Mataupu 7

O Faaaliga Faifai Pea e Ala Mai i Perofeta Soifua

“O loo taialaina i tatou e se perofeta soifua a le Atua—o le o loo mauaina faaaliga mai le Alii.”

Mai le Soifuaga o Howard W. Hunter

Ina ua uma ona lagolagoina o se Peresitene o le Ekalesia i le konafesi aoao ia Oketopa 1994, sa faaalia e Howard W. Hunter ona lagona e uiga i tiutetauave paia:

“O’u uso e ma tuafafine pele, faafetai atu mo la outou palota lagolago. Ua ou tu atu i o outou luma ma le lotomaualalo ma le agamalu, ua faanoanoa ona o le maliu talu ai nei o lo tatou perofeta pele, o Peresitene Ezra Taft Benson. E momomo lo’u loto i le maliu o si a’u uo pele, aemaise ai le iloa o tiutetauave fou ua oo mai ia te au.

“Ua tele o’u loimata e maligi ma ua ou saili atu i lo’u Tama oi le Lagi i le tatalo faatauanau ma le manao o lo’u loto ina ia ou gafataulimaina lenei valaauga maualuga ma le paia. Sa ou tatalo ina ia ou agavaa e tauaveina le tofiga lea ua toasefulutolu isi tamalii ua tauaveina i lenei tisipenisione. Atonu e na o i latou, o loo vaavaai mai i le isi itu o le veli, e mafai ona malamalama atoa i le mamafa o le tiutetauave ma le faalagolago loloto i le Alii ua ou lagonaina i le taliaina o lenei valaauga paia.”

Sa faamalamalama e Peresitene Hunter na ia mauaina le malosi ma le faamautinoaga i lona talitonuga maumaututu e le o taitaia le Ekalesia e tagata, ae o Iesu Keriso lava Ia, o loo saunia ma musuia i latou Na te valaauina e pulefaamalumalu:

“O lo’u malosiaga silisili i nei masina ua mavae atu o la’u molimau mausali lea o le galuega lenei a le Atua ae le o tagata. O Iesu Keriso o le faaao o le Ekalesia Na taitaia i le upu ma galuega. Ua faamamaluina lava au, e le mafai e upu ona faamatala, ina ua valaauina mo sina taimi e avea o se meafaigaluega i ona aao e pulefaamalumalu i lana ekalesia. Ae a aunoa ma lena malamalama o Keriso o le ao o le Ekalesia, e le mafai e au po o se isi lava tagata ona tauaveina le tiutetauave o le valaauga ua oo mai.

“I le manatu ai i lea tiutetauave, ou te faailoa atu ai le aao faavavega o le Atua i lo’u olaga. Ua faatele ona ia faasaoina lo’u ola ma toe faafoisia mai lo’u malosi, ua faatele ona ia toe aumaia a’u mai le siui o le faavavau, ma ua faatagaina au e faaauau i la’u galuega i le olaga nei mo se isi vaitau. E tele taimi sa ou tau manatunatu ai pe aisea ua faasaoina ai lo’u ola. Ae o lea ua ou faapafalaina lena fesili ae ole atu tau lava o le faatuatua ma tatalo mo tagata o le Ekalesia ina ia mafai ona tatou galulue faatasi, o a’u e galue faatasi ma outou, e faataunuu ia faamoemoega o le Atua i lenei vaitau o o tatou olaga. …

“Ua tolusefululima tausaga talu ona lagolagoina a’u o se tasi o le Korama a le Toasefululua. O na tausaga ua tumu i tapenapenaga. … Ua telegese atu la’u savali i le taimi nei, ae o loo manino lo’u mafaufau, o lo’u agaga foi o loo talavou. …

“Faapei o o’u uso na muamua atu ia te au, ua ou maua faatasi ma lenei valaauga le faamautinoaga o le a taitai e le Atua lana perofeta. Ua ou taliaina ma le lotomaualalo le valaauga e auauna atu ma tautino atu faatasi ma le Faisalamo, “O Ieova o lo’u malosi ma lo’u talita o ia; ua faatuatua lo’u loto ia te ia, ona ou maua ai lea o le fesoasoani” Sala. 28:7).”¹

I le avea ai o se tasi o le Korama a Aposetolo e Toasefululua, sa fautuaina ai e Peresitene Howard W. Hunter le Au Paia o Aso e Gata Ai e mulimuli i le Peresitene o le Ekalesia.

O Aoaoga a Howard W. Hunter

I tisipenisione taitasi, ua faatuina e le Atua perofeta e fai ma Ona fofoga taumomoli.

A e susueina itulau o le Feagaiga Fou, o loo i ai tusitusiga a tamalii maoae o aso anamua, o e ua ta’ua o perofeta. O loo i ai foi i tusi o le Feagaiga Fou, e ese mai isi mea, tusitusiga, o aoaoga, ma le talaaga o tamalii o se tisipenisione mulimuli ane, o e na tofia e fai ma perofeta. O loo i ai foi ia i tatou le faamaumauga o perofeta o le itu i sisifo o le lalolagi, o e sa sii ae o latou leo, e folafola le upu a le Alii, tetee atu i le amioletonu, ma aoao atu mataupu faavae o le talalelei. O i latou uma nei sa tuua a latou molimau.

O se perofeta o se tasi ua valaau ma faatuina e le Alii e faalautele ia faamoeoega o le Atua i ana fanau. O ia o le ua mauaina le perisitua ma tautala atu ma le pule. O perofeta o faiaoga ma puipui o le talalelei. Latou te tuuina atu molimau i le paia o le Alii o Iesu Keriso. E muai ta’u atu e perofeta mea o le a tutupu i le lumanai, peitai e le o le mea taua lea o o latou tiutetauave, e ui e mafai ona avea lena mea ma se faamaoniga o le mana faaperofeta.

Sa manaomia le taitaiga amiotonu i tisipenisione taitasi, ma sa filifilia e le Atua ia perofeta mo lea faamoemoega a o lei taitai ona o mai i latou i lenei olaga [tagai Ieremia 1:5; Aperaamo 3:23].²

Ua faamautu i se suesuega o tusitusiga paia a le Alii le mea moni faapea, o faaaliga faifai pea o loo taialaina ai perofeta ma le Ekalesia i soo se taimi. A na le seanoa faaaliga faifai pea, semanu e le saunia Noa mo le lolo sa ufitia ai le lalolagi. Semanu e le taialaina Aperaamo mai Arana i Heperona, le Laueleele o le Folafolaga. O faaaliga faifaipea na toe taitaia ai le fanauga a Isaraelu mai le nofopologa i lo latou nuu folafolaina. O faaaliga e ala mai i perofeta na taialaina ai taumafaiga a faifeautalai, na faatonutonu ai le toefausia o le malumalu o Solomona, ma tuuitiitia ai le sosolo o faiga faapologa i tagata Isaraelu.

A o lei afio ae le Keriso, sa ia folafola atu i aposetolo e toasefulutasi na totoe, “Faauta foi, ou te ia te outou i aso uma lava, e oo lava i le gataaga o le lalolagi.” (Mata. 28:20.) Ia ua mavae lona afio ae, sa ia taialaina le Ekalesia e ala i faaaliga seia iu ina maliliu Aposetolo ma sosoo ai ma le liliuese o le Ekalesia a Iesu Keriso.³

I lona talafaasolopito, e aofia ma le aso nei, e i ai lava se perofeta a le Ekalesia, tagatavaai, ma se talifaaaliga. I le ao o le Ekalesia o i ai Iesu Keriso, o le o loo taitaia lana perofeta. …O Ona fesoasoani [ma] uso o le Aufono a le Toasefululua … o perofeta foi, tagatavaai, ma talifaaaliga. …O tagata o le Ekalesia e le tau faalogo i se pu e le mautinoa. E mafai ona latou talitonu i le leo o o latou taitai, ma le iloa o loo taialaina i latou e le Alii.⁴

Ua saunia e le Atua le taitaiga mo Lana fanau e ala mai i se perofeta soifua i le taimi nei.

O se faailoga ma’oti o aso amuli e tamua mai i le afio faalua mai o le Alii, na vaaia i se faaaliga e le Aposetolo lava lea e tasi na tusia le tusi o Faaaliga. Fai mai a ia:

“Na a’u iloa foi le tasi agelu na lele i le taulotoaiga o le lagi, ua ia te ia le talalelei e faavavau e folafola atu i e e nonofo i le lalolagi, i atunuu uma, ma ituaiga, ma gagana eseese, ma nuu.” (Faaa. 14:6.) …

Tatou te molimau atu i le lalolagi uma ua uma ona oo mai avefeau mai le lagi i o tatou taimi, ma aumai le pule mai le lagi ma toefuatai mai upumoni na leiloloa ona o aoaoga ma faiga piopio. Ua toe fetalai mai le Atua ma ua faaauau ona saunia le taiala mo ana fanau uma e ala mai i se perofeta soifua i aso nei. Tatou te tautino atu e pei ona folafola mai, e faatasi o ia e le aunoa ma ana auauna ma taitai mataupu o lana Ekalesia i le lalolagi atoa. E pei o taimi ua tuanai, o faaaliga e taitaia ai le galuega faafaifeautalai, o le fausiaina o malumalu, o le valaauina o taitai perisitua, ma lapataia mai mea leaga o le olaga ia e ono faafitia ai le faaolataga o fanau a lo tatou Tama.

I se faaaliga i se failauga o ona po nei, o Iosefa Samita, na fetalai ai le Alii:

“Ona o A’u e le o se faailoga tagata, ma Ou te manao ia iloa e tagata uma ua vave ona oo mai o le aso, e lei oo mai le itula, ae ua latalata mai lava le oo mai, o le taimi o le a aveesea ai le filemu mai le lalolagi, ma o le a maua ai e le tiapolo le mana i luga o lana lava pulega.

Ma o le a i ai foi i le Alii le mana i luga o lana au paia, ma o le a nofotupu i lo latou lotolotoi.” (MF&F 1:35–36.)

O loo nofotupu le Faaola i le lotolotoi o le Au Paia i le taimi nei e ala i faaaliga faifai pea. Ou te moimau atu o loo i ai o ia faatasi ma ana auauna i le aso ma o le a i ai pea lava seia oo i le gataaga o le lalolagi.

Talosia ia aua nei vaiti la tatou vaaiga, ma mafaufau faapea na o anamua sa oo mai ai faaaliga. E mutimutivale le alofa o le Atua ma e alofa i ana fanau i tupulaga uma ma sa ia faaalia mai o ia lava i ona po nei i le talafaasolopito.⁵

Ua faaalia mai e le Alii lona mafaufau ma lona finagalo i ana perofeta faauuina. O loo i ai se vaitafe e le muta o faaaliga o loo tafe mai pea lava pea mai le matavai o le lagi i auauna faauuina a le Atua. Talu mai le maliu o le Perofeta o Iosefa Samita, o loo faaauau pea ona oo mai le siufofoga o le Alii i ana perofeta faapei o le taimi muamua.⁶

I le taimi lenei o le oge faaleagaga, e mafai ona tatou maua le mau o le faaleagaga e ala i le gauai atu i le leo o le perofeta.

O le oge o se tasi o mala masani i taimi o le Feagaiga Fou, ma sa malamalama tagata i taunuuga faataumaoi o le pagatia o faatoaga ma le matelaina o tagata. Na aumaia e Amosa lea malamalama i se taulaiga maati e ala i lana valoaga o se oge faaleagaga. Fai mai a ia: “… e le se oge i mea e ‘ai, po o se galala i le fiainu vai, ae o le oge i le faalogologo i afioga a Ieova” [Amosa 8:11]. …

I lipoti o aso nei o le fememeai ma le oi o tagata taitoatasi ma faalapotopotoga faalelotu, a o latou taumafai e foia o latou faaletonu tau lotu ma feeseeseaiga, ua faamanatu mai ai ia i tatou upu nei a Amosa: “… Latou te feoai atu ai e saili le afioga a Ieova ae le maua”[Amosa 8:12].

Latou te saili ia maua se vaifofo e aunoa ma le atiae i luga o le papa o faaaliga, e pei ona fetalai mai ai le Aliii e tatau ona faia ai [tagai Mataio 16:17–18]. …

… O le fememeai ma le oi o loo pagatia ai le lalolagi e le o se mea e masani ai tagata faamaoni o le Ekalesia. … O loo i ai se siufofoga e talitonuina ia i latou e faatuatua ma le naunautaiga e talitonu. E moni o loo tatou o ola i se taimi o le oge, e pei ona faamatala mai e Amosa. … E ui o lea, i le mea ua foliga mai o se oge faaleagaga, e toatele ua mauaina le manuia faaleagaga.

O … la’u molimau ma le lotomaualalo ua toefuatai mai le talalelei i lona atoaga i nei aso e gata ai, ma o loo i ai se perofeta i le lalolagi i ona po nei, o loo tautala atu i le mafaufau ma le finagalo o le Alii ia i latou o le a faalogo ma i ai le faatuatua e mulimuli ai. ⁷

Afai tatou te mulimuli i aoaoga a perofeta soifua, o le a le faaseseina lava i tatou.

I tagata o tisipenisione ma tupulaga ua mavae, o le perofeta aupito taua o ia lea sa soifua i lena taimi, e aoao atu ma faaalia mai le finagalo o le Alii i o latou taimi. I tisipenisone taitasi ua mavae, sa faatuina ia perofeta e le Alii e fai ma ona fofoga taumomoli i tagata o lena vaitau faapitoa ma mo faafitauli patino o lena tupulaga.

O le perofeta o loo soifua i le taimi nei, o ia o lo tatou taitai, ma lo tatou faiaoga. O ia tatou te maua mai ai lo tatou taitaiga i le lalolagi i ona po nei. Mai tulimanu uma o le lalolagi, tatou te tuuina atu ai e i tatou o loo lagolagoina o ia o se perofeta a le Alii lo tatou agaga talisapaia mo lana punavai o le taitaiga faalelagi. …

A o tatou manatua ia perofeta mai le amataga, tatou te iloa ai se faamanuiaga tele tatou te maua mai le uunaiga a se perofeta soifua. E ao ina tatou aoao mai le talafaasolopito, a tatou le naunau e gauai atu i lapataiga ma mulimuli i aoaoga a se perofeta a le Alii, o le a afaina i tatou i le faamasinoga a le Atua. ⁸

E na o le Peresitene o le Ekalesia e i ai le aia tatau e maua ai faaaliga mo le Ekalesia atoa pe tuuina mai ia faauigaga aloaia o tusitusiga paia po o aoaoga faavae a le Ekalesia:

E leai se tasi e tofia na te mauaina poloaiga ma faaaliga i le ekalesia lenei vagana ai [le Peresitene o le Ekalesia], ona e maua e ia e pei lava o Mose” (MF&F 28:2).⁹

Afai tatou te mulimuli i le fautuaga, apoapoaiga, ma aoaoga a taitai o le Ekalesia i a latou faatonuga ia i tatou, o le a le faaseseina lava i tatou i mea e taua mo lo tatou lava faaolataga ma faaeaga patino. ¹⁰

Ua lofituina lava au i le lotofaafetai mo faaaliga ia ua faavaeina ai se faiga ofoofogia ua pulea ai le Ekalesia. O alii taitoatasi ua faauuina o se Aposetolo ma vaetofia o se uso o le Korama a le Toasefululua, e lagolagoina o se perofeta, tagatavaai, ma talifaaaliga. O le Au Peresitene Sili ma le Korama a Aposetolo e Toasefululua ua tofia ma faauuina e umia ki o le perisitua, ua i ai le pule ma le tiutetauave e pulea ai le Ekalesia, e taitaia ai ona sauniga, e aoao atu ai ana aoaoga faavae, ma faatuina ma tausisia ana faiga masani.

A gasegase se Peresitene o le Ekalesia pe ua le mafai foi ona galue atoatoa i tiute uma o lona tofi, o ona Fesoasoani e toalua, o e o faatasi ma ia, e aofia ai i se Korama a le Au Peresitene Sili, e tauaveina le galuega a le Au Peresitene. Soo se fesili faigata, aiaiga faavae, polokalama, po o aoaoga faavae e mataituina ma le lototatalo i le fono a Fesoasoani i le Au Peresitene Sili ma le Korama a Aposetolo e Toasefululua. E leai se faaiuga mai le Au Peresitene Sili ma le Korama a le Toasefululua e aunoa ma le finagalo autasi o i latou uma e tatau ai.

I le mulimuli ai i lea mamanu musuia, o le a agai ai i luma le Ekalesia e aunoa ma se faalavelaveina. O le pulea o le Ekalesia ma le faaaogaina o meaalofa faaperofeta o le a i ai pea lava i na pule faaaposetolo o loo umia ma faaaogain ki uma o le perisitua. ¹¹

Nofoaga Autu mo Konafesi — “O le taimi o konafesi o se vaitau o le toefaafouina faaleagaga e faateleina ai ma faamautuina le malamalama ma molimau.”

I konafesi aoao, tatou te maua ai fautuaga musuia mai perofeta, tagatavaai, ma talifaaaliga.

A o ou mafaufau i savali o konafesi [aoao], ou te fesili ifo ia te au lava i le fesili lea: E mafai faapefea ona ou fesoasoani i isi ia taumamafa i le agalelei ma faamanuiaga a lo tatou Tama Faalelagi? O loo taoto le tali i le mulimuli i le taitaiga e maua mai ia i latou ua tatou lagolagoina o ni perofeta, tagatavaai, ma talifaaaliga, ma isi o le Au Pulega Aoao. Tatou suesue i upu, e fetalaia mai i musumusuga a le Agaga, ma faasino soo i ai. Ua faaalia mai e le Alii lona finagalo i le Au Paia i lenei konafesi.¹²

E tele naua fautuaga musuia mai perofeta, tagatavaai, ma talifaaaliga, ma isi Au Pulega Aoao o le Ekalesia e tuuina mai i le taimi o le konafesi aoao. Ua fautuaina i tatou e perofeta o ona po nei, ia avea le faitauina o lomiga o le konafesi i mekasini a le Ekalesia o se vaega taua o a tatou suesuega faaletagata lava ia. O le mea lea, e avea konafesi aoao, i se faauigaga, o se faaopoopoga po o se faatelega o Mataupu Faavae ma Feagaiga.¹³

O le taimi o konafesi o se vaitau o le toefaafouina faaleagaga pe a faateleina ai le malamalama ma faateleina molimau ma faamautuina ai o loo soifua le Atua ma faamanuiaina ai i latou o e faamaoni. O se taimi faamumuina ai se malamalama o Iesu o le Keriso, o le Alo o le Atua soifua, i loto o i latou e naunau e auauna atu ia te ia ma tausi ana poloaiga. O le konafesi o le taimi e tuuina mai ai e o tatou taitai se taitaiga musuia i le faafoega o o tatou olaga—o se taimi e faagaepuina ai agaga ma faia ai faaiuga ina ia avea ma tane ma ava, o tama ma tina e sili atu, o ni atalii ma ni afafine e sili atu ona usiusitai, o ni uo ma ni tuaoi e sili atu. …

O i tatou ua potopoto iinei i le aso [i le konafesi aoao ua mauaina se malamalama faapitoa, uigaese i le talalelei a le Faaola O le mea e aupito sili ona matagofie, mo i latou ua faatoa mafuta mai ma i tatou, o la tatou tautinoga i le lalolagi o loo taitaia i tatou e se perofeta soifua a le Atua—o le e fesootai, ma musuia, ma mauaina faaaliga mai le Alii. ¹⁴

Fautuaga mo Suesuega ma le Aoaoina Atu

Fesili

Iloilo aoaoga a Peresitene Hunter i le vaega 1. Aisea ua saunia ai e le Atua perofeta mo tisipenisione taitasi? O a nisi o tiute o perofeta? E mafai faapefea ona tatou fesoasoani i tamaiti ia maua se molimau i perofeta?
E faamanuiaina faapefea i tatou i le taimi nei i le i ai o se perofeta soifua? (Tagai vaega 2.) E taua i se a le i ai “o se vaitafe e le uma o faaaliga” o loo tafe mai le Atua i Ana perofeta soifua?
O ni faamaoniga o loo tatou ola i se taimi o le “oge faaleagaga”? (Tagai vaega e 3.) O a faamanuiaga ua e maua mai le gauai atu i le leo o le perofeta soifua?
Ua aoao mai i tatou e Peresitene Hunter e faapea “na o le Peresitene o le Ekalesia e i ai le aia tatau e maua ai faaaliga mo le Ekalesia atoa” (vaega 4). Aisea e fesoasoani ai le iloa o lenei mea? Aisea e fesoasoani ai le iloa “o le a le faaseseina i tatou” pe a tatou mulimuli i le perofeta?
Mafaufau i le taua o le konafesi aoao i lou olaga. (Tagai vaega 5.) O a ni aoaoga mai konafesi aoao ua faamanuiaina ai oe? E mafai faapefea ona e faia ia avea le konafesi aoao o se tosinaga mamana i lou olaga ma le aiga?

Mau Fesootai

Amosa 3:7; Mataio 10:41; Luka 1:68–70; Faaliliuga Iosefa Samita, 2 Peteru 1:20–21; Mosaea 8:15–18; MF&F 1:14–16, 37–38; 21:1, 4–6; 43:2–6; 107:91–92

Fesoasoani mo le Aoaoina Atu

Fai faatasi o se vasega, ia lisi i luga o le laupapa ni fesili atonu o i ai i tagata o isi ekalesia e uiga i le autu o le mataupu. Valaaulia tagata o le vasega e iloilo le mataupu, ma vaavaai mo tali i fesili nei, ona faasoa lea o mea latou te maua.