma auauna atu i isi i o latou mafatiaga.

Na tusia e Iosefa Samita se tusi i le Au Paia, na lomia i le Messenger and Advocate, e uiga i le mataupu o le alofa o le tasi i le isi ma ia faamaonia i luma o le Atua. Na ia tusia:

Uso Pele e:—O se tiute e ao ona i ai i tagata taitoatasi o le Au Paia, o le faia saoloto o mea mo ona uso—ia fealofani e le aunoa, ma fesoasoani ia i latou. Ina ia faamaonia i luma o le Atua, e tatau ona tatou fealofani: e tatau ona tatou faatoilalo le leaga; e tatau ona tatou asiasi atu i e ua matuaoti ma fafine ua oti a latou tane i o latou mafatiaga, ma e tatau foi ona tatou tausisia i tatou lava ia le pisia mai le lalolagi: aua o ia amioga mama e tafe mai le punavai tele o le talitonuga faalelotu mama. O le faamalolosia o lo tatou faatuatua e ala i le faaopoopo i ai o uiga auaumama lelei uma lea e faaoofu ai fanau a Iesu faamanuina, e mafai ona tatou tatalo i le vaitau o talosaga; e mafai ona tatou alolofa i o tatou tuaoi e pei o i tatou lava, ma ia faatuatua i mafatiaga, ma le iloa o le taui o na mea ua silisili ia i le malo o le lagi. E maeu lea faamafanafanaga! E maeu lea olioli! Tuu mai lava au ou te ola i se olaga o le amiotonu, ma ia faapea foi lo’u taui!” (History of the Church, 2:229).

O nei amioga mama e lua, o le alofa ma le auauna atu, e manaomia mai ia i tatou pe afai e fia avea i tatou ma ni tuaoi lelei ma fia maua le filemu i o tatou olaga. Sa i ai moni i le loto o Elder Willard Richards. A o i ai i le Falepuipui i Karefasi i le afiafi o le tagatavaleina o Iosefa ma Ailama, sa manatu le leoleo o le falepuipui o le a sili ona saogalemu i latou i sela. Sa faliu atu Iosefa ia Elder Richards ma fesili, “Afai ma te o i le sela, mata e te sau?”

O le tali a Elder Richards, o se tali o le alofa: “Uso Iosefa, e te lei tau fesili mai ia te au ou te laasia ma oe le vaitafe—e te lei tau fesili mai ia te au ou te sau i Karefasi—e te lei fesili mai ia te au ou te sau i le falepuipui faatasi ma oe—ma pe ete manatu o le a ou lafoaia nei oe? Ae o le a ou ta’u atu ia te oe le mea ou te fai; afai o le a faasalaina oe e sisi mo le ‘taufaalata,’ ou te tuu atu au e sisi mo oe, ae faasaoloto oe e te alu.

Atonu na tali atu Iosefa ma se lagona ootia tele, “Ae e te le mafai.”

Lea na tali mausali atu ai Elder Richards, “O le a ou faia” (tagai B. H. Roberts, A Comprehensive History of the Church, 2:283).

O le suega a Elder Richards atonu na sili atu nai lo le mea o le a feagai ma le toatele o i tatou: o le suega o le afi ae le o le fuamaa. Ae afai e poloaiina ai i tatou e faia, mata e mafai ona tatou oti mo o tatou aiga? o tatou uso? o tatou tuaoi?

O le fuamaa o le agaalofa o se fuataga lea o le avea o i tatou ma soo; o se fuataga o lo tatou alofa mo le Atua ma le tasi i le tasi. Pe o le a tatou tuua ea se faailoga o le auro mao’i pe, faapei o le faitaulaga ma le sa Levi, na ui ese atu i le isi ituala? ⁹

E manaomia lo tatou savavali ma le mautinoa i le ala o le alofa lea ua faaalia mai e Iesu.

I se feau taua i le Au Paia o Aso e Gata Ai i Navu, i le na o le tasi le tausaga a o lei tagatavaleina faafuasei ma le matautia, na saunoa ai le Perofeta o Iosefa Samita:

“Afai tatou te fia maua ma atiae le alofa o isi, e tatau ia i tatou ona alolofa atu i isi, e oo lava i o tatou fili faapea ma a tatou uo. … Ua tatau i Kerisiano ona tuu le tauaimisa ma le fetaua’i, ae atiina ae ia mataupu faavae o le lotogatasi ma le faauooga i o latou siomaga.” (History of the Church, 5:498–99.)

O se fautuaga maoae lea i aso nei, pei lava o [lena] taimi. O le lalolagi o loo tatou ola ai, pe latalata i o tatou aiga pe mamao, e manaomia le talalelei a Iesu Keriso. E maua ai le ala e tasi o le a iloa ai e le lalolagi le filemu. E manaomia ona tatou agalelei atili o le tasi ma le isi, agamalu ma lotofaamagalo atili. E manaomia ona tatou faatelegese ona ita ae faatele vave le fesoasoani atu. E ao ina faaloaloa atu lo tatou lima o le faauo ae teena le lima o le tauimasui. A faapuupuu, e manaomia ona tatou alolofa o le tasi i le isi i le alofa mama o Keriso, faatasi ai ma le alofa moni ma le agaalofa, ma afai e tatau ai, ia fetausoaa’i i mafatiaga, aua o le ala lena o loo alofa mai ai le Atua ia te i tatou.

I a tatou sauniga tapuai, e tele ina tatou lagiina se viiga matagofie mai tusiga a Susan evans McCloud. Ou te fia sii maia ni nai laina o lena viiga mo outou?

Faaola e, ia ou alofa,
Ia oe ma ui i ou ala,
Ia ou sii ae se tasi,
I le mana mai luga. …

O ai a’u e faamasino
Ae ua tele o’u sese?
Lilo faanoanoa i le loto
Ma ua le ma vaaia. …

Ou te leoleo i lo’u uso;
Faamalolo i tagata.
Ma alofa i e vaivai
Ma e ua manunua.
Faaola e, ou te mulimuli—
atu ia te oe.

(Viiganu. 150)

E ao ina tatou savavali ma le mautinoa ma le agaalofa sili atu i le ala ua faaalia mai e Iesu. E manaomia ona tatou “tutu ma fesoasoani e sii ae se isi” ma e moni o le a tatou maua le “malosi e sili atu i lo [tatou] lava.” Afai tatou te faia nisi mea e aoao ai i le “galuega faamalolo,” o le a i ai avanoa e le mata’ua e faaaoga ai, e pa’i atu ai i “e ua manunua ma vaivai” ma faaalia i tagata uma “se loto agamalu[atu].” Ioe, le Alii e, o le a matou mulimuli ia te oe. ¹⁰

O le alofa mama o le alofa le pona lea o Keriso ma o le a le toilalo lava.

Na fetalai [Iesu], “Ou te tuu atu ia te outou se poloaiga fou,” “Ia outou fealofani; … Ou te iloa ai o o’u soo moni outou, pe afai tou te fealofani.” (Ioane 13:34–35.) O lenei alofa lea e tatau ona tatou alolofa ai i o tatou uso ma tuafafine i le aiga o tagata, lea foi e alofa ai Keriso i tagata uma, ua ta’ua o le alofa mama po o le “alofa le pona o Keriso.” (Moro. 7:47.) O le alofa lea na uunaia ai le mafatiaga ma le taulaga togiola a Keriso. O le tulaga aupito maualuga e mafai ona ausia e se tagata, ma o le lagona aupito loloto foi lea o le loto o le tagata.

… O le alofa mama ua aofia ai isi amoiga mama uma o le amioatua. E iloagofie ai le amataga ma le faaiuga o le ata o le faaolataga. A oo ina le aoga mea uma, o le alofa mama—le Alofa o Keriso—o le a letoilalo lava. O uiga aupito silisili ia o uiga paia uma.

Mai le tele o le alofa i lona loto; na talanoa atu Iesu i e matitva, o e le taualoa, o fafine ua oti a latou tane, o tama iti; o faifaatoaga ma le au faifaiva, ma i latou sa tausi oti ma mamoe; o tagata ese ma tagata mai fafo, o e mauoa, o taitai o malo, faapea foi le Au Faresaio ma le au tusiupu faatuaupua. Na Ia auauna atu i e matitiva, o e fiaaai, o e na tuliesea, o e mamai. Sa Ia faamanuiaina e pipili, o e tauaso, o e tutuli, ma isi tagata sa i ai manaoga faaletino. Sa Ia tuliesea temoni ma agaga leaga sa mafua ai ona mama’i i le mafaufau ma lagona. Sa Ia faamamaina i latou sa mafatia i agasala. Sa Ia aoaoina lesona o le alofa ma faia faafia auaunaga le faatuaoia i isi. Na maua e tagata uma lona alofa. Na “lauavanoa tagata uma o le tasi e pei o le tasi, ma ua leai se tasi [na] faasaina.” (2 Ni. 26:28.) O faaaliga uma nei ma faataitaiga o lona alofa mama le faatuaoia.

O le a manuia tele le lalolagi o loo tatou ola ai pe afai o le a faatino e alii ma tamaitai i soo se mea, le alofa le pona o Keriso, o le agalelei, agamalu, ma le lotomaualalo. E le lotoleaga pe faamaualuga. E le faatuaoia aua e le sailia se taui. E le taliaina mea leaga po o le lotoleaga, e le fiafia foi i le amioleaga; e leai se avanoa mo le faamaualuga, inoino, po o le lemigao. E musu e amanaia le taufaifai, gagana mataga, sauaina, po o le faate’a mai faiganuu. E uunaia ai tagata eseese e nonofo faatasi i le alofa faaKerisiano tusa lava po o a talitonuga faalelotu, lanu, tagatanuu, tulaga tautupe, tulaga faaleaoaoga, po o aganuu.

Ua poloaiina i tatou e le Faaola ia tatou fealofani e faapei ona ia alofa mai ia te i tatou; e faaoofu ia i tatou lava “i le noataga o le alofa” (MF&F 88:125), e pei ona ia faaofuina ai ia lava. Ua valaaulia i tatou ina ia faamama o tatou lagona i totonu, ia suia o tatou loto, ia faaogatusa a tatou taga faaaliali ma o tatou foliga ma mea tatou te tautala ma talitonu i ai, ma ia lagonaina i totonu. E ao ina avea i tatou o ni soo moni o Keriso. ¹¹

O le alolofa atu i isi o “se ala silisili lea.”

A o avea o se alii talavou, fai mai Brother Vern Crowly sa ia aoaoina se mea o se lesona taua na aoao mai e le Perofeta o Iosefa i le uluai Au Paia ina ua ia ta’u atu i ai “ia alolofa i isi, e oo lava i o tatou fili faapea foi ma uo.” O se lesona lelei lea mo i tatou taitoatasi.

Ina ua gasegase lona tama, sa nafa ai Vern Crowley ma le tiutetauave o le vaaia o le lotoa e faatau ai totoga tuai o taavale a le aiga e ui sa na o le sefululima ona tausaga. Sa le amanaia e nisi tagata o ia ona e talavou, ma sa toesea ni totoga o taavale mai le lotoa i le po. Sa ita Vern ma tonu ai ia te ia e pue se tagata ma faia ai se faataitaiga. O le a ia tauimasui.

Ina ua faatoa amata ona malosi mai lona tama, sa taamilo Vern i le lotoa i se tasi po i le taimi e tapuni ai. Toeitiiti a pogisa. Sa ia vaaia i se tulimanu mamao o le fanua se tasi o amoina se fasi uamea lapoa agai i tua o le pa. Sa tamoe saoasaoa pei se tagata tutuu ma maua le gaoi talavou. O lona manatu muamua lava o le fasi ma toso faatata le tamaitiiti i luma i le ofisa e telefoni ai leoleo. Sa matua faatumulia lona loto i le ita ma le fiatauimasui. Na ia maua le gaoi, ma sa ia faamoemoe e faia le mea tonu e tatau ai.

Na faafuasei ona tu atu le tama o Vern, ma sa ia tuu lona lima vaivai ma le malu i le tauau o lona atalii, ma fai atu, “Ua ou iloa ua e le fiafia, Vern. E mafai ona ou taulimaina?” Ona ia savali atu lea i le alii talavou semanu e gaoi, ma tuu lona lima i lona tauau, ma vaai atu i ona mata mo sina minute, ma fai atu, “Atalii, ta’u mai, aisea ua e faia ai lenei mea? Aisea na e taumafai ai e gaoi lena kia o le taavale?” Ona amata savalivali atu lea o Uso Crowley i le ofisa ma faauouo le tama, ma fesilisili e uiga i le faafitauli o le taavale a le alii talavou a o la savavali. E oo ifo i le taimi na la taunuu ai i le ofisa, sa fai mai le tamā, “Ou te manatu ua uma le kalasi ma o le mea lena o loo mafua ai le faafitauli.”

O le taimi lea ua matua mumū le ita o Vern. “O ai e kea i lana kalasi?” na ia mafaufau ai. “Vili leoleo ona uma a lea.” Ae sa talanoa pea lona tamā. “Vern, aumai sana kalasi. Ave foi i ai ma se mama [throwout bearing]. Ma aumai sana peleti o le kalasi. E tatau ona lelei ai.” Sa tuuina atu e le tamā totoga uma i le alii talavou sa taumafai e gaoi ma faapea atu, “Ave mea ia. Ma le kia lea. E te le tau gaoi, alii talavou. Na o lou fesili mai lava. E i ai lava auala e foia ai faafitauli uma. E naunau tagata e fesoasoani.”

Fai mai Uso Vern Cowley, sa ia aoaoina se lesona o le faavavau i le alofa i lena aso. Na tele ina toe foi mai le alii talavou i le lotoa. I lona lava lotomalie, i lea masina ma lea masina, sa ia totogia ai totoga uma sa tuuina i ai e Vic Crowley, e aofia ai ma le kia. I le taimi o na asiasiga, na fesili ai o ia ia Vern pe aisea na faapena ai lona tamā ma faia le mea sa ia faia. Na faamatala i ai e Vern se mea e uiga i talitonuga o le Au Paia o Aso e Gata Ai, ma le tele o le alofa o lona tama i le Alii ma tagata. Na mulimuli ane papatiso le alii semanu e gaoi. Fai mai Vern mulimuli ane, “Ua faigata nei ona faamatala o’u lagona sa i ai ma le mea na ou oo i ai i lena aafiaga. O au foi ia sa laitiiti. Sa ou pueina la’u kuluku. Sa tuu ou te faia i ai se faasalaga matuia. Ae sa ese le ala na aoao mai e lo’u tama ia te au.”

Se ala ese? Se ala e sili atu? Se ala e maualuga atu? Se ala e silisili ona lelei? Oi, se lesona ina a matagofie e ono manuia ai le lalolagi. Pei ona tautino mai e Moronae:

O le mea lea, soo se tasi e talitonu i le Atua e mafai moni lava ona faamoemoe mo se lalolagi sili atu ona lelei. …

“Ae ua saunia e le Atua le ala i le meaalofa a lona Alo se ala e sili atu ona lelei” (Eteru 12:4, 11.)¹²

Fautuaga mo Suesuega ma le Aoaoina Atu

Fesili

O le a le uiga o le saunoaga a Peresitene Hunter e faasino i poloaiga sili e lua o “fuamaa a le Alii”? (Tagai vaega 1.) Mafaufau pe faapefea ona e tali i fesili o loo fesili ai Peresitene Huner i le faaiuga o le vaega 1.
Toe iloilo le tala a Peresitene Hunter i le faataoto i le Samaria agalelei (tagai vaega 2). O le a se mea e mafai ona tatou aoao mai nei aoaoga e uiga i le alolofa i o tatou tuaoi? E mafai faapefea ona tatou faateleina lo tatou alolofa mo i latou e ono “faigata ona alolofa i ai”?
I le vaega e 3, o loo aoao mai ai e Peresitene Hunter e ao ona tatou alolofa ma auauna atu i isi i taimi o o latou mafatiaga. Pe ua faamanuiaina ea oe e se tasi sa alofa ma auauna atu ia te oe i se taimi na e manaomia ai?
Mafaufau i aoaoga a Peresitene Hunter e uiga i le mulimuli i le faataitaiga a le Faaola o le alofa (tagai vaega e 4). E mafai faapefea ona tatou atiae se alofa sili atu mo isi? O a nisi auala e mafai ona tatou faailoa lelei atu ai lo tatou alofa?
I le vaega e 5, o loo faaalia ai e Peresitene Hunter nisi o auala na faaalia ai e Keriso Lona alofa. O anafea na e lagonaina ai le alofa o le Faaola i lou olaga? O a faamanuiaga na oo mai a o e “faatinoina le alofa le pona o Keriso”?
O a ni mea e mafai ona tatou aoaoina mai ia Peresitene Hunter i lona faamatalaina o le tala ia Vern Crowley? (Tagai vaega 6.) E mafai faapefea ona tatou suia lagona o le “ita ma le tauimasui” i lagona o le alofa mama? O a ni aafiaga ua fesoasoani ia te oe ua e iloa ai o le alofa mama o “se ala e sili atu ona lelei”?

Mau Fesootai

Mataio 25:31–46; 1 Korinito 13; Efeso 4:29–32; 1 Ioane 4:20; Mosaea 4:13–27; Alema 34:28–29; Eteru 12:33–34; Moronae 7:45–48; MF&F 121:45–46

Fesoasoani mo Suesuega

“O le faatinoina o mea ua e aoaoina o le a maua mai ai se malamalama faaopoopo lelei (tagai Ioane 7:17)” (Talai La’u Talalelei [2004], 19 ). Mafaufau e te fesili ifo ia te oe lava pe mafai faapefea ona e faaaogaina i le fale, i le galuega, ma ou tiutetauave faale-Ekalesia.