Kapitulo 3

Kapitulo 3: Pagpuli sa Kapangulohan

Pasiuna

Ang pagpuli sa Kapangulohan sa Simbahan giestablisar sa Ginoo. Ang Simbahan wala gayud pasagdi nga walay dinasig nga pagpangulo, ug walay rason sa pagbana-bana o kontrobersiya kon si kinsa ang mosunod nga Presidente sa Simbahan. Gipasabut ni Presidente Harold B. Lee (1899–1973) nga: “Nasayud [ang Ginoo] si kinsa ang gusto niyang mangulo niini nga simbahan, ug dili gayud siya masayop. Dili sulagma ang paghimo sa Ginoo og mga butang. Wala pa gayud siya makahimo og bisan unsa sa sulagmang paagi” (sa Conference Report, Okt. 1970, 153; o Improvement Era, Dis. 1970, 127). Gitudlo ni Presidente Ezra Taft Benson (1899–1994) nga “Ang Dios nahibalo sa tanang butang, sa katapusan gikan sa sinugdanan, ug walay tawong sulagma nga mahimong presidente sa simbahan ni Jesukristo, o wala tuyoa nga magpabilin diha, o wala damhang mopauli sa langitnong panimalay” (“Jesus Christ—Gifts and Expectations,” New Era, Mayo 1975, 16–17).

Pinaagi ni Propeta Joseph Smith (1805–44), gipamahayag sa Dios nga Siya “mohatag ngadto sa matinud-anon og pagtulun-an ngadto sa lain nga pagtulun-an, lagda ngadto sa lain nga lagda” (D&P 98:12; tan-awa usab sa D&P 42:61; 128:21). Ang proseso sa anam-anam nga pagpadayag sa doktrina ug pamaagi makita sa dinasig nga pag-ugmad sa mga baruganan alang sa pagpuli sa Kapangulohan sa Simbahan.

Samtang tun-an nimo kini nga kapitulo, pamalandungi sa unsang paagi ang proseso sa pagtawag og bag-ong Presidente sa Simbahan lahi sa politikal nga proseso sa pagpili og mga opisyal sa gobyerno. Ang pagsabut sa unsang paagi mopili ang Ginoo og bag-ong Presidente sa Simbahan mopalambo sa imong pagsalig sa kasamtangan nga Presidente sa Simbahan.

Komentaryo

3.1

Ang Assistant President sa Simbahan

“Niadtong 5 sa Disyembre 1834 si Propeta Joseph Smith miorden ni Oliver Cowdery nga Assistant President sa Simbahan [tan-awa sa History of the Church, 2:176]. Kauban na siya sa Propeta dihang ang Aaronic ug Melchizedek Priesthood gipahiuli. Dihang giorganisar ang Simbahan ni Jesukristo niadtong 1830, si Oliver maoy ‘ikaduhang elder’ nga nagsunod kang Joseph sa awtoridad [tan-awa sa D&P 20:2–3]. Sa ingon niini, sa matag higayon nga gipahiuli ang awtoridad ug mga yawe sa priesthood, si Oliver kauban ni Propeta Joseph. ‘Gikinahanglan kadto sumala sa balaanong balaod sa pagsaksi nga si Joseph Smith dunay kompanyon nga naghupot niana nga mga yawe’ [Joseph Fielding Smith, Doctrines of Salvation, comp. Bruce R. McConkie (1954), 1:211]. Dili lang kay moabag si Oliver Cowdery kang Joseph Smith sa pagpangulo sa Simbahan, apan kinahanglan usab nga kauban siya sa Propeta isip ikaduhang saksi sa Pagpahiuli [tan-awa sa D&P 6:28; tan-awa usab sa 2 Mga Taga-Corinto 13:1]. Sa tuig 1838 si Oliver Cowdery nawad-an sa iyang katungdanan sa pagka-Assistant President tungod sa apostasiya ug pagka-excommunicate, apan niadtong 1841 gitawag sa Ginoo si Hyrum Smith nga mopuli niini nga katungdanan (tan-awa sa D&P 124:94–96). Ang Presidente ug ang Assistant President, o ang una ug ikaduhang mga saksi, mosilyo sa ilang pagpamatuod pinaagi sa ilang dugo sa Carthage Jail” (Church History in the Fulness of Times, 2nd ed. [Church Educational System manual, 2003], 153; emphasis gidugang).

Gihulagway ni Presidente Joseph Fielding Smith (1876–1972) sa unsang paagi ang balaod sa pagsaksi (tan-awa sa 2 Mga Taga-Corinto 13:1) natuman ni Oliver Cowdery nga anaa kanunay sa matag higayon nga gipahiuli ang mga yawe sa priesthood:

“Gitawag sa Ginoo si Oliver Cowdery isip ikaduhang saksi nga mangulo niini nga dispensasyon nga nag-abag sa Propeta sa paghupot sa mga yawe. Ang mga rekord nagpahibalo kanato nga sa matag higayon nga ang Propeta nakadawat og awtoridad ug mga yawe sa priesthood gikan sa kalangitan, kauban si Oliver Cowdery sa Propeta sa pagtugyan niadtong mga gahum. Kon padayon pa nga nagmatinud-anon si Oliver Cowdery ug mas dugay nga nabuhi kay sa Propeta ubos niadtong mga kahimtang, siya unta ang mopuli isip Presidente sa Simbahan pinaagi sa katungod niining balaan nga calling” (Doctrines of Salvation, comp. Bruce R. McConkie [1954], 1:213; emphasis gidugang). Niadtong Enero 19, 1841, tungod kay wala magpabiling matinud-anon si Oliver, “gisugo sa Ginoo si Joseph Smith sa pag-orden ni Hyrum Smith ug pagtugyan kaniya sa tanang yawe, awtoridad, ug mga pribelihiyo nga didto sa ulo ni Oliver Cowdery, ug gihimo siyang ‘Second President’ sa Simbahan” (Doctrines of Salvation, 1:220).

Joseph and Hyrum Smith

Si Presidente Brigham Young (1801–77) nakabantay:

“Kon wala pa mamatay si Hyrum wala unta siya sa posisyon taliwala ni Joseph ug sa Napulog Duha apan sa posisyon unta puli kang Joseph.—May tawo bang giorden si Joseph puli sa iyang dapit? Oo. Kinsa man? Si Hyrum, apan, namatay si Hyrum nga usa ka martir una ni Joseph. Kon wala pa mamatay si Hyrum siya unta ang puli ni Joseph” (“Conference Minutes,” Times and Seasons, Okt. 15, 1844, 683).

Mipasabut si Presidente Joseph Fielding Smith (1876–1972) nganong wala na kitay Assistant President sa Simbahan:

“Usahay ipangutana kini: Kon si Oliver Cowdery giorden nga maghupot sa mga yawe kauban sa Propeta, ug sa iyang pagkawala tungod sa kalapasan, kini nga awtoridad gitugyan ngadto kang Hyrum Smith, nan nganong sa Simbahan karon wala man ang susama nga paagi sa mga butang, ug ang Assistant President ingon man ang duha ka magtatambag sa Unang Kapangulohan?

“Yano ra ang tubag niini. Tungod kay ang lahi nga kahimtang sa panginahanglan og duha ka saksi aron maestablisar ang buhat, wala na kinahanglana human maestablisar ang buhat. Si Joseph ug Hyrum Smith nagbarug nga pangulo niini nga dispensasyon, silang duha naghupot sa mga yawe, isip ang duha ka saksi nga gikinahanglan sa katumanan sa balaod kay gipahiluna kini sa atong Ginoo agig tubag sa mga Judeo [tan-awa sa Mateo 18:16]. Tungod kay ang ebanghelyo dili na ipahiuli pag-usab wala nay higayon nga kining paagiha mobalik. Tanan kita mohinumdom sa duha ka espesyal nga saksi, gitawag nga mosaksi sa hingpit nga pag-uyon sa balaang balaod” (Doctrines of Salvation, 1:222; emphasis gidugang).

3.2

Korum sa Napulog Duha ka mga Apostoles

“Usa sa pinakaimportanting hitabo sa pagpahiuli sa simbahan sa Manluluwas mao ang pagporma sa Korum sa Napulog Duha ka mga Apostoles. Bisan niadtong wala pa maorganisar ang Simbahan, napanglantawan na sa mga miyembro kining mahinungdanong lakang. … [Niadtong Hunyo 1829] usa ka pagpadayag ang nagsugo kang Oliver Cowdery ug ni David Whitmer sa pagpangita og napulog duha nga ‘gitawag sa pagpanlakaw ngadto sa tibuok kalibutan sa pagsangyaw sa akong ebanghelyo ngadto sa matag linalang’ [tan-awa sa D&P 18:26–37]. Sa wala madugay gitawag usab si Martin Harris sa pagtabang niini nga pagpili. Nagpasabut kini nga ang tulo ka mga saksi sa Basahon ni Mormon, ubos sa direksyon ug pagtugot sa Unang Kapangulohan, mopili sa Napulog Duha ka mga Apostoles isip espesyal nga mga saksi sa Manluluwas niini nga dispensasyon” (Church History in the Fulness of Times, 153–54). Kini nga pagpili gihimo atol sa espesyal nga komperensya niadtong Pebrero 14, 1835.

“Sulod sa daghang katuigan ang Ginoo … mainampingong miandam sa Korum sa Napulog Duha ka mga Apostoles aron mapasa ang pagpangulo sa Simbahan. Niadtong 1835, dihang unang gitawag ang Napulog Duha, may restriksyon ang ilang mga katungdanan sa mga dapit sa gawas sa mga naorganisar nga stake, apan sa kadugayan gipalapdan ang ilang mga responsibilidad nga naglakip sa awtoridad sa tibuok kamiyembrohan sa Simbahan. …

Si Propeta Joseph Smith nagtudlo sa Napulog Duha

© 1998 Paul Mann

“Ang misyon sa Napulog Duha ngadto sa Great Britain nagbugkos kanila ngadto sa hiniusang korum ubos sa direksyon ni Brigham Young. Dihang namalik na sila sa Amerika, gidugangan ni Propeta Joseph ang ilang mga responsiblidad sa temporal ug sa mga eklesyastikal nga kalihokan. … Ang Napulog Duha nalakip sa unang nakadawat og instruksyon gikan ni Joseph Smith mahitungod sa pagpangasawa og daghan ug sa mga ordinansa sa templo. Ang mga sakop sa Napulog Duha gihatagan og responsibiliad sa pagdumala sa Church publishing, gidumala nila ang pagtawag, pag-assign, ug paghatag og instruksyon sa mga misyonaryo, nag-preside sila og mga komperensya sa field ug sa Nauvoo, ug gidumala nila ang mga branch sa gawas sa nasud.

“Labaw sa tanan, si Joseph Smith nga mibati nga siya mamatay sa dili madugay, miatiman gayud og maayo atol sa katapusang pito ka bulan sa iyang kinabuhi sa mainampingong pag-andam sa Napulog Duha. Nakigtagbo siya sa korum hapit matag adlaw sa paghatag nila og instruksyon ug paghatag nila og dugang nga mga responsibilidad. Sa usa ka dili ordinaryo nga council meeting sa hinapos sa Marso 1844, sinsero niyang gisultihan ang Napulog Duha nga mahimo na siyang mobiya tungod kay nahuman na ang iyang buhat ug ang pundasyon napahimutang na aron ang gingharian sa Dios mapalambo” (Church History in the Fulness of Times, 293–94).

Si Presidente Wilford Woodruff (1807–98) sakop sa Korum sa Napulog Duha ka mga Apostoles niadtong 1844. Nahinumduman niya ang mga instruksyon ni Joseph Smith sa Napulog Duha ka mga Apostoles nianang higayuna:

“Usa ko ka buhing saksi sa pagpamatuod nga gihatag ni [Joseph Smith] sa Napulog Duha ka mga Apostoles dihang tanan kami nakadawat sa among mga endowment gikan sa iyang mga kamot. Nakahinumdom ako sa katapusan nga pagpamulong nga sukad gihatag niya diri kanamo sa wala pa siya mamatay. Gihimo kadto sa wala pa magsugod ang among misyon sa Sidlakan. Nagbarug siya sulod sa mga tulo ka oras. Ang kwarto napuno og ingon sa nagaut-ut nga kalayo, ang iyang nawong tin-aw nga masanag, ug siya gisul-uban sa gahum sa Dios. Siya mipasabut kanamo sa among mga katungdanan. Siya mipasabut kanamo sa kahingpitan niining mahinungdanon nga buluhaton sa Dios; ug sa iyang pagpamulong kanamo miingon siya; ‘Akong gisilyo dinhi sa akong ulo ang matag yawe, matag gahum, matag baruganan sa kinabuhi ug kaluwasan nga sukad gihatag sa Dios ngadto sa tawo kinsa nakapuyo sa ibabaw niini nga yuta. Ug kini nga mga baruganan ug kini nga Priesthood ug gahum nahilakip niining mahinungdanon ug katapusang dispensasyon diin ang Dios sa Kalangitan miandam sa Iyang kamot sa pag-establisar dinhi sa kalibutan. ‘Karon,’ miingon siya ngadto sa Napulog Duha, ‘Akong gisilyo diha sa inyong mga ulo ang matag yawe, matag gahum, ug ang matag baruganan diin ang Ginoo misilyo diri sa akong ulo.’ …

“Human namulong ngari kanamo sa ingon niini nga paagi miingon siya; ‘Sultihan ko kamo, ang palas-anon sa gingharian anaa na karon sa inyong mga abaga; ilibut ninyo kini sa tibuok kalibutan’” (Deseret Weekly, Mar. 19, 1892, 406; tan-awa usab sa Teachings of Presidents of the Church: Wilford Woodruff [2004], xxxv).

Sa wala pa siya mamatay, giandam ni Propeta Joseph Smith ang mga Apostoles sa pagdumala sa Simbahan. Nagsiguro kana nga ang buhat sa Ginoo magpadayon ubos sa direksyon niadtong adunay awtoridad.

Si Elder Parley P. Pratt (1807–57), kinsa sakop usab sa Korum sa Napulong Duha ka mga Apostoles kaniadto, mipasabut nga sa sama nga miting si Propeta Joseph Smith “mipadayon sa pagtugyan kang elder [Brigham] Young, Presidente sa Napulog Duha, sa mga yawe sa gahum sa pag-seal. …

“Kining katapusan nga yawe sa priesthood mao ang pinakasagrado sa tanan, ug ekslusibo kini mahitungod sa unang kapangulohan sa simbahan” (“Proclamation,” Millennial Star, Mar. 1845, 151).

Ang Korum sa Napulog Duha ka mga Apostoles naghupot sa tanang yawe, gahum, ug awtoridad sa priesthood nga gikinahanglan sa paggiya sa Simbahan (tan-awa sa D&P 107:23–24; 112:14–15). Ang matag sakop sa Korum sa Napulog Duha ka mga Apostoles gihatagan sa mga yawe sa priesthood atol sa iyang pagka-orden nga usa ka Apostol ug sa pagtawag ngadto sa Korum. Ang Presidente lang sa Simbahan ang dunay awtoridad nga makagamit sa tanang yawe sa priesthood, apan sigun sa gipasabut ni Presidente Gordon B. Hinckley (1910–2008), ang matag sakop sa Korum sa Napulog Duha “naghupot sa mga yawe niini nga dispensasyon alang sa mga posibilidad nga moabut. Dala niana nga balaang posibilidad mao ang kasiguroan sa dili maputol nga pagpangulo sa Simbahan” (“He Slumbers Not, nor Sleeps,” Ensign, Mayo 1983, 6; empasis gidugang).

3.3

Gipamatud-an sa Ginoo ngadto sa mga Santos Nga si Brigham Young ang Mopuli ni Joseph Smith

Gatusan ka mga Santos ang didto dihang si Brigham Young nakita nga daw si Joseph Smith. Kini nga manipestasyon tin-aw nga nagtimaan nga anaa kang Brigham Young ang mga yawe sa pagpangulo sa Simbahan.

Human mamatay si Propeta Joseph Smith, dunay pagkalibug kon si kinsa ang mangulo sa Simbahan. Si Sidney Rigdon, nga sakop sa Unang Kapangulohan, maoy usa sa nangangkon nga mopuli ni Joseph. Niadtong Agosto 8, 1844, dayag nga gipakita sa Ginoo sa mga Santos nga si Brigham Young, Presidente sa Korum sa Napulog Duha ka mga Apostoles, gipili nga maoy bag-ong propeta sa Simbahan.

Si Presidente George Q. Cannon (1827–1901) nga sa wala madugay miserbisyo sa Unang Kapangulohan, mihulagway niining milagruso nga manipestasyon gikan sa Ginoo:

“Human sa pagkamatay sa Propeta sa wala madugay ang Napulog Duha namalik sa Nauvoo, ug nahibalo sa mga tinguha ni Sidney Rigdon. Nangangkon siya nga nagkinahanglan og magbalantay ang Simbahan, ug nga siya ang magbalantay. Mipili na siya og adlaw nga himoon ang pagpili og magbalantay, ug siyempre, didto siya sa miting nga gipahigayon ra sa gawas. Kusog kaayo ang huros sa hangin padulong sa stand niadtong panahona mao nga nag-ayum-ayum sila og stand gamit ang karwahe, nga gipasalta sa luyo nga bahin sa kongregasyon, ug diin siya, [William] Marks, ug uban pa ang didto. Misulay siya sa pagpamulong, apan naulaw lang hinoon kaayo. Usa siya ka tigdiskurso sa Simbahan apan ning higayona napakyas siya sa iyang diskurso, ug ang iyang pakigpulong dili maayo ug dili gayud madanihon. Sa maong higayon si Presidente Young ug pipila sa iyang kaigsoonan miadto ug miduol sa stand. Niining higayuna ang hangin mihunong na sa paghuros. Human nakapamulong si Sidney Rigdon, si Presidente Young mibarug ug namulong sa kongregasyon, nga ang kongregasyon miliso sa pag-atubang ug pagpaminaw kaniya, gitalikdan ang karwahe nga gigamit ni Sidney” (Deseret News, Peb. 21, 1883, 67).

“Primero kadto nga tingog [ni Brigham] nga nadungog sa mga tawo sukad miadto siya sa sidlakan para sa iyang misyon, ug ang epekto niini ngadto kanila labihan ka talagsaon. Kadtong nanambong niana nga okasyon dili gayud makalimot sa impresyon nga miabut kanila! Kon si Joseph nabuhi gikan sa pagkamatay ug namulong pag-usab kanila, ang hitabo dili unta kaayo hilabihan nga ikatingala kay sa nahitabo ngadto sa daghan nga mitambong niadto nga miting. Tingog gayud kadto ni Joseph mismo; ug dili lang kadto nga tingog ni Joseph ang nadungog; apan daw sa mga panan-aw sa mga tawo ang tawo nga nagbarug sa ilang atubangan mao gayud si Joseph. Wala nay laing nadungog nga talagsaon ug milagrusong hitabo kay sa nahitabo nianang adlawa sa presensya niana nga kongregasyon. Ang Ginoo mihatag sa Iyang katawhan og usa ka pagpamatuod diin walay luna nga gibilin alang sa pagduha-duha kon si kinsa ang tawo nga Iyang gipili nga mangulo kanila. Nakita nila ug nadungog sa ilang natural nga mga mata ug dalunggan, ug dayon ang mga pulong nga gilitok miabut, inubanan sa makadani nga gahum sa Dios, ngadto sa ilang kasingkasing, ug napuno sila sa Espiritu ug hilabihang kalipay. Tingali dunay mga kasubo, ug sa ubang kasingkasing, dunay pagduha-duha ug kawalay kasiguroan; apan karon klaro na sa tanan nga ania ang tawo nga gitugyanan sa Ginoo sa gikinahanglang awtoridad nga molihok sa ilang taliwala puli ni Joseph” (“Joseph Smith, the Prophet,” Juvenile Instructor, Okt. 29, 1870, 174–75).

Gatusan ka mga miyembro ang nakasaksi sa milagro nga gihulagway ni Zera Pulsipher (1789–1872) sa Kapangulohan sa Seventy nga nahitabo sa miting:

“Si Brigham Young nagsugod sa pagpamulong ug nianang panahona naglingkod kong nagtalikod sa stand sama sa daghan pang uban. Ug dihang misulti si Brigham misulti siya nga ang tingog kang Joseph ug miliso kami sa pagtan-aw niyang namulong sa tingog ni Joseph ug tan-awa ang awtoridad ni Joseph gihatag kaniya. Nasabtan kini sa katawhan sa samang paagi. Si Brigham ang nangulo sa Napulog Duha mao nga ang simbahan midangup kaniya” (sa Lynne Watkins Jorgensen ug BYU Studies staff, “The Mantle of the Prophet Joseph Passes to Brother Brigham: A Collective Spiritual Witness,” BYU Studies, vol. 36, no. 4 [1996–97], 173; emphasis gidugang).

Si Drusilla Dorris Hendricks mirekord usab sa iyang kasinatian:

“Nagsugod sa pagsulti si Brigham Young. Milukso ako sa pagsusi kon dili ba kadto si Brother Joseph kay tinuod gayud nga iya kadtong tingog ug linihokan. Ang matag Santos sa Ulahing mga Adlaw dali rang makakita kon asa ang priesthood gihatag kay si Brigham Young ang naghupot sa mga yawe” (sa Jorgensen ug BYU Studies staff, “The Mantle of the Prophet Joseph,” 163; emphasis gidugang).

Si Nancy Naomi Alexander Tracy misulat:

“Makapamatuod ko nga ang awtoridad ni Joseph gihatag kang Brigham nianang adlawa sama sa kang Elijah nga gihatag kang Elisha [tan-awa sa 1 Mga Hari 19:19; 2 Mga Hari 2:11–15], kay sama og ang iyang tingog, iyang linihokan, ug ang tanan kang Joseph. Sama og gikauban na sab namo siya. Gipaluyohan siya pinaagi sa tingog sa katawhan sa pagka-propeta, manalagna, ug tigpadayag” (sa Jorgensen ug BYU Studies staff, “The Mantle of the Prophet Joseph,” 177; emphasis gidugang).

3.4

Importanting mga Baruganan sa Pagpuli

Si Presidente Spencer W. Kimball, kauban ni Presidente Gordon B. Hinckley nga naggunit sa iyang kamot ug si Presidente Ezra Taft Benson nga nakig-istorya kaniya

Ang importanting mga baruganan sa pagpuli gikan sa usa ka Presidente ngadto sa sunod gipasabut sa 1996 Ensign nga artikulo:

“Samtang ang pihong mga pamaagi ug protocol sa magkalahi nga pagpuli sa kapangulohan sukad sa pagkamatay ni Propeta Joseph Smith dunay gagmayng kalainan sa usag usa, ang mahinungdanong mga baruganan mao ra gihapon ug sigurado nga gibase kini sa pagpadayag. Upat ka tukuranang mga baruganan ug mga binuhatan gihimo sukad 1844 ug makita kini sa tanang pagpuli sukad.

“1. Mga yawe sa gingharian gihatag sa Napulog Duha. Ang unang baruganan o lakang sa pagpuli mao ang pagtugyan sa mga yawe sa gingharian sa matag tawo nga i-orden sa balaang pagkaapostol ug i-set apart isip sakop sa Korum sa Napulog Duha ka mga Apostoles (tan-awa sa D&P 27:12–13). …

“2. Seniority: nagdumalang baruganan sa kapangulohan. Ang butang nga mag-determinar kon si kinsa ang mag-preside sa Napulog Duha ug kon si kinsa ang aktibong mogamit sa tanang yawe sa gingharian kon mamatay ang Presidente sa Simbahan mao ang baruganan sa seniority. Niadtong 1835, dihang gitawag ang unang Korum sa Napulog Duha, ang seniority gihan-ay sigun sa edad. Sukad niana, ang seniority i-determinar na pinaagi sa petsa sa pagka-orden ngadto sa Korum sa Napulog Duha. …

“3. Sa pagkamatay sa Presidente wala nay Unang Kapangulohan nga labaw sa Napulog Duha. Sa pagsunod sa mga baruganan nga gitudlo ni Propeta Joseph Smith, kon ang Presidente sa Simbahan mamatay, ang korum sa Unang Kapangulohan awtomatik nga mabungkag ug ang mga magtatambag, kon daan na silang naa sa Korum sa Napulog Duha, mobalik sa ilang mga dapit sa seniority niana nga korum. Ang senior nga Apostol, isip Presidente sa Napulog Duha, gumikan sa seniority, awtomatik nga mahimong ‘[Presiding High Priest]’ ug, sa ingon, aktibong mohupot sa tanang yawe sa gingharian ug ‘[mo]dumala ibabaw sa tibuok simbahan’ (tan-awa sa D&P 107:65–66, 91). ‘Managsama ang [awtoridad]’ sa Unang Kapangulohan, kini nga presiding nga korum sa Napulog Duha ka mga Apostoles usa ka Kapangulohan sa Simbahan nga sama ra sa Unang Kapangulohan kon kini hingpit nang naorganisar ug naglihok (tan-awa sa D&P 107:23–24). Sa samang paagi, ang Presidente sa Napulog Duha nianang higayuna sama ra og katungdanan ug awtoridad sa Presidente sa Simbahan kon siya ma-sustain nianang bag-ong naorganisar nga Unang Kapangulohan. …

“4. Reorganisasyon sa Unang Kapangulohan. Isip presiding officer sa Simbahan, ang Presidente sa Napulog Duha dunay prebilehiyo nga makadawat og pagpadayag kon kanus-a i-reorganisar ang Unang Kapangulohan. Kini nga desisyon buhaton pinaagi sa pagkonsulta ug pinaagi sa hiniusang pagsuporta sa Korum sa Napulog Duha. …

“Sa adlaw nga gi-sustain si Presidente Howard W. Hunter [1907–95] isip Presidente sa Simbahan, mipamatuod siya:

“‘Ang matag lalaki kinsa gi-orden nga Apostol ug gi-set apart isip usa ka sakop sa Korum sa Napulog Duha i-sustain isip usa ka propeta, manalagna, ug tigpadayag. Ang Unang Kapangulohan ug ang Korum sa Napulog Duha ka mga Apostoles, gitawag ug gi-orden nga maghupot sa mga yawe sa priesthood, adunay awtoridad ug responsibilidad sa pagdumala sa Simbahan, sa pagpahigayon sa mga ordinansa niini, sa pagtudlo sa doktrina niini, ug sa pagtukod ug sa pagpadayon sa mga naandan niining buluhaton.

“‘Kon ang Presidente sa Simbahan magkasakit o dili hingpit nga makahimo sa pagbuhat sa tanang katungdanan sa iyang buhatan, ang iyang duha ka Magtatambag, kinsa, uban kaniya, naglangkob sa Korum sa Unang Kapangulohan, mopadayon sa trabaho sa Kapangulohan. Ang bisan unsa nga dagkong mga pangutana, mga polisiya, mga programa, o mga doktrina mainampuong ikonsiderar sa konseho pinaagi sa mga Magtatambag sa Unang Kapangulohan ug sa Korum sa Napulog Duha ka mga Apostoles. Walay desisyon nga maggikan sa Unang Kapangulohan ug sa Korum sa Napulog Duha nga walay hingpit nga panag-uyon sa tanang may kalabutan.

“‘Nagsunod niining dinasig nga sumbanan, ang Simbahan mopadayon nga walay pagbalda. Ang pagdumala sa Simbahan ug ang paggamit sa propetikanhong mga gasa sa kanunay itugyan ngadto sa apostolikanhong mga awtoridad kinsa naghupot ug naggamit sa tanan nga mga yawe sa priesthood’ [sa Conference Report, Oct. 1994, 6–7; o Ensign, Nob. 1994, 7]” (Brent L. Top and Lawrence R. Flake, “‘The Kingdom of God Will Roll On’: Succession in the Presidency,” Ensign, Ago. 1996, 29, 31–34).

3.5

Ang Ginoo Miestablisar sa Han-ay sa Pagpuli sa Kapangulohan sa Simbahan

Dihang si Harold B. Lee gi-sustain nga Presidente sa Simbahan human mamatay si Presidente Joseph Fielding Smith, nabantayan ni Presidente Spencer W. Kimball (1895–1985) ang tahas sa Dios sa pagpili sa usa ka Presidente sa Simbahan:

“Makahatag og kasiguroan ang pagkahibalo nga si Presidente Lee wala pilia pinaagi sa mga komite ug mga kombensyon inubanan sa panagsungi, pagpanaway, ug boto sa mga tawo, apan gitawag sa Dios ug dayon gi-sustain sa mga tawo. …

“Ang balaang sundanan dili motugot og sayop, walay pagkasungi, walay pangambisyon, walay tinagong mga motibo. Gigahin sa Ginoo alang sa iyang kaugalingon ang pagtawag sa iyang mga lider sa iyang simbahan” (“We Thank Thee, O God, for a Prophet,” Ensign, Ene. 1973, 33; emphasis gidugang).

Human dayon sa pagkahimong Presidente ni Presidente Gordon B. Hinckley (1910–2008) sa Simbahan, gipasabut niya ang pattern nga giestablisar sa Ginoo:

“Sa pagkamatay ni Presidente Hunter, ang Unang Kapangulohan nawala na. Si Brother Monson ug ako, nga nagserbisyo nga iyang mga magtatambag, mibalik sa among mga dapit sa Korum sa Napulog Duha ka mga Apostoles nga nahimong presiding authority sa Simbahan.

“Tulo ka semanang milabay na karon ang tanang na-orden nga buhing mga Apostoles nagpundok sa pagpuasa ug pag-ampo sa kwarto sa taas sa templo. Didto nanganta kami og sagradong himno ug nag-ampo kaming tanan. Miambit kami sa sakrament sa panihapon sa Ginoo, nagbag-o sa sagrado, simbolikanhong testamento sa among mga pakigsaad ug sa among relasyon Kaniya nga among balaang Manunubos.

“Ang Kapangulohan dayon giorganisar pag-usab, pinasubay sa maayong pagka-establisar nga pattern sukad pa sa mga henerasyong nanglabay.

“Walay pagpangumpanya, walay pag-indigay, walay pagpangambisyon para sa katungdanan. Hilum, malinawon, yano, ug sagrado kadto. Gihimo kadto subay sa pattern nga gipahimutang mismo sa Ginoo” (“This Is the Work of the Master,” Ensign, Mayo 1995, 69; emphasis gidugang).

Gipasabut ni Presidente Harold B. Lee (1899–1973) nga ang pagpangagpas mahitungod sa pagpuli sa Kapangulohan “dili makahimuot sa panan-aw sa Ginoo.” Miingon siya nga “kadtong mosulay sa pagtag-an kon si kinsa ang mosunod nga Presidente sa Simbahan daw nanugal sa lumba sa kabayo, tungod kay ang Ginoo lamang ang adunay iskedyul” (“Admonitions for the Priesthood of God,” Ensign, Ene. 1973, 107).

3.6

Seniority sa Korum sa Napulog Duha ka mga Apostoles

Ang Presidente sa Simbahan mao ang Apostol nga pinaka-senior. Ang Apostol nga nagsunod sa seniority mao ang Presidente sa Korum sa Napulog Duha ka Apostoles, gawas kon nagserbisyo siya sa Unang Kapangulohan, diin ang Apostol nga maoy sunod sa seniority nagserbisyo isip Acting President sa Korum sa Napulog Duha ka Apostoles. Ang seniority tali sa mga Apostoles tinoon dili sa edad apan sa petsa ug han-ay sa pag-orden kanila nga mga Apostol. Sama pananglit, si Spencer W. Kimball ug Ezra Taft Benson gi-orden isip mga Apostol niadtong Oktubre 7, 1943, nga si Spencer W. Kimball ang unang giorden. Tungod niini, si Presidente Kimball ang nahimong Presidente sa Simbahan niadtong 1973 dihang namatay si Harold B. Lee.

Mipasabut si Presidente Spencer W. Kimball (1895–1985) nga tungod kay ang pagpuli sa Kapangulohan gibase sa seniority, ang Ginoo lamang ang makakontrolar sa han-ay sa pagpuli:

“Dunay mga otsenta na ka apostoles [hangtud 1972] nga gitugahan [sa mga yawe sa awtoridad] sukad kang Joseph Smith, bisan og onse ra ang napahimutang nga Presidente sa Simbahan, tungod kay ang uban nangamatay; ug tungod kay ang kamatayon sa iyang mga sulugoon ubos man sa gahum ug kontrol sa Ginoo, gitugot niya nga maadto sa unang dapit ang tawo lamang nga gidestino nga matugyanan sa pagkapangulo. Ang kamatayon ug kinabuhi nahimong mga butang nga tig-kontrol. Ang matag bag-ong apostol tungod niana pilion sa Ginoo ug ipadayag sa buhing propeta nga maoy mo-orden kaniya” (“We Thank Thee, O God, for a Prophet,” 34; emphasis gidugang).

Ang Manluluwas nga nagtawag sa Iyang mga Apostoles

Gihulagway ni Presidente Gordon B. Hinckley (1910–2008) ang proseso sa seniority ug pagpuli nga magsugod kon ang tawo tawagon ngadto sa Korum sa Napulog Duha:

“Kini nga transisyon sa awtoridad, nga akong naapilan sa pipila ka higayon, matahum sa kasimple niini. Usa kini ka sanglitanan kon sa unsang paagi mobuhat og mga butang ang Ginoo. Ubos sa Iyang pamaagi ang tawo pilion sa propeta nga mahimong sakop sa Konseho sa Napulog Duha ka mga Apostoles. Wala niya pilia kini isip usa ka panarbaho. Gitawag siya, sama sa mga Apostoles sa panahon ni Jesus, diin ang Ginoo miingon, ‘Kamo wala magpili kanako, hinonoa ako mao ang nagpili kaninyo’ (Juan 15:16). Milabay ang katuigan. Nahanas na siya ug disiplinado sa tanang katungdanan sa iyang buhatan. Mobiyahe siya sa tibuok kalibutan sa pagtuman sa iyang apostolikanhong tawag. Taas kini nga proseso sa pagpangandam, diin iyang mailhan ang mga Santos sa Ulahing mga Adlaw bisan taga-asa man sila, ug sila makaila kaniya. Ang Ginoo mosulay sa iyang kasingkasing ug sa iyang kinaiya. Sa natural nga dagan sa panghitabo, ang pagkabakante mahitabo niana nga konseho ug bag-ong mga pagpili ang buhaton. Ubos niini nga proseso ang usa ka tawo sa partikular mamahimong senior nga Apostol. Anaa nang daan kaniya, ug diha sa iyang kauban nga mga Kaigsoonan, gihatag sa matag usa atol sa pag-orden, mao ang tanang mga yawe sa priesthood. Apan ang awtoridad sa paggamit niana nga mga yawe anaa ra sa Presidente sa Simbahan. Sa iyang pagkamatay, kana nga awtoridad magamit na sa senior nga Apostol, kinsa dayon pangalanan, i-set apart, ug i-orden nga propeta ug Presidente pinaagi sa iyang mga kaubanan sa Konseho sa Napulog Duha” (“Come and Partake,” Ensign, Mayo 1986, 46–47).

Human sa pagkamatay ni Presidente Gordon B. Hinckley (sa tuo), si Thomas S. Monson nahimong Presidente sa Simbahan.

Si Presidente Boyd K. Packer (1924–2015) sa Korum sa Napulog Duha ka mga Apostoles namulong sa kasiguroan sa senior nga Apostol nga mahimong Presidente sa Simbahan:

“Human dayon sa kamatayon ni Presidente Gordon B. Hinckley, ang 14 ka mga lalaki, ang mga Apostoles, kinsa gitugyanan sa mga yawe sa gingharian, nagpundok didto sa kwarto sa ibabaw sa templo aron sa pag-organisar pag-usab sa Unang Kapangulohan sa Simbahan. Walay pangutana kon unsay buhaton, walay pagduhaduha. Nasayud kami nga ang senior nga Apostol mao ang Presidente sa Simbahan. Ug nianang sagrado nga miting, si Thomas Spencer Monson gipaluyohan sa Korum sa Napulog Duha ka mga Apostoles isip Presidente sa Simbahan” (“Ang Napulog Duha,” Ensign o Liahona, May 2008, 83; emphasis gidugang).

3.7

Pagpangulo sa Korum sa Napulog Duha ka mga Apostoles ug ang Tayming sa Pagpuli

Gipasabut ni Presidente Spencer W. Kimball (1895–1985) ang transisyon sa awtoridad ngadto sa Korum sa Napulog Duha ka mga Apostoles human mamatay ang kasamtangang propeta:

“Walay katapusan ang buhat sa Ginoo. Bisan og ang pinaka-impluwensyal nga lider mamatay, walay bisan usa ka higayon nga ang Simbahan walay pangulo, salamat sa mabinationg Tighatag kinsa mihimo nga magpadayon ug makanunayon ang iyang gingharian. …

“Sa higayon nga mamatay ang Presidente sa Simbahan, usa ka pundok sa kalalakin-an mamahimong tibuok nga lider—kining mga tawhana namanso na sa kasinatian ug sa training. Ang mga pagpili dugay nang gihimo, ang awtoridad gihatag, ang mga yawe gihatag. … Ang gingharian magpadayon ubos niining awtorisado nang daan nga konseho. Walay ‘paglansar’ para sa posisyon, walay eleksyon, walay pagpangampanya. Pagkabalaan nga plano! Pagkamanggialamon sa atong Ginoo, sa pag-organisar sa ingon niini ka hingpit nga lapas sa kahuyang sa hakog nga mga tawo” (sa Conference Report, Abr. 1970, 118; o Improvement Era, Hunyo 1970, 92).

Ang Unang Kapangulohan ug ang Korum sa Napulog Duha ka mga Apostoles (circa 1870), nga may litrato ni Propeta Joseph Smith (ibabaw nga laray, ikaduha gikan sa wala)

“Isip presiding officer sa Simbahan, ang Presidente sa Napulog Duha dunay prebilehiyo nga makadawat og pagpadayag kon kanus-a i-reorganisar ang Unang Kapangulohan. Kini nga desisyon buhaton pinaagi sa pagkonsulta ug pinaagi sa hiniusang pagsuporta sa Korum sa Napulog Duha” (Top and Flake, “The Kingdom of God,” 33; emphasis gidugang). Human sa pagkamatay ni Propeta Joseph Smith, ang Korum sa Napulog Duha ka mga Apostoles ang nangulo sa Simbahan sulod sa tulo og tunga ka tuig sa wala pa mareorganisar ang Unang Kapangulohan. Ang Korum sa Napulog Duha nangulo sa Simbahan kapin og gamay sa tulo ka tuig human sa pagkamatay ni Presidente Brigham Young ug hapit duha ka tuig human sa pagkamatay ni John Taylor. Bag-o pa lang gyud, ang Korum sa Napulog Duha ka mga Apostoles nangulo sa Simbahan sagad sulod lang sa pipila ka adlaw sa dili pa i-reorganisar ang Unang Kapangulohan ug ma-set apart ang bag-ong Presidente.

Niadtong Septyembre 18, 1898, si Presidente George Q. Cannon (1827–1901) sa Unang Kapangulohan namulong mahitungod sa organisasyon sa Unang Kapangulohan human sa pagkamatay ni Presidente Wilford Woodruff niadtong Septyembre 2:

“Niadtong Septyembre 13, sa usa ka miting sa mga Apostoles, samtang naghisgot sa panginahanglanon sa pagpili og trustee-in-trust [kasaligang korporasyon o tawo nga modumala sa kabtangan] nga para sa Simbahan, ang panginahanglan usab sa pag-organisar sa Unang Kapangulohan nakita nga klaro sa kaigsoonan, ug ang matag usa sa Napulog Duha namulong nga pabor niana nga aksyon nga gihisgutan nianang panahona. Human madungog ang ilang mga hunahuna, si Presidente Snow mibarug ug mipahayag sa kaigsoonan nga siya, sukad sa pagkamatay ni Presidente Woodruff, nadasig nga mopresentar sa iyang kaugalingon ngadto sa Ginoo, nagsul-ob sa iyang mga saput sa priesthood, sulod sa Templo, ug ang Ginoo mipadayag kaniya nga ang Unang Kapangulohan kinanghanglang i-organisar, ug mipadayag usab kaniya kon si kinsa ang mahimo niyang mga magtatambag. Wala siyay gisulti mahitungod niini, hangtud nga nahuman sa pagsulti ang mga Apostoles mahitungod niini. Kini nga pamahayag ni Presidente Snow usa ka ebidensya kanila nga ang Espiritu sa Dios midasig sa mga pakigpulong nga ilang gihimo, ug miaprubar sa buhat nga giplanohan nilang buhaton, ug naghimo kini nga nalipay sila sa hilabihan. Para nako wala gayud kadto dahuma nga mahimo kadto nga aksyon nianang higayuna, bisan og tinuoray ako nga pabor niini, ug mibati nga ang Unang Kapangulohan kinahanglang maorganisar diha dayon kutob sa mahimo o diha dayon kon dasigon sa Ginoo ang mao nga aksyon” (Deseret News, Okt. 8, 1898, 514).

3.8

Pag-reorganisar sa Unang Kapangulohan

Niadtong 1974, si Presidente N. Eldon Tanner (1898–1982) sa Unang Kapangulohan mihulagway sa transisyon sa awtoridad ug sa pamaagi nga ang bag-ong Presidente sa Simbahan paluyohan sa Korum sa Napulog Duha ka mga Apostoles ug sa pag-reorganisar sa Unang Kapangulohan pinaagi sa pagsaysay sa panghitabo nga nag-una ug nagsunod sa pagkamatay ni Presidente Harold B. Lee:

“Makahuluganon ang paghinumdom sa unsay nanghitabo panahon sa pagkamatay ni Presidente Harold B. Lee. Si Presidente Romney gitawag ngadto sa ospital ug dihang nag-istorya sila, si Presidente Lee, nakamatikud nga tingali dili pa siya makabuhat sa mga buluhaton sulod sa panahon, miingon kang Presidente Romney: ‘Tua sa layo si Presidente Tanner, ug gusto kong ikaw una ang mopuli ug mobuhat sa mga kalihokan sa Simbahan.’ Si Presidente Kimball nga miabut sa wala madugay, mitanyag sa iyang serbisyo kang Presidente Romney. Hinoon, diha dayon nga gipahibalo ang pagkamatay ni Presidente Lee, miduol si Presidente Romney kang Presidente Kimball ug miingon; ‘Ikaw, isip presidente sa Korum sa Napulog Duha, ang in-charge karon. Ubos ko karon sa imong pagbuot ug andam nga mohimo bisan unsa nga akong ikatabang.’

Nahisubay gayud kini sa han-ay sa Simbahan ug usa ka talagsaong ehemplo kon sa unsang paagi ang Simbahan dili gayud mapasagdan nga walay kapangulohan ug unsa kahapsay ang pagpasa gikan sa usa ngadto sa usa. Diha dayon si Presidente Kimball, isip presidente sa Napulog Duha, nahimong presiding authority sa Simbahan.

“Gusto kong mo-outline sa pamaagi nga gisunod sa panahon sa iyang pagkapili ug pag-orden isip presidente sa Simbahan. …

“… Upat ka adlaw human sa pagkamatay ni Presidente Lee, si Presidente Kimball, ang presidente sa Napulog Duha, mitawag sa pagpundok sa mga sakop sa Napulog Duha sa taas nga bahin nga kwarto sa templo sa tuyo nga paghisgot sa reorganisasyon sa Unang Kapangulohan ug sa paghimo og bisan unsang aksyon nga madesisyunan. Kadtong nahimong mga magtatambag sa Presidente—nga si Presidente Romney ug ako—mibalik sa naandan nilang mga dapit sa Korum sa Napulog Duha.

“Si Presidente Kimball, sa pagpahayag niya sa iyang dakong kasubo sa pagkamatay ni Presidente Lee ug sa kahaw-ang nga iyang gibati, mitawag sa Napulog Duha nga pinasubay sa seniority aron mopahayag sa ilang gibati bahin sa pag-reorganisar sa kapangulohan sa Simbahan.

“Samtang ang mga sakop sa Napulog Duha namulong, gipahayag niya ang pagbati nga karon panahon nang i-reorganisar ang Unang Kapangulohan ug si Presidente Spencer W. Kimball ang tawo nga gusto sa Ginoo nga mo-preside niining higayuna. Ang matam-is nga Espiritu sa Ginoo didto nga kusog kaayo ug didto ang hingpit nga paghiusa ug panag-uyon sa mga hunahuna ug mga pulong nga gipamulong sa Kaigsoonan. Ang bugtong katuyoan ug tinguha mao ang pagsunod sa kabubut-on sa Ginoo, ug walay pagduha-duha sa hunahuna ni bisan kinsa nga napahayag ang kabubut-on sa Ginoo.

“Si Elder Ezra Taft Benson mihimo dayon og pormal nga mosyon nga i-reorganisar ang Unang Kapangulohan sa Simbahan ug nga si Spencer W. Kimball i-sustain, i-orden, ug i-set apart nga presidente, propeta, manalagna ug tigpadayag ug isip trustee-in-trust sa Simbahan. Kini nga motion gisegundahan ug hiniusang giaprubahan.

“Sa tanang pagpaubos, miabante si Presidente Kimball ug mihimo sa iyang pagdawat nga pakigpulong, nag-ampo nga ang Espiritu ug mga panalangin sa Ginoo moabag kaniya aron mahimo niya ang kabubut-on sa Ginoo. Miingon siya nga kanunay niyang giampo ang kahimsog ug kalig-on ug kusog ni Presidente Lee ug sa mga panalangin sa Ginoo nga moabag kaniya samtang molihok siya isip presidente sa Simbahan. Iyang gipasabut nga tinuoray siyang nag-ampo uban sa mapinanggaon niyang asawa, si Camilla, nga dili moabut kaniya kini nga posisyon ug sigurado siya nga mag-una pa siya ni Presidente Lee. …

“Dayon gipili niya ug ginominar si N. Eldon Tanner nga iyang unang magtatambag ug si Marion G. Romney nga iyang ikaduhang magtatambag, diin ang matag usa mipahayag sa dakong pagpaubos ug misaad nga suportahan ug mopaluyo ni Presidente Kimball isip presidente sa Simbahan ug motuman sa iyang katungdanan kutob sa iyang mahimo, ug nag-ampo nga ang mga panalangin sa Ginoo moabag kaniya.

“Human niini, si Presidente Benson gi-sustain nga presidente sa Konseho sa Napulog Duha. Si Presidente Kimball dayon milingkod sa lingkuranan sa tunga sa kwarto, ug samtang ang tanan nga didto mipandong sa ilang mga kamot sa iyang ulo, among gibati nga ang Espiritu sa Ginoo tinuod nga among gikauban, ug kining tam-is nga Espiritu mipuno sa among kasingkasing. Dayon, si Presidente Benson ang namulong sa matahum nga pag-ampo ug panalangin, si Spencer Woolley Kimball gi-orden ug gi-set apart nga propeta, manalagna, ug tigpadayag ug presidente sa Ang Simbahan ni Jesukristo sa mga Santos sa Ulahing mga Adlaw” (“Chosen of the Lord,” Ensign, Mayo 1974, 84–85).

3.9

Unsa ang Maligdong nga Katiguman?

Pag-sustain atol sa maligdong nga katiguman sa Simbahan

Bisan og si Presidente Thomas S. Monson nahimong Presidente sa Simbahan niadtong Pebrero 3, 2008, human sa pagkamatay ni Presidente Gordon B. Hinckley, gipili nga sa Sabado sa buntag nga sesyon sa kinatibuk-ang komperensya sa Abril 2008 ang usa ka maligdong nga katiguman, nga ang mga miyembro sa Simbahan, pinaagi sa mga korum ug mga pundok sa tibuok kalibutan, mi-sustain kaniya isip propeta, manalagna, ug tigpadayag ug Presidente sa Ang Simbahan ni Jesukristo sa mga Santos sa Ulahing mga Adlaw (tan-awa sa “Ang Pagpaluyo sa mga Opisyales sa Simbahan,” Ensign o Liahona, Mayo 2008, 4–6).

Atol sa unang maligdong nga katiguman, si Elder David B. Haight (1906–2004) sa Korum sa Napulog Duha ka mga Apostoles naghisgot kon unsa ang maligdong nga katiguman ug ang kasagrado sa maong halandumong panagtigum:

“Karon mga saksi kita ug partisipante sa pinakasagradong okasyon—usa ka maligdong nga katiguman nga aksyunan ang langitnong mga butang. Sama sa karaang kapanahunan, dunay gihimong daghan nga pagpuasa ug pag-ampo nga gihalad sa mga Santos sa tibuok kalibutan aron madawat nila ang pagbu-bu sa Espiritu sa Ginoo, nga makita kaayo dinhi niini nga okasyon karong buntaga.

“Ang maligdong nga katiguman, sigun sa gipasabut sa ngalan, nagpasabut nga usa ka sagrado, mahunahunaon, ug mahilum nga okasyon diin ang mga Santos magkatigum ubos sa direksyon sa Unang Kapangulohan. Ang maligdong nga katiguman gigamit sa tulo ka katuyoan: sa pagpahinungod sa mga templo, espesyal nga instruksyon sa mga lider sa priesthood, ug pag-sustain og bag-ong Presidente sa Simbahan. Kini nga sesyon sa komperensya karon usa ka maligdong nga katiguman sa katuyoan sa pag-sustain sa bag-ong natawag nga Presidente sa Simbahan ug sa ubang mga opisyal sa Simbahan.

“Adunay sundanan sa mga maligdong nga katiguman nga nagpalahi niini gikan sa uban nga kinatibuk-ang mga miting diin atong i-sustain ang mga opisyal sa Simbahan. Kana nga pattern, nga giestablisar ni Propeta Joseph Smith, mao nga ang mga korum sa priesthood, sugod sa Unang Kapangulohan, mobarug ug mopakita pinaagi sa pag-isa sa tuong kamot sa ilang kaandam nga mo-sustain sa Presidente sa Simbahan isip propeta, manalagna ug tigpadayag, ug suportahan siya pinaagi sa ilang pagsalig, pagtuo, ug mga pag-ampo. Ang mga korum sa priesthood sa Simbahan mopakita gayud niini pinaagi sa ilang pagboto. Dayon ang kinatibuk-ang pundok sa mga Santos mobarug ug mopakita sa ilang kaandam sa paghimo sa samang butang. Ang ubang lider sa Simbahan i-sustain sa samang paagi sa ilang mga katungdanan ug mga calling.

“Kon i-sustain nato ang Presidente sa Simbahan pinaagi sa pag-isa sa atong kamot, wala lamang kini magpasabut nga atong giila atubangan sa Dios nga siya ang tukmang mogunit sa tanang mga yawe sa priesthood; nagpasabut usab kini nga makigsaad kita sa Dios nga kita mosunod sa direksyon ug tambag nga maggikan sa Iyang propeta. Usa kini ka sagradong pakigsaad.

“Sa adlaw nga gi-organisar ang Simbahan, gihatag sa Ginoo kini nga sugo sa Iyang Simbahan:

“Kay ang iyang [ang presidente sa Simbahan] pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo.

“Kay pinaagi sa pagbuhat niini nga mga butang ang mga ganghaan sa impyerno dili makabuntog batok kanimo; oo ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan.

“‘Kay sa ingon miingon ang Ginoong Dios: Kaniya Ako nagdasig sa pagbuhat sa kahimoan sa Zion sa labing gamhanan nga gahum alang sa kaayohan’ (D&P 21:5–7).

“Ang unang maligdong nga katiguman gihimo sa Kirtland Temple niadtong 27 sa Marso 1836. Human sa pamaagi sa pagboto nga akong gihulagway, girekord ni Propeta Joseph Smith, ‘Managna ako sa tanan, nga kon suportahan nila kining mga tawhana sa daghan nilang katungdanan, … panalanginan sila sa Ginoo; … sa pangalan ni [Jesukristo], ang mga panalangin sa langit ilang maangkon’ (History of the Church, 2:418).

“Karon, pinaagi sa paggamit sa baruganan sa pagtugot sa tanan [common consent], atong gipahayag ang atong kabubut-on. Unsa man kasagrado kini nga pribilehiyo ug responsibilidad? Labihan ka sagrado nga sa talagsaong pagpadayag sa priesthood, miingon ang Ginoo nga kining mga butanga ‘mahimo nga dad-on sa atubangan sa kinatibuk-an nga pundok sa nagkalain-laing mga korum, nga naglangkob sa espirituhanong mga katungdanan sa simbahan’ (D&P 107:32; mga italic gidugang)” (“Solemn Assemblies,” Ensign, Nob. 1994, 14–15; emphasis gidugang).

3.10

Unsaon Nato sa Pag-sustain ang Presidente sa Simbahan

Usa sa mga pribilehiyo sa pagkamiyembro sa Simbahan mao ang oportunidad nga maka-sustain sa mga gitawag sa pag-preside sa Simbahan.

Atol sa konklusyon sa maligdong nga katiguman diin si Thomas S. Monson gipaluyohan nga ika-16 nga Presidente sa Simbahan, si Presidente Henry B. Eyring sa Unang Kapangulohan namulong sa gibatunan nato nga talagsaong panalangin ug saad nga atong gihimo kon moisa kita sa atong kamot sa pagpaluyo sa atong mga lider:

“Ang mga katawhan sa Dios dili kanunayng takus sa talagsaong kasinatian nga atong giambitan karon. Ang mga Apostoles human sa Pagkayab ni Kristo, nagpadayon sa paggamit sa mga yawe nga Iyang gibilin kanila. Apan tungod sa pagkamasinupakon ug pagkawala sa pagtuo sa mga miyembro, namatay ang mga apostoles nga wala mahatag ang mga yawe ngadto sa mga nagsunod. Gitawag nato kana nga mangilngig nga hitabo nga ‘ang Apostasiya.’ Kon ang mga miyembro sa Simbahan niadtong mga adlawa aduna pay kahigayunan ug kabubut-on sa paggamit sa hugot nga pagtuo sama ninyo karon, dili unta kuhaon sa Ginoo ang mga yawe sa priesthood gikan sa yuta. Mao nga kini ang adlaw nga importante sa kasaysayan ug importante sa kahangturan sa kasaysayan sa kalibutan ug sa mga anak sa atong Langitnong Amahan.

“Karon ang atong obligasyon mao ang pagpabilin nga takus sa hugot nga pagtuo nga gikinahanglan nato aron sa pagtuman sa atong saad sa pagpaluyo niadtong kinsa gitawag. … Aron kita makapaluyo niadtong gitawag karon, kinahanglan nga atong susihon ang atong kinabuhi, maghinulsol kon gikinahanglan, mosaad nga mosunod sa mga sugo sa Ginoo, ug mosunod sa Iyang mga sulugoon. Ang Ginoo mipasidaan kanato nga kon kita dili mobuhat niadtong mga butanga, ang Espiritu Santo pagakuhaon, mawala kanato ang kahayag nga atong nadawat, ug kita dili makatuman sa saad nga atong gihimo karon sa pagpaluyo sa mga sulugoon sa Ginoo sa Iyang tinuod nga Simbahan” (“Ang Tinuod ug Buhi nga Simbahan,” Ensign o Liahona, Mayo 2008, 21; emphasis gidugang).

Mga Punto nga Pamalandungan

• Sa unsang mga paagi ang pagsabut sa dinasig nga balaang pamaagi sa pagpuli sa Kapangulohan makadugang sa atong pagsalig sa Presidente sa Simbahan?

• Sa unsang paagi ang pagtugyan sa mga yawe sa priesthood sa higayon nga i-orden ang bag-ong Apostol magsugod sa proseso sa pagpuli?

• Unsang mga panalangin ang moabut gumikan sa pagsuporta ug pag-sustain sa senior nga Apostol isip propeta ug Presidente sa Simbahan?

Gisugyot nga mga Assignment

• Gamiton kini nga kapitulo isip giya, i-outline ang mga lakang nga gi-establisar sa Ginoo sa pagpili og bag-ong Presidente sa Simbahan. Sa unsang paagiha kini nga proseso magsugod sa pagpili og bag-ong Apostol?

• I-rekord ang imong tubag sa mosunod nga mga pangutana: Unsa man ang gilauman diri kanato kon mo-sustain kita sa bag-ong Presidente sa Simbahan? Sa unsang paagi kaha kini magamit sa atong pag-sustain og bishop o ubang mga lider sa Simbahan?

• Ipasabut sa daklit ngadto sa usa ka higala o sakop sa pamilya kon sa unsang paagi ang balaang dinasig nga pamaagi sa pagpuli sa Kapangulohan malikayan ang pangambisyon para sa katungdanan, mga sayop, ug mga pagsungi.

• I-rekord ang imong mga pagbati kon sa unsang paagi ang pagsabut sa baruganan sa seniority sa Korum sa Napulog Duha ka mga Apostoles makalig-on sa imong pagsalig nga ang pagpangulo sa Simbahan anaa sa mga kamot sa Ginoo ug nga nahibalo Siya ug miandam sa matag sakop sa Napulog Duha.