Pasiuna

Sa Lawak-Tigumanan sa mga Propeta nga nahimutang sa Conference Center sa Salt Lake City, Utah, ang kinulit nga mga representasyon sa mga propeta niini nga dispensasyon mao ang mapamahayagong pahinumdom nga ang padayong pagpadayag padayong madawat.

Si Presidente James E. Faust (1920–2007) sa Unang Kapangulohan mipasabut sa tahas sa mga propeta ug sa panginahanglan sa pagpadayag nga ilang nadawat:

“Ang mga propeta, manalagna, ug tigpadayag aduna ug padayon pang adunay responsibilidad ug pribilehiyo sa pagdawat ug pagpamahayag sa pulong sa Dios para sa kalibutan. …

“… Mao kini ang mapanagnaong mga orakulo nga naminaw og mga mensahe gikan sa langit sulod sa daghang mga siglo, uban sa responsibilidad sa paghatud sa pulong sa Ginoo ngadto sa uban. …

“Kini nga Simbahan padayong nanginahanglan sa giya gikan sa pangulo niini, ang Ginoo ug Manluluwas, si Jesukristo. Gitudlo kini og maayo ni Presidente George Q. Cannon, [samtang nagserbisyo] sa Unang Kapangulohan: ‘Aduna kitay Biblia, Basahon ni Mormon ug ang Basahon sa Doktrina ug mga Pakigsaad; apan kining tanan nga basahon, kon wala ang buhing mga orakulo ug padayong dagayday sa pagpadayag gikan sa Ginoo, dili makagiya ni bisan kinsang tawhana ngadto sa Celestial nga Gingharian sa Dios’ [Gospel Truth: Discourses and Writings of President George Q. Cannon, 2 vols., sel. Jerreld L. Newquist (1974), 1:323]. …

“Ang Pagpadayag kinahanglanon sa pag-establisar niini nga Simbahan. Ang pagpadayag midala niini gikan sa ubos nga sinugdanan hangtud sa kasamtangang dalan niini. Ang pagpadayag miabut sama sa nagdagayday, buhi nga tubig. Ang padayon nga pagpadayag modala niini hangtud sa katapusang mga adlaw. Apan sama sa gisulti kanato ni Presidente [J. Reuben] Clark, wala kita magkinahanglan og dugang pa o lahi nga mga propeta. Nagkinahanglan kita og mas daghang tawo nga dunay ‘makabati nga dalunggan’ (sa Conference Report, Okt. 1948, 82)” (James E. Faust, “Continuing Revelation,” Ensign, Ago. 1996, 2, 4, 6–7).

Karon, sama sa tunga-tungang kapanahunan, ang pundasyon sa Simbahan mao ang mga apostoles ug mga propeta (tan-awa sa Mga Taga-Efeso 2:20) ug ang pagpadayag nga ilang nadawat (tan-awa sa Amos 3:7; Mateo 16:16–18). Ang Ginoo mopadayag sa Iyang kabubut-on pinaagi sa Iyang mga sulugoong propeta ug namahayag, “ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).

Ang Katuyoan Niini nga Manwal

Ang imong pagpamatuod malig-on samtang magtuon ka sa mga pulong sa buhing mga propeta.

Ang katuyoan sa Manwal sa Estudyante sa Mga Pagtulun-an sa Buhing mga Propeta mao ang pagtabang nimo nga malig-on ang imong pagpamatuod sa buhing mga propeta ug sa ilang mga pagtulun-an. Naghisgot kini sa atong panginahanglan og buhing mga propeta, sa tahas sa Presidente sa Simbahan, sa balaang han-ay sa pagpuli sa Kapangulohan, sa Korum sa Unang Kapangulohan ug sa Korum sa Napulog Duha ka mga Apostoles, ug sa kaimportante sa kinatibuk-ang mga komperensya.

Si Presidente Harold B. Lee (1899–1973) mitudlo:

“Dili igo alang kanato isip mga Santos sa Ulahing mga Adlaw sa pagsunod sa atong mga lider ug sa pagdawat sa ilang tambag, apan kita adunay mas dako nga obligasyon sa pag-angkon alang sa atong mga kaugalingon sa dili matarug nga pagpamatuod sa balaan nga pagkatudlo niini nga mga tawo ug sa saksi nga unsay ilang gisulti kanato mao ang kabubut-on sa atong Langitnong Amahan” (Harold B. Lee, sa Conference Report, Okt. 1950, 130).

Usa ka saksi sa balaang pagkapili sa buhing mga propeta gisaad sa matag usa kanato kon atong tun-an ang tambag sa mga Kaigsoonan ug modesisyon sa pagsuporta kanila pinaagi sa atong kamasulundon. Kini nga manwal makatabang kanimo sa imong pagtuon sa buhing mga propeta.

Giunsa Pag-organisar Kini nga Manwal

Ang matag kapitulo niini nga manwal sa estudyante dunay upat ka bahin: “Pasiuna,” “Komentaryo,” “Mga Punto nga Pamalandungan” ug “Gisugyot nga mga Assignment.”

Pasiuna

Ang matag kapitulo nagsugod og usa ka mubong pasiuna. Makatabang kini kanimo nga makatutok sa sentro nga hilisgutan sa kapitulo.

Komentaryo

Ang mga kasulatan ug pulong sa mga propeta, mga apostoles, ug ubang mga General Authority sa “Komentaryo” nga seksyon nagpasabut ug nagklaro sa mga doktrina ug mga baruganan nga may kalabutan sa sentro nga hilisgutan sa kapitulo. Ang mainampingong pagbasa sa komentaryo makatabang nga imong masabtan ang panginahanglan ug tahas sa mga propeta sa padayong nagkausab nga kalibutan.

Mga Punto nga Pamalandungan

Ang seksyon nga “Punto nga Pamalandungan” makatabang nga imong mapamalandungan ang unsay imong nakat-unan.

Si Presidente Russell M. Nelson sa Korum sa Napulog Duha ka mga Apostoles mimatuod nga ang pagpamalandong magdala og bililhong mga sangputanan:

“Samtang mamalandong ug mag-ampo ka mahitungod sa doktrinal nga mga baruganan, ang Espiritu Santo mosulti diha sa imong hunahuna ug imong kasingkasing. … Bag-ong mga panglantaw moabut ug ang mga baruganan nga haum sa imong sitwasyon motuhop sa imong kasingkasing” (Russell M. Nelson, “Living by Scriptural Guidance,” Ensign, Nob. 2000, 18).

Gisugyot nga mga Assignment

Sa konklusyon sa matag kapitulo mao ang mga assignment nga mag-awhag og personal nga application. Palihug timan-i nga kini nga mga assignment mao ang mga sugyot nga mahimong sagupon sumala sa indibidwal nimong panginahanglan ug direksyon gikan sa Espiritu Santo. Kon enrolled ka sa institute sa kurso nga Mga Pagtulun-an sa Buhing mga Propeta (Religion 333), mahimong ilakip sa imong teacher ang pipila niining mga assignment diha sa imong kurso. Ang paggahin og panahon sa paghimo niining mga assignment maghatag kanimo og dugang nga mga oportunidad nga matudloan sa Espiritu Santo.

Pahinumdom: Aron epektibong magamit ang mga seksyon nga “Mga Punto nga Pamalandungan” ug “Gisugyot nga mga Assignment”, mahimo kang mogamit og usa ka study journal o notebook sa pagrekord sa mga pangutana, panghunahuna, mga tumong, ug mga impresyon gikan sa imong gitun-an.

Si Elder Richard G. Scott (1928–2015) sa Korum sa Napulog Duha ka mga Apostoles miawhag kanato sa pagsulat sa mga impresyon gikan sa Espiritu:

“Pinaagi sa pabalik-balik nga proseso sa mga pagbati sa impresyon, ang pagrekord niini, ug pagsunod niini ang tawo makakat-on sa pagsalig sa direksyon sa Espiritu labaw kay sa komunikasyon pinaagi sa lima ka pamalatian [senses]” (“Helping Others to Be Spiritually Led” [Church Educational System symposium mahitungod sa Doktrina ug mga Pakigsaad ug sa Church History, Aug. 11, 1998], 3).

Impormasyon para Niadtong may mga Kakulian sa Panglawas

Kon maglisud ka og gamit niini nga manwal gumikan sa usa ka kakulian sa panglawas, palihug kontaka ang imong instruktor para sa dugang nga mga kapanguhaan.