Kapitulo 1

Ang Atong Panginahanglan sa Buhing mga Propeta

Pasiuna

Sukad pa sa kapanahunan ni Adan, usa ka paagi nga ang Ginoo mosulti sa Iyang kabubut-on ngadto sa Iyang mga anak mao ang pinaagi sa mga propeta (tan-awa sa Amos 3:7). Ang mga propeta motudlo kanato sa kabubut-on sa Dios ug mopadayag sa Iyang balaanong kinaiya. Mga tigsangyaw sila sa pagkamatarung ug mosaway sa sala, ug kon madasig, ang mga propeta managna sa umaabut nga mga panghitabo. Ang pinakaimportante nga ang mga propeta mosaksi kang Jesukristo. Misaad ang Ginoo nga kon “maminaw” kita sa mga pulong sa propeta, “ang mga ganghaan sa impyerno dili makabuntog batok [kanato]; ug ang Ginoong Dios mopatibulaag sa mga gahum sa kangitngit gikan sa [atong] atubangan, ug mohimo sa mga langit sa pagkurog alang sa [atong] kaayohan, ug himaya sa iyang ngalan” (D&P 21:4, 6). Kay naay mga propeta nga mogiya kanato, makasiguro kita sa kabubut-on sa Dios bahin kanato. Makasiguro kita nga kon sundon nato ang tambag sa buhing mga propeta, makahimo kita og mas maayong pagsuhid sa kapanahunang gubot nga atong gipuy-an.

Komentaryo

1.1

Ang Ginoo mopadayag sa Iyang Kabubut-on ngadto sa Buhing mga Propeta Karon sama sa Iyang Gibuhat sa Nangagi.

Si Presidente Russell M. Nelson sa Korum sa Napulog Duha ka mga Apostoles mipasabut nga gikan kang Adan hangtud sa kasamtangan nga Presidente sa Simbahan, ang mga propeta importante nga bahin sa plano sa Ginoo:

“Ang pinakauna [dispensasyon sa ebanghelyo] mao ang panahon ni Adan. Dayon miabut ang mga dispensasyon nila ni Enoch, Noe, Abraham, Moises, ug uban pa [tan-awa sa Bible Dictionary, “Dispensations”]. Ang kada propeta dunay balaang mando sa pagtudlo sa kabalaan ug sa doktrina ni Ginoong Jesukristo. Sa kada panahon, kini nga mga pagtulun-an gitumong aron sa pagtabang sa mga tawo. Apan ang ilang pagkadili masulundon miresulta sa apostasiya. …

“Sa ingon ang usa ka hingpit nga pagpahiuli gikinahanglan. Ang Dios Amahan ug si Jesukristo mitawag kang Propeta Joseph Smith nga mahimong propeta niining dispensasyon. Ang tanang balaang mga gahum sa miaging mga dispensasyon gikinahanglang ipahiuli pinaagi kaniya” (“Ang Pagpahiuli sa Nagkatibulaag nga Israel,” Ensign o Liahona, Nob. 2006, 79–80; emphasis gidugang).

Ang katapusang dispensasyon sa ebanghelyo nagsugod sa pagkatawag sa usa ka propeta—si Joseph Smith. Sama sa nangaging dispensasyon, ang kabubut-on sa Dios gihatag ngadto sa Iyang mga anak pinaagi sa pagpadayag.

Si Presidente James E. Faust (1920–2007) sa Unang Kapangulohan naghisgot sa panginahanglan sa padayong pagpadayag:

“Ang daghang nadawat nga pagpadayag, karon sama usab sa karaan, bahin sa doktrina. Ang uban niini bahin sa pagpadagan sa Simbahan ug ang uban bahin sa unsay angay buhaton. Kadaghanan niini dili talagsaon. Gipahinumduman kita ni Presidente John Taylor: ‘Ang mga pagpadayag ni Adan wala magtudlo kang Noe sa paghimo sa iyang arka; mao usab ang pinadayag ni Noe wala magsulti kang Lot nga biyaan ang Sodom; wala niining duha ang naghisgot mahitungod sa pagbiya sa mga anak sa Israel gikan sa Ehipto. Tanan kini dunay pagpadayag para sa ilang kaugalingon’ (Millennial Star, 1 Nob. 1847, 323)” (“Continuing Revelation,” Ensign, Ago. 1996, 5; emphasis gidugang).

Si Presidente Hugh B. Brown (1883–1975) sa Unang Kapangulohan mihulagway sa iyang pagpakig-istorya sa usa ka sakop sa British House of Commons ug kanhi huwis sa Korte Suprema sa England nga dili miyembro sa Simbahan mahitungod sa panginahanglan og buhing mga propeta ug sa pinadayag nga ilang nadawat:

“[Miingon ko] ‘Akong itug-an kanimo sa tumang ka seryuso nga sumbanang patakaran kadto sa Biblikal nga kapanahunan nga ang Dios makigsulti sa tawo.’

“[Mitubag siya,] ‘Tingali madawat ko kana, pero nahunong kana human sa unang siglo sa Kristiyanong katuigan.’

“‘Ngano kaha nga nahunong man kini?’

“‘Wa koy ikasulti.’

“‘Wala na kaha makigsulti ang Dios sukad niana?’

“‘Basi sa akong nasayran, wala.’

“‘Mosulti kog pipila ka posibling rason nganong wala na siya mamulong. Tungod tingali kay dili siya makahimo. Nawad-an na Siya sa gahum.’

“Miingon siya, ‘Panamastamas kana.’

“‘Ah, kon mao, kon dili ka modawat niana, tingali wala siya makigsulti sa tawo tungod kay wala na siya mahigugma kanato. Dili na siya interesado sa mga kalihokan sa katawhan.’

“‘Dili,’ miingon siya, ‘Nahigugma ang Dios sa tanang tawo, ug Siya walay tawo nga pinalabi.

“‘Kon mao, … ang bugtong posible nga tubag sa akong tan-aw mao nga wala na kita magkinahanglan kaniya. Dako na kaayo ang atong naabut sa edukasyon ug siyensya nga wala na nato kinahanglana ang Dios.’

“Dayon miingon siya, ug nangurog ang iyang tingog dihang naghunahuna siya sa nagsingabut nga gubat [Ikaduhang Gubat sa Kalibutan], ‘Mr. Brown, wala pay panahon sa kasaysayan sa kalibutan nga ang tingog sa Dios gikinahanglan kay sa panginahanglan niini karon. Tingali mahimo ko nimong sultihan nganong wala siya mamulong.’

“Ang akong tubag mao, ‘Namulong gayud siya, namulong siya; apan nagkinahanglan og pagtuo ang mga tawo aron makadungog kaniya.’

“Dayon among gisusi ang unsay gitawag nako nga ‘profile sa usa ka propeta.’ …

“Milingkod ang huwes ug naminaw pag-ayo. Nangutana siya og pipila ka klaro kaayo ug makapahunahuna nga pangutana, ug sa katapusan sa interbyu miingon siya, ‘Mr. Brown, naghunahuna ko kon ang inyong mga tawo nakaamgo ba sa kaimportante sa imong mensahe. Ikaw ba?’ Miingon siya, ‘Kon tinuod man kanang imong gisulti kanako, pinakamahinungdanon kana nga mensahe nga nahitabo sa yuta sukad mipahibalo ang mga anghel sa pagkatawo ni Kristo’” (sa Conference Report, Okt. 1967, 118, 120; emphasis gidugang; tan-awa usab sa “The Profile of a Prophet” [Brigham Young University devotional, Okt. 4, 1955], 2–3, 5, 8, speeches.byu.edu; o “The Profile of a Prophet,” Ensign, Hunyo 2006, 36–37, 39).

1.2

Sulbaron og Balaang mga Solusyon ang mga Problema Karon

Mitudlo si Propeta Joseph Smith (1805–44) nga nagkinahanglan kita og padayon nga balaang direksyon nga “gipahiangay sa mga kahimtang” sa katawhan niini nga dispensasyon (sa History of the Church, 5:135). Mitudlo usab siya nga “lahi ra ang atong pagkabutang kay sa bisan kinsa nga mga tawo nga nabuhi niini nga yuta” ug mao nga gikinahanglan ang lahi nga pagpadayag ug direksyon (sa History of the Church, 2:52; tan-awa usab sa Mga Pagtulun-an sa mga Presidente sa Simbahan: Joseph Smith [2007], 233). “[Kita] nagtuo sa tanan nga gipadayag sa Dios, sa tanan nga gipadayag niya karon, ug [kita] nagtuo nga siya mopadayag pa og daghan nga dagko ug mahinungdanon nga mga butang kalabut sa Gingharian sa Dios” (Mga Artikulo sa Hugot nga Pagtuo 1:9).

Sa pinadayag nga gihatag niadtong 1883 pinaagi ni Presidente John Taylor (1808–87), misaad ang Ginoo nga padayon Niyang panalanginan og pagpadayag ang Simbahan og mga pagpadayag:

“Akong ipadayag kaninyo, sa matag karon ug unya, gamit ang mga pamaagi nga Akong gipili, ang tanan nga gikinahanglan alang sa umaabut nga kalamboan ug kahingpitan sa akong Simbahan, alang sa pagpahiangay ug pag-uswag sa akong gingharian, ug sa pagtukod sa akong Zion” (sa James R. Clark, comp., Messages of the First Presidency of The Church of Jesus Christ of Latter-day Saints [1965], 2:354).

Si Presidente Boyd K. Packer (1924–2015) sa Korum sa Napulog Duha ka mga Apostoles mipahinumdom sa mga Santos sa Ulahing mga Adlaw nga ang pagkakanunay ug ang kausaban nga gihimo sa Simbahan nag-agad sa pagpadayag:

“Dunay mga kausaban nga himoon sa umaabut sama sa nangagi. Kon kining mga kausaban buhaton man o dili sa mga Kaigsoonan [sa propeta ug mga apostoles], magdepende kana sa mga instruksyon nga ilang madawat gamit ang pamaagi sa pagpadayag nga giestablisar sukad sa sinugdanan.

“Ang mga doktrina magpabiling mao ra gihapon, mahangturon; ang organisasyon, mga programa, ug pamaagi mahimong usabon sigun sa Iyang mando nga tag-iya niini nga Simbahan” (“Revelation in a Changing World,” Ensign, Nob. 1989, 16).

Gisulti ni Presidente John Taylor (1808–87) ang panginahanglan sa karon gayud nga pagpadayag isip kabahin sa tinuod nga relihiyon sa Manluluwas:

“Mituo kita nga gikinahanglan nga dunay komunikasyon ang tawo ngadto sa Dios; nga makadawat gayud siya og pagpadayag gikan kaniya, ug kon wala kaniya ang impluwensya sa inspirasyon sa Espiritu Santo dili siya mahibalo sa mga butang sa Dios. … Kinsa kaha ang nakadungog og tinuod nga relihiyon nga walay komunikasyon sa Dios? Alang kanako kana nga ideya maoy labing bakak nga mahanduraw sa tawhanong hunahuna. Ako dili matingala, kon ang mga tawo sa kasagaran mosalikway sa baruganan sa pagpadayag karon, kana nga pagduhaduha ug pagkawalay pagtuo mipatigbabaw sa hilabihan ka makapalisang nga pagkatap. Ako wala matingala nga daghang mga tawo nga mitagad sa relihiyon uban sa pagtamay, ug mitagad niini ingon sa usa ka butang nga dili takus sa atensyon sa maalamong mga linalang, kay kon walay pagpadayag ang relihiyon usa ka pagbugalbugal ug pagtiaw-tiaw. …

“Ang baruganan sa pagpadayag karon, mao gayud ang pundasyon sa atong relihiyon” (“Pakigpulong ni Elder John Taylor,” Deseret News, Mar. 4, 1874, 68; empasis gidugang; tan-awa usab sa Mga Pagtulun-an sa mga Presidente sa Simbahan: John Taylor [2001], 193–194).

1.3

Ang Pagpadayag Padayon Gihapon Niini nga Dispensasyon

Si Joseph Smith mipadayag sa hunahuna ug kabubut-on sa Dios ngadto sa mga Santos.

Si Presidente Spencer W. Kimball (1895–1985) mipamatuod nga ang pagkadawat og pagpadayag padayon gihapon sa atong dispensasyon:

“Moingon ako, sa tumang pagpaubos, pero ingon man usab pinaagi sa gahum ug kusog sa nagdilaab nga pagpamatuod sa akong kalag, nga gikan sa propeta sa Pagpahiuli ngadto sa propeta sa atong kaugalingong panahon, ang linya sa komunikasyon wala maputol, ang awtoridad mapadayunon, usa ka kahayag, masanagon ug matuhupon, nagpadayon sa pagdan-ag. Ang tunog sa tingog sa Ginoo maoy usa ka mapadayunong huni ug naglanog-lanog nga pangamuyo.” (“Revelation: The Word of the Lord to His Prophets,” Ensign, Mayo 1977, 78; tan-awa usab sa Mga Pagtulun-an sa mga Presidente sa Simbahan: Spencer W. Kimball [2006], 300).

Si Presidente George Q. Cannon (1827–1901) sa Unang Kapangulohan mitudlo:

“Kini nga Simbahan sukad sa pagkaorganisar niini hangtud karon wala gayud lapasi og usa ka oras, oo, moingon ko nga walay panahon nga wala ang pagpadayag, nga wala ang tawo sa atong taliwala nga mosulti kanatong mga tawo sa hunahuna ug kabubut-on sa Dios, kinsa mopasabut gayud kanato unsay angay natong buhaton, kinsa makatudlo kanato sa mga doktrina ni Kristo, kinsa makapasabut kanato asa ang sayop ug dili sakto, ug kinsa makahatag kanato sa gikinahanglang tambag ug instruksyon sa lahi-lahing mga butang nga atong masinati. Ingon gayud niini sa kanunay” (“Discourse by President George Q. Cannon,” Deseret News, Ene. 21, 1885, 3; emphasis gidugang).

1.4

Ang Simbahan sa Ginoo Gitukod sa Pundasyon nga mga Apostoles ug mga Propeta

Ang Korum sa Napulog Duha ka mga Apostoles, 2009

Si Presidente Gordon B. Hinckley (1910–2008) mipamatuod:

“Kini ang gipahiuli nga Simbahan ni Jesukristo. Kita isip usa ka katawhan mga Santos sa Ulahing mga Adlaw. Kita nagpamatuod nga ang kalangitan naabli, nga ang mga kurtina natunga, nga ang Dios namulong, ug nga si Jesukristo nagpakita sa Iyang kaugalingon mismo, nga gisundan sa pagtugyan sa balaang katungod.

“Si Jesukristo mao ang ulohang bato sa pamag-ang niini nga buhat, ug kini gitukod sa ‘patukuranan nga … mga apostoles ug mga propeta’ (Mga Taga-Efeso 2:20)” (“The Marvelous Foundation of Our Faith,” Ensign, Nob. 2002, 81).

Si Elder Jeffrey R. Holland sa Korum sa Napulog Duha ka mga Apostoles mipasabut nganong ang pundasyon nga mga apostoles ug mga propeta gikinahanglan karon:

“Ang pundasyon sa Simbahan nga apostol ug propeta kinahanglang anaa sa tanang panahon apan ilabi na sa mga panahon sa kalisdanan o kakuyaw, sa mga panahon nga mobati kita sama sa mga bata, naglibug o nahisalaag, tingali may gamayng kahadlok, mga panahon diin ang dili maayong mga buhat sa mga tawo o sa dautang tinguha sa yawa mosulay sa pagsamok o paglimbong. … Sa panahon sa Bag-ong Tugon, sa mga panahon sa Basahon ni Mormon, ug sa moderno nga mga panahon kini nga mga opisyal mao ang pundasyon nga mga bato sa tinuod nga Simbahan, gipahiluna ug nakaangkon sa ilang kusog gikan sa bato sa pamag-ang, ‘ang bato sa atong Manunubos, kinsa mao si [Jesukristo], ang anak sa Dios’ [Helaman 5:12]” (“Mga Propeta, mga Manalagna, ug mga Tigpadayag,” Ensign o Liahona, Nob. 2004, 7).

1.5

Ang Unang Kapangulohan ug ang Korum sa Napulog Duha ka mga Apostoles Mga Propeta, Manalagna, ug Tigpadayag

Mitudlo si Presidente Harold B. Lee (1899–1973) kon unsay ipasabut sa pag-sustain sa Unang Kapangulohan ug sa Napulog Duha ka mga Apostoles isip mga propeta, manalagna, ug tigpadayag:

“Ang tanang sakop sa Unang Kapangulohan ug ang Napulog Duha sa kanunay gipaluyohan isip ‘mga propeta, manalagna, ug mga tigpadayag.’ … Kini nagpasabut nga bisan kinsa sa mga Apostoles, nga gipili ug gi-orden, mahimo nga modumala sa Simbahan kon siya gipili pinaagi sa kahugpongan [nga gihubad nga nagpasabut ang tibuok Korum sa Napulog Duha], gitudlo ug gi-orden ngadto niana nga katungdanan, ug gibuligan pinaagi sa pagsalig, pagtuo, ug pag-ampo sa simbahan, sa pagkutlo gikan sa usa ka pagpadayag mahitungod niini nga hilisgutan, sa usa ka kondisyon, ug kana ingon nga siya mao ang kinadugayan nga miyembro, o ang Presidente niana nga kahugpungan. (Tan-awa sa D&P 107:22.)” (sa Conference Report, Abr. 1970, 123; o Improvement Era, Hunyo 1970, 28; emphasis gidugang; tan-awa usab sa Mga Pagtulun-an sa mga Presidente sa Simbahan: Harold B. Lee [2000], 98).

Si Presidente J. Reuben Clark Jr. (1871–1961) sa Unang Kapangulohan mipasabut:

“Ang uban nga General Authority [mga Apostoles] gi-assign og espesyal nga calling: naghupot sila og espesyal nga gasa; gi-sustain sila nga mga propeta, manalagna, ug tigpadayag, nga naghatag nila og espesyal nga espirituhanong tuga kalabut sa ilang pagpanudlo sa mga tawo. Duna silay katungod, gahum, ug awtoridad sa pagpadayag sa hunahuna ug kabubut-on sa Dios ngadto sa katawhan, nga ubos sa kinatibuk-ang gahum ug awtoridad sa Presidente sa Simbahan” (“When Are Church Leaders’ Words Entitled to Claim of Scripture?” Church News, Hulyo 31, 1954, 9; emphasis gidugang).

1.6

Unsa Ang mga Propeta, Manalagna ug Tigpadayag

1.6.1

Propeta

Ang propeta mao ang “usa ka tawo kinsa gitawag ug mamulong alang sa Dios. Ingon usa ka sinugo sa Dios, ang propeta makadawat og mga sugo, mga panagna, ug mga pagpadayag gikan sa Dios. Ang iyang responsibilidad mao ang pagpahibalo sa kabubut-on ug tinuod nga kinaiya sa Dios ngadto sa katawhan ug mopakita sa hinungdan sa iyang mga pakigsabut kanila. Ang propeta mosaway sa sala ug managna sa mga sangputanan niini. Tigsangyaw siya sa pagkamatarung. Usahay, ang mga propeta madasig sa pagtagna sa umaabut para sa kaayohan sa katawhan. Ang nag-una niyang responsibilidad, bisan pa, mao ang pagsaksi kang Kristo. Ang Presidente sa Simbahan ni Jesukristo sa mga Santos sa Ulahing mga Adlaw mao ang propeta sa Dios sa yuta karon. Ang mga sakop sa Unang Kapangulohan ug ang Napulog Duha ka mga Apostoles kanunay nga i-sustain nga ‘mga propeta, mga manalagna, ug mga tigpadayag” (Giya sa mga Kasulatan, “Propeta,” scriptures.lds.org; emphasis gidugang).

1.6.2

Manalagna

Isip manalagna, nakita ni Isaias ang umaabut.

Ang manalagna mao “ang tawo nga gihatagan og katungod sa Dios sa pagkakita pinaagi sa espirituhanong mga mata sa mga butang nga gitago sa Dios gikan sa kalibutan (Moises 6:35–38). Siya usa ka tigpadayag ug usa ka propeta (Mosiah 8:13–16). Diha sa Basahon ni Mormon, si Ammon mitudlo nga ang manalagna lamang ang makagamit sa talagsaon nga mga maghuhubad, o Urim ug Thummim (Mosiah 8:13; 28:16). Ang usa ka manalagna nasayud sa nangagi, karon, ug sa umaabut. Sa karaan, ang usa ka propeta sa kanunay gitawag nga usa ka manalagna (1 Sam. 9:9; 2 Sam. 24:11).

“Si Joseph Smith mao ang bantugang manalagna sa ulahing mga adlaw (D&P 21:1; 135:3). Agig dugang, ang Unang Kapangulohan ug ang Konseho sa Napulog Duha giuyunan nga mga propeta, mga manalagna, ug mga tigpadayag” (Giya sa mga Kasulatan, “Propeta,” scriptures.lds.org; emphasis gidugang).

Si Elder John A. Widtsoe (1872–1952) sa Korum sa Napulog Duha ka mga Apostoles mipasabut:

“Ang manalagna mao ang tawo nga makakita gamit ang espirituhanong mga mata. Masabtan niya ang kahulugan sa butang nga dili maklaro sa uban: mao nga usa siya ka tighubad ug tigpatin-aw sa mahangturong kamatuoran. … Buot ipasabut, tawo siya nga makakita, naglakaw uban sa kahayag sa Ginoo nga buka ang mga mata [tan-awa sa Mosiah 8:15–17]” (Evidences and Reconciliations, arr. G. Homer Durham, 3 vols. in 1 [1960], 258).

Gihulagway ni Presidente Joseph Fielding Smith (1876–1972) ang usa sa iyang mga tigtambag nga usa ka tawong nagbaton og gasa sa pagpanagna:

“Si Presidente Harold B. Lee usa ka lindog sa kamatuoran ug pagkamatarung, tinuod nga manalagna nga may talagsaong espiritwal nga kalig-on ug panglantaw ug kaalam, ug kansang kahibalo ug panabut sa Simbahan ug sa panginahanglan niini dili malapawan ni bisan kinsa” (sa Conference Report, Abr. 1970, 114; o Improvement Era, Hunyo 1970, 27).

1.6.3

Tigpadayag

Isip mga tigpadayag, ang Unang Kapangulohan ug Korum sa Napulog Duha ka mga Apostoles mopahibalo sa kabubut-on sa Ginoo alang sa Simbahan ug sa katawhan sa kinatibuk-an. Ipadayag nila ang Iyang kabubut-on sa mga kalihokang espiritwal ug temporal, kay ang tanang butang espirituhanong sa Ginoo (tan-awa sa D&P 29:34). Motudlo sila sa doktrina, modumala sa mga korum sa priesthood, mogiya sa mga auxiliary, modumala sa kontruksyon sa mga meetinghouse ug mga templo, ug mobuhat sa bisan unsa nga gikinahanglan aron ang “ebanghelyo mokaylap ngadto sa mga kinatumyan sa yuta, ingon sa bato nga gipikas gikan sa bukid nga walay gigamit nga mga kamot mokaylap, hangtud kini mopuno sa tibuok yuta” (D&P 65:2).

Si Elder John A. Widtsoe (1872–1952) mitudlo:

“Ang tigpadayag mopahibalo, uban sa tabang sa Ginoo, sa butang nga wala pa mahibaloi. Posibling bag-o kini o nakalimtan nang kamatuoran, o bag-o o nakalimtang gamiton nga nahibaloang kamatuoran nga gikinahanglan sa tawo” (Evidences and Reconciliations, 258).

1.7

Ang mga Propeta Motabang nga Atong Mapalig-on ang Atong Pagtuo kang Jesukristo

Ang pagpaminaw ug pagsunod sa mga pulong sa buhing mga propeta molig-on sa atong pagtuo kang Jesukristo (tan-awa sa Mga Taga-Roma 10:17). Si Propeta Joseph Smith (1805–44) mitudlo nga, “Ang pagtuo moabut pinaagi sa pagpaminaw sa pulong sa Dios, pinaagi sa pagpamatuod sa mga sulugoon sa Dios; kana nga pagpamatuod kanunayng giubanan sa Espiritu sa panagna ug pagpadayag [tan-awa sa Pinadayag 19:10]” (sa History of the Church, 3:379; emphasis gidugang). Mopahayag ang mga propeta sa pulong sa Dios pinaagi sa panagna aron kadtong makadungog mogamit sa ilang pagtuo kang Jesukristo.

Tungod kay gihigugma Niya ang Iyang mga anak, ug “nahibalo sa katalagman nga moabut diha sa mga lumulupyo sa yuta” (D&P 1:17), dunay gihatag nga sulbad ang Langitnong Amahan: Gipahiuli Niya ang kahingpitan sa ebanghelyo ni Jesukristo pinaagi ni Propeta Joseph Smith. Sa paghimo niini, nag-andam ang Ginoo og paagi aron ang “hugot nga pagtuo … molambo sa yuta” (D&P 1:21). Misaad Siya nga, “bisan pa ang mga langit ug ang yuta mahanaw, ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38). Kon madungog nato ang pulong sa Ginoo pinaagi sa pagtulun-an sa mga propeta ug masaksihan ang katumanan niini, motubo ang atong pagtuo. Kana nga pagtuo magdala kanato og kalinaw, paglaum, ug kalipay, bisan niining kalibutan nga gihugpaan sa pagduha-duha, kadautan, ug mga kalamidad.

1.8

Motudlo ang mga Propeta alang sa Atong Kaayohan

Para niadtong natintal sa pagdumili sa tambag ug pahimangno sa mga propeta, mitanyag si Presidente Gordon B. Hinckley (1910–2008) niini nga kasiguroan:

Palihug hibaloi nga ang among mga pangamuyo wala maaghat sa bisan unsang hinakog nga tinguha. Palihug hibaloi nga dili mahimo ang among mga pasidaan kon kini walay unod ug hinungdan. Palihug hibaloi nga ang mga desisyon sa pagpamulong sa nagkalainlaing mga butang wala makab-ot nga walay pagtimbangtimbang, paghisgot, ug pag-ampo. Palihug hibaloi nga ang among bugtong tinguha mao ang pagtabang sa matag usa kaninyo sa inyong mga problema, sa inyong mga pakigbisog, sa inyong mga pamilya, sa inyong kinabuhi. …

“Wala kami hinakog nga tinguha … gawas sa panghinaot nga ang atong mga kaigsoonan magmalipayon, nga ang kalinaw ug gugma maanaa sa ilang panimalay, nga mapanalanginan sila pinaagi sa gahum sa Makagagahum sa lahi-lahi nilang paningkamot sa pagkamatarung” (“The Church Is on Course,” Ensign, Nob. 1992, 59–60).

1.9

Moabut ang Kasiguroan pinaagi sa Pagkahibalo ug Paggamit sa mga Pagtulun-an sa Buhing mga Propeta

Sulod sa Conference Center atol sa kinatibuk-ang komperensya sa Simbahan

Ang mga temporal ug espiritwal nga peligro nga giatubang sa kalibutan karon maoy ebidensya sa kadako sa atong panginahanglan og propetikanhong giya. Si Presidente James E. Faust (1920–2007) sa Unang Kapangulohan mihulagway sa unsang paagi kita luwas gikan niana nga mga peligro:

“Gisaaran kita nga ang Presidente sa Simbahan, isip tigpadayag sa Simbahan, makadawat og giya para kanatong tanan. Ang atong kasiguroan mag-agad sa atong pagpatalinghug sa iyang gisulti ug pagsunod sa iyang tambag” (“Continuing Revelation,” Ensign, Ago. 1996, 6; emphasis gidugang).

Si Elder Quentin L. Cook sa Korum sa Napulog Duha ka mga Apostoles mihatag og ehemplo kon sa unsang paagi ang propetikanhong pagtudlo mipanalipod sa matinud-anong mga miyembro sa Simbahan gikan sa peligro:

“Ang mga propeta madasig sa paghatag kanato og propetikanhong mga prayoridad sa pagpanalipud kanato sa mga peligro. Isip usa ka ehemplo, si Presidente Heber J. Grant, ang propeta sugod 1918 hangtud 1945, nadasig sa paghatag og gibug-aton sa pagsunod sa Pulong sa Kaalam [tan-awa sa Mga Pagtulun-an sa mga Presidente sa Simbahan: Heber J. Grant (2002), 227–36], sa baruganan nga may kaubang saad nga gipadayag sa Ginoo kang Propeta Joseph [tan-awa sa D&P 89]. Iyang gipasabut og maayo ang kaimportante sa dili pagpanabako ug pag-inom sa ilimnong makahubog ug mimando sa mga bishop sa pagribyu niining mga baruganan diha sa mga interbyu para sa temple recommend.

“Nianang panahona ang pagpanabako gidawat sa katilingban isip angayan, gani madanihon nga kinaiya. Ang propesyong medikal midawat sa pagpanabako uban sa gamay lamang nga kabalaka tungod kay ang siyentipikanhong mga pagtuon nga naglambigit sa pagpanigarilyo sa pipila ka matang sa kanser wala pa mahimo hangtud sa ulahing bahin. Si President Grant mitambag uban sa labihan ka madasigon, ug nailhan kitang mga katawhan nga dili moinon ug dili manabako. …

“Ang pagsunod sa Pulong sa Kaalam mihatag sa atong mga miyembro, ilabi na sa atong mga kabatan-onan, og usa ka panagang batok sa paggamit sa druga ug sa miresultang mga problema sa panglawas ug moral nga mga kapeligro” (“Patalinghugi ang mga Pulong sa mga Propeta,” Ensign o Liahona, Mayo 2008, 49; emphasis gidugang).

Si Elder M. Russell Ballard sa Korum sa Napulog Duha ka mga Apostoles mipasidaan nga tungod kay ang pagkaluwas makaplagan pinaagi sa pagsunod sa mga pulong sa buhing mga propeta, kinahanglan nga manalipud kita batok sa mga babag nga maoy nagpugong sa uban sa wala pagpaminaw sa mga pulong sa propeta:

“Dili kini gamay nga butang, mga kaigsoonan, ang pagkaadunay propeta sa Dios sa atong taliwala. … Kon makadungog kita og tambag sa Ginoo nga gipahayag pinaagi sa mga pulong sa Presidente sa Simbahan, kinahanglan nga positibo ang atong pagsanong ug diha dayon. Ang kasaysayan nagpakita nga anaa ang kasiguroan, kalinaw, kalamboan, ug kalipay sa pagsanong sa propetikanhong tambag sama sa gihimo ni Nephi sa karaan, “Ako moadto ug mobuhat sa mga butang nga ang Ginoo nagsugo” (1 Nephi 3:7).

“Nasayud kita sa kasinatian ni Naaman, nga may sakit nga sanla ug kinsa sa katapusan miadto kang Eliseo ug gisugo nga ‘lakaw ug maghugas [sa] Jordan sa makapito, ug hiulian ka sa imong unod, ug ikaw mahinlo’ (2 Mga Hari 5:10).

“Sa sinugdanan, dili andam si Naaman sa pagsunod sa tambag ni Eliseo. Wala niya masabti ang butang nga gipabuhat kaniya—sa paghugas sa makapito sa suba sa Jordan. Sa laing pagkasulti, ang iyang garbo ug kagahi og ulo nagpugong nga dili niya madawat ang panalangin sa Ginoo pinaagi sa Iyang propeta. Sa katapusan miadto siya ug ‘misugmaw sa iyang kaugalingon sa makapito didto sa Jordan, sumala sa gipamulong sa tawo sa Dios; ug ang iyang unod nahiuli pag-usab sama sa unod sa diyutay nga bata, ug siya nahinlo’ (2 Mga Hari 5:14).

“Makapaubos kaayo kang Naaman dihang naamguhan niyang hapit siya dauga sa iyang garbo ug kawalay tinguha nga maminaw sa tambag sa propeta nga magpugong unta nga madawat niya ang ingon ka talagsaon, makalimpyo nga panalangin. Ug makapaubos kaayo ang pagpamalandong kon pila kaha kanato ang dili makadawat sa talagsaon ug gisaad nga mga panalangin tungod kay dili kita maminaw ug dili mobuhat sa yanong mga butang nga gihisgutan nga gisulti sa propeta nga atong buhaton karon. …

“Karon mohimo ko kaninyo og saad. Yano ra kini, apan tinuod. Kon maminaw kamo sa buhing propeta ug sa mga apostol ug mopatalinghug sa among tambag, dili kamo mahisalaag” (“His Word Ye Shall Receive,” Ensign, Mayo 2001, 65–66; emphasis gidugang).

Si Presidente Dieter F. Uchtdorf sa Unang Kapangulohan mipahinumdom kanato nga ang mga panalangin moabut kon lihukon nato ang tubag nga dinasig nga gihatag kanato sa propeta:

“Aduna kitay buhi nga propeta dinhi ibabaw sa yuta karon. … Nasayud siya sa atong mga kalisdanan ug mga kahadlok. Duna siya’y mga tubag nga dinasig. …

“Ang mga propeta mamulong kanato pinaagi sa pangalan sa Ginoo ug sa kayano. Sigun sa gipamatuod diha sa Basahon ni Mormon, “ang Ginoong Dios naghatag og kahayag ngadto sa salabutan; kay siya namulong ngadto sa mga tawo sumala sa ilang pinulongan, ngadto sa ilang pagsabut’ (2 Nephi 31:3).

“Atong katungdanan dili lang ang pagpaminaw apan usab sa paglihok sa Iyang mga pulong nga unta atong maangkon ang mga panalangin sa mga ordinansa ug mga pakigsaad sa gipahiuli nga ebanghelyo. Siya miingon, ‘Ako, ang Ginoo, mapugos sa pagtuman kon kamo mobuhat sa unsa nga Ako misulti, apan kon kamo dili mobuhat sa unsa nga Ako misulti, kamo dili makaangkon og saad’ (D&P 82:10).

“Adunay daghang panahon diin kita masubrahan, masakitan, o anaa sa ngilit sa kasagmuyo samtang naningkamot kaayo nga mahimong hingpit nga mga miyembro sa Simbahan. Salig lang, anaa ang tambal sa Galaad. Pamation nato ang mga propeta sa atong panahon samtang sila motabang kanato nga magpunting sa mga butang nga maoy sentro sa plano sa Tiglalang alang sa mahangturon nga padulngan sa Iyang mga anak” (“The Global Church Blessed by the Voice of the Prophets,” Ensign, Nob. 2002, 12; emphasis gidugang).

1.10

Usa sa Kinadak-an Natong Panginahanglan Mao ang Pagpatalinghug sa mga Propeta

Si Presidente Harold B. Lee (1899–1973) mipasabut sa bili sa pagpatalinghug sa tambag sa mga propeta, bisan og ang kaugalingon natong mga panglantaw lahi ra niana nga tambag:

“Karon ang bugtong kasiguroan nga anaa kanato isip mga miyembro niini nga simbahan mao ang pagbuhat sa tukma sa unsay gisulti sa Ginoo ngadto sa Simbahan niana nga adlaw nga gi-organisar ang Simbahan. Kinahanglan gayud nga magkat-on kita sa pagpaminaw sa tanang pulong ug mga sugo nga ang Ginoo mohatag pinaagi sa Iyang propeta, “ingon nga siya nakadawat [niini], maglakaw sa tanan nga pagkabalaan diha sa akong atubangan; … ingon og gikan sa akong kaugalingon nga ba-ba, sa tanan nga pagpailub ug hugot nga pagtuo.’ (D&P 21:4–5.) Maanaay pipila ka mga butang nga nagkinahanglan og pailub ug hugot nga pagtuo. Mahimo nga kamo dili makauyon unsay moabut gikan sa awtoridad sa Simbahan. Mahimo nga kini supak sa inyong politikanhong mga panglantaw. Mahimo nga supak kini sa inyong sosyal nga mga panglantaw. Mahimong mobalda kini sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa ba-ba sa Ginoo Mismo, uban ang pagpailub ug hugot nga pagtuo, ang saad mao ‘ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan.’ (D&P 21:6.)” (sa Conference Report, Okt. 1970, 152–53; o Improvement Era, Dis. 1970, 126; tan-awa usab sa Mga Pagtulun-an sa mga Presidente sa Simbahan: Harold B. Lee, 101).

Si Elder Robert D. Hales sa Korum sa Napulog Duha ka mga Apostoles mipaniguro kanato og kagawasan gikan sa “wala kinahanglana nga kasakit” kon sundon nato ang propetikanhong tambag:

“Kon sundon nato ang tambag nga gihatag sa mga propeta, maangkon nato ang kinabuhi sa mortalidad diin dili kita mag-antus sa wala kinahanglanang kasakit ug kagun-ob sa kaugalingon. Wala kini magpasabut nga wala kitay mga kalisdanan. Aduna. Wala kini magpasabut nga dili kita sulayan. Sulayan kita, kay kabahin man kini sa katuyoan dinhi sa kalibutan. Apan kon maminaw kita sa tambag sa atong propeta, mas magkalig-on kita ug makabarug sa mga pagsulay sa mortalidad. Makabaton kita og paglaum ug kalipay. Ang tanang panambag nga pulong gikan sa mga propeta gihatag kanato aron malig-on kita ug makabayaw ug makalig-on sa uban” (“Hear the Prophet’s Voice and Obey,” Ensign, Mayo 1995, 17; tan-awa usab sa Mosiah 2:41; D&P 59:23).

Mga Punto nga Pamalandungan

• Sumala sa komentaryo niini nga kapitulo, nganong nagkinahanglan man kita sa mga pagtulun-an sa buhing mga propeta agig dugang sa mga sinulat sa mga propeta diha sa mga kasulatan?

• Unsa kaha ang kalainan sa imong kinabuhi kon wala kay mga pagtulun-an sa buhing mga propeta?

• Gihisgutan ni Elder M. Russell Ballard ang garbo isip usa sa mga babag nga nagpugong sa mga tawo sa pagsunod sa propeta. Unsa pay lain? Unsay atong mahimo aron mabuntog o makapanalipud batok niining mga babag?

Gisugyot nga mga Assignment

• Pagsulat og tulo ka mugbong paragraph gamit ang kaugalingon nimong mga pulong nga magpasabut sa mga termino nga propeta, manalagna, ug tigpadayag. Unsa ang mga kalainan tali niini nga mga tawag [title]? Ngano nga importante kana nga mga kalainan?

• Isulat ang imong mga pagbati mahitungod sa pagkatinuod sa mosunod nga pamahayag: Ang mga miyembro sa Ang Simbahan ni Jesukristo sa mga Santos sa Ulahing mga Adlaw dili mahimong modawat sa Ginoo samtang mosalikway sa Iyang propeta.