Kapitulo 6

Kinatibuk-ang Komperensya

Pasiuna

Gisugo sa Ginoo si Propeta Joseph Smith (1805–44) nga “ang pipila ka mga anciano [elder] nga naglangkob niini nga simbahan ni Kristo kinahanglan nga magtigum sa komperensya … matag karon ug unya” sa katuyoan nga mapahigayon ang “bisan unsa nga buluhaton sa simbahan nga gikinahanglan nga pagabuhaton niana nga panahon.” (D&P 20:61–62). Mga duha ka bulan human sa pag-organisar sa Simbahan, ang unang komperensya gihimo niadtong Hunyo 9, 1830. Si Propeta Joseph Smith mirekord sa mosunod mahitungod niining unang komperensya: “Ang among gidaghanon mga traynta, kauban namo nga nagtigom, mga tumutuo o gustong magkat-on. Gisugdan namo sa pagpanganta ug pag-ampo, miambit kami sa mga timaan sa lawas ug sa dugo sa atong Ginoo nga si Jesukristo. Dayon mipadayon kami sa pagkumpirma sa pipila nga bag-o lang nabunyagan, pagkahuman among gitawag ug giorden ang pipila ngadto sa magkalahing katungdanan sa Priesthood. Daghang pag-awhag ug pagtudlo ang gihatag, ug ang Espiritu Santo gibu-bu kanamo sa milagrusong paagi—daghan kanamo ang nanagna, samtang ang uban nakakita sa langit nga naabli” (sa History of the Church, 1:84–85).

Sama niadtong 1830, ang kinatibuk-ang mga komperensya nagpadayon sa paghatag og “daghang pag-awhag ug pagtudlo,” ug “ang Espiritu Santo gibu-bu” niining sagradong mga panagtigom. Kini nga kapitulo naghatag og empasis sa mga katuyoan sa kinatibuk-ang komperensya sa Simbahan ug gihatagan og pagtagad ang atong tahas sa pagdawat sa tambag ug mga pahimangno sa mga sulugoon sa Ginoo. Samtang tun-an nimo kini nga kapitulo, i-evaluate ang kasamtangan nimong mga kinaiya mahitungod sa kinatibuk-ang komperensya ug ikonsiderar ang pagdawat og mas dako nga espirituhanong pagbag-o ug personal nga mga intstruksyon gikan sa mga mensahe sa mga lider sa Simbahan.

Komentaryo

6.1

Ang mga Katuyoan sa Kinatibuk-ang mga Komperensya

Ang Conference Center sa Salt Lake City, Utah

Gi-summarize ni Presidente David O. McKay (1873–1970) ang mga katuyoan sa kinatibuk-ang mga komperensya:

“(1) Aron sa pagpahibalo sa mga miyembro sa kinatibuk-ang kahimtang—kon nag-uswag ba ang Simbahan o nagkakunhod, sa ekonomikal, sa eklesyastikal , o sa espiritwal nga paagi. (2) Aron sa pagdayeg sa tinuorayng maayong buhat. (3) Sa pagpasalamat sa balaang giya. (4) Sa paghatag og instruksyon ‘sa mga baruganan, sa doktrina, sa balaod sa ebanghelyo.’ (5) Sa pagsangyaw sa pagpahiuli, uban sa balaanong awtoridad sa pagpahigayon sa tanang ordinansa sa ebanghelyo ni Jesukristo, ug sa pagpamahayag, sa gisulti ni Apostol Pedro, nga ‘walay bisan unsa pang lain nga ngalan sa silong sa langit, nga gikahatag ngadto sa mga tawo, nga pinaagi niini maluwas kita.’ (Mga Buhat 4:12.) (6) Sa pagpahimangno ug pagdasig nga makapadayon sa mas dakong kalihokan” (sa Conference Report, Okt. 1954, 7).

6.2

Ang Kinatibuk-ang Komperensya Naghatag og mga Oportunidad alang sa Espirituhanong Pagbag-o

Si Presidente Howard W. Hunter (1907–95) mitudlo nga ang kinatibuk-ang komperensya mao ang panahon sa paglig-on sa atong pagpamatuod ug paghukom nga palamboon ang atong kinabuhi:

Ang komperensya usa ka panahon sa espirituhanong pagpalig-on nga ang kahibalo ug pagpamatuod gidugangan ug gipalig-on nga buhi ang Dios ug nagpanalangin niadtong kinsa mga matinud-anon. Kini usa ka panahon nga ang pagsabut nga si Jesus mao ang Kristo, ang Anak sa buhing Dios, hugot nga gipatik diha sa kasingkasing niadtong kinsa adunay determinasyon sa pagserbisyo kaniya ug sa pagsunod sa iyang mga sugo. Ang komperensya mao ang panahon nga ang atong mga lider mohatag kanato og dinasig nga direksyon kon unsaon pagdumala ang atong kinabuhi—usa ka panahon nga ang mga tawo maawhag ug ang mga tinguha nga mahimong mas maayong mga amahan ug mga inahan, mas magmasulundon nga mga anak, mas maayong mga higala ug mga silingan himoon” (“Conference Time,” Ensign, Nob. 1981, 12; emphasis gidugang).

Ang gunitanan nga puthaw—ang pulong sa Dios—magdala kanato nga luwas latas sa gabon sa kangitngit.

Atol sa panapos nga sesyon sa Oktubre 2006 nga kinatibuk-ang komperensya, si Elder Jeffrey R. Holland sa Korum sa Napulog Duha ka mga Apostoles mipasabut nga ang pagpamati sa pulong sa Dios pinaagi sa Iyang mga sulugoon mahinungdanon aron espirituhanong makalahutay sa atong panahon sa mga peligro ug kalisdanan:

“Ang atong panahon masamok ug malisud. Atong makita ang mga gubat sa tibuok kalibutan ug kasakit sa atong lugar. Ang mga silingan sa atong palibot adunay personal nga problema ug mga kasubo sa pamilya. Daghang tawo ang nakasinati og lainlaing mga matang sa kahadlok ug kasamok. Kini nagpahinumdom kanato nga sa dihang ang mga gabon sa kangitngit mitabon sa mga nanglakaw sa panan-awon ni Lehi sa kahoy sa kinabuhi, mitabon kini sa tanang mga partisipante—sa matarung ingon man usab sa dili matarung, sa batan-on uban sa tigulang, sa bag-ong kinabig ug sa karaan na nga miyembro. Niana nga sambingay ang tanan nag-atubang og oposisyon ug kasamok, ug ang gunitanan nga puthaw lamang—ang gipahayag nga pulong sa Dios—ang makaluwas kanila. Kitang tanan nagkinahanglan niana nga gunitanan. Tanan kita nagkinahanglan niana nga pulong. Walay usa nga luwas kon wala kini, kay kon wala kini si bisan kinsa ‘[mahulog] ngadto sa gidili nga mga dalan ug [mawala],’ sama sa giingon sa rekord [1 Nephi 8:28; tan-awa usab sa mga bersikulo. 23–24]. Mapasalamaton kita nga nakadungog sa tingog sa Dios ug mibati sa kalig-on niana nga gunitanan nga puthaw niini nga komperensya sa milabay nga duha ka adlaw” (“Ang mga Propeta Ania na Usab sa Yuta,” Ensign o Liahona, Nob. 2006, 105; emphasis gidugang).

6.3

Ang Pulong sa mga Propeta nga Gihatag Pinaagi sa Espiritu atol sa Kinabuk-ang Komperensya Mao ang mga Kasulatan sa Ulahing mga Adlaw

Si Presidente Thomas S. Monson nga namulong sa kinatibuk-ang komperensya

Ang kasulatan mao ang hunahuna ug kabubut-on sa Dios nga gipadayag pinaagi sa Iyang mga sulugoon (tan-awa sa D&P 68:4). Gipamahayag ni Apostol Pedro, ang “wala may propesiya nga miabut pinaagi sa kabubot-on sa tawo, hinonoa minandoan sa Espiritu Santo nanagpanulti ang mga balaang tawo sa Dios” (2 Pedro 1:21). Ang mao nga kasulatan gisulat ug gipreserbar sa sumbanang mga basahon isip bililhon kaayong mga mutya sa mahangturong kamatuoran. Bisan pa, ang sumbanang mga basahon dili lang mao ang tinubdan sa kasulatan. Si Elder James E. Talmage (1862–1933) sa Korum sa Napulog Duha ka mga Apostoles miila sa koneksyon tali sa sumbanang mga basahon ug sa pulong sa buhing mga propeta:

“Ang Sumbanang mga Basahon sa Simbahan naglangkob sa sinulat nga awtoridad sa Simbahan sa doktrina. Bisan pa, ang Simbahan andam kanunay sa pagdawat og dugang nga kahayag ug kahibalo ‘mahitungod sa Gingharian sa Dios’ pinaagi sa balaang pagpadayag. Mituo kita nga ang Dios andam karon sama sa kanunay Niyang gihimo sa pagpadayag sa Iyang hunahuna ug kabubut-on ngadto sa tawo, ug Iya kining gihimo pinaagi sa Iyang mga pinili nga sulugoon—gihatag pinaagi sa ordinasyon uban sa awtoridad sa Balaang Priesthood. Mao nga nagasalig kita sa mga pagtulun-an sa buhing mga orakulo sa Dios nga sama ka balido sa mga doktrina nga nasulat” (Articles of Faith [1968], 7; emphasis gidugang).

Gitudlo ni Presidente Joseph Fielding Smith (1876–1972) ang mahitungod sa ulahing adlaw nga mga kasulatan:

“Kon ang usa sa mga kaigsoonan mobarug atubangan sa kongregasyon sa katawhan karon, ug ang inspirasyon sa Ginoo anaa kaniya, gipamulong niya kon unsay gusto sa Ginoo nga ipasulti. Pareho ra gayud kini sa kasulatan nga imong makit-an sa bisan asang mga rekord, ug karon gitawag nako kini nga sumbanang mga basahon sa Simbahan. Dayag lang nga kita nagdepende sa giya sa mga kaigsoonan nga may katungod sa inspirasyon.

“Adunay usa ra ka tawo sa Simbahan sa usa ka higayon ang may katungod sa paghatag og pagpadayag para sa Simbahan, ug mao kana ang Presidente sa Simbahan. Apan wala kana magpugong ni bisan kinsang miyembro niini nga Simbahan sa pagpamulong sa pulong sa Ginoo, sigun sa gipasabut dinhi nini nga pagpadayag, seksyon 68 [tan-awa sa D&P 68:2–6], apan ang pagpadayag nga ihatag sama niining mga pagpadayag nga gihatag dinhi sa basahon, ngadto sa Simbahan, maggikan sa presiding officer sa Simbahan; bisan gani ang pulong sa Ginoo, nga gipamulong sa ubang mga sulugoon atol sa kinatibuk-ang mga komperensya, o bisan asa man sila kon mamulong sila sa unsay gibutang sa Ginoo sa ilang mga ba-ba, sama ra gayud kini sa pulong sa Ginoo sa mga sinulat ug sa mga pulong sa ubang propeta sa ubang mga dispensasyon” (Doctrines of Salvation, comp. Bruce R. McConkie [1954], 1:186).

Si Presidente J. Reuben Clark Jr. (1871–1961) mipasabut nga kinahanglan kitang mahimong takus ug makadawat og inspirasyon gikan sa Espiritu Santo aron mahibalo kon ang mga Kaigsoonan mamulong ba pinaagi sa gahum sa Espiritu Santo:

“Ang pangutana mao, unsaon man nato sa pagkahibalo nga ang mga butang nga ilang gipanulti, gisulti diha ‘nga sila nadasig pinaagi sa Espiritu Santo’? [D&P 68:3].

“Gihatagan nako og pipila ka higayon ang paghunahuna niining pangutanaha, ug ang tubag niini sigun sa akong nakita sukad, mao: Makasulti kita nga ang mamumulong ‘gitandog sa Espiritu Santo’ kon kita, sa atong kaugalingon, ‘gitandog sa Espiritu Santo.’

“Sa usa ka paagi, hingpit kining nagbalhin sa responsibilidad gikan kanila ngari kanato sa pag-ila kon sila mamulong sa ingon nga paagi” (“When Are Church Leaders’ Words Entitled to Claim of Scripture?” Church News, Hulyo 31, 1954, 9; emphasis gidugang; tan-awa usab sa 2 Pedro 1:20–21).

Si Presidente Howard W. Hunter (1907–95) namulong mahitungod sa mga pakigpulong sa kinatibuk-ang komperensya nga may kalabutan sa ulahing adlaw nga kasulatan:

“Daghang dinasig nga tambag sa mga propeta, mga manalagna, mga tigpadayag, ug sa ubang mga General Authority sa Simbahan ang ihatag panahon sa kinatibuk-ang komperensya. Ang atong mga propeta sa modernong panahon nag-awhag kanato sa pagbasa sa mga edisyon sa komperensya diha sa atong mga magasin sa Simbahan isip usa ka importante ug regular nga bahin sa atong personal nga pagtuon. Sa ingon niini, ang kinatibuk-ang komperensya nahimo nga, sabton ta nga, usa ka pagdugang o usa ka sumpay sa Doktrina ug mga Pakigsaad. Agig dugang sa mga isyu sa komperensya sa mga magasin sa Simbahan, ang Unang Kapangulohan mosulat og binulang dinasig nga tambag para sa atong kaayohan” (The Teachings of Howard W. Hunter, ed. Clyde J. Williams [1997], 212; emphasis gidugang; tan-awa usab sa Mga Pagtulun-an sa mga Presidente sa Simbahan: Howard W. Hunter [2015], 136).

6.4

Ang Benepisyo ug Bili sa Ulahing Adlaw nga Pagpadayag

Si Presidente Harold B. Lee (1899–1973) nakamatikud sa kaimportante sa pagdawat ug sa pagpatalinghug sa pagpadayag:

“Ang pipila sa pinakabantugang tighunahuna sa atong henerasyon, gawas lang sa mga miyembro sa Simbahan, nakamatikud sa panginahanglan og mga pagpadayag gikan sa Ginoo aron makahatag og kalig-on sa mga pagtulun-an sa simbahan. Si Ralph Waldo Emerson kinsa miingon:

“Ang mga kasulatan nga Hebrew ug Greek naglangkob sa imortal nga mga sentence nga nahimong pan sa kinabuhi sa minilyon, apan kini walay dakong integridad, nagkatipak-tipak kini ug wala makita sa ilang kahan-ay ngadto sa hunahuna. … Dili usab masarado ang Biblia hangtud matawo ang katapusang mahinungdanong tawo. … Ang mga tawo moingon nga ang pagpadayag dugay na kaayong gihatag ug tapos na, ingon og ang Dios patay na. Kana nga pagtuong sayop mopugong sa mga tigsangyaw ug ang pinakamaayong mga institusyon mamahimong dili na sigurado ug dili maayong magpahayag. Ang panginahanglan kaniadto dili gayud sama kadako kay sa karon.’ [Naglakip kini sa mga pamahayag gikan sa pakigpulong sa Harvard Divinity School, Hulyo 15, 1838, ug sa Representative Men, “Uses of Great Men.”]

“… Ania karon sa atong panahon, mga tawo nga gisugo sa Ginoo nga dunay gahum ug awtoridad, ug iya silang gihatagan og inspirasyon sa pagtudlo ug pagsangyaw niining mga butanga sa kalibutan sa katuyoan nga gipahiluna sa Ginoo … nga ang importanting mga butang ikatambag sa mga elder sa Simbahan niining mga tawhana sumala sa inspiriasyon ug pagpadayag nga ilang madawat sa matag karon ug unya. Samtang mamauli ang mga Santos gikan niini nga komperensya, mas maayo kon ilang makonsiderar sa tinuoray gayud ang kaimportante … niini nga komperensya ug himoon kini nga giya sa ilang inadlaw nga buluhaton ug pagpakig-istorya atol sa sunod nga unom ka bulan. Mao kini ang importanting mga butang nga nakitang haum sa Ginoo nga ipadayag niining mga tawhana niining adlawa” (sa Conference Report, Abr. 1946, 67–68).

Miawhag si Presidente Thomas S. Monson nga atong tun-an ang mga pakigpulong sa komperensya nga naa sa mga magasin sa Simbahan:

“Pahinumduman namo kamo nga ang mga mensahe nga atong nadunggan niini nga komperensya i-imprinta sa … Ensign ug Liahona nga mga magasin. Samtang kita magbasa ug magtuon niini, matudloan kita og dugang ug madasig. Hinaut nga atong iapil sa atong inadlaw nga pagpakabuhi ang mga kamatuoran nga makita dinhi niini” (“Panapos nga Pakigpulong,” Ensign o Liahona, Nob. 2009, 109; emphasis gidugang).

Ang kinatibuk-ang komperensya susama sa modernong Liahona ug takus kini sa atong pagtuo, pagpatalinghug, ug kakugi (tan-awa sa 1 Nephi 16:28).

Si Elder Lowell M. Snow sa Seventy mikumpara sa kinatibuk-ang komperensya ngadto sa Liahona, nga gihatag sa Ginoo nga giya ni Lehi ug sa iyang pamilya (tan-awa sa 1 Nephi 16:10, 16, 29):

“Karon naghatag og giya ug direksyon ang Ginoo sa mga indibidwal ug mga pamilya, sama sa Iyang gibuhat ni Lehi. Kini mismong kinatibuk-ang komperensya, mao ang moderno nga Liahona, usa ka panahon ug dapit aron makadawat og dinasig nga paggiya ug direksyon nga mopauswag kanato ug motabang kanato sa pagsunod sa agianan sa Dios ngadto sa mas mabungahon nga kabahin sa pagka-mortal. Hunahunaa nga nagkapundok kita dinhi aron makapaminaw sa tambag sa mga propeta ug mga apostoles kinsa hugot nga nanag-ampo ug miandam sa mainampingon nga paagi aron masayud kon unsay ipasulti kanila sa Ginoo. Nag-ampo kami alang sa mga propeta ug apostoles ug sa among kaugalingon nga unta ang Maghuhupay motudlo kanato sa hunahuna ug kabubut-on sa Dios. Siguro gayud nga walay mas labing maayo nga panahon o dapit alang sa Ginoo nga magtudlo sa Iyang mga anak kay sa niini nga komperensya.

“Ang mga pagtulun-an niini nga komperensya mao ang kompas sa Ginoo. Sa umaabut nga adlaw mahimo nimo, sama, sa gibuhat ni Lehi, nga mogawas sa inyong pultahan ug makakita og Liahona, Ensign, o uban pang gimantala sa Simbahan, sa inyong mailbox, ug naglangkob kini sa mga palakaw sa komperensya. Sama sa Liahona sa karaan, kining bag-o nga mga sinulat mahimo nga yano ug sayon nga basahon ug mohatag kaninyo ug sa inyong pamilya og salabutan kabahin sa mga pamaagi ug mga dalan sa Ginoo” (“Kompas sa Ginoo,” Ensign o Liahona, Nob. 2005, 97; emphasis gidugang).

6.5

Mopasalig Kita nga Mopatalinghug ug Mosuporta Niadtong Atong Gi-sustain sa Kinatibuk-ang Komperensya

Ang pag-sustain sa mga opisyales sa Simbahan kanunay nga usa ka bahin sa Ang Simbahan ni Jesukristo sa mga Santos sa Ulahing mga Adlaw. Gitudlo sa mga kasulatan nga “walay tawo nga i-orden ngadto sa bisan unsa nga katungdanan niini nga simbahan, diin sa husto nga paagi adunay natukod nga sanga sa ingon, nga walay pagboto niana nga simbahan” (D&P 20:65). Sa pinakauna gayud nga miting sa Simbahan, niadtong Abril 6, 1830, “nangutana si Joseph [Smith] sa mga tawo nga didto kon andam ba silang modawat kaniya ug kang Oliver [Cowdery] nga ilang mga magtutudlo ug espiritwal nga mga adviser. Ang tanan miisa sa ilang mga kamot sa pag-uyon” (Church History in the Fulness of Times, 2nd ed. [Church Educational System manual, 2003], 67–68; tan-awa usab sa History of the Church, 1:77). Sa wala madugay gipamatud-an sa Ginoo nga “ang tanan nga mga butang mabuhat nga inuyunan sa kadaghanan diha sa simbahan, pinaagi sa daghan nga pag-ampo ug hugot nga pagtuo” (D&P 26:2; emphasis gidugang). Duna kitay oportunidad sa kinatibuk-ang komperensya nga maka-sustain sa Unang Kapangulohan, sa Korum sa Napulog Duha ka mga Apostoles, sa mga sakop sa Korum sa Seventy, ug ubang mga Kinatibuk-ang Opisyales sa Simbahan pinaagi sa hiniusang pag-uyon.

Dihang si Presidente Gordon B. Hinckley (1910–2008) gi-sustain nga Presidente sa Simbahan, mipasabut siya sa komitment nga atong gihimo kon mag-sustain kita og mga lider sa Simbahan:

“Niining buntaga tanan kita moapil sa usa ka maligdong nga katiguman. Mao lamang kana ang ipasabut sa ngalan. Panagtigom kini sa mga miyembro diin ang matag indibidwal mobarug nga parehas sa tanan sa pagpakita og kalumo ug pagtahud sa iyang katungod sa pagpaluyo o dili pagpaluyo sa mga tawo, kinsa ubos sa pamaagi nga namugna gikan sa mga pagpadayag, gipili nga mangulo.

“Ang pamaagi sa pagpaluyo mas labaw pa kay sa usa ka ritwal nga pag-isa sa kamot. Usa kini ka commitment sa pagsuporta, sa pagtabang niadtong mga napili. …

“Ang mga kamot nga inyong gipataas sa maligdong nga katiguman karong buntaga nahimong usa ka ekspresyon sa inyong kaandam ug tinguha sa pagsuporta kanamo, inyong mga kaigsoonan ug inyong mga sulugoon, uban sa inyong pagsalig, pagtuo, ug pag-ampo” (“This Work Is Concerned with People,” Ensign, Mayo 1995, 51; emphasis gidugang).

Ang oportunidad nga makapaluyo sa atong mga lider sa Simbahan may kauban nga sagradong mga obligasyon.

Si Elder David B. Haight (1906–2004) sa Korum sa Napulong Duha ka mga Apostoles misulti bahin sa pakigsaad nga atong gihimo sa Dios kon mo-sustain kita sa atong mga lider sa Simbahan:

“Kon i-sustain nato ang Presidente sa Simbahan pinaagi sa pag-isa sa atong kamot, wala lamang kini magpasabut nga atong giila atubangan sa Dios nga siya ang tukmang may katungod nga mogunit sa mga yawe; nagpasabut usab kini nga makigsaad kita sa Dios nga kita mosunod sa direksyon ug tambag nga maggikan sa Iyang propeta. Usa kini ka sagradong pakigsaad” (“Solemn Assemblies,” Ensign, Nob. 1994, 14–15).

Ang Doktrina ug mga Pakigsaad 107:22 nag-ingon nga ang mga sakop sa Unang Kapangulohan “gituboy pinaagi sa pagsalig, hugot nga pagtuo, ug pag-ampo sa simbahan.” Sa adlaw nga si Thomas S. Monson, Henry B. Eyring, ug Dieter F. Uchtdorf gi-sustain sa usa ka maligdong nga katiguman isip Unang Kapangulohan, mitudlo si Presidente Eyring sa mosunod kon unsay ipasabut sa pag-sustain sa atong mga lider:

“Aron kita makapaluyo niadtong gitawag karon, kinahanglan nga atong susihon ang atong kinabuhi, maghinulsol kon gikinahanglan, mosaad nga mosunod sa mga sugo sa Ginoo, ug mosunod sa Iyang mga sulugoon. Ang Ginoo mipasidaan kanato nga kon kita dili mobuhat niining mga butanga, ang Espiritu Santo pagakuhaon, mawala ang kahayag nga atong nadawat, ug kita dili makatuman sa saad nga atong gihimo karon sa pagpaluyo sa mga sulugoon sa Ginoo sa Iyang tinuod nga Simbahan. …

“Karong adlawa mas maayo nga determinado sa pagpaluyo uban sa atong hugot nga pagtuo ug sa atong mga pag-ampo. Personal kong nakahibalo sa gahum sa hugot nga pagtuo sa mga miyembro sa Simbahan sa pagpaluyo niadtong gitawag. Sa miaging pipila ka semana akong gibati sa gamhanang mga paagi ang mga pag-ampo ug hugot nga pagtuo sa mga tawo nga wala nako mailhi ug kinsa nakaila kanako nga tawo nga gitawag sa pagserbisyo pinaagi sa mga yawe sa priesthood. Si Presidente Thomas S. Monson mapanalanginan pinaagi sa inyong mapaluyohon nga hugot nga pagtuo. Ang iyang pamilya makadawat usab sa mga panalangin tungod sa inyong hugot nga pagtuo ug sa inyong mga pag-ampo. Kadtong tanan nga gipaluyohan ninyo karon paluyohan sa Dios tungod sa ilang hugot nga pagtuo ug sa inyoha” (“Ang Tinuod ug Buhi nga Simbahan,” Ensign o Liahona, Mayo 2008, 21; emphasis gidugang).

Ang mosunod nga pamahayag naghulagway sa pasalig nga anaa ni President Joseph F. Smith (1838–1918) sa pag-sustain niadtong iyang giila nga mga sulugoon sa Ginoo:

“Ako gitawag ngadto sa misyon human ko nakapuyo ug nakaugmad og usa ka wanang sa yuta nga gipanag-iya sa publiko nga mga yuta sa Estados Unidos ug kinahanglan lamang alang kanako nga magpabilin sulod sa usa ka tuig aron akong maestablisar ang akong pag-angkon ug makuha ang titulo sa yuta; apan si Presidente Young miingon nga gusto niya nga moadto sa misyon sa Europe, aron sa pagdumala sa misyon didto. Ako wala moingon kaniya nga, ‘Brother Brigham, dili ko makaadto; naninguha ko nga maangkon ang titulo sa wanang nga yuta pinaagi sa pagpuyo ug sa pag-ugmad niini, ug kon mobiya ko karon aron sa pagserbisyo sa misyon mawala kini kanako.’ Ako miingon ni Brother Brigham, ‘Sige, President Young; bisan kanus-a nimo gusto nga ako moadto, moadto ko; ako andam sa pagsunod sa tawag sa akong lider.’ Ug ako miadto. Nawala kanako ang yuta, ug bisan pa man wala ko moreklamo kabahin niini; ako wala mopasangil ni Brother Brigham sa pagpangawat kanako tungod niini. Akong gibati nga ako nahilambigit sa usa ka mas mahinungdanon nga buhat kaysa pag-angkon og mga 65 ka ektaryang yuta. Ako gipadala aron sa pagpahayag sa mensahe sa kaluwasan ngadto sa mga nasud sa yuta. Ako gitawag pinaagi sa katungod sa Dios dinhi sa yuta, ug ako wala mohunong sa pagkonsiderar sa akong kaugalingon ug sa akong gamay nga personal nga mga katungod ug pribilehiyo; ako miadto ingon nga ako gitawag, ug ang Dios mipaluyo ug mipanalangin kanako tungod niini” (Mga Pagtulun-an sa mga Presidente sa Simbahan: Joseph F. Smith [1998], 259–60; emphasis gidugang).

6.6

Ang Atong Pagpangandam Makaapekto sa Unsay Atong Makuha gikan sa Kinatibuk-ang Komperensya

Paggahin og panahon sa pagtuon sa mga pakigpulong sa komperensya.

Si Elder Paul V. Johnson sa Seventy mihulagway kon giunsa niya sa pagkat-on nga himoong prayoridad ang kinatibuk-ang komperensya sa iyang kinabuhi:

“Ang akong inahan ganahan kaayo sa kinatibuk-ang komperensya. Pirmi niyang patingugon og kusog kaayo ang radyo ug ang TV nga walay lugar sa balay nga dili ka makadungog sa komperensya. Gusto niyang makabati ang mga bata sa mga pulong ug sa matag karon ug unya mangutana kon unsay among nahinumduman. Usahay mogawas ako uban sa usa ka sa akong mga igsoong lalaki nga magdula og bola panahon sa Sabado nga sesyon sa komperensya. Amo gayung dad-on ang radyo kay nasayud kaming mangutana dayon si mama. Magdula kami ug panagsa mopahulay ug maminaw pag-ayo aron duna kami ikareport ni Mama. Wala ko motuo nga nailad namo si mama kay pareho ra ang among gireport gikan sa usa ka sesyon.

“Dili kadto ang husto nga pagpaminaw sa komperensya. Nagbasol ako sukad niadto. Nakakat-on ko sa paghigugma sa kinatibuk-ang komperensya, siguro alang kanako tungod kay ang akong mama nahigugma sa mga pulong sa buhi nga mga propeta. Nakahinumdom ko nga nag-inusarang namati sa usa ka komperensya sulod sa akong apartment sa college pa ako. Ang Espiritu Santo misaksi ngari kanako nga si Harold B. Lee, ang Presidente sa Simbahan niadtong panahuna, tinuod gayud nga propeta sa Ginoo. Nahitabo kini sa wala pa ako moadto sa misyon ug naghinam-hinam ako nga ipamatuod ang usa ka buhi nga propeta tungod kay nahibaloan ko kini sa akong kaugalingon. Ang susama nga pagsaksi moabut kanako kabahin sa matag propeta sukad niadto.

“Sa didto na ako sa misyon, ang satellite wala pa mauso sa Simbahan ug ang nasud diin ako nagserbisyo walay sibya sa kinatibuk-ang komperensya. Gipadad-an ako sa akong inahan og mga audiotapes sa mga sesyon, ug gibalik-balik nako kini sa pagpaminaw. Nagtubo ako nga nahigugma sa pagpaminaw sa mga pulong sa mga propeta ug apostoles. …

“Desisyuni karon nga himoon ninyong prayoridad ang kinatibuk-ang komperensya sa inyong kinabuhi. Desisyuni nga paminawon pag-ayo ug sundon ang mga panudlo nga gipanghatag. Paminawa o basaha ang mga gipamulong dili lang kay kausa ra aron masabtan pag-ayo ug makasunod sa mga tambag. Kay pinaagi sa pagbuhat niini nga mga butang ang mga ganghaan sa impyerno dili makabuntog batok kaninyo, ug ang gahum sa kangitngit matibulaag gikan sa inyong atubagnan, ug ang kalangitan mokurog alang sa inyong kaayohan” (“Ang mga Panalangin sa Kinatibuk-ang Komperensya,” Ensign o Liahona, Nob. 2005, 51–52; emphasis gidugang).

Makadawat kita og personal nga pagpadayag samtang tun-an nato ang mga pakigpulong sa komperensya. Ang Espiritu Santo motabang nga personal natong magamit ang mga mensahe.

Si Presidente Boyd K. Packer (1924–2015) sa Korum sa Napulog Duha ka mga Apostoles mihatag og importansya sa atong pagpangandam alang sa kinatibuk-ang komperensya:

“Sa moabut nga pipila ka adlaw lain na pud nga kinatibuk-ang komperensya ang moabut sa Simbahan. Ang mga sulugoon sa Ginoo motambag kanato. Mahimo kang maminaw uban ang mahinamong mga dunggan ug kasingkasing, o ibaliwala ang mga tambag. … Unsay imong maangkon dili kaayo mag-agad unsa kadako ang gihimo nila nga pagpangandam sa mga mensahe kay sa imong pagpangandam alang niini” (Follow the Brethren, Brigham Young University Speeches of the Year [Mar. 23, 1965], 10; emphasis gidugang).

Ikonsiderar ang mosunod nga mga ideya sa imong pagpangandam:

1. Planoha ug paggahin og personal nga panahon sa pagpaminaw ug pagtuon sa mga pakigpulong sa komperensya. Gikinahanglan nga ipalayo nimo ang imong kaugalingon gikan sa mga babag o pagkabalda. Himoa ang palibut diin imong makita, mapaminaw, o matun-an ang mga pakigpulong sa komperensya nga madawat sa Espiritu Santo.

2. Mag-ampo inubanan sa pagtuo nga imong madawat ang mga mensahe nga makahuluganon sa imong kinabuhi. Mag-ampo alang sa mga lider sa Simbahan samtang mangandam sila ug mohatag sa ilang mga pakigpulong.

3. Sa dili pa maminaw o magtuon sa mga pakigpulong sa komperensya, paglista og mga pangutana nga personal o mga kabalaka nga nangita ka og mga tubag. Pinaagi sa paghimo og personal nga imbentaryo imong mabantayan ang mga aspeto sa imong kinabuhi nga kinahanglan nimong palamboon. Sa journal o sa notebook, irekord ang mga tubag ug mga impresyon nga imong nadawat atol sa komperensya.

4. Human mapaminaw o matun-an ang mga pakigpulong sa komperensya, tinguhaa pag-usab ang pagpalambo sa imong kinabuhi sa mga butang nga nakatandog kanimo.

Gihatag ni Presidente Gordon B. Hinckley (1910–2008) ang mosunod nga imbitasyon sa pagsugod sa kinatibuk-ang komperensya:

“Nagpundok kamo aron maawhag, madasig, mabayaw ug matudloan isip mga miyembro sa Simbahan. … Nagpundok kamo aron matabangan sa temporal ninyong mga kabalaka, kapakyasan, ug mga kadaugan. Mianhi kamo aron maminaw sa pulong sa Ginoo nga gitudlo niadtong kinsa, dili sa kaugalingon nilang pagpili, gitawag nga mga magtutudlo niining talagsaong buhat.

“Nag-ampo kamo nga inyo untang madungog ang mga butang nga makatabang ninyo sa inyong mga problema ug madugangan ang kalig-on sa inyong pagtuo. …

“Dapiton ko kamo sa pagpaminaw, paminawa ninyo kon mahimo pinaagi sa gahum sa Espiritu, sa mga mamumulong nga mamulong ninyo karon ug ugma ingon man karong gabii. Kon buhaton ninyo kini, dili ko magpanuko sa pagsaad kaninyo nga mabayaw kamo, ang inyong mga plano sa paghimo sa eksakto mas molig-on, makaplagan ninyo ang mga sulbad sa inyong mga problema ug panginahanglan, ug magiyahan kamo sa pagpasalamat sa Ginoo sa unsay inyong nadungog” (“Listen by the Power of the Spirit,” Ensign, Nob. 1996, 4–5).

Giawhag kita ni Presidente Spencer W. Kimball (1895–1985) nga atong isulat, hinumduman, ug buhaton ang mga pagtulun-an nga atong nadawat samtang maminaw kita sa mga mensahe nga ihatag atol sa kinatibuk-ang komperensya:

“Manghinaot kami nga ang mga lider ug mga miyembro sa Simbahan nga nanambong ug naminaw sa komperensya nadasig ug nabayaw. Manghinaot kami nga nakahimo kamo og daghang mga pagsulat sa mga pagtulun-an nga miabut sa inyong hunahuna samtang ang mga Kaigsoonan namulong kaninyo. Daghang sugyot ang gihatag nga makahatag kaninyo isip mga lider alang sa paghingpit sa inyong buhat. Daghang mapuslanong pagtulun-an ang nahatag para sa ikahingpit sa kaugalingon natong kinabuhi, ug kana, siyempre, ang nag-unang rason sa atong pag-anhi.

“Samtang naglingkod dinhi, akong gihukman sa hunahuna nga kon mouli ko gikan niini nga komperensya karong gabii dunay daghang dapit sa akong kinabuhi nga mahimo nakong hingpiton. Naghimo ko og mental nga lista niini, ug akong gilauman nga lihukon kini dayon kon mahuman na kini nga komperensya” (“Spoken from Their Hearts,” Ensign, Nob. 1975, 111; emphasis gidugang).

6.7

Ang Kinatibuk-ang Komperensya Usa ka Tawag sa Paglihok

Atol sa kinatibuk-ang komperensya niadtong 1856, gitawag ni Presidente Brigham Young ang mga Santos sa pag-adto ug pagluwas sa natanggong nga mga handcart company. Gigamit kini nga pasumbingay, si Elder Jeffrey R. Holland sa Korum sa Napulog Duha ka mga Apostoles mitudlo nga ang espiritwal nga pagbag-o nga atong naangkon gikan sa komperensya kinahanglan nga moagni kanato sa pagserbisyo sa uban:

“Ang matag usa niining mga komperensya nagtimaan og usa ka tawag sa pagbuhat dili lamang sa atong kaugalingong mga kinabuhi pero sa uban usab sa palibut kanato, kadto kinsa anaa sa atong kaugalingong pamilya ug tinuohan ug kadtong kinsa dili. …

“Ang pagluwas niadtong nanginahanglan [mga nagkariton nga pundok gikan sa kasadpan] mao ang tema sa kinatibuk-ang komperensya niadtong Oktubre 1856, mao usab ang tema niini nga komperensya ug sa miaging komperensya ug sa umaabut sa sunod nga spring. Tingali dili grabing pag-ulan og snow ug pagkalubong sa yuta sa nibagtok nga snow ang atong giatubang niini nga komperensya, pero ang timawa anaa gihapon—ang kabus ug ang nagluya, ang nawad-an og paglaum ug ang masulub-on , kadtong ‘[nahulog] ngadto [sa] gidili nga mga dalan’ [1 Nephi 8:28] nga atong gihisgutan, ug ang mga tawo nga ‘wala masayud sa kamatuoran tungod kay wala sila masayud asa kini pangitaa’ [D&P 123:12]. Anaa sila sa gawas nga huyang ang mga tuhod, mga kamot nga nawad-an og paglaum [tan-awa sa D&P 81:5], ug dautan nga panahon nagsingabut. Maluwas sila pinaagi lamang niadtong adunay daghan ug mas nakahibalo ug mas makatabang. Ug ayaw kabalaka sa pagpangutana “Hain sila?’ Anaa sila bisan asa, sa atong tuo ug sa atong wala, sa atong kasilinganan ug sa trabahoan, sa tanang komunidad ug lalawigan ug nasud niini nga kalibutan. Dad-a ang inyong mga kauban ug karwahe; kargahi kini sa inyong gugma, sa inyong pagpamatuod ug espiritwal nga pagkaon; dayon larga bisan asa nga direksyon. Ang Ginoo mogiya kaninyo ngadto niadtong nagkinahanglan kon inyong dawaton ang ebanghelyo ni Jesukristo nga gitudlo niini nga komperensya. Ablihi ang inyong kasingkasing ug ang inyong kamot niadtong wala makagawas sa ika-baynte uno nga siglo nga sama sa Martin’s Cove ug Devil’s Gate. Sa pagbuhat sa ingon atong gisunod ang gibalikbalik nga pangamuyo sa Ginoo alang sa nawala nga sensilyo ug sa nawala nga mga kalag [tan-awa sa Lucas 15]” (“Mga Propeta Ania na usab sa Yuta,” Ensign o Liahona, Nob. 2006, 106; emphasis gidugang).

6.8

Ang Paggamit sa mga Pagtulun-an sa Kinatibuk-ang Komperensya Makapalambo sa Atong Kinabuhi

Gitudlo ni Presidente Spencer W. Kimball (1895–1985) ang mosunod mahitungod sa kaimportante sa paggamit kon unsay atong nakat-unan sa kinatibuk-ang komperensya:

“Dominggo sa gabii, Abril 7, ang bantugang Tabernacle gisarado na, ang mga suga gipalong, ang mga record[ing] machine gihunong, ang mga pultahan gikandaduhan na, ug lain na usab nga makasaysayan nga komperensya ang nahuman na. Mawala ra ang mga gipanghimo dinhi—usik sa oras, enerhiya, ug kwarta—kon ang mga mensahe niini dili mapatalinghugan. Sa [pipila] ka mga sesyon nga tag-duha ka oras … , mga kamatuoran gitudlo, mga doktrina gipasabut, mga pag-awhag gihatag, igo nga moluwas sa tibuok kalibutan gikan sa tanang problema niini—buot nakong ipasabut gikan sa TANANG problema niini. Ang sama og kompletong edukasyon sa mahangturong mga kamatuoran nahatag ngadto sa minilyon inubanan sa talagsaong paglaum nga adunay ‘mga dalunggan nga maminaw ug mga mata nga makakita ug mga kasingkasing nga nagpitik,’ nakombinser sa kamatuoran. …

“Ayaw itugot ang mapahitas-on, ang mapanigurohon sa kaugalingon, nagtuong makinaadmanon nga mobungkag sa mga kamatuoran nga gitudlo didto ug sa mga pagpamatuod nga gipamatuod, ug lalisan ang mga mensahe ug mga instruksyon nga gihatag didto. …

“Manghinaut ko nga kamong tanang mga batan-on nakadungog sa mga mensahe sa tanang kapanahunan nga gipamulong [atol sa kinatibuk-ang komperensya]. Dunay laing mga komperensya matag unom ka bulan. Hinaot nga mokuha kamo og inyong kopya sa [Ensign o Liahona] ug badlisan ninyo ang mga haum nga pagtulun-an ug tipigan kini para sa padayon ninyong pakisayran [reference]. Unta walay teksto o mga basahon gawas sa mga sumbanang basahon sa Simbahan ang anaa sa hamiling butanganan sa personal ninyong library—dili tungod sa literal nga kinaadman o kabatid sa pagpahayag, apan sa mga konsepto nga nagtutok padulong sa kinabuhing dayon” (In the World but Not of It, Brigham Young University Speeches of the Year [Mayo 14, 1968], 2–3).

Ang kinatibuk-ang komperensya mao ang panahon sa espirituhanong pagbag-o.

Gihulagway ni Presidente Ezra Taft Benson (1899–1994) sa unsang paagi kita mas makabenipisyo gikan sa kinatibuk-ang komperensya:

“Ang mapaubsanon nakong pag-ampo nga ang tanan kanato unta mosunod sa tambag ug instruksyon nga atong nadawat.

“Samtang gibati nato ang Espiritu ug mihimo og bag-o ug sagradong mga desisyon, unta kita karon dunay kaisug ug kalig-on sa pagpadayon niini nga mga desisyon.

“Para sa mosunod nga unom ka bulan, ang inyong edisyon sa komperensya sa Ensign kinahanglang nagbarug tupad sa inyong mga sumbanang basahon ug gamiton kanunay. Sama sa gisulti sa akong higala ug igsoong si [Presidente] Harold B. Lee, kinahanglan nga ang komperensya himoon nga “giya sa inadlaw [natong] pagbuhat ug pagpakigsulti atol sa sunod nga unom ka bulan. Mao kini ang importanting mga butang nga nakitang haum sa Ginoo nga ipadayag niining mga tawhana niining adlawa” (sa Conference Report, Abr. 1946, p. 68).

“Unta ang tanan mamauli nga napahinungod pag-usab ngadto sa sagradong misyon sa Simbahan sama sa matahum nga pagkahan-ay niini nga mga sesyon sa komperensya—nga ‘magdapit sa tanan sa pagduol ngadto kang Kristo’ (D&P 20:59), ‘oo, duol ngadto kang Kristo, ug paghingpit diha kaniya’ (Moroni 10:32)” (“Come unto Christ, and Be Perfected in Him,” Ensign, Mayo 1988, 84).

Gipahayag ni Presidente Gordon B. Hinckley (1910–2008) ang iyang tinguha nga ang matag miyembro sa Simbahan mamahimong mas maayo nga tawo pinaagi sa paggamit sa mga pagtulun-an nga gihatag atol sa komperensya:

“Manghinaot ko nga atong pamalandungan uban sa malumong pagbati ang mga pakigpulong nga atong nadunggan. Manghinaot ko nga atong mapamalandungan sa hilum ang talagsaong mga butang nga atong nadungog. Manghinaot ko nga bation nato ang dugang nga kamahinulsulon ug kamapainubsanon.

“Tanan kita nalamdagan. Ang pagsulay moabut diha sa paggamit sa mga pagtulun-an nga gihatag. Kon human niini, nadugangan ang atong kamabination, kon nadugangan ang atong pagkamaayong silingan, kon mas naduol kita sa Manluluwas, uban sa mas lig-ong resolusyon sa pagsunod sa Iyang mga pagtulun-an ug sa Iyang ehemplo, niana kini nga komperensya nakaangkon og talagsaong kalampusan. Kon, sa laing bahin, walay kalamboan sa atong kinabuhi, nan ang mga pulong nga gipamulong sa dakong sukod napakyas.

“Kana nga mga kausaban tingali dili masukod sa usa ka adlaw o sa usa ka semana o sa usa ka bulan. Ang mga resolusyon dali rang buhaton ug dali rang hikalimtan. Apan usa ka tuig gikan karon, kon mihimo kita og mas maayo kay sa miagi, nan, ang mga paningkamot niining mga adlawa wala makawang.

“Dili kita mahinumdom sa tanang nasulti, apan dunay motumaw gikan sa tanan niini nga usa ka espirituhanong pagbayaw. Dili siguro kini mapasabut, apan tinuod kini. Sama sa giingon sa Ginoo kang Nicodemo, ‘Ang hangin bitaw mohuros man ngadto sa buot niyang padulngan, ug mabati mo ang iyang tingog; ngani dili nimo mahibaloan diin siya gikan o asa siya padulong. Maingon usab niana ang tanan nga gianak sa Espiritu’ (Juan 3:8).

Giawhag kita sa paghisgot sa mga pakigpulong sa kinatibuk-ang komperensya atol sa mga leksyon sa family home evening.

“Mao nga hisgutan kini uban sa kasinatian nga atong natagamtam. Ug tingali gikan sa tanan nga atong nadungog, tingali dunay mga pulong o paragraph nga klaro ug nakakuha sa atong pagtagad. Kon mahitabo man kini, manghinaot ko nga isulat nato kini ug pamalandungan hangtud atong matugkad ang giladmon sa kahulugan ug mahimo kini nga bahin sa atong kinabuhi.

“Sa atong mga family home evening manghinaot ko nga hisgutan nato sa atong mga anak kining mga butanga ug tugatan silang makatilaw sa katam-is sa mga kamatuoran nga atong natagamtam. Ug kon ang Liahona nga magasin mogawas na … nga naa ang tanang mga mensahe sa komperensya, palihug ayaw lang kini ihiplig sa pag-ingon nga nadungog na nimo kining tanan, apan pamalandungi ang managlahing mga mensahe. Makaplagan nimo ang daghan pang mga butang nga wala nimo madungog dihang naminaw ka sa mga mamumulong. …

“Ugma sa buntag mamalik na kita sa atong mga trabaho, balik sa atong mga pagtuon, balik sa bisan unsang naglangkob sa daghang programa sa atong kinabuhi. Apan mabatunan nato ang mga panumduman niining talagsaong okasyon nga makasuporta kanato” (“An Humble and a Contrite Heart,” Ensign, Nob. 2000, 88–89; emphasis gidugang).

Si Elder Paul V. Johnson sa Seventy mipasabut nga kinahanglang ibutang nato sa lihok ang mga mensahe sa kinatibuk-ang komperensya:

“Aron ang mga mensahe sa kinatibuk-ang komperensya makausab sa atong kinabuhi, kinahanglang andam kita sa pagsunod sa mga tambag nga atong nadungog. Ang Ginoo mipasabut pinaagi sa pagpadayag ngadto ni Propeta Joseph Smith ‘nga kon kamo magpundok kamo magtudlo ug maghatag og kaayohan sa usag usa, nga kamo masayud … unsaon sa pagbuhat diha sa mga katuyoan sa akong balaod ug mga sugo’ [D&P 43:8]. Pero ang pagkahibalo ‘unsaon sa pagbuhat’ dili paigo. Ang Ginoo sa sunod nga bersikulo miingon, ‘kamo maghiusa sa inyong mga kaugalingon sa pagbuhat sa tanan nga pagkabalaan diha sa akong atubangan’ [D&P 43:9]. Kining pag-uyon nga mobuhat kon unsay atong nakat-unan mag-abli sa pultahan alang sa talagsaong mga panalangin. …

“Sa matag higayon nga motuman kita sa mga pulong sa mga propeta ug mga apostoles makadawat kita og daghang panalangin. Makadawat kita og daghan pang panalangin kay sa atong gihunahuna nianang higayuna, ug padayon pa kitang makadawat ug mga panalangin sa umaabut human sa gihimo natong desisyon nga magmasulundon” (“Ang mga Panalangin sa Kinatibuk-ang Komperensya,” Ensign o Liahona, Nob. 2005, 52; emphasis gidugang).

Sa pagtapos sa Abril 1978 nga kinatibuk-ang komperensya, si Presidente Spencer W. Kimball (1895–1985) miingon:

“Karon sa atong pagtapos niining kinatibuk-ang komperensya, patalinghugan natong tanan ang mga gipangsulti ngari kanato. Atong hunahunaon ang tambag nga gihatag para kanato, para kanako. Patalinghugan nato kadtong atong mga gi-sustain isip mga propeta ug mga tigpadayag, ug ang ubang mga kaigsoonan usab, sama nga ang atong kinabuhing dayon magdepende niini, tungod kay mao man gayud kini!” (“Listen to the Prophets,” Ensign, Mayo 1978, 77; emphasis gidugang).

Si Presidente Marion G. Romney (1897–1988) sa Unang Kapangulohan mipasabut sa kadaghan sa kamatuoran nga matudlo atol sa kinatibuk-ang komperensya:

“Daghang kamatuoran ug direksyon ang atong nadungog niini nga komperensya nga magdala kanato sa presensya sa Dios kon sundon nato kini. Gidala kita ngadto sa espirituhanong bungtod ug gipakita og mga panan-awon sa dakong himaya” (sa Conference Report, Apr. 1954, 132–33).

Pamalandungi sa unsang paagi nga ang tambag imong magamit sa personal.

Kon mopasalig ka sa paggamit sa mga pagtulun-an sa kinatibuk-ang komperensya sa imong kinabuhi, hunahunaa ang mosunod nga mga sugyot:

1. Hisguti ang kinatibuk-ang komperensya kauban sa pamilya ug mga higala. Ipaambit unsay imong nakat-unan, ug kat-uni usab kon unsay ilang gisulti kanimo.

2. Samtang maminaw ka sa kinatibuk-ang komperensya, kon mobati ka sa mga pag-aghat sa Espiritu sa paghimo og butang, isulat kini, ug dayon buhata.

3. Maghimo og tumong nga magpiho kon unsaon ug kanus-a nimo i-apply ang tambag nga imong nadawat atol sa kinatibuk-ang komperensya. Isulat ang imong mga tumong ug mo-refer niini sa kanunay.

4. Tun-i ang mga pakigpulong kon mogawas na kini sa mga magasin sa Simbahan o sa internet aron makakat-on ka og bag-ong mga pagtulun-an ug mabag-o ang anaa nimong mga pagbati nga espiritwal. (Ang mga pakigpulong sa kinatibuk-ang komperensya anaa nga mabasa o mapaminaw sa LDS.org; ang pag-search sa pulong ug topic mahimong buhaton usab para sa mga Ensign nga magasin online.)

5. Pag-andam og mga leksyon sa family home evening nga naa sa mga pakigpulong sa komperensya.

6. Pagpalit og mga DVD o CD sa kinatibuk-ang komperensya, ug tan-awa o paminawa kini sa kanunay, pwede ra samtang magsakay ka o magbiyahe aron magamit nimo ang imong panahon sa maalamong paagi.

7. Kopyaha ang mugbong mga kinutlo gikan sa mga pakigpulong sa komperenysa ug ibutang kini diha sa imong balay o apartment diin kanunay nimo kining makita. Sulayi ang pagmemorya niini.

Mga Punto nga Pamalandungan

• Magsulat ka ba samtang maminaw sa kinatibuk-ang komperensya? Kini ba kinatibuk-ang summary sa mga komentaryo para sa mga mamumulong, o girekord lang nimo ang mga butang nga nakadani kanimo? Ang imong mga gisulat naglakip ba og mga impresyon gikan sa Espiritu nga miabut kanimo samtang naminaw ka sa mamumulong? Naglakip ba kini sa mga plano ug tumong nga gusto nimong buhaton nga makatabang sa pag-usab sa imong kinabuhi? Unsa nga mga instruksyon ang gihatag diha sa Doktrina ug mga Pakigsaad 43:8–10 nga makatabang nimo sa pagpalambo sa imong mga pagsulat atol sa kinatibuk-ang komperensya?

• Hunahunaa kon giunsa nimo sa pagtagad ang mga mensahe sa kinatibuk-ang komperensya ug ang ubang mga pakigpulong ug mga sinulat sa mga General Authority. Giunsa nimo sa paggamit ang mga pag-awhag ug instruksyon sa mga nangaging mamumulong? Unsaon man nimo kini sa paggamit sa umaabut?

• Unsang mga panalangin ang gisaad niadtong mosunod sa mga propeta sa Dios?

• Unsaon man nimo sa pagpalambo sa imong preparasyon para sa sunod nga kinatibuk-ang komperensya?

• Sa unsang paagi ang pagtuon sa mga pakigpulong sa komperensya miimpluwensya sa imong pagtuon sa mga kasulatan?

Gisugyot nga mga Assignment

• Gamit ang imong nakat-unan niini nga kapitulo, ipiho sa paglista unsay imong mahimo aron maandam sa pagdawat ug paggamit sa pulong sa Ginoo sa kinatibuk-ang komperensya. Paghimo og ikaduhang lista sa mga panalangin nga malauman nimong madawat samtang tumanon nimo unsay imong nasulat.

• Basaha ang Mosiah 5:1–7, ug ilista ang mga epekto sa pakigpulong ni Haring Benjamin ngadto sa iyang katawhan. Unsay imong mahimo aron makasinati og susamang mga epekto gikan sa kinatibuk-ang komperensya?

• Basaha ang Mga Taga-Efeso 4:11–14, ug ilista ang mga rason nga gihatag ni Apostol Pablo sa pag-establisar sa Ginoo sa Iyang Simbahan nga dunay mga propeta ug mga apostoles. Sa unsang paagi ang pagtulun-an ni Pablo may kalabutan sa kinatibuk-ang komperensya?

• Samtang tun-an nimo ang mga isyu sa komperensya sa Ensign o Liahona ug ubang mga pakigpulong sa mga Kaigsoonan, i-highlight ang pihong mga saad nga gihimo sa mga namulong. Timan-i usab unsay gisulti sa mga mamumulong nga angay natong buhaton aron madawat ang mga panalangin nga gisaad. I-rekord kon unsay buhaton nimo karon aron madawat kining mga panalangin.