Kapitulo 7

Pagtuon sa mga Pakigpulong sa Kinatibuk-ang Komperensya

Pasiuna

Si Presidente Ezra Taft Benson (1899–1994) mitudlo og usa ka baruganan nga mahinungdanon niini nga kurso:

“Ang buhi nga propeta dunay gahum sa TNT. Ang buot nakong ipasabut niana ‘Today’s News Today.’ … Busa, ang pinakaimportanting pagbasa nga atong mabuhat mao ang mga pulong sa propeta … nga naa matag bulan sa atong mga magasin sa Simbahan. Ang gimando nga atong buhaton sulod sa matag unom ka bulan makita sa mga pakigpulong sa kinatibuk-ang komperensya, nga giimprinta sa Ensign [o Liahona] nga magasin” (“Fourteen Fundamentals in Following the Prophet” [Brigham Young University devotional, Peb. 26, 1980], 2, speeches.byu.edu).

Giawhag usab ni Presidente Spencer W. Kimball (1895–1985) ang mga miyembro sa Simbahan nga magbaton og kopya sa isyu sa komperensya sa mga magasin sa Simbahan ug buhaton kini nga usa ka bahin sa ilang gospel library:

“Manghinaot ko nga mokuha kamo og inyong kopya sa [Ensign o Liahona] ug badlisan ninyo ang mga pagtulun-an nga haum ug tipigan kini para sa padayon ninyong kaadtoan. Unta walay teksto o mga basahon gawas sa mga sumbanang basahon sa Simbahan ang anaa sa hamiling butanganan sa personal ninyong library—dili tungod sa literal nga kinaadman o kabatid sa pagpahayag, apan sa mga konsepto nga nagtutok padulong sa kinabuhing dayon” (In the World but Not of It, Brigham Young University Speeches of the Year [Mayo 14, 1968], 2–3).

Kini nga kapitulo maghatag og mga ideya ug mga kahanas nga makatabang nimo sa pagtuon sa kinatibuk-ang komperensya nga mga isyu sa Ensign o Liahona ug ubang mga pakigpulong ug mga sinulat sa mga General Authority sa mas epektibong paagi. Kadaghanan niining kursoha ipahinungod sa pagtuon ug pagkat-on sa mga pakigpulong gikan sa pinakabag-o nga kinatibuk-ang komperensya. Samtang mahunahunaon nimong gipaminaw ug gitun-an ang mga pakigpulong sa buhing mga propeta, imong makat-unan ang kabubut-on sa Ginoo para kanimo niining higayuna. Pagmainampuon sa imong pagtino kon sa unsang paagi nimo magamit kini nga mga kahanas sa pagpalambo sa imong pagtuo sa Ginoo nga si Jesukristo ug sa mga mensahe nga iyang gidasig sa Iyang pinili nga mga lider nga ihatag kanato.

Komentaryo

7.1

Andama ang Imong Hunahuna ug Kasingkasing

Ang pagpangandam mahinungdanon alang sa pagdawat ug pagsabut sa kabubut-on sa Ginoo. Misaad ang Ginoo, “Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing” (D&P 8:2) Ang pulong sa Ginoo moabut kanimo diha dayon kon andamon nimo ang imong hunahuna ug kasingkasing. Si Elder David A. Bednar sa Korum sa Napulog Duha ka mga Apostoles mitudlo sa kaimportante sa pagpangandam ug sa pagkahimong aktibo nga tigkat-on:

“Si Nephi nagtudlo kanato, ‘Kon ang tawo mamulong pinaagi sa gahum sa Espiritu Santo ang gahum sa Espiritu Santo modala [sa mensahe] ngadto sa mga kasingkasing sa katawhan (2 Nephi 33:10). Palihug timan-i kon sa unsang paagi ang gahum sa Espiritu modala sa mensahe paingon pero dili pasulod sa kasingkasing. Ang usa ka magtutudlo makapasabut, makapakita, makadani, ug makapamatuod, ug makabuhat og daghan niini uban sa dakong espirituhanong gahum ug sa pagkaepektibo. Sa kaulahian, hinoon, ang sulod sa usa ka mensahe ug ang saksi sa Espiritu Santo mosulod lamang sa kasingkasing kon ang nagdawat motugot niini nga mosulod. Ang pagkat-on pinaagi sa hugot nga pagtuo moabli sa agianan pasulod sa kasingkasing. …

“Ang usa ka nagkat-on nga naggamit sa kabubut-on pinaagi sa paglihok sumala sa saktong mga baruganan mobukas sa iyang kasingkasing ngadto sa Espiritu Santo ug nagdapit sa Iyang pagtudlo, gahum sa pagpamatuod, ug panghimatuod nga saksi. Ang pagkat-on pinaagi sa hugot nga pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. Pinaagi sa kinasingkasing ug pagkamakanunayon sa atong paglihok nga dinasig sa hugot nga pagtuo mapakita nato sa atong Amahan sa Langit ug sa Iyang Anak nga si Jesukristo ang atong pagkaandam nga makat-on ug pagdawat og panudlo gikan sa Espiritu Santo. …

“… Ang kasinatian nakapahimo nako sa pagsabut nga ang tubag nga gihatag sa laing tawo sa kasagaran dili mahinumduman og dugay, kon mahinumduman man gani. Apan ang tubag nga atong nadiskobrehan o naangkon pinaagi sa paggamit sa hugot nga pagtuo, sa kasagaran, mahinumduman sa tibuok kinabuhi. Ang labing importanting mga pagkat-on sa kinabuhi mao ang gikaplagan—dili kay gitudloan” (“Paningkamot sa Pagkat-on pinaagi sa Hugot nga Pagtuo,” Ensign, Sept. 2007, 17, 20, 23).

Ikonsiderar ang mosunod nga mga paagi aron maandam ka sa dili pa moabut ang komperensya:

• Gahini og panahon ang pagtuon sa mga pakigpulong sa komperensya nga walay pagkabalda. Paghimo og palibut nga madawat nimo ang mga pag-aghat sa Espiritu Santo.

• Tinguhaa ang giya sa Espiritu pinaagi sa mahunahunaong pag-ampo, pagpuasa, ug pagtuon sa kasulatan.

• Paglista og personal nga mga pangutana o mga kabalaka diin nagpangita ka og tubag. Dayon irekord ang mga tubag ug mga impresyon nga imong nadawat atol sa komperensya.

• Ribyuha ang imong mga lista gikan sa milabay nga kinatibuk-ang komperensya.

7.2

Praktisa ang Maayong mga Kahanas sa Pagtuon Kon Magtuon sa mga Pakigpulong sa Kinatibuk-ang Komperensya

Adto sa LDS.org sa pagtuon sa bag-o ug nangaging mga pakigpulong sa kinatibuk-ang komperensya.

Kon magtuon ka sa mga pakigpulong sa kinatibuk-ang komperensya, makagamit ka og daghang susama nga kahanas nga imong gigamit sa pagtuon sa mga kasulatan. Ang uban pa niini nga kapitulo naghulagway sa pipila niana nga mga kahanas. Ang pag-implementar sa mga sugyot sa pagtuon niini nga kapitulo dili lang makaimpluwensya sa imong pagtuon sa buhing mga propeta, moimpluwenysa kini sa imong gahum sa paghimo og eksaktong mga pagpili.

7.2.1

Ilha ang mga Doktrina ug Baruganan

Samtang magtuon ka sa mga pakigpulong sa kinatibuk-ang komperensya, pangita og klarong mga pamahayag sa mga doktrina ug baruganan sa ebanghelyo. Hibaloi ug markahi kini sa paagi nga imo kining maribyu ug mahinumduman. Ang pagribyu ug pagpamalandong sa mga pamahayag sa doktrina ug mga baruganan makalig-on sa imong panabut sa mga kamatuoran sa ebanghelyo ug sa imong pasalig sa pagsunod niini. Ang mosunod mao ang pipila ka mga ehemplo sa mga doktrina ug baruganan nga gitudlo atol sa kinatibuk-ang mga komperensya:

• Elder Richard G. Scott (1928–2015) sa Korum sa Napulog Duha ka mga Apostoles:

  “Tagsa ra kamong makadawat og tubag sa tanang [pag-ampo] diha-diha dayon. Moabut kini sa hinay-hinay, matag usa, aron kamo magtubo nga lig-on. Samtang ang matag usa pagasundan og pagtuo, dad-on kamo ngadto sa laing porsyon hangtud madawat ninyo ang tibuok tubag. Kana nga sundanan nagkinahanglan sa paggamit sa pagtuo sa kapasidad sa atong Amahan sa pagtubag. Samtang usahay kini lisud kaayo, moresulta kini sa makahuluganong personal nga pagtubo” (“Ang Paggamit sa Langitnon nga Gasa sa Pag-ampo,” Ensign o Liahona, Mayo 2007, 9).

• Presidente Henry B. Eyring sa Unang Kapangulohan:

  “Nakahibalo kita gikan sa panagna nga dili na kuhaon pag-usab ang tinuod ug buhi nga Simbahan gikan sa yuta, apan kini mahimo pang mas maayo. … Ang mga kasulatan naglakip sa mga saad nga kon ang Ginoo mobalik pag-usab sa Iyang Simbahan, makita Niya kini nga andam alang Kaniya sa espirituhanong paagi. Kana makahimo kanatong determinadto ug malaumon. Kinahanglang mohimo kita og mas maayo pa. Makahimo kita. Ug buhaton nato” (“Ang Tinuod ug Buhi nga Simbahan,” Ensign o Liahona, Mayo 2008, 21).

• Elder Robert D. Hales sa Korum sa Napulog Duha ka mga Apostoles:

  “Kita mangandam sa pagdawat og personal nga pagpadayag sama sa mga propeta , pinaagi sa pagtuon sa mga kasulatan, pagpuasa, pag-ampo, ug paglig-on sa hugot nga pagtuo. Ang hugot nga pagtuo mao ang yawe” (“Personal nga Pagpadayag: Ang mga Panudlo ug mga Ehemplo sa mga Propeta,” Ensign o Liahona, Nob. 2007, 88).

7.2.2

Ilha ang mga Interpretasyon o Klaripikasyon sa Kasulatan

Ang mga pakigpulong sa kinatibuk-ang komperensya makatabang nga mas masabtan nato ang mga kasulatan.

Ang mga propeta nagdala sa mahinungdanong tahas sa paghubad ug pagklaro sa kasulatan. Ang mosunod mao ang pipila ka ehemplo:

• Si Elder Jeffrey R. Holland sa Korum sa Napulog Duha ka mga Apostoles mitudlo kon sa unsang paagi ang mga kasulatan nagpakita sa managbulag nga kinaiyahan sa tulo ka sakop sa Dios nga Kapangulohan (tan-awa sa “Sa Bugtong Tinuod nga Dios, ug kang Jesukristo nga Iyang Pinadala,” Ensign o Liahona, Nob. 2007, 40–42).

• Si Presidente James E. Faust (1920–2007) sa Unang Kapangulohan naghisgot sa paggamit sa pipila ka mga kasulatan samtang gitudlo niya ang mahitungod sa baruganan sa pagpasaylo sa uban (tan-awa sa “Ang Makaalim nga Gahum sa Pagpasaylo,” Ensign o Liahona, Mayo 2007, 67–69).

• Si Elder David A. Bednar sa Korum sa Napulog Duha ka mga Apostoles namulong mahitungod sa “malumo nga mga kalooy sa Ginoo,” nga gihisgutan sa 1 Nephi 1:20 (tan-awa sa “Ang Malumo nga mga Kalooy sa Ginoo,” Ensign o Liahona, Mayo 2005, 99–102).

7.2.3

Paghimo og mga Cross-Reference tali sa mga Pakigpulong ug sa mga Kasulatan

Ang pagtuon sa kinatibuk-ang komperensya nga gamit ang mga kasulatan makadugang sa imong panabut sa duha.

Samtang ilhon nimo ang mga interpretasyon o klaripikasyon nga scriptural, makatabang ang pagsulat sa reference sa mga pakigpulong sa komperensya diha sa margin tupad sa kasulatan nga gitudlo o giklaro. Ang mosunod mao ang pipila ka mga ehemplo:

• Tupad sa Pinadayag 22:18 mahimo nimong isulat ang kinutlo ni: Elder Jeffrey R. Holland, Ensign, Mayo 2008, 91–94. Niini nga pakigpulong, mi-refer si Elder Holland ngadto sa Pinadayag 22:18 ug gihisgutan ang kaimportante sa padayon nga pagpadayag.

• Tupad sa Salmo 24:3–4 mahimo nimong isulat ang: Elder David A. Bednar, Ensign, Nob. 2007, 80–83. Gihisgutan ni Elder Bednar kon unsay ipasabut sa pagbaton og limpyong mga kamot ug putling kasingkasing.

• Tupad sa Nehemias 6 mahimo nimong isulat: Presidente Dieter F. Uchtdorf, Ensign, Mayo 2009, 59–62. Gihisgutan ni Presidente Uchtdorf si Nehemias nga nagtukod og balik sa mga paril nga naglibut sa Jerusalem ug sa ideya nga “kita nagbuhat og usa ka dakong buhat, mao nga kita dili makaanha.”

Mahimo sab nimong gamiton ang luna diha sa mga margin sa imong kopya sa Ensign o Liahona sa pagsulat sa mga reference nga nagsuporta sa mga ideya nga gitudlo niini nga pakigpulong.

7.2.4

Ilha ang mga Pag-awhag, Pagdapit, o mga Sugo

Samtang mangita ka sa mga pag-awhag, pagdapit, ug mga sugo, imong makat-unan ang pihong mga butang nga angay nimong buhaton aron mahiangay sa kabubut-on sa Ginoo. Tingali makatabang ang pagbadlis niining mga pamahayag diha sa imong kopya sa Ensign o Liahona aron makatabang sa imong pagpangita niini sa sunod. Ang mosunod mga ehemplo sa maong mga pamahayag:

• Elder L. Tom Perry (1922–2015) sa Korum sa Napulog Duha ka mga Apostoles:

  “Among gihatag og usab ang panawagan sa tanang espirituhanon, pisikal, ug emosyonal nga angayang mga young men sa pagpangandam nga mahimong mga misyonaryo sa Simbahan ni Jesukristo. Tinoa nga dali ra ninyong malatasan ang pinakaubos nga sumbanan alang sa pag-alagad isip misyonaryo ug nga kamo padayon nga mopataas sa sumbanan. Andama ang inyong kaugalingon sa pagkahimong mas epektibo niining talagsaon nga tawag” (“Pagpataas sa Sumbanan,” Ensign o Liahona, Nob. 2007, 49).

• Elder Dallin H. Oaks sa Korum sa Napulog Duha ka mga Apostoles:

  “Samtang atong hunahunaon ang daghang kapilian, kinahanglan atong hinumduman nga dili igo nga ang usa ka butang maayo. Ang ubang kapilian mas maayo, ug ang uban pa gayud labing maayo. …

  “Hunahunaa giunsa nato paggamit ang atong oras diha sa mga pagpili nga atong gihimo sa pagtan-aw og telebisyon, pagdula og mga video games, pag-surf sa Internet, o sa pagbasa og mga basahon o mga magasin. Siyempre maayo ang pagtan-aw og nindot nga salida o ang pagkuha og makalingaw nga impormasyon. Apan dili tanan niana nga klase takus sa bahin sa atong kinabuhi nga atong gihatag sa pagkuha niini. Ang pipila ka butang mas maayo, ug ang ubang butang labing maayo” (“Maayo, Mas Maayo, Labing Maayo,” Ensign o Liahona, Nob. 2007, 105).

• Presidente Thomas S. Monson:

  “Kaninyo nga makahimo sa pagtambong sa templo, ako motambag kaninyo sa pag-adto kanunay” (“Mapanalanginan Pag-ayo,” Ensign o Liahona, Mayo 2008, 112).

7.2.5

Pangitaa ang mga Panalangin nga Gisaad ug Unsay Angay Natong Buhaton aron sa Pag-angkon Niini

Kinahanglan nga mobuhat kita og labaw pa kay sa maminaw sa mga mensahe—kinahanglan nga lihukon nato kini. Niining paagiha nagpakita kita sa atong pagtuo.

Ang mga propeta mohimo kanunay og mga saad niadtong mosunod sa mga baruganan nga ilang gitudlo. Ang pagtinguha sa mga panalangin nga gisaad makatabang nga madasig kita sa pagpakabuhing matarung. Ang mosunod mao ang duha ka ehemplo sa maong mga saad:

• Presidente Henry B. Eyring sa Unang Kapangulohan:

  “Kon pamalandungan ninyo ang mga kasulatan ug sugdan ninyo sa paghimo ang gipakigsaad ninyo sa Dios nga buhaton, makasaad ko ninyo nga mas bation ninyo ang gugma para sa Dios ug mas bation ninyo ang Iyang gugma para kaninyo. Ug uban niana, ang inyong mga pag-ampo maggikan sa kasingkasing, puno sa pasalamat ug pangamuyo. Bation ninyo ang mas dakong pagsalig sa Dios. Makaplagan ninyo ang kaisug ug determinasyon nga molihok sa pagserbisyo Kaniya, nga walay kahadlok ug maanaa ang kalinaw sa inyong kasingkasing. Mag-ampo kamo sa kanunay. Ug dili mo Siya hikalimtan, bisan unsa pay modangat sa umaabut” (“Prayer,” Ensign, Nob. 2001, 17).

• Elder L. Tom Perry (1922–2015) sa Korum sa Napulog Duha ka mga Apostoles:

  “Mosaad ako og dagkong panalangin—sa sosyal, sa pisikal, mental, emosyunal, ug espiritunahon nga mga panalangin—sa matag batan-ong lalaki nga mobayad sa mahinungdanong porsyon sa iyang misyon” (“Pagpataas sa Sumbanan,” 49).

7.2.6

Ilha ang mga Pulong ug Hugpong sa mga Pulong nga Gibalik-balik

Ang mga pulong ug hugpong sa mga pulong nga gibalik-balik makahatag og pagtagad sa sentro sa mensahe sa mamumulong. Sama pananglit, si President Dieter F. Uchtdorf sa Unang Kapangulohan mibalik-balik og gamit sa mga pulong nga “sayop nga mga gagmay” sa tibuok komperensya sa paghatag og gibug-aton nga “ang kalainan tali sa kalipay ug kaalaut diha sa matag usa, diha sa mga kaminyoon, ug mga pamilya kadaghanan mahitabo gumikan lamang sa pipila ka mga sayop” (“Ang Kalainan sa Gamay nga mga Sayop,” Ensign o Liahona, Mayo 2008, 57–60). Sa samang paagi gibalik-balik ni Presidente Uchtdorf ang mga pulong nga “tinuohan sa atong amahan” sa usa ka pakigpulong wala madugay sa mao ra gihapon nga kinatibuk-ang komperensya dihang mitambag siya kanato sa paghinumdom niadtong mga miandam sa agianan para kanato (“Tinuohan sa Atong Amahan,” Ensign o Liahona, Mayo 2008, 68–70, 75).

Ang mga pulong ug hugpong sa mga pulong nga gibalik-balik makasumpay usab sa mga mensahe sa pipila ka mamumulong. Sama pananglit, imong mamatikdan nga ang mga pulong nga “malumo nga mga kalooy” ug “pagpataas sa sumbanan” nga gigamit sa pipila ka mga pakigpulong sa mao ra gihapon nga kinatibuk-ang komperensya o sa pipila ka komperensya. Ang pagkonektar sa mga pagtulun-an gikan sa daghang pakigpulong makahatag kanimo og mas lapad nga panabut sa kaimportante sa mga baruganan sa ebanghelyo nga ilang gitudlo.

7.2.7

Paghimo og Kaugalingon Nimong Hugpong sa mga Pulong

Pangita og hugpong sa mga pulong ug mga sentence nga, bisan mubo ug sayon nga hinumduman, magdala og lawom nga kahulugan. Kon pamalandungan, makapalambo kini sa inyong panabut sa importanting mga baruganan. Ang mosunod mao ang pipila ka ehemplo:

• Elder Joseph B. Wirthlin (1917–2008) sa Korum sa Napulog Duha ka mga Apostoles:

  “Kon atong higugmaon ang Ginoo, ang pagsunod dili na mahimong sagubangunon” (“Ang Dakong Sugo,” Ensign o Liahona, Nob. 2007, 30).

• Presidente Thomas S. Monson:

  “Walay panaghigala nga mas bililhon kay sa inyong kaugalingong limpyo nga konsensya” (“Mga Ehemplo sa Pagkamatarung,” Ensign o Liahona, Mayo 2008, 65).

7.2.8

Ilha ang mga Lista

Ang mga mamumulong mahimong mogamit og mga lista sa paghulagway sa proseso, sama sa paghinulsol, o mga bahin sa usa ka baruganan. Sama pananglit, si Presidente Thomas S. Monson milista sa “mga timailhan sa tinuod nga naghupot sa priesthood sa Dios.” Ang Iyang lista naglakip sa “timailhan sa panglantaw,” “sa timailhan sa pagpaningkamot,” “sa timailhan sa hugot nga pagtuo,” “sa timailhan sa hiyas,” ug sa “timailhan sa pag-ampo” (“Usa ka Harianong Priesthood,” Ensign o Liahona, Nob. 2007, 59–61). Ang pag-ila sa mga lista samtang magtuon ka sa mga pakigpulong sa komperensya makatabang sa imong pag-outline ug pag-organisar sa impormasyon nga anaa niini. Makatabang kini nga imong mahinumduman ang mga pagtulun-an ug sa paggamit niini sa imong kinabuhi.

7.2.9

Pangitaa ang Hinungdan ug ang Epekto ug ang “Kon-Niana” nga mga Pamahayag

Pangitaa ang mga pamahayag nga naghatag og katin-awan sa mga epekto sa piho nga mga aksyon. Giila niini ang mga sangputanan ug mga panalangin. Ang mosunod mao ang pipila ka ehemplo:

• Presidente Henry B. Eyring sa Unang Kapangulohan:

  “Kon dili kaayo tutok ang atong pagtuon sa mga kasulatan, kulang pud sa tutok ang atong mga pag-ampo. Posibling walay hunong ang atong pag-ampo, apan ang atong mga pag-ampo magkahimong pabalik-balik, mas awtomatik, kulang sa tinuoray nga katuyoan” (“Prayer,” 17).

• Presidente Gordon B. Hinckley (1910–2008):

  “Kon kamo mohimo niini [pagkontrolar sa inyong kasuko], dili kamo magmahay sa inyong mga kinabuhi. Ang inyong relasyon sa kaminyoon ug sa pamilya mapreserbar. Mas magmalipayon kamo. Makahimo kamo og mas maayo. Mobati kamo og kalinaw nga talagsaon” (“Hinay nga Masuko,” Ensign o Liahona, Nob. 2007, 66).

• Presidente Thomas S. Monson:

  “Kon kita anaa sa kasugoan sa Ginoo, … kita angayan sa panabang sa Ginoo” (“Mga Ehemplo sa Pagkamatarung,” Ensign o Liahona, Mayo 2008, 65).

7.2.10

Hatagi og pagtagad ang mga Pulong ug Hugpong sa mga Pulong Nga Nagpaila og Piho nga Punto o Konklusyon

Ang mga pulong sama sa “busa,” “sa katapusan,” “hinumdumi,” ug “sa ingon niini” ug ang mga pulong sama sa “agig panapos” ug “agig summary” nagpaila og mahinungdanong mga punto o konklusyon. Ang mosunod mao ang pipila ka ehemplo:

• Si Presidente Russell M. Nelson sa Korum sa Napulog Duha ka mga Apostoles mikutlo sa Mga Taga-Efeso 2:19–20 ug 4:11–13 ug dayon miingon:

  “Sa ingon ang pangalagad sa mga Apostoles—sa Unang Kapangulohan ug sa Napulog Duha—mao ang pagdala niana nga panaghiusa sa pagtuo ug pagsangyaw sa atong kahibalo kabahin sa Manluluwas” (“Kaluwasan ug Kahimayaan,” Ensign o Liahona, Mayo 2008, 7).

• Si Elder L. Tom Perry (1922–2015) sa Korum sa Napulog Duha ka mga Apostoles mihatag og gibug-aton sa panaghiusa nga kinahanglang maanaa sa kaminyoon dihang gitapos niya ang pakigpulong mahitungod sa amahan isip pangulo sa pamilya:

  “Hinumdumi, mga kaigsoonan, nga sa inyong tahas isip lider sa pamilya, inyong asawa maoy inyong kauban. … Sukad sa sinugdanan, ang Dios nagsugo sa katawhan nga ang kaminyoon kinahanglan mohiusa sa bana ug asawa diha sa panag-uyon. Busa, walay usa ka presidente o bise presidente diha sa pamilya. Ang managtiayon magkaubang magtrabaho hangtud sa kahangturan para sa kaayohan sa ilang pamilya. Sila magkahiusa sa pulong, sa buhat, ug sa lihok, samtang sila mangulo, maggiya, ug magdumala sa ilang pamilya. Sila managsamang magkauban. Magakauban ug magkahiusa silang magplano ug mag-organisar sa mga kalihokan sa pamilya samtang nagpadayon sila sa unahan” (“Pagkaamahan, usa ka Mahangturong Katungdanan,” Ensign o Liahona, Mayo 2004, 71).

7.2.11

Mangutana

Ang maayong mga pangutana makapasiugda og pagkat-on ug magtugot nga ang Espiritu Santo makatudlo kanimo lapas sa gipamulong nga pulong. Samtang tun-an nimo ang mga pakigpulong sa komperensya, kat-uni ang pagpangutana sama sa mosunod:

• Nganong gigamit man sa mamumulong kini nga pulong o mga pulong?

• Unsa man ang mensahe para kanako, para sa akong pamilya, o para sa Simbahan?

• Unsaon man nako sa paggamit niini sa akong kinabuhi?

• Unsay gikatudlo niini kanako mahitungod kang Jesukristo o sa plano sa kaluwasan?

• Duna bay mahinungdanong tema niini nga komperensya?

7.2.12

Isulat ang mga Espiritwal nga Pag-aghat

Isulat ang mga espirtiwal nga pag-aghat, ug dayon lihuka kini. Usa kini ka paagi sa pagpakita sa Ginoo nga ang mga impresyong espiritwal importante kanimo.

Samtang pamanlandungan nimo ang tambag nga gihatag sa kinatibuk-ang komperensya, makadawat ka og mga panglantaw ug pag-aghat gikan sa Espiritu Santo nga haum sa imong panginahanglan ug sa imong lebel sa espiritwal nga kahingkod. Ang pagsulat sa imong mga panglantaw diha sa imong journal o notebook makatabang nga matanom kini sa imong hunahuna ug kasingkasing. Mahimo usab nimong isulat ang pipila ka tumong para sa personal nga kalamboan. Panagsa ribyuha ang imong mga notes ug tumong ug i-evaluate ang imong pag-uswag.

Si Elder Richard G. Scott (1928–2015) sa Korum sa Napulog Duha ka mga Apostoles mipasabut og dugang nga panalangin sa pagrekord sa mga pagtulun-an:

“Pinaagi sa pabalik-balik nga proseso sa mga pagbati sa impresyon, pagrekord niini, ug pagsunod niini nga ang usa nakakat-on sa pagsalig sa direksyon sa Espiritu labaw kay sa komunikasyon pinaagi sa lima ka pamalatian [senses]” (“Helping Others to Be Spiritually Led” [Church Educational System symposium mahitungod sa Doktrina ug mga Pakigsaad ug sa Church History, Ago. 11, 1998], 3).

Si Presidente Gordon B. Hinckley (1910–2008) miawhag usab kanato sa paghimo niini:

“Tingali gikan sa tanan nga atong nadungog, tingali dunay mga pulong o paragraph nga klaro ug nakakuha sa atong pagtagad. Kon mahitabo man kini, unta isulat nato kini ug pamalandungan kini hangtud atong matagamtam ang kaladmon sa kahulugan niini ug gihimo kining bahin sa kaugalingon natong kinabuhi” (“An Humble and a Contrite Heart,” Ensign, Nob. 2000, 88).

7.2.13

Pangitaa ang mga Pagpamatuod sa Espesyal nga mga Saksi sa Ginoo

Ang mga impluwensyal, makalig-on sa pagtuo nga pagpamatuod maoy talagsaong tinubdan sa kalig-on sa kaugalingon natong mga pagpamatuod. Talagsa ra nga kusog kaayo ang Espiritu sama sa pagpaambit og mga pagpamatuod. Ang mosunod mao ang duha ka ehemplo niini:

• Si Presidente Gordon B. Hinckley (1910–2008) mihatag sa iyang pagpamatuod bahin sa Manluluwas:

  “Pagmalig-on sa inyong pagpamatuod kang Jesukristo, ang Anak sa Dios. Siya ang ulohang bato sa pamag-ang niining talagsaon nga buhat. Sa Iyang kabalaan ug pagkatinuod mohatag ko sa sagrado nakong pagsaksi. Siya ang Kordero nga walay lama, kinsa gihalad alang sa mga sala sa kalibutan. Pinaagi sa Iyang kasakit ug tungod sa Iyang pag-antus akong nakaplagan ang pagpasig-uli ug kinabuhing dayon. Siya ang akong Magtutudlo, akong Ehemplo, akong Higala, ug akong Manluluwas kinsa akong gihigugma ug gisimba isip Manunubos sa kalibutan” (“Building Your Tabernacle,” Ensign, Nob. 1992, 52; emphasis gidugang).

• Sa iyang katapusan nga pakigpulong sa kinatibuk-ang komperensya sa wala pa siya mamatay, si Elder Bruce R. McConkie (1915–85) sa Korum sa Napulog Duha mipamatuod:

  “Ug karon, kalabut niining hingpit nga Pag-ula, nga nahitabo pinaagi sa pagpaagas sa dugo sa Dios—mopamatuod ko nga kini nahitabo sa Getsemani ug sa Golgota, ug kabahin ni Jesukristo, mopamatuod ko nga Siya ang Anak sa Buhi nga Dios ug gilansang alang sa mga sala sa kalibutan. Siya ang atong Ginoo, atong Dios, ug atong Hari. Kini nasayran nako sa akong kaugalingon, wala mag-agad-sa ubang tawo.

  “Usa ako sa Iyang mga saksi, ug sa umaabut nga adlaw akong mahikap ang mga marka sa lansang sa Iyang mga kamot ug sa Iyang mga tiil ug bas-on ang Iyang mga tiil sa akong mga luha.

  “Apan ang akong masayran nianang panahona mao lang gihapon sa karon nga Siya mao ang Makagagahum nga Anak sa Dios, nga Siya mao ang atong Manluluwas ug Manunubos, ug ang kaluwasan moabut pinaagi sa Iyang maulaong dugo ug wala nay lain pang paagi.

  “Gitugot sa Dios nga tanan kita magalakaw sa kahayag sama sa Dios nga atong Amahan anaa sa kahayag aron nga, sumala sa mga saad, ang dugo ni Jesukristo iyang Anak molimpyo kanato gikan sa tanang sala” (“The Purifying Power of Gethsemane,” Ensign, Mayo 1985, 11).

7.2.14

Magmemorya og Makahuluganong mga Pamahayag

Miingon ang Ginoo nga kon unsay isulti sa Iyang sulugoon “kon nadasig diha pinaagi sa Espiritu Santo mahimo nga kasulatan” (D&P 68:4). Niini nga pagsabut, ang tambag nga gihatag ni Elder Richard G. Scott (1928–2015) nga sakop sa Korum sa Napulog Duha ka mga Apostoles alang sa haum kaayo nga pagkutlo ug pagmemorya sa mga kasulatan tingali magamit usab sa mga pulong sa buhing mga propeta:

“Adunay gahum nga makausab og mga kinabuhi diha sa mga piho nga pulong nga narekord sa sumbanang mga basahon. Kana nga gahum mohuyang kon atong usabon o lahion ang aktwal nga pagkahan-ay sa pulong. Mao nga mosugyot ko nga dasigon ninyo ang mga estudyante sa pagmemorya og scripture content uban sa katukma. Ang tanan ninyong buhaton sa pagdasig sa mga estudyante sa pagmemorya sa piniling mga kasulatan sa tukma gayud makatabang nga madala nila sa ilang kinabuhi ang gahum sa sulod niini” (“Four Fundamentals for Those Who Teach and Inspire Youth” [Church Educational System symposium on the Old Testament, Ago. 14, 1987], 7).

“Mosugyot ko nga memoryahon ninyo ang mga kasulatan nga motandog sa inyong kasingkasing ug mopuno sa inyong kalag og panabut. Kon ang mga kasulatan gigamit sumala sa tuyo sa Ginoo sa pagkarekord niini, duna kini kaugalingon niyang gahum nga dili masulti kon usabon ang pulong. Usahay kon dunay makahuluganong panginahanglan sa akong kinabuhi, ribyuhon nako sa hunahuna ang mga kasulatan nga naghatag kanako og kalig-on. Adunay dakong kahupayan, direksyon, ug gahum nga modagayday gikan sa mga kasulatan, ilabi na sa mga pulong sa Ginoo” (“He Lives,” Ensign, Nob. 1999, 87–88).

Ang pagmemorya og makahuluganong mga pamahayag gikan sa mga mensahe sa buhing mga propeta maghatag kanato og reserba nga inspirasyon ug giya nga atong magamit kon kini atong gikinahanglan.

7.2.15

Tun-i ang mga Pakigpulong nga Gihatag sa Sama ra nga Topic

Ang pagtuon og sobra sa usa ka pakigpulong sa sama ra nga topic sa kasagaran mo-highlight sa mga dapit nga gihatagan og gibug-aton ug makahatag og dugang nga mga panglantaw. Sama pananglit, sa Oktubre 2007 nga kinatibuk-ang komperensya si Elder Robert D. Hales sa Korum sa Napulog Duha ka mga Apostoles namulong mahitungod sa personal nga pagpadayag, ug si Elder Richard G. Scott, usab sa Korum sa Napulog Duha, namulong mahitungod sa paggamit sa pagpadayag nga giya sa atong mga pagpili (tan-awa sa “Personal nga Pagpadayag: Ang mga Panudlo ug mga Ehemplo sa mga Propeta” ug “Kamatuoran: Ang Sukaranan sa Sakto nga mga Desisyon,” Ensign o Liahona, Nob. 2007, 86–92). Sa Abril 2006 nga kinatibuk-ang komperensya sila si Elder M. Russell Ballard ug Richard G. Scott sa Korum sa Napulog Duha ka mga Apostoles namulong mahitungod sa pagpaambit sa ebanghelyo. Namulong si Elder Ballard mahitungod sa pagpangimbitar og mga higala ug mga silingan ngadto sa atong mga balay isip paagi sa pagpaambit sa ebanghelyo ngadto kanila, ug human niana nga pakigpulong gihisgutan ni Elder Scott ang pagpangandam sa mga misyonaryo diha sa panimalay ug sa Simbahan (tan-awa sa “Paghimo og Mapaambiton sa Ebanghelyo nga Panimalay” ug “Karon Mao ang Panahon sa Pagserbisyo og Misyon!” Ensign o Liahona, May 2006, 84–90).

7.2.16

Paghimo og Library sa Imong mga Lista ug sa Ensign o Liahona nga mga isyu sa Komperensya

Tipigi ang mga komperensya nga isyu sa mga magasin sa Simbahan, kauban sa imong mga gipangsulat atol sa imong pagpaminaw o pagtuon sa mga pakigpulong, aron makabalik ka sa pag-refer niini sa moabut nga panahon. Maghimo kini nga imong makumpara ang nangaging mga mensahe ug mga hunahuna ngadto sa imo unyang madawat. Imo usab nga makita sa unsang paagi ang pihong mga baruganan ug doktrina gibalik-balik sa daghang komprensya ug makasugod ka sa paghimo og cross-reference niini. Ug mopalambo kini sa imong abilidad sa pagkat-on gikan sa mga pulong sa mga propeta atol sa mga oportunidad sa pagpanudlo, sama sa naa sa misyon, sa mga pakigpulong sa miting sa sakrament, sa mga klase sa Simbahan, o sa family home evening.

7.2.17

Gamita ang Unsay Imong Nakat-unan

Ang tumong sa imong pagtuon sa ebanghelyo mao ang pagsunod sa ebanghelyo sa mas maayong paagi. Dili lang kay unsay imong nahibaloan apan unsay imong gihimo sa unsay imong nahibaloan nga magdala sa kinadak-ang kalipay sa imong kinabuhi. Kinahanglan nga kita “[tigtuman sa] pulong, ug dili kay magpaminaw ra” (Santiago 1:22). Samtang imong gamiton unsay imong nakat-unan, makapalambo ka og mas dakong panabut sa plano sa kaluwasan ug mas lig-ong tinguha sa pagpaambit niini sa uban. Sigurado ang kalipay kon dawaton nato ug magpakabuhi sumala sa tambag sa Ginoo ug sa Iyang mga propeta.

Ang pagpamalandong sa mosunod nga mga pangutana samtang magtuon ka sa kinatibuk-ang komperensya makatabang nimo sa paggamit sa unsay imong nakat-unan:

• Unsay gusto sa Ginoo nga paagi sa akong paggamit niini sa akong kinabuhi?

• Unsaon nako sa paggamit niini sa paglig-on sa akong pagtuo?

• Kanus-a man ko nakasinati og butang nga susama sa mga gipangtudlo?

• Unsay mahimong kalainan niini sa akong kinabuhi kon sundon kini nga pagtulun-an?

• Sa unsang paagi kini akong magamit sa pagtudlo sa uban mahitungod sa baruganan sa ebanghelyo?

Mga Punto nga Pamalandungan

• Hunahunaa ang usa ka piho nga hagit o desisyon nga imong giatubang. Sa unsang paagi ang mga mensahe sa pinakabag-ong kinatibuk-ang komperensya sa Simbahan nakatabang sa pagsulbad niini nga problema?

Gisugyot nga mga Assignment

• Pagpili og mga kahanas sa pagtuon nga gihulagway niini nga kapitulo nga gipanghinaot nimong gamiton sa imong personal nga pagtuon. Sugdi ang personal nga pagtuon sa pinakabag-ong mga pakigpulong sa kinatibuk-an nga komperensya gamit kana nga mga kahanas sa pagtuon.

• Ilista ang tambag nga gihatag diha sa pinakabag-ong kinatibuk-an nga komperensya nga gibati nimong kinahanglang lihukon. Isulat ang mga tumong ug paghimo og mga pasalig sigun sa itudlo kanimo sa Espiritu.

• Basaha ang mga magasin sa Simbahan. Hatagi og pihong pagtagad ang mga mensahe nga gisulat sa mga sakop sa Unang Kapangulohan ug sa ubang mga General Authority.