Kapitulo 5

Korum sa Napulog Duha ka mga Apostoles

Pasiuna

Si Presidente Boyd K. Packer (1924–2015), sa paghisgot mahitungod sa kauban niyang mga sakop sa Korum sa Napulog Duha ka mga Apostoles, miingon:

“Ang kasamtangang Napulog Duha ordinaryo ra kaayong mga tawo. Dili sila mapasundayagon sa tagsa-tagsa, sama sa orihinal nga Napulog Duha, apan sa tiningub ang Napulog Duha adunay dakong gahum.

“Naggikan kami sa magkalain-laing mga trabaho. Kami mga scientist, mga abogado, mga magtutudlo.

“Si Elder Nelson usa ka pioneer sa pag-opera og kasingkasing. Mipahigayon siya og liboan ka mga operasyon. …

“Pipila nga nia niini nga korum mga sundalo kaniadto—usa ka sailor, marines, mga piloto.

“Naghupot sila og lain-laing mga katungdanan sa Simbahan: mga home teacher, mga magtutudlo, mga misyonaryo, mga presidente sa korum, mga bishop, mga stake president, mga mission president, ug pinakaimpotante, mga bana ug mga amahan.

“Silang tanan mga estudyante ug mga magtutudlo sa ebanghelyo ni Jesukristo. Unsay nakapahiusa kanamo mao ang among gugma sa Manluluwas ug sa mga anak sa Iyang Amahan ug ang among pagsaksi nga Siya nagbarug isip pangulo sa Simbahan.

“Hapit tanan sa Napulog Duha naggikan sa mapaubsanong gigikanan, sama sa unsay nahitabo sa dihang ania pa Siya dinhi. Ang buhi nga Napulog Duha gihiusa diha sa pagpangalagad sa ebanghelyo ni Jesukristo. Sa dihang ang tawag miabut, ang matag usa mipadaplin sa iyang mga pukot, maingon ta, ug misunod sa Ginoo.

“Si Presidente Kimball mahinumduman sa iyang pamahayag, “Ang akong kinabuhi sama sa akong mga sapatos—nga gamiton og maayo diha sa pagserbisyo.’ Magamit kana sa tanang sakop sa Napulog Duha. Mosul-ob usab kami hangtud maguba diha sa pagserbisyo sa Ginoo, ug buhaton namo sa dakong tinguha” (“Ang Napulog Duha,” Ensign o Liahona, Mayo 2008, 86; tan-awa usab sa Mga Pagtulun-an sa mga Presidente sa Simbahan: Spencer W. Kimball [2006], xliv).

Sa pagtuon nimo niini nga kapitulo, tinguhaa nga malig-on ang personal nimong pagpamatuod sa mga Apostoles pinaagi sa pagkat-on sa ilang mga tahas ug mga responsibilidad. Nangulo sila sa Simbahan pinaagi sa awtoridad sa sagradong mga yawe sa priesthood nga naghatag kanila’g awtoridad sa pagdala sa ebanghelyo sa kalibutan ug mamahimong espesyal nga mga saksi ni Jesukristo.

Komentaryo

5.1

Ang mga Apostoles mga Kabahin sa Pundasyon sa Tinuod nga Simbahan sa Ginoo

Mitudlo si Apostol Pablo nga ang matinud-anong mga Santos mao kadtong “mga sakop sa panimalay sa Dios: ug tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:19–20; emphasis gidugang).

Niadtong Abril 6, 1980, nga proklamasyon, namahayag ang Unang Kapangulohan ug ang Korum sa Napulog Duha ka mga Apostoles:

“Sagrado namong gipamatud-an nga Ang Simbahan ni Jesukristo sa mga Santos sa Ulahing mga Adlaw sa pagkatinuod usa ka pagpahiuli sa Simbahan nga giestablisar sa Anak sa Dios, dihang sa mortalidad giorganisar niya ang iyang buhat sa yuta; nga nagdala kini sa iyang sagrado nga ngalan, gani ang ngalan ni Jesukristo; [ug] nga kini gitukod nga ang pundasyon mga Apostoles ug mga propeta, siya ang ulohang bato sa pamag-ang” (“Proclamation,” Ensign, Mayo 1980, 52).

5.2

Nahibalo ang mga Apostoles ug Mohatag og Espesyal nga Pagsaksi Nga si Jesus Mao ang Kristo

Ang Korum sa Napulog Duha ka mga Apostoles, 1979

Mipakigbahin si Presidente Harold B. Lee (1899–1973) og iyang kasinatian samtang nagtabang og duha ka misyonaryo nga makasabut sa reyalidad sa pagsaksi sa usa ka Apostol kang Jesukristo:

“Pipila ka tuig ang milabay giduol ko sa duha ka misyonaryo dala ang para nila lisud kaayo nga pangutana. Gikataw-an sila sa usa ka batan-ong ministro sa Methodist dihang miingon sila nga gikinahanglan karon ang mga apostoles aron ang tinuod nga simbahan maania sa kalibutan. Miingon kuno ang ministro nga, ‘Nahibalo ba mo nga dihang nagtigum ang mga apostoles aron mopili og usa nga ipuli sa bakante gumikan sa pagkamatay ni Judas, miingon sila nga kinahanglan nga tawo kini nga nakauban na nila ug nahimo nang saksi sa tanang butang mahitungod sa misyon ug pagkabanhaw sa Ginoo? Unsaon man ninyo sa pag-ingon nga duna moy mga apostoles, kon mao kana ang sukdanan sa usa ka apostol?’

“Ug mao nga miingon kining mga batan-on, ‘Unsay among itubag?’

“Giingnan nako sila, ‘Balik ngadto ug pangutan-a og duha ka pangutana ang inyong higala nga ministro. Una, sa unsa nga paagi naangkon ni Apostol Pablo ang mga kinahanglanon aron mahimong apostol? Wala siya makaila sa Ginoo, wala siya makaila sa personal. Wala pud niya ikauban ang mga apostoles. Wala siya mahimong saksi sa pangalagad ni sa pagkabanhaw sa Ginoo. Giunsa niya sa pagkaangkon og pagpamatuod igo nga mahimo siyang apostol? Ug ang ikaduha pangutan-a siya, Giunsa niya sa pagkahibalo nga ang tanang apostoles karon wala makadawat niana nga saksi?’

“Mosaksi ko kaninyo nga kadtong naghupot sa apostolikanhong tawag, nahibalo sa reyalidad sa misyon sa Ginoo” (Stand Ye in Holy Places [1974], 64–65).

Sigurado gayud nga nahibalo ang mga Apostoles pinaagi sa personal nga pagpadayag nga si Jesus mao ang Kristo ug Siya buhi isip usa ka nabanhaw nga binuhat. Gipasabut sa kasulatan nga “uban sa dakong gahum, ang mga apostoles nanagpamatuod sa pagkabanhaw sa Ginoong Jesus” (Mga Buhat 4:33). Gipasabut ni Presidente Joseph F. Smith (1838–1918) ang sagradong kinaiyahan sa ilang calling:

“Kini nga napulog duha ka mga disipulo ni Kristo masabut nga mga saksi nga nakakita gayud ug nakadungog sa balaang misyon ni Jesukristo. Dili madawat nga moingon ra sila nga, mituo ako, siyempre; gidawat lamang nako kini tungod kay mituo ko niini. Basaha ang pagpadayag, gipahibalo kita sa Ginoo nga sila kinahanglan gayud nga mahibalo, kinahanglan gayud nga maangkon nila mismo ang kahibalo. Kinahanglan gayud nga maanaa kini kanila sama nga kini ilang nakita sa ilang mga mata ug nadungog sa ilang mga dunggan ug nahibaloan nila ang kamatuoran. Mao kana ang ilang misyon, sa pagpamatuod kang Jesukristo ug nga Siya gilansang ug mibangon gikan sa pagkamatay ug gisul-uban karon og labaw nga gahum sa tuong kamot sa Dios, ang Manluluwas sa kalibutan. Mao kana ang ilang misyon, ug ilang katungdanan, ug mao kana ang doktrina ug kamatuoran nga ilang katungdanan nga isangyaw sa kalibutan ug sa pagtino nga nasangyaw kini sa kalibutan” (sa Conference Report, Abr. 1916, 6).

Nahibalo ang mga Apostoles nga si Jesus mao ang Kristo.

Sa Doktrina ug ma Pakigsaad 107:23 atong mabasa, “Ang napulog duha ka tigpanaw nga mga konsehal gitawag ngadto sa Napulog Duha ka mga Apostoles, o talagsaon nga mga saksi sa ngalan ni Kristo sa tibuok kalibutan.” Si Presidente Boyd K. Packer (1924–2015) sa Korum sa Napulog Duha ka mga Apostoles namulong mahitungod sa sagradong kinaiyahan sa apostolikanhong pagsaksi kang Jesukristo:

“Panagsa sa miaging tuig gipangutana ko. Sa kasagaran moabut kini isip usa ka panguryuso, daw walay punto nga pangutana, pangutana mahitungod sa kwalipikasyon sa pagbarug isip saksi kang Kristo. Ang pangutana nila mao kini, ‘Ikaw nakakita na ba Kaniya?’

“Pangutana kana nga wala nako ipangutana sa uban. Wala ko kana ipangutana sa akong kaigsoonan sa Korum, nagtuo nga sagrado kaayo kini ug personal kaayo nga ang tawo kinahanglan nga dunay espesyal nga inspirasyon, sa pagkatinuod, usa ka pagtugot sa pagpangutana niini.

“Adunay pipila ka butang nga sagrado kaayo nga hisgutan. …

“Dunay mga tawong nakadungog og pagpamatuod nga gihimo sa Simbahan, pinaagi sa mga tawo nga naa sa taas nga posisyon ug pinaagi sa mga miyembro sa ward ug mga branch, ang tanan naggamit sa mao ra gihapong mga pulong—‘Nasayud ako nga ang Dios buhi; Nasayud ako nga si Jesus mao ang Kristo,’ ug dayon mangutana, ‘Nganong dili man kini malitok sa mas yanong mga pulong? Nganong dili man sa mas tin-aw ug mas mahulagwayon? Dili ba mahimong mas daghan pa og isulti ang mga apostoles?’

“Susama gayud kini sa paagi nga ang sagradong kasinatian sa templo mahimo natong personal nga pagpamatuod. Sagrado kini, ug kon gusto natong litukon kini, sama ra gihapon ang atong isulti—tanan mogamit sa mao ra gihapong mga pulong. Ipamahayag kini sa mga apostoles sa mao ra gihapong mga pulong sa gagmayng Primary ug kabatan-onan sa Sunday School. ‘Nasayud ko nga buhi ang Dios ug nasayud ko nga si Jesus mao ang Kristo.’ …

“Miingon ko nga dunay pangutana nga dili mahimong ibaliwala lang ug tubagon nga walay pag-aghat sa Espiritu. Kana nga pangutana sa uban wala pa nako mapangutana, apan nadungog nako silang mitubag niini—apan dili sa panahon nga gipangutana sila. Natubag nila kini ubos sa pag-aghat sa Espiritu, sa sagradong mga okasyon, dihang ‘mipamatuod ang Espiritu.’ (D&P 1:39.)

“Nakadungog ko og usa sa akong kaigsoonan nga namahayag: ‘Nasayud ako gikan sa mga kasinatian, labihan ka sagradong isaysay, nga si Jesus mao ang Kristo.’

“Nakadungog pud kog lain pa nga mipamatuod: ‘Nasayud ako nga buhi ang Dios; nasayud ako nga buhi ang Ginoo. Ug mas labaw pa niana, nakaila ako sa Ginoo.’

“Dili ang ilang mga pulong ang naghupot sa kahulugan o sa gahum. Ang Espiritu kadto. ‘… kay kon ang tawo mamulong pinaagi sa Espiritu Santo ang gahum sa Espiritu Santo modala niini ngadto sa mga kasingkasing sa mga katawhan.’ (2 Ne. 33:1.)

“Gisulti ko kini nga hilisgutan uban sa pagpaubos, uban sa mapadayunong pagbati nga ako ang pinakaubos sa tanan niadtong gitawag niining balaan nga office. …

“Karon, naghunahuna ko uban kaninyo kon ngano nga ang usa nga sama nako angayan nga tawagon sa balaang pagka-apostol. Daghan kaayong gikinahanglan nga ako nagkulang. Adunay daghan kaayo sa akong paningkamot sa pagserbisyo nga kulang. Samtang namalandong ko niini, dunay usa lang ka butang nga akong mahunahunaan nga maoy hinungdan, ug kana mao nga, ako nakabaton niana nga saksi.

“Ako mamahayag kaninyo nga si Jesus mao ang Kristo. Nasayud ko nga siya buhi. Natawo siya sa tunga-tungang kapanahunan. Gitudlo Niya ang Iyang ebanghelyo, gitaral, gilansang sa krus. Mibangon Siya sa ikatulong adlaw. Siya ang unang nabanhaw. Siya adunay lawas nga unod ug bukog. Niini ako mopamatuod. Kaniya usa ako ka saksi” (“The Spirit Beareth Record,” Ensign, Hunyo 1971, 87–88).

Si Presidente Howard W. Hunter (1907–95) mipaambit sa apostolikanhon niyang pagsaksi:

“Isip giorden nga Apostol ug espesyal nga saksi ni Kristo, mohatag ako kaninyo sa akong ligdong nga pagsaksi nga si Jesukristo sa pagkatinuod mao ang Anak sa Dios. Siya ang Mesiyas nga propetikanhong gipaabut sa mga propeta sa Daang Tugon. Siya ang Paglaum sa Israel, kansang pag-abut giampo sa mga anak ni Abraham, Isaac, ug Jacob atol sa dugay nang mga siglo sa gitudlong paagi sa pagsimba.

“Si Jesus mao ang Hinigugmang Anak kinsa misumiter ngadto sa kabubut-on sa Amahan pinaagi sa pagpabunyag kang Juan sa suba sa Jordan. Gitintal siya sa yawa didto sa kamingawan apan wala motugyan sa mga tintasyon. Gisangyaw niya ang ebanghelyo, nga mao ang gahum sa Dios ngadto sa kaluwasan, ug misugo sa tanang katawhan sa tanang dapit sa paghinulsol ug pagpabunyag. Mipasaylo siya og mga sala, namulong isip tawo nga may awtoridad, ug gipakita ang iyang gahum sa paghimo niini pinaagi sa pag-ayo sa mga bakol ug pag-abli sa mga mata sa buta ug pag-abli sa mga dalunggan sa bungol. Gihimo niya ang tubig nga bino, gipalinaw ang baluron nga tubig sa Galilea, ug gilakaw ang mao gihapong tubig sama nga naa sa gahi nga yuta. Gibuntog niya ang dautang mga tigmando kinsa nagtinguha sa iyang kinabuhi ug midala og kalinaw sa naglibug nga kasingkasing

“Sa katapusan, nag-antus siya sa Tanaman sa Getsemani ug namatay sa krus, gitugyan ang kinabuhi niyang walay sala isip lukat sa matag kalag nga misulod sa mortalidad. Siya sa tinuod gayud mibangon gikan sa pagkamatay sa ikatulong adlaw, nahimo nga unang bunga sa pagkabanhaw ug mibuntog sa kamatayon.

“Ang nabanhaw nga Ginoo nagpadayon sa iyang pangalagad sa kaluwasan pinaagi sa pagpakita sa matag karon ug unya ngadto sa mortal nga mga tawo nga pinili sa Dios nga mahimo niyang mga saksi, ug pinaagi sa pagpadayag sa iyang kabubut-on pinaagi sa Espiritu Santo.

“Pinaagi sa gahum sa Espiritu Santo nga ako nagsaksi. Ako nahibalo sa pagkatinuod ni Kristo sama nga akong nakita sa akong mga mata ug nadungog sa akong mga dalunggan. Nasayud sab ako nga ang Balaang Espiritu momatuod sa katinuod sa akong pagsaksi diha sa kasingkasing sa tanan niadtong naminaw gamit ang dalunggan sa pagtuo” (“An Apostle’s Witness of Christ,” Ensign, Ene. 1984, 70).

5.3

Ang mga Apostoles Naghupot sa Tanang Yawe sa Priesthood sa Gingharian sa Dios

Ang mga langitnong mensahero mipahiuli sa mahinungdanong mga yawe sa priesthood. Kini nga mga yawe gihuptan sa mga sakop sa Unang Kapangulohan ug sa Korum sa Napulog Duha ka mga Apostoles.

© 1985 Robert Theodore Barrett. Dili pakopyahan

Si Presidente Henry B. Eyring sa Unang Kapangulohan mipamatuod sa kaimportante sa apostolikanhong mga yawe sa priesthood:

“Si Pablo mipamatuod ngadto sa mga Taga-Efeso nga si Kristo anaa sa ulohan sa Iyang Simbahan. Ug mitudlo siya nga ang Manluluwas mitukod sa Iyang Simbahan sa usa ka pundasyon sa mga apostoles ug propeta kinsa naghupot sa tanang yawe sa priesthood. …

“Si Pablo naglantaw sa pagpangalagad ni Propeta Joseph Smith nga ang mga langit moabli pag-usab. Nahitabo kini. Si Juan Bautista miabut ug mitugyan sa mga tawo sa priesthood ni Aaron ug ang mga yawe sa pagpangalagad sa mga anghel ug ang pagbunyag pinaagi sa pagpaunlod sa tubig alang sa kapasayloan sa mga sala.

“Ang karaang mga apostoles ug mga propeta mibalik ug mitugyan kang Joseph sa mga yawe nga ilang gihuptan sa pagka-mortal. Mga mortal nga tawo giorden sa balaang pagkaapostol niadtong Pebrero 1835. Ang mga yawe sa priesthood gihatag ngadto sa Napulog Duha ka mga Apostoles niadtong hinapos sa Marso 1844.

“Si Propeta Joseph Smith nasayud nga ang iyang kamatayon nagkaduol na. Nasayud siya nga ang bililhong mga yawe sa priesthood ug sa pagkaapostol kinahanglan dili ug dili na gayud mawala pag-usab.

“Usa sa mga Apostoles, si Wilford Woodruff, mihatag kanato niini nga istorya kon unsay nahitabo didto sa Nauvoo samtang namulong ang Propeta ngadto sa Napulog Duha:

“‘Nianang higayuna ang Propeta Joseph mibarug ug misulti ngari kanamo: “Mga kaigsoonan, nagandoy ko nga mabuhi pa aron makakita niini nga templo nga tukuron. Dili na ako makakita niini samtang buhi pa ako apan kamo makakita niini. Gibugkos ko kini sa inyong mga ulo ang tanang mga yawe sa gingharian sa Dios. Gibugkos ko diha kaninyo ang matag yawe, gahum ug baruganan, nga ang Dios sa langit mipadayag kanako. Karon, dili igsapayan bisag asa ko mopaingon o unsa ang akong buhaton, ang gingharian anaa kaninyo.”

“Matag propeta nga misunod kang Joseph, gikan ni Brigham Young hangtud ni Presidente Hinckley, naghupot ug naggamit niadto nga mga yawe ug naghupot sa sagradong pagkaapostol.” (“Hugot nga Pagtuo ug mga Yawe,” Ensign o Liahona, Nob. 2004, 27–28).

Si Propeta Joseph Smith, Oliver Cowdery, ug David Whitmer miorden ni Parley P. Pratt isip sakop sa Korum sa Napulog Duha ka mga Apostoles.

Si Elder Bruce R. McConkie (1915–85) sa Korum sa Napulog Duha ka mga Apostoles mipasabut nga ang senior nga Apostol lamang nga naa sa kalibutan ang hingpit nga makagamit sa apostolikanhong mga yawe sa priesthood:

“Ang mga yawe sa gingharian sa Dios—ang katungod ug gahum sa mahangturong kapangulohan diin ang yutan-ong gingharian gidumala—kining mga yaweha, nga unang gipadayag gikan sa langit, gihatag pinaagi sa espiritu sa pagpadayag sa matag tawo nga giorden sa pagka-Apostol ug gi-set apart isip sakop sa Konseho sa Napulog Duha.

“Apan tungod kay ang mga yawe mao man ang katungod sa kapangulohan, magamit lamang ang kahingpitan niini sa usa ka tawo sa usa ka higayon sa kalibutan. Siya mao kanunay ang senior nga Apostol, ang presiding nga Apostol, ang presiding nga high priest, ang presiding nga elder. Siya lang ang makahatag og direksyon sa tanan, direksyon nga walay tawo ang dili maapil.

“Sa ingon niini, ang mga yawe, bisan gitugyan diha sa tanang Napulog Duha, gigamit ni bisan kinsa kanila sa limitadong paggamit lamang, gawas ug hangtud ang usa kanila makaabut niana nga seniority nga maghimo kaniyang pinili sa Ginoo dinhi sa kalibutan” (“The Keys of the Kingdom,” Ensign, Mayo 1983, 22–23; empasis gidugang).

Ang mga yawe sa gingharian nga gihuptan sa Napulog Duha isip mga propeta, manalagna, ug tigpadayag naghatag nila og katungod sa paghimo sa mga katungdanan nga gihatag kanila sa Presidente sa Simbahan. Gipasabut ni Presidente Joseph Fielding Smith (1876–1972) nga:

“Ang Napulog Duha ka mga Apostoles makadawat og pagpadayag alang sa paggiya kanila sa ilang mga buluhaton ug sa pagtabang nga ilang mapahimutang sa han-ay ang priesthood ug mga organisasyon sa Simbahan. Kon ipadala sila ngadto sa usa ka stake pinaagi sa awtoridad, anaa nila ang tanang gahum sa pagdawat og pagpadayag, sa paghimog mga kausaban, ug pagpahigayon sa mga kalihokan pinasubay sa kabubut-on sa Ginoo. Apan dili sila makadawat og mga pagpadayag para sa giya sa tibuok Simbahan, gawas lang kon usa kanila ang mopuli sa Kapangulohan. Sa laing pagkasulti ang katungod sa pagkadawat og pagpadayag ug giya para sa tibuok Simbahan gitugyan diha sa matag usa sa Napulog Duha, nga iyang magamit kon mopuli na siya sa Kapangulohan. Apan kini nga gahum dili magamit samtang ang Presidente sa Simbahan buhi pa” (Doctrines of Salvation, comp. Bruce R. McConkie [1956], 3:157; emphasis gidugang).

5.4

Mga Katungdanan sa Napulog Duha ka mga Apostoles

Ang Korum sa Napulog Duha ka mga Apostoles, 1997

“Ang napulog duha ka tigpanaw nga mga konsehal gitawag ngadto sa Napulog Duha ka mga Apostoles, o talagsaon nga mga saksi sa ngalan ni Kristo sa tibuok nga kalibutan—sa ingon milahi gikan sa uban nga mga opisyal diha sa simbahan sa mga katungdanan sa ilang balaan nga tawag. …

”Ang Napulog Duha mao ang Tigpanaw nga Tigdumala nga Halangdon nga Konseho, sa pagpangalagad sa ngalan sa Ginoo, ubos sa pagdumala sa Kapangulohan sa Simbahan, nahiuyon sa katukuran sa langit; sa pagtukod sa simbahan, ug sa pagdumala sa tanan nga mga kalihokan sa mao diha sa tanan nga mga nasud, una ngadto sa mga Hentil ug ikaduha ngadto sa mga Judeo.

“Ang Kapitoan [Seventy] mao ang mobuhat sa ngalan diha sa Ginoo, ubos sa paggiya sa Napulog Duha o sa tigpanaw nga halangdon nga konseho, sa pagtukod sa simbahan ug pagdumala sa tanan nga mga kalihokan sa mao diha sa tanan nga mga nasud, una ngadto sa mga Hentil ug unya ngadto sa mga Judeo;

“Ang Napulog Duha nga gipadala, naghupot sa mga yawe, sa pag-abli sa pultahan pinaagi sa pagpahayag sa ebanghelyo ni Jesukristo, ug una ngadto sa mga Hentil ug unya ngadto sa mga Judeo. …

Kini mao ang katungdanan sa Napulog Duha, usab, sa pag-orden ug sa pagpahimutang diha sa kahusay sa tanan nga uban nga mga opisyal sa simbahan, nga mahiuyon sa pagpadayag” (D&P 107:23, 33–35, 58).

Si Presidente Russell M. Nelson sa Korum sa Napulog Duha ka mga Apostoles namulong mahitungod sa mga katungdanan sa mga Apostoles:

“Ang Ginoo mipadayag nganong ‘ang iyang mga gasa mao nga ang uban mahimong mga apostoles, ang uban mga propeta.’ Kini ‘alang sa pagkasangkap sa mga balaan, alang sa buhat sa pag-alagad, alang sa paglig-on sa lawas ni Kristo:

“Hangtud makakab-ot kitang tanan sa pagkahiniusa sa pagtoo ug sa kahibalo mahitungod sa Anak sa Dios.’ [Mga Taga-Efeso 4:11–13].

“Sa ingon ang pangalagad sa mga Apostoles—ang Unang Kapangulohan ug ang Napulog Duha—mao ang pagdala niana nga panaghiusa sa pagtuo ug pagsangyaw sa atong kahibalo kabahin sa Manluluwas. Ang atong pangalagad mao ang pagpanalangin sa mga kinabuhi sa tanan kinsa mokat-on ug mosunod sa ‘labing maayo nga paagi’ sa Ginoo [1 Mga Taga-Corinto 12:31; Ether 12:11]. Ug kinahanglan kitang motabang sa mga tawo nga maandam alang sa ilang potensyal nga kaluwasan ug kahimayaan” (“Kaluwasan ug Kahimayaan,” Ensign o Liahona, Mayo 2008, 7–8).

Gi-outline ni Presidente Gordon B. Hinckley (1910–2008) ang nag-unang mga katungdanan sa mga Apostoles niini nga paagi:

“Ang Unang Kapangulohan ug ang Konseho sa Napulog Duha ka mga Apostoles, gitawag ug gi-orden nga maghupot sa mga yawe sa priesthood, dunay awtoridad ug responsibilidad sa pagdumala sa Simbahan, sa pagpahigayon sa mga ordinansa niini, sa pagpasabut sa doktrina niini, ug sa pag-establisar ug pagmentinar sa mga naandan niining gimbuhaton. Ang matag tawo nga giorden nga Apostol ug gi-sustain nga sakop sa Konseho sa Napulog Duha i-sustain isip propeta, manalagna, ug tigpadayag” (“God Is at the Helm,” Ensign, May 1994, 54; emphasis gidugang).

Human mapili ug ma-orden ang mga sakop sa Korum sa Napulog Duha, si Presidente Oliver Cowdery (1806–50), nga Assistant President sa Simbahan, mihatag sa mosunod nga sugo:

“Giorden kamo niining balaan nga Priesthood, inyo kining nadawat gikan niadtong dunay gahum ug awtoridad gikan sa anghel; magsangyaw kamo sa Ebanghelyo sa tanang nasud. Kon ugaling kamo magkulang og bisan gamay sa inyong katungdanan, kadako sa inyong pagkahimaraot; kay kon mas dako ang calling mas dako ang sala. Busa pahimangnoan ko kamo nga ugmaron ninyo ang dakong pagpaubos; kay nasayud ako sa garbo sa tawhanong kasingkasing. Pagbantay, basin ang mga ulog-ulugan sa kalibutan modasig kaninyo; pagbantay, basin ang inyong mga pagbati mabihag sa kalibutanong mga butang. Himoang mag-una ang inyong pangalagad. Hinumdumi, ang kalag sa katawhan nakasangon kaninyo; ug kon inyong hunahunaon ang inyong calling, magmauswagon kamo.

“… Gikinahanglan nga makadawat kamog pagpamatuod gikan sa langit para sa inyong kaugalingon. …

“… Lig-ona ang inyong pagtuo; iwakli ang inyong mga pagduha-duha, inyong mga sala, ug tanan ninyong kawalay pagtuo; ug walay makapugong kaninyo sa pagduol sa Dios. Dili mahingpit ug makompleto ang inyong ordinasyon hangtud nga ang Dios moaprubar kaninyo. Pareho ra sa mga nag-una kanato ang gikinahanglan aron mo-qualify kita; Ang Dios mao gihapon. Kon ang Manluluwas mipandong sa Iyang mga kamot sa Iyang mga disipulo, nganong dili man sa ulahing mga adlaw?

“… Kamo susama ra nga usa; pareho kamo nga naggunit sa mga yawe sa Gingharian sa tanang kanasuran. Gitawag kamo sa pagsangyaw sa Ebanghelyo sa Anak sa Dios ngadto sa kanasuran sa kalibutan; kabubut-on kini sa inyong langitnong Amahan, nga isangyaw ninyo ang Iyang Ebanghelyo sa tanang suok sa kalibutan ug sa mga isla sa kadagatan.

“Pagmadasigon sa pagluwas og mga kalag. Ang kalag sa usa ka tawo sama ra ka bililhon sa kalag sa uban. … Ang kaaway kanunayng nagtinguha sa kinabuhi sa mga sulugoon sa Dios; mao nga kinahanglan kamong mangandam sa tanang panahon sa pagsakripisyo sa inyong kinabuhi, kon gikinahanglan man kini sa Dios alang sa pagpadayon ug pagpalig-on sa Iyang kawsa. Ayaw pagbagulbol sa Dios. Magmainampuon sa kanunay; magmabinantayon sa kanunay. …

“… Kami karon moawhag kaninyo sa matinud-anong pagtuman sa inyong mga calling; kinahanglang walay magkulang nga paningkamot; buhaton gayud ninyo ang tanang butang; … ang tanang kanasuran nagkinahanglan kaninyo; gihiusa kamo sama sa Tulo ka mga Saksi; apan magkabulagay kamo ug magkita, ug magkita ug magkabulagay na usab, hangtud ang inyong mga ulo moputi na sa katuigan” (sa History of the Church, 2:195–96, 198; emphasis gidugang).

5.5

Ang mga Apostoles Gipadala aron Matukod ang Gingharian sa Dios sa tibuok Kalibutan

Gipasabut ni Presidente Gordon B. Hinckley (1910–2008) ang kahulugan sa pulong nga apostol:

“Ang pulong nga apostol, sa sinugdanan, sa tinuoray nagpasabut nga ‘ang usa nga gipadala.’ Kon kana nga depinisyon gisulti sa pag-ingon nga ‘usa nga gipadala uban ang pihong awtoridad ug responsibilidad,’ tukma kining maghulagway sa calling sama sa paghatag niini sa panahon nga ang Ginoo naglakaw dinhi sa yuta, ug sama nga kini gihatag sa atong panahon” (“Special Witnesses for Christ,” Ensign, Mayo 1984, 50; emphasis gidugang).

Mipasabut si Presidente Brigham Young (1801–77) nga ang pagtukod sa gingharian sa Dios sa tibuok kalibutan usa ka apostolikanhong katungdanan:

“Ang calling sa usa ka Apostol mao ang pagtukod sa Gingharian sa Dios sa tibuok kalibutan; ang Apostol mao ang naghupot sa mga yawe niini nga gahum, ug wala nay lain pa. Kon ang usa ka Apostol mopalambo sa iyang calling, siya ang pulong sa Ginoo ngadto sa iyang katawhan sa tanang higayon” (Discourses of Brigham Young, sel. John A. Widtsoe [1954], 139; emphasis gidugang; tan-awa usab sa Mga Pagtulun-an sa mga Presidente sa Simbahan: Brigham Young [1997], 162).

Si Elder L. Tom Perry (1922–2015) sa Korum sa Napulong Duha ka mga Apostoles nakabantay nga ang mga responsibilidad sa mga Apostoles modala kanila sa tibuok kalibutan:

“Usa ka Apostol karon nagpadayon nga ‘usa nga gipadala.’ Ang mga kondisyon nga [among] giatubang lahi gikan niadtong unang mga Kaigsoonan samtang [kami] mobiyahe aron tumanon ang [among] buluhaton. Ang paagi [namo] sa pagbiyahe ngadto sa tanang bahin sa yuta lahi kaayo gikan sa unang mga Kaigsoonan. Bisan pa niana, ang [among] buluhaton nagpabilin nga pareha niadtong gihatag sa Manluluwas sa dihang Iyang gisugo ang Iyang gitawag nga Napulog Duha sa ‘panglakaw kamo ug himoa ninyong mga tinun-an ang tanang kanasuran, sa pagbunyag kanila sa ngalan sa Amahan ug sa Anak ug sa Espiritu Santo: nga magtudlo kanila sa pagtuman sa tanan nga akong gisugo kaninyo: ug tan-awa, ako magauban kaninyo sa kanunay, hangtud sa katapusan sa kapanahunan’ (Mateo 28:19–20)” (“Unsa ang Usa ka Korum?” Ensign o Liahona, Nob. 2004, 24).

Si Elder Bruce C. Hafen sa Seventy misaysay sa tibuok kalibutan nga mga biyahe ni Elder Neal A. Maxwell (1926–2004) sa Korum sa Napulog Duha ka mga Apostoles sulod lang sa usa ka tuig:

“Bisan unsa pa ang pagkausab sa indibidwal nga mga assignment sa usa ka tuig, ang matag Apostol sa tibuok kalibutan nga Simbahan mibati sa panginahanglan sa tibuok kalibutan nga pangalagad, miatiman dili lang sa tanang programa sa Simbahan apan sa tanang kontinente usab ug tanang katawhan. Ikonsiderar, isip usa ka paghulagway, ang opisyal nga lista sa komperensya ug special meeting nga mga assignment ni Elder Maxwell sa tuig 1993 [tan-awa sa nag-uban nga tsart]. …

“Ubay-ubay gyud kining lahi-lahi nga dagkong assignments sa tibuok kalibutan sa usa ka tuig—lakip sa mainland China ug Mongolia. Sa gihapon kasagaran mao kini ang pattern nga gisunod sa Napulog Duha” (A Disciple’s Life: The Biography of Neal A. Maxwell [2002], 458–59).

Ang mga Assignment ni Elder Neal A. Maxwell sa Komperensya ug mga Special Meeting: 1993

Petsa	Lokasyon	Assignment
Enero 30	Manti, Utah	Stake Conference
Pebrero 13	Provo, Utah	Regional Conference (BYU stake sa mga minyo)
Pebrero 20	Salt Lake City	Pagpahinungod sa Cathedral of the Madeleine
Pebrero 27	El Paso, Texas	Stake Conference
Marso 6	Hermosillo, Mexico	Regional Conference
Marso 13	Toronto, Canada	Stake Conference
Abril 9–19	Mongolia ug Beijing, China	Ipahinungod ang Mongolia, bisitahon ang Chinese officials
Abril 25-26	San Diego, California	Pagpahinungod sa San Diego California Temple
Mayo 1	Ogden, Utah	Regional Conference
Mayo 22	Paris, France	Stake Conference
Hunyo 12	Twin Falls, Idaho	Regional Conference
Hunyo 19	Springville, Utah	I-reorganisar ang Stake
Hulyo 4	Provo, Utah	Freedom Festival
Agosto 22	Salt Lake City	Mag-tranining sa bag-ong mga stake president sa Utah North Area
Agosto 28	Nyssa, Oregon	Stake Conference
Septyembre 11	Montreal, Canada	Regional Conference
Oktubre 16	Raleigh, North Carolina	Regional Conference
Oktubre 23	Hattiesburg, Mississippi	Regional Conference
Nobyembre 6	Tokyo, Japan	Seminar sa mga Mission President, Area training
Nobyembre 13	Seoul, Korea	Area training
Nobyembre 17	Hong Kong	Area training
Nobyembre 20	Manila, Philippines	Seminar sa mga Mission President, Area training
Disyembre 4	Chicago, Illinois	Miting sa mga worker sa Chicago Temple

(Bruce C. Hafen, A Disciple’s Life: The Biography of Neal A. Maxwell [2002], 459.)

Ang Unang Kapangulohan usahay mo-assign og mga sakop sa Korum sa Napulog Duha ka mga Apostoles aron sa pagdumala sa buluhaton sa Simbahan sa mga piho nga bahin sa kalibutan sulod sa usa ka higayon. Bisan og ang paglambo sa teknolohiya sa transportasyon ug komunikasyon magtugot sa mga Apostoles nga makadumala niining mga rehiyon gikan sa Church headquarters sa Estados Unidos, sila, panagsa, mipuyo sa ubang nasud. Sama pananglit, si Elder Dallin H. Oaks ug Elder Jeffrey R. Holland miserbisyo isip mga Area President ug mipuyo sa Pilipinas ug sa Chile, sugod 2002 hangtud 2004, ug si Elder L. Tom Perry miserbisyo isip Area President samtang nagpuyo sa central Europe sugod 2004 hangtud 2005.

Si Presidente Gordon B. Hinckley (1910–2008) mitudlo bahin sa responsibilidad sa mga Apostoles sa pagpangalagad sa mga lumulupyo sa kalibutan:

“Ang pinakauna nilang responsibilidad mao gayud ang pagpalambo sa buhat sa Dios dinhi sa kalibutan. Kinahanglang maghunahuna sila sa kaayohan sa mga anak sa Amahan, miyembro man sa Simbahan ug dili miyembro sa Simbahan. Kinahanglan gayud silang mobuhat kutob sa ilang mahimo aron mahatag ang kahupayan niadtong nagbangutan, paghatag og kalig-on sa mga huyang, sa paghatag og kadasig sa mga nahisalaag, pakighigala sa walay higala, pag-atiman sa mga kabus, pagpanalangin sa masakiton, sa pagsaksi, dili gikan sa pagtuo apan sa piho nga kahibalo mahitungod sa Anak sa Dios, ilang Higala ug Agalon nga sila ang mga sulugoon” (“Special Witnesses for Christ,” 49–50).

Si Presidente Thomas S. Monson nga mibisita sa Tonga, 1965 Tungod sa daghang mga biyahe, ang mga Apostoles pamilyar na sa mga panginahanglan sa tibuok kalibutan nga Simbahan.

5.6

Ang mga Apostoles Dunay mga Yawe sa Pag-abli sa Pagsangyaw sa Ebanghelyo sa mga Kanasuran

Si Propeta Joseph Smith (1805–44) mitudlo nga ang Napulog Duha ka mga Apostoles “mohupot sa mga yawe niini nga pangalagad, sa pag-abli sa pultahan sa Gingharian sa langit ngadto sa tanang kanasuran, ug mosangyaw sa Ebanghelyo sa matag binuhat. Mao kini ang gahum, awtoridad, ug hiyas sa ilang pagka-apostol” (sa History of the Church, 2:200; tan-awa usab sa Mga Pagtulun-an sa mga Presidente sa Simbahan: Joseph Smith [2007], 165).

Ang Napulog Duha, ubos sa direksyon sa Unang Kapangulohan, “moabli sa mga pultahan” sa misyonaryo nga buhat pinaagi sa pakigsabut sa mga opisyal sa gobyerno ug ubang lider sa nasud. Gamiton usab nila ang gahum sa priesthood sa pagpahinungod ug pagpahinungod og balik sa mga yuta alang sa pagsangyaw sa ebanghelyo. Mipasabut si Presidente Ezra Taft Benson (1899–1994):

“Ang pagsangyaw sa ebanghelyo sa mga kanasuran sa kalibutan mahitabo lamang kon ang usa ka sakop sa Unang Kapangulohan o sa Napulog Duha mopahinungod sa yuta alang niana nga katuyoan. Ang Simbahan magtrabaho pinasubay sa mga balaod sa matag nasud sa pagsiguro nga ang gipangbuhat sa Simbahan dili masupak sa balaod o sa mga kustombre niana nga nasud. Dili kita magsangyaw diin ang balaod niana nga nasud nagdili” (“150th Year for Twelve: ‘Witnesses to All the World,’” Church News, Ene. 27, 1985, 3; emphasis gidugang).

Si Elder M. Russell Ballard sa Korum sa Napulog Duha ka mga Apostoles mipaambit sa kasinatian sa iyang apohan gamit ang apostolikanhong mga yawe sa pagpahinungod sa South America niadtong 1925:

“Si Elder Parley P. Pratt mibisita sa South America niadtong 1851. Gisulayan na usab ang misyonaryo nga buhat niadtong 1925. Sa adlaw sa Pasko niadong 1925, sa parke sa Tres de Febrero sa Buenos Aires, Argentina, ang akong apohan nga si Elder Melvin J. Ballard, mipahinungod sa South America alang sa pagsangyaw sa ebanghelyo. Mokutlo ko og gikan sa iyang pag-ampo nga pagpahinungod:

“‘Panalangini ang mga presidente, mga gobernador, ug ang mga nangulong opisyal sa mga nasud sa South America, nga mabination silang modawat kanamo ug motugot nga maablihan ang mga pultahan sa kaluwasan ngadto sa katawhan niining mga yutaa. …

“‘Ug karon, o Amahan, pinaagi sa awtoridad sa panalangin pagkapinili sa Presidente sa Simbahan, ug pinaagi sa awtoridad sa balaang pagkaapostol nga ania kanako, akong lisuon ang yawe, ug ablihan ang pultahan para sa pagsangyaw sa Ebanghelyo niining tanan nga kanasuran sa South America, ug mobadlong ug momando nga mapugngan ang matag gahum nga mosupak sa pagsangyaw sa Ebanghelyo niining mga yutaa; ug among panalanginan ug ipahinungod kini nga yuta para sa pagsangyaw sa imong Ebanghelyo. Ug kining tanan among gibuhat aron ang kaluwasan moabut sa tanang katawhan, ug ang imong ngalan tahuron ug himayaon niining bahina sa yuta sa Zion’ (Crusader for Righteousness [Salt Lake City: Bookcraft, 1966], p. 81; italics gidugang)” (“The Kingdom Rolls Forth in South America,” Ensign, Mayo 1986, 12).

5.7

Ang mga Desisyon sa Korum sa Napulog Duha ka mga Apostoles Gikauyunan Nilang Tanan

Ang Korum sa Napulog Duha ka mga Apostoles, 1984

Sa pagtudlo kon sa unsang paagi makab-ot ang panag-uyon sa nagdumala nga mga council sa Simbahan, si Presidente Boyd K. Packer (1924–2015) sa Korum sa Napulog Duha ka mga Apostoles mipasabut:

“Makasulti ko ninyo og maayo giunsa kamo sa pagdumala karon … pinaagi sa pagpasabut sa mga baruganan ug pamaagi nga among gisunod sa mga miting sa Unang Kapangulohan ug sa Korum sa Napulog Duha ka mga Apostoles. Kining mga paagiha mopanalipud sa buhat gikan sa mga kahuyang sa indibidwal nga tino nga anaa kanatong tanan.

“Kon ang usa ka butang moabut sa Unang Kapangulohan ug sa Korum sa Napulog Duha sa usa ka miting sa templo, ang usa nga tinoon diha dayon mao kon kini importante ba kaayo o dili. Ang usa o lahi kanamo makakita diha sa daw yanong proposal og mga isyu nga may talagsaon ug malungtarong importansya.

“Klaro gikan sa mga pagpadayag nga ang mga desisyon sa mga presiding korum ‘kinahanglan gayud nga pinaagi sa nagkauyon nga tingog sa mao. … Kon kini dili mao, ang ilang mga hukom dili angay sa sama nga mga panalangin’ (D&P 107:27, 29). Aron masiguro nga ingon gyud niana, ang mga butang nga mahinungdanon tagsa rang hukman diha sa miting diin kini gisugyot. Ug kon ang proposal usa ka bahin sa dako nga isyu, igong panahon ang gamiton para ‘magkauyon kaming tanan’ aron maklaro nga matag usa kanamo nakatarung ba sa pagsabut sa isyu o, sama sa kasagaran, may maayo kaayong pagbati mahitungod niini. …

“Lisud hunahunaon nga tuyuon pagpresentar ang usa ka isyu nga ang pag-aprubar mag-agad kon giunsa kini sa pagmaniobra agi sa mga channel, kon si kinsa ang nagpresentar niini, o kon si kinsa ang anaa o wala dihang gipresentar kini.

“Sa kasagaran usa o daghan kanamo wala diha sa mga regular nga miting. Nasayud kaming tanan nga ang buhat magpadayon gayud ug modawat sa desisyon sa among mga kaigsoonan. Hinoon, kon natun-an na ang usa ka butang sa usa ka sakop sa Korum sa mas detalyadong paagi kay sa uban o mas pamilyar siya niini tungod sa assignment, kasinatian, o personal nga interes, ilangay sa kasagaran kini nga hilisgutan hangtud nga maapil siya sa diskusyon.

“Ug sa kanunay, kon usa kanamo dili pa makasabut sa isyu o dili pa komportable niini, pugngan kini para sa sunod nga diskusyon.

“Nakahinumdom ko og mga okasyon dihang usa ka delegasyon gipadala sa ospital aron mahisgutan ngadto sa usa ka sakop sa Council nga nagkasakit ang pipila ka dinalian kaayong butang nga dili angayang malangay apan nagkinahanglan nianang ‘hiniusang pag-uyon.’ Usab, dunay mga okasyon, nga usa kanamo temporaryong mobiya sa miting sa pagtawag og usa sa among kauban nga naa sa abroad aron pangayoon ang iyang mga pagbati sa butang nga gihisgutan.

“May balaod kaming gisunod: Ang usa ka butang dili masulbad hangtud nga dunay minute entry [rekord sa miting] isip ebidensya nga ang tanang Kaigsoonan sa council nga nagkatigom (dili lang kay usa ra kanamo, dili lang usa ka komite) nagkahiusa sa pagbati. Ang pag-aprubar sa prinsipyo sa usa ka butang dili makonsiderar nga awtorisado nang buhaton hangtud ang minute entry magrekord sa naaprubahang buhatunon—sa kasagaran kon maaprubahan na ang minutes sa sunod nga miting.

“Usahay ang usa ka ulahing hunahuna makahimo sa usa kanamo nga dili komportable sa desisyon. Kana dili gayud ibale-wala. Dili mahunahuna nga kana nga pagkadili komportable sa pagkatinuod dili Espiritu sa Pagpadayag.

“Ingon niana ang among function—sa nagkatigom nga council. Naghatag kana og kasiguroan sa Simbahan ug taas nga level sa kahupayan sa matag usa kanamo kinsa may tulubagon sa personal nga paagi. Ubos sa plano, ang mga tawo nga may ordinaryong kapasidad mahimong giyahan pinaagi sa tambag ug inspirasyon nga matuman ang ekstraordinaryong mga butang” (“I Say unto You, Be One” [Brigham Young University devotional, Peb. 12, 1991], 3–4, speeches.byu.edu; empasis).

Si Presidente Howard W. Hunter, Elder Jeffrey R. Holland, ug Presidente James E. Faust nga nalingaw sa usa ka panahon nga panagkuyog

Si Presidente James E. Faust (1920–2007) sa Unang Kapangulohan mipasabut nganong ang panagkauyon importante kaayo:

“Kini nga panginahanglan sa panagkauyon makatabang sa pagkontrolar sa pagpihig ug personal nga dili maayong mga reaksyon. Magsiguro kini nga ang Dios nagdumala pinaagi sa Espiritu, dili sigun sa mayoriya sa tawo o gumikan sa kompromiso. Magsiguro kini nga ang pinakamaayong kaalam ug kasinatian magtutok sa isyu sa dili pa madawat ang halawom, dili malalis nga mga impresyon sa pinadayag nga direksyon. Manalipod kini batok sa mga tawhanong kahuyang” (“Continuous Revelation,” Ensign, Nob. 1989, 10; emphasis gidugang).

Ang mga tawo nga nagserbisyo sa Korum sa Napulog Duha mga tawo nga may lig-ong mga opinyon ug managlahing kaagi. Bisan pa, namatikdan ni Presidente Gordon B. Hinckley (1910–2008) nga walay panagbingkil o mga pagbati sa pagdumot tali sa kaigsoonan:

“Ang bisan unsang dagkong pangutana sa polisiya, mga pamaagi, mga programa, o doktrina gihunahuna nga sinigurado ug sa mainampuong paagi sa Unang Kapangulohan ug sa Napulog Duha uban sa pagtambayayong. Kining duha ka korum, ang Korum sa Unang Kapangulohan ug ang Korum sa Napulog Duha, nga magmiting, uban sa matag tawo nga dunay bug-os nga kagawasan sa pagpahayag sa iyang kaugalingon, mohunahuna sa matag importanting pangutana. …

“Ug karon akong kutloon … gikan sa pulong sa Ginoo: ‘Ug sa matag hukom nga mahimo sa bisan hain niini nga mga korum kinahanglan gayud pinaagi sa nagkauyon nga tingog sa mao; nga mao, nga ang matag sakop diha sa tagsa-tagsa ka korum kinahanglan gayud nga mouyon sa ilang mga paghukom, aron sa paghimo sa ilang mga hukom nga sama og gahum o kalig-on sa usag usa’ (D&P 107:27).

“Walay desisyon nga magagikan sa mga deliberasyon sa Unang Kapangulohan ug sa Napulog Duha nga walay hingpit nga panag-uyon sa tanang may kalabutan. Sugod sa sinugdanan sa pagkonsiderar og mga butang, duna tingali mga kalainan sa opinyon. Ingon gayud niana. Kining mga tawhana naggikan sa managlahing kaagi. Mga tawo kini nga maghunahuna sa ilang kaugalingon. Apan sa dili pa mosangko sa final nga desisyon, moabut ang panagkauyon sa hunahuna ug tingog.

“Malauman kini kon ang napadayag nga pulong sa Ginoo gisunod. Usab mokutlo ko gikan sa pinadayag:

“Ang mga hukom niining mao nga mga korum, o bisan hain kanila, kinahanglan nga buhaton sa tanan nga pagkamatarung, diha sa pagkabalaan, ug pagkamapainubsanon sa kasingkasing, pagkamaaghup ug pagkamainantuson, ug diha sa hugot nga pagtuo, ug hiyas, ug kahibalo, pagkamapugnganon, pailub, pagkadiosnon, inigsoon nga pagkamabination ug gugma nga putli;

“Tungod kay ang saad mao, kon kini nga mga butang buhong diha kanila sila dili magkulang sa kasayuran sa Ginoo’ (D&P 107:30–31).

“Modugang ko pinaagi sa personal nga pagpamatuod nga sa bayente singko ka tuig nakong pagserbisyo isip sakop sa Konseho sa Napulog Duha ug sa hapit trese ka tuig nga nagserbisyo ko sa Unang Kapangulohan, wala gayud mahitabo nga wala sunda kining paagiha sa tanang dagkong desisyon nga gihimo. May nakita kong gipresentar nga panaglahi sa opinyon niini nga mga deliberasyon. Gikan niining mao gayud nga proseso sa mga tawo nga mipagawas sa ilang mga hunahuna anaa ang paghashas sa mga ideya ug mga konsepto. Apan wala gayud ako makabantay nga dunay seryusong panaglalis o personal nga pagdumot tali sa akong Kaigsoonan. Hinoon, akong namatikdan ang matahum ug talagsaong butang—ang pagkahiusa, ubos sa direktang impluwensya sa Espiritu Santo ug ubos sa gahum sa pagpadayag, mahitungod sa managsukwahing panan-aw hangtud nga nakab-ot ang bug-os nga paghiusa ug hingpit nga panag-uyon. Niana lamang himoon ang pag-implementar. Kana, akong ipamatuod nga nagrepresentar sa espiritu sa pagpadayag nga gibalik-balik sa pagpakita sa paggiya niini nga buluhaton sa Ginoo” (“God Is at the Helm,” Ensign, Mayo 1994, 54, 59; emphasis added).

Mga Punto nga Pamalandungan

• Sa unsang mga paagi ang mga responsibilidad sa usa ka Apostol lahi kay sa ubang mga awtoridad sa Simbahan?

• Unsang mga yawe sa priesthood ang gihuptan sa mga sakop sa Korum sa Napulog Duha ka mga Apostoles? Sa unsang paagi ang priesthood nakapanalangin kaninyo ug sa inyong pamilya?

• Sa unsang paagi ang mga Apostoles makatabang nato nga dili kita “igatuyatuya ug igaliyokliyok sa tanang hangin sa tuloohan, pinaagi sa lipat-lipat sa mga tawo nga batid sa pagpangmugnag kasaypanan”? (tan-awa sa Mga Taga-Efeso 4:11–14).

• Unsang responsibilidad ang anaa sa mga miyembro sa Simbahan aron mahiusa sa pagsuporta sa Napulog Duha ka mga Apostoles ug sa Unang Kapangulohan? Unsang mga obligasyon ang anaa kanato kon makita nato ang atong kaugalingon nga dili hingpit nga nahiuyon kanila?

Gisugyot nga mga Assignment

• Sa usa ka papel o sa journal, i-outline og mubo ang calling ug mga responsibilidad sa Korum sa Napulog Duha ka mga Apostoles sigun sa gitudlo niini nga leksyon.

• Sa usa ka papel o sa journal, irekord ang imong mga kasinatian dihang ang mga pulong sa mga Apostoles nakahatag nimo og kahupayan, direksyon, o espritwal nga panglantaw.

• Sa moabut nga family home evening o diskusyon, ipaambit unsay imong nakat-unan samtang gitun-an kini nga leksyon.