Kapitulo 2

Ang Buhing Propeta: Ang Presidente sa Simbahan

Pasiuna

Ang Presidente sa Simbahan ang nagdumala sa tanang korum sa simbahan ug sa tibuok kamiyembrohan sa Simbahan. Si Presidente James E. Faust (1920–2007) sa Unang Kapangulohan mipasabut: “Siya ang senior nga Apostol sa kalibutan. Giorden siya og gi-set apart isip propeta, manalagna, ug tigpadayag sa kalibutan. Gi-sustain siya isip Presidente sa Simbahan. Siya ang tigdumalang high priest sa tanang priesthood sa kalibutan. Siya lang ang naghupot ug mogamit sa tanang yawe sa gingharian ubos kang Jesukristo kinsa mao ang pangulo niini nga Simbahan ug mao ang punoang bato sa pamag-ang” (“Continuing Revelation,” Ensign, Ago. 1996, 5).

Si Elder Mark E. Petersen (1900–1984) sa Korum sa Napulog Duha ka mga Apostoles mipamatuod nga ang buhing propeta mao ang tigpamâ-bâ sa Simbahan ug sa kalibutan: “Ang mga tawo nga dili miyembro niini nga Simbahan posibling dili makamatikud sa dakong kahulugan nga may kalambigitan sa iyang pangalagad. Bisan gani ang ubang mga Santos sa Ulahing mga Adlaw wala pa makadiskubre niini. Apan ang presidente sa Simbahan sa pagkatinuod usa ka propeta nga gituboy niining ulahing mga adlaw aron makahatag og dinasig nga giya, dili lang sa mga Santos sa Ulahing mga Adlaw, apan sa tanang katawhan bisan asa” (“A People of Sound Judgment,” Ensign, Hulyo 1972, 40).

Ang masusihong pagtuon niini nga kapitulo mopalawom sa imong pagpasalamat sa Presidente sa Simbahan ug sa mga yawe sa awtoridad sa priesthood nga iyang gihuptan ug makatabang nimo sa pagsabut sa unsang paagi moabut ang kasiguroan niadtong mopatalinghug sa iyang tambag.

Komentaryo

2.1

Ang Buhing Propeta Naggunit sa Tanang Yawe sa Priesthood

Si Presidente Boyd K. Packer (1924–2015) sa Korum sa Napulog Duha ka mga Apostoles misaysay og usa ka kasinatian dihang si Presidente Spencer W. Kimball (1895–1985) mipahayag nga siya, isip Presidente sa Simbahan, naggunit sa mga yawe sa priesthood:

“Niadtong 1976 human sa komperensya sa Copenhagen, Denmark, si Presidente Spencer W. Kimball midapit kanamo ngadto sa usa ka gamayng simbahan aron makita ang mga estatuwa ni Kristo ug sa Napulog Duha ka mga Apostoles nga hinimo ni Bertel Thorvaldsen. Ang Christus nagbarug sa usa ka dapit saylo sa altar. Nagbarug sa mga kilid sa chapel mao ang mga estatuwa sa Napulog Duha kauban ni Pablo nga maoy puli ni Judas Iscariot.

“Gisultihan ni Presidente Kimball ang gulangon na nga tig-atiman nga sa panahon gayud nga si Thorvaldsen mihimo niining matahum nga mga estatuwa sa Denmark, ang pagpahiuli sa Simbahan ni Jesukristo nanghitabo na sa Amerika nga ang mga apostoles ug mga propeta midawat og awtoridad gikan niadtong naghupot niini sa karaang panahon.

“Gipaduol kaniya ang pundok, miingon siya sa tig-atiman, ‘Kami mga buhing Apostoles sa Ginoo nga si Jesukristo,’ ug miingon siya samtang nagtudlo kang Elder Pinegar, ‘Siya usa ka Seventy sama sa gihisgutan sa Bag-ong Tugon.’

“Nagbarug kami duol sa estatuwa ni Pedro, kinsa gibutangan sa eskultor og mga yawe sa iyang kamot, nagsimbolo sa mga yawe sa gingharian. Miingon si Presidente Kimball, ‘Gihuptan namo ang mga yawe nga tinuod, sama sa gihuptan ni Pedro, ug gigamit namo kini sa matag adlaw.’

“Dayon nahitabo ang usa ka kasinatian nga dili gayud nako hikalimtan. Si Presidente Kimball, ang malumo nga propeta, miatubang ni Presidente Johan H. Benthin, sa Copenhagen Stake, ug sa tingog sa pagmando miingon, ‘Gusto nakong sultihan nimo ang tanang prelado [lider sa relihiyon] sa Denmark nga sila walay mga yawe nga gihuptan! Ako ang naghupot sa mga yawe!’

“Miabut kanako kana nga saksi nga nahibaloan sa mga Santos sa Ulahing mga Adlaw apan lisud ihulagway sa tawo nga wala makasinati niini—usa ka kahayag, gahum nga mikuyanap sa kinahiladman sa tawo—ug nasayud ako, sa katinuod gayud, nga didto anaa ang buhi nga propeta nga naghupot sa mga yawe” (“The Shield of Faith,” Ensign, Mayo 1995, 8).

Ang propeta dunay mga gahum, gasa, ug mga panalangin nga maghimo kaniyang makadumala sa bisan unsang katungdanan sa Simbahan (tan-awa sa D&P 46:29; 107:91–92). Si Elder Bruce R. McConkie (1915–85) sa Korum sa Napulog Duha ka mga Apostoles mitino sa mga responsibilidad sa Presidente sa Simbahan, ang buhing propeta:

“Siya ang tawo nga nangulo sa gingharian sa Dios dinhi sa kalibutan, ang kinatas-ang opisyal sa Simbahan, ang ‘Presidente sa Halangdon nga Pagkapari sa Simbahan; O, sa laing pagkasulti, ang Tigdumala nga Halangdon nga Pari ibabaw sa Halangdon nga Pagkapari sa Simbahan.’ (D. & P. 107:65–66.) Katungdanan niya ang ‘pagdumala ibabaw sa tibuok simbahan. …’ (D. & P. 107:91.)

“Siya ang bugtong tawo sa yuta nga sa usa ka higayon makahimo sa paghupot ug paggamit sa mga yawe sa gingharian sa kahingpitan niini. (D. & P. 132:7.) Pinaagi sa awtoridad nga gitugyan kaniya, ang tanang ordinansa sa ebanghelyo gipahigayon, tanang pagtulun-an sa kamatuoran alang sa kaluwasan awtorisado, ug pinaagi sa mga yawe nga iyang gihuptan, ang kaluwasan mismo anaa aron magamit sa mga tawo sa iyang panahon” (Mormon Doctrine, 2nd ed. [1966], 591–92; emphasis gidugang).

Ang mao gihapong mga yawe ug gahum sa priesthood nga gihuptan ni Propeta Joseph Smith padayon nga ania sa yuta karon.

Si Presidente Gordon B. Hinckley (1910–2008) mipasabut sa unsang paagi ang mga yawe sa priesthood nagpadayon gikan ni Propeta Joseph Smith hangtud sa kasamtangang buhing propeta niini nga dispensasyon:

“Kana nga mao gihapong awtoridad nga gihuptan ni Joseph, kana nga mao gihapong mga yawe ug mga gahum nga pinakaimportanting bahin sa iyang balaan nga katungod nga gihatag alang sa pagdumala, pinaagi kaniya gitugyan ngadto sa Napulog Duha ka mga Apostoles nga gipangulohan ni Brigham Young. Ang matag presidente sa Simbahan sukad niana miabut nianang pinakataas ug sagrado nga office gikan sa Konseho sa Napulog Duha. Ang matag usa niining mga tawhana gipanalanginan sa espiritu ug gahum sa pagpadayag gikan sa kahitas-an. Padayon ang walay putol nga sumpay gikan ni Joseph Smith, Jr., hangtud kang Spencer W. Kimball [nga mao ang kasamtangan nga propeta]. Niana mohatag ko sa sagrado nakong pagsaksi ug pagpamatuod kaninyo niining adlawa. Kini nga Simbahan gitukod diha sa dili kaduha-duhaang pulong sa panagna ug pagpadayag—nga gitukod, sama sa gisulat ni Pablo ngadto sa mga Taga-Efeso, tinukod ibabaw sa patukuranan nga mao ang mga apostoles ug mga propeta, nga niini si Jesukristo ang ulohang bato sa pamag-ang.’ (Efe. 2:20.)” (“The Joseph Smith III Document and the Keys of the Kingdom,” Ensign, Mayo 1981, 22).

2.2

Ang Propeta Mao ang Tigpamâ-bâ sa Ginoo

Si Propeta Joseph Smith nakadawat og pagpadayag gikan sa Dios.

Si Presidente Harold B. Lee (1899–1973) mipasabut nga ang mga Santos kinahanglang dili gayud magpailad, kay ang Ginoo miestablisar og walay pagkasayop nga agianan sa instruksyon:

“Kon ugaling aduna may lahi kay sa gikasulti na sa Ginoo kanato, iya kining ihatag ngadto sa iyang propeta dili ngadto kang bisan kinsa lang nga ordinaryong tawo nga mamukong [hitch] lang og sakay tadlas sa kanasuran sumala sa gisulti sa ubang tawo; ug dili pinaagi sa tawo, sumala sa laing istorya, kinsa nakuyapan ug naulian dayon mihatag og pagpadayag. Miingon ko nga, ‘Nagtuo ba mo nga kon ang Ginoo dunay propeta dinhi sa kalibutan, iya pa bang ituyok-tuyok ang pagpadayag og mga butang para sa iyang mga anak? Mao kanay hinungdan nga siya dunay propeta, ug kon duna man siyay kinahanglang ihatag sa iyang Simbahan, ihatag niya kini sa Presidente, ug ang Presidente mosiguro nga nadawat kini sa mga presidente sa stake ug mission, ingon man sa mga General Authority; ug sila usab mosiguro nga ang mga tawo mapahibalo sa bisan unsang bag-ong kausaban’” (“The Place of the Living Prophet, Seer, and Revelator” [pakigpulong sa Church Educational System religious educators, Hulyo 8, 1964], 11; emphasis gidugang).

Si Presidente Ezra Taft Benson (1899–1994) mitudlo nga kinahanglang mas hatagan natog bili ang mga pulong sa propeta kay sa ubang tawo:

“Tali sa tanang katawhan, kinahanglan nga itutok nato ang atong panan-aw sa walay pagkalipat ngadto sa kapitan, ang propeta, manalagna, ug tigpadayag, ug presidente sa Ang Simbahan ni Jesukristo sa mga Santos sa Ulahing mga Adlaw. Kining tawhana ang nagbarug nga pinakaduol sa tinubdan sa buhing tubig. Adunay daghang langitnong instruksyon para kanato nga madawat lang nato pinaagi sa propeta. Ang maayong paagi sa pagsukod sa imong kahimtang ngadto sa Ginoo mao ang pagsusi kon unsay imong gibati, ug gihimo, mahitungod sa mga dinasig nga pulong sa iyang representante sa kalibutan nga mao ang propeta nga presidente. Ang mga dinasig nga pulong sa presidente dili angayang ibaliwala. Ang tanang tawo may katungod sa inspirasyon ug ang lain-laing mga tawo may katungod sa pagpadayag alang sa piho nilang assignment. Apan usa ra ka tawo ang mobarug isip tigpamâ-bâ sa Simbahan ug sa kalibutan, ug siya ang presidente sa Simbahan. Ang mga pulong sa uban pang mga tawo kinahanglang sukdon subay sa iyang dinasig nga mga pulong” (“Jesus Christ—Gifts and Expectations,” New Era, Mayo 1975, 16).

2.3

Ang Ginoo Nangulo sa Simbahan pinaagi sa Padayong Pagpadayag ngadto sa Iyang Propeta

Ang Ginoo mopadayag sa iyang hunahuna ug kabubut-on ngadto sa Iyang propeta. Si Presidente Spencer W. Kimball (1895–1985) mipamatuod nga ang kalangitan abli gihapon ug nga ang Ginoo mogiya sa Iyang Simbahan sa tanang adlaw:

“Mopamatuod ko sa kalibutan karon nga kapin sa usa ka siglo og tunga ang milabay ang puthaw nga kisame natangtang; ang kalangitan sa makausa giablihan, ug sukad nianang panahona ang mga pagpadayag nagpadayon. …

“Sukad nianang halandumong adlaw sa 1820, dugang nga kasulatan padayon sa pag-abut, lakip sa daghan ug mahinungdanong mga pinadayag nga walay hunong nga nagdagayday gikan sa Dios ngadto sa iyang mga propeta dinhi sa yuta. …

“… Among ipamatuod sa kalibutan nga ang pagpadayag padayon ug nga ang mga tipiganan ug mga rekord sa Simbahan naglangkob niining mga pagpadayag nga moabut nga binulan ug inadlaw. Usab among ipamatuod nga aduna, sukad niadtong 1830 dihang ang Ang Simbahan ni Jesukristo sa mga Santos sa Ulahing mga Adlaw giorganisar, ug magpadayon pa kini, padayon sa hangtud, nga adunay propeta, giila sa Dios ug sa iyang katawhan, kinsa padayong mohubad sa hunahuna ug kabubut-on sa Ginoo.

“Karon, usa ka pulong sa pasidaan; Dili nato buhaton ang sayop sa kakaraanan. Daghang modernong mga sakop sa mga relihiyon mituo sa mga Abraham, sa mga Moises, ug sa mga Pablo, apan dili motuo sa mga propeta karon. Ang mga karaan midawat usab sa mga propeta sa unang panahon, apan gisaway nila ug gitunglo ang mga propeta nga diha sa ilang panahon.

“Sa atong panahon, sama sa nangaging panahon, daghang tawo nagtuo nga kon duna may pagpadayag moabut kini pinaagi sa maagnihon kaayo, makatay-og sa kalibutan nga hitabo. Para sa daghan lisud nga dawaton isip pagpadayag kadtong daghan sa kapanahunan ni Moises, sa kapanahunan ni Jose, ug sa kaugalingon natong katuigan—kadtong mga pagpadayag nga miabut sa mga propeta isip lawom, dili malalis nga mga impresyon nga mituhop sa hunahuna ug kasingkasing sa propeta sama sa yamog gikan sa langit o sama sa kaadlawon nga nag-anam og kawagtang sa kangitngit sa kagabhion.

“Kon magpaabut sa katingalahan, ang usa ka tawo mahimong dili hingpit nga makabantay sa makanunayong pagdagayday sa gipadayag nga komunikasyon. Moingon ako, sa tumang pagpaubos, apan usab pinaagi sa gahum ug kusog sa nagdilaab nga pagpamatuod sa akong kalag, nga gikan sa propeta sa Pagpahiuli ngadto sa propeta sa atong kaugalingong panahon, ang linya sa komunikasyon wala maputol, ang awtoridad mapadayunon, usa ka kahayag, masanagon ug matuhupon, nga padayon sa pagdan-ag. Ang tunog sa tingog sa Ginoo maoy usa ka mapadayunong huni ug pangamuyo nga naglanoglanog. Hapit mag-usa og tunga ka siglo nga walay pagkabalda” (“Revelation: The Word of the Lord to His Prophets,” Ensign, Mayo 1977, 77–78; emphasis gidugang).

2.4

Ang Pulong sa Ginoo ngadto sa Buhing Propeta Tukma Gayud sa Panahon ug Pinakaimportante Kaayo Kanato Karon

Ang kalibutan padayong nagkausab. Bag-o ug lahi-lahing mga problema ug daghang pagkalahi sa daang mga problema padayon nga nagpalisud kanato. Ang maalamon ug mapinanggaon natong Amahan sa Langit nasayud sa tanang butang sa dili pa kini mahitabo, ug ipadayag Niya ang mga tubag ug solusyon pinaagi sa Iyang propeta sigun sa panginahanglan. Agig dugang sa paghubad ug pagmatuod sa naa na nga kasulatan, ang propeta molihok isip sulugoon diin ang Ginoo makahatag og bag-ong kasulatan, sumala sa panginahanglan sa katawhan. Namulong ubos sa direksyon sa Espiritu Santo, ang mga pulong sa buhing propeta mas labaw kay sa ubang mga pamahayag sa sama nga butang. Ang dinasig niya nga tambag mahiangay sa mahangturong mga sumbanang kasulatan ug nakatutok sa panginahanglan ug kahimtang sa iyang panahon.

Mahangturon ang mga doktrina ug dili mausab; hinoon, ang Ginoo pinaagi sa Iyang propeta, mahimong mousab sa mga pamaagi ug mga programa, sumala sa panginahanglan sa katawhan. Ang mosunod nga mga ehemplo naghulagway niini nga baruganan:

1. Ang balaod ni Moises gihatag para sa mga anak ni Israel isip “magtatagad sa pag-agak [kanila] ngadto kang Kristo” (Mga Taga-Galacia 3:24; tan-awa usab sa Joseph Smith Translation, Mga Taga-Galacia 3:24 [sa Mga Taga-Galacia 3:24, footnote b sa English LDS nga bersyon sa Biblia]) apan natuman kini dihang ang balaod sa ebanghelyo gihatag ni Jesukristo (tan-awa sa Mga Taga-Galacia 3:23–25; Mosiah 13:27–35; 3 Nephi 9:15–20).

2. Sa dinhi pa si Jesus sa kalibutan, ang ebanghelyo sa kinatibuk-an gitudlo dili lang sa balay ni Israel (tan-awa sa Mateo 10:5–6; 15:24; Marcos 7:25–27). Human sa Iyang Pagkabanhaw, gisugo sa Manluluwas ang mga Apostoles nga isangyaw ang ebanghelyo ngadto sa tanan (tan-awa sa Marcos 16:15; Mga Buhat 10).

3. Sa kapanahunan ni Moises ang Melchizedek Priesthood gikuha gikan sa kinatibuk-ang populasyon sa Israel ug ang Aaronic Priesthood gihatag lamang ngadto sa mga Levite (tan-awa sa D&P 84:24–26; tan-awa usab sa Numeros 8:10–22; Mga Hebreohanon 7:5). Sa kapanahunan ni Kristo ug sa Iyang mga Apostol, ang Melchizedek Priesthood magamit na usab ug ang Aaronic Priesthood gitanyag na ngadto sa mga tawo nga dili mga Levite (tan-awa sa Lucas 6:13–16; Mga Taga-Filipos 1:1; Mga Hebreohanon 7:11–12). Karon ang “matag matinud-anon, takus nga lalaki sa Simbahan mahimo nga modawat sa balaan nga pagkapari uban sa gahum sa paggamit niini nga langitnon nga pagtugot” (Opisyal nga Pahayag 2).

Sama sa kapanahunan ni Noah, ang mga propeta karon naghatag og tingog sa pasidaan.

Si Presidente John Taylor (1808–87) migamit sa mga propeta sa Daang Tugon sa paghulagway nga ang bag-ong mga pagpadayag gikinahanglan sa bag-ong henerasyon:

“Kita nagkinahanglan og buhing kahoy—usa ka buhing tuburan—buhing kahibalo, nga nagagikan sa buhing priesthood sa langit, pinaagi sa buhing priesthood dinhi sa yuta. … Ug gikan sa panahon nga si Adan nakadawat og komunikasyon gikan sa Dios, ngadto sa panahon nga si Juan, diha sa Isla sa Patmos, nakadawat sa iyang komunikasyon, o si Joseph Smith diin ang mga langit naabli alang kaniya, kini sa kanunay nagkinahanglan og bag-o nga mga pagpadayag, gipahiangay sa talagsaon nga mga kahimtang diin ang mga simbahan o mga tawo nahimutang.

“Ang pagpadayag ni Adan wala magtudlo ni Noe sa paghimo og arka; ni ang kang Noe nga pagpadayag misulti ni Lot sa pagbiya sa Sodom; ni walay usa kanila ang naghisgot sa pagbiya sa mga anak sa Isarel gikan sa Ehipto. Kining tanan adunay mga pagpadayag alang sa ilang mga kaugalingon, ug ingon man ni Isaias, Jeremias, Ezequiel, Jesus, Pedro, Pablo, Juan, ug Joseph. Ug kinahanglan nga kita mao usab” (Mga Pagtulun-an sa mga Presidente sa Simbahan: John Taylor [2001], 193).

Si Presidente Wilford Woodruff (1807–98) namulong kabahin sa usa ka miting nga gitambungan ni Propeta Joseph Smith ug ni Brigham Young:

“Milingi si Brother Joseph kang Brother Brigham Young ug miingon, ‘Brother Brigham gusto kong moadto ka sa atubangan ug sultihi kami sa imong mga hunahuna mahitungod sa nasulat nga mga pagpadayag ug sa nasulat nga mga pulong sa Dios.’ Miadto si Brother Brigham sa atubangan, ug gikuha ang Biblia, ug gibutang kini; gikuha ang Basahon ni Mormon, ug gibutang kini; ug gikuha niya ang Basahon sa Doktrina ug mga Pakigsaad, ug gibutang kini sa iyang atubangan, ug miingon siya: ‘Anaa ang mga pulong sa Dios kanato, mahitungod sa buhat sa Dios gikan sa sinugdanan sa kalibutan, kasagaran, hangtud sa atong panahon.’ ‘Ug karon,’ miingon siya, ‘kon ikumpara sa buhing mga orakulo [buhing mga propeta] kana nga mga basahon walay bili kanako; kana nga mga basahon wala maghatag sa direkta nga pulong sa Dios kanato karon, sama sa mga pulong sa Propeta o sa tawo nga naghupot sa Balaang Priesthood sa atong panahon ug henerasyon. Mas maayo nga duna ko sa buhing mga orakulo kay sa tanang sinulat diha sa mga basahon.’ Mao kadto ang pagtulun-an nga iyang gisunod. Dihang nahuman na siya, miingon si Brother Joseph sa kongregasyon: ‘Si Brother Brigham nagsulti kaninyo sa pulong sa Ginoo, ug gisulti niya kaninyo ang tinuod’” (sa Conference Report, Okt. 1897, 22–23; emphasis gidugang).

Si Presidente Boyd K. Packer (1924–2015) sa Korum sa Napulog Duha ka mga Apostoles mitudlo nga ang mga baruganan ug doktrina sa ebanghelyo pabiling mao lang gihapon, bisan og ang pamaagi nga gigamit sa Simbahan usahay i-adjust: “Mga pamaagi, mga programa, ang mga polisiya sa administrasyon, gani ang ubang mga butang kabahin sa organisasyon posible nga usbon. Gawasnon kami, sa pagkatinuod, obligado sa pag-usab niini sa matag karon ug unya. Apan ang mga baruganan, ang mga doktrina, dili gayud mausab” (“Principles,” Ensign, Mar. 1985, 8).

2.5

Ang Ginoo Dili Gayud Motugot sa Buhing Propeta nga Mopahisalaag Kanato

Si Presidente Wilford Woodruff (1807–98) mipahayag nga mabatunan nato ang hingpit nga pagsalig sa direksyon nga gipasubay sa propeta sa pagpangulo sa Simbahan:

“Ang Ginoo dili gayud motugot kanako ni bisan kinsa nga tawo kinsa mibarug ingon nga Presidente niini nga Simbahan sa paggiya kaninyo nga mahisalaag. Kini wala sa palakaw. Kini wala sa hunahuna sa Dios. Kon ako mangahas niana, ang Ginoo mopapahawa kanako gikan sa akong dapit, ug busa Siya mobuhat ngadto ni bisan kinsa nga tawo kinsa mangahas sa paggiya sa mga katawhan sa paghisalaag gikan sa mga orakulo sa Dios ug gikan sa ilang katungdanan” (Opisyal nga Pahayag 1, “Mga Kinutlo gikan sa Tulo ka mga Pakigpulong ni Presidente Wilford Woodruff Mahitungod sa Manifesto”; emphasis gidugang).

Si Presidente Harold B. Lee (1899–1973) mitudlo niini nga baruganan:

“Ikanunay ninyo ang pagtan-aw kaniya nga gitawag sa Ginoo, ug moingon ako kaninyo karon, nahibalo nga anaa ako niini nga katungdanan, dili kamo angayang mabalaka mahitungod sa Presidente sa Simbahan nga mopahisalaag kaninyo, tungod kay ang Ginoo motangtang kaniya sa iyang dapit sa dili pa Niya tugutan nga mahitabo kana” (The Teachings of Harold B. Lee, ed. Clyde J. Williams [1996], 533).

Si Presidente Gordon B. Hinckley (1910–2008) mihatag og susamang kasiguroan sa mga miyembro sa Simbahan:

“Ang Simbahan tinuod. Kadtong mangulo niini usa ra ang tinguha, ug mao kana ang pagbuhat sa kabubut-on sa Ginoo. Magtinguha sila sa iyang direksyon sa tanang butang. Walay desisyon nga importante nga may kalabutan sa Simbahan ug sa katawhan nga himoon nga wala ang mahunahunaong pag-ampo, ngadto sa tinubdan sa tanang kaalam alang sa direksyon. Sunda ang kapangulohan sa Simbahan. Ang Dios dili motugot nga mahisalaag kini nga buhat” (“Be Not Deceived,” Ensign, Nob. 1983, 46; emphasis gidugang).

2.6

Ang Ubang Tawo Motuo sa Nangaging mga Propeta apan Mosalikway sa Buhing mga Propeta

Daghang tawo morespeto sa nangaging mga propeta apan dili modawat sa propeta nga gipadala sa Ginoo kanila sa ilang panahon (tan-awa sa Helaman 13:24–26). Si Presidente Harold B. Lee (1899–1973) mipaambit og kasinatian nga naghulagway niini nga kalagmitan:

“Duna koy higala nga banker sa New York. Mga tuig ang milabay dihang nahimamat nako siya nga kauban si President Jacobson nga nag-preside sa Eastern States Mission nianang higayuna, may maanindot kaming diskusyon. Gihatagan siya ni Presidente Jacobson og kopya sa Basahon ni Mormon nga iyang gibasa, ug mahinamon kaayo siyang misulti sa gitawag niya og mga talagsaong pilosopiya niini. Sa hapit na mahuman ang oras nga tingtrabaho midapit siya namo sa pagsakay sa iyang limousine aron moadto sa mission home ug miuyon kami. Sa among biyahe, samtang gihisgutan niya ang Basahon ni Mormon ug ang iyang ligdong nga pagtahud sa mga pagtulun-an niini, miingon ko, ‘Ah, nganong dili ka mohimo og usa ka butang kabahin niini? Kon gidawat nimo ang Basahon ni Mormon, unsay nagpugong kanimo? Ngano nga dili ka mopasakop sa Simbahan? Nganong dili man nimo dawaton si Joseph Smith, nga usa ka propeta?’ Sa mahunahunaon ug mainampingong paagi, miingon siya, ‘Ah, tingali ang usa ka rason tungod kay si Joseph Smith kadungan-dungan ra nako. Kon siya nagpuyo duha ka libo ka mga tuig ang milabay, ako nagtuo nga ako motuo. Apan tungod kay siya hilabihan ka bag-ohay, siguro, mao ang katarungan nga ako dili makadawat [kaniya isip propeta].

“Ania ang usa ka tawo nga nag-ingon, ako nagtuo sa patay nga mga propeta nga nagpuyo kapin sa libo ka mga tuig ang milabay, apan ako adunay dako nga kalisud sa pagtuo sa usa ka buhi nga propeta.’ Kana nga kinaiya gihimo usab ngadto sa Dios. Ang pag-ingon nga ang kalangitan gisirad-an ug walay pagpadayag karon nagpasabut nga wala kita motuo sa buhi nga Kristo karon, o sa buhi nga Dios karon—gituohan nato ang usa nga dugay nang patay ug wala na. Mao nga kining termino nga ‘buhing propeta’ tinud-anay nga mahinungdanon” (“The Place of the Living Prophet, Seer, and Revelator,” [address to Church Educational System religious educators, Hulyo 8, 1964], 2).

Ang pagpangangkon nga mituo sa patayng mga propeta samtang gisalikway ang buhing propeta karaan na kaayong problema. Ang ubang mga Pariseo sa panahon ni Jesukristo misalikway sa buhi nga Kristo apan midawat ni propeta Moises, kinsa migiya sa Israel kapin na sa 1,000 ka tuig ang milabay. Ug ilang gipasipad-an ang tawo nga giayo ni Jesus, nga nanag-ingon:

“Ikaw tinun-an niya, apan kami mga tinun-an ni Moises.

“Kami nasayud nga ang Dios nakigsulti kang Moises, apan bahin niining [Jesus], ambut tagadiin kini siya” (Juan 9:28–29; tan-awa usab sa Mateo 23:29–30, 34; Helaman 13:24–29).

Mga manggugubot nga naglibut sa Carthage Jail

Mitudlo si Presidente Harold B. Lee (1899–1973) nga ang pagtuo sa pagpadayag kinahanglang maglakip sa mga pagtulun-an sa atong kasamtangan nga propeta:

“Diha dayon nga nahuman ni Presidente David O. McKay ang pagpahibalo sa Simbahan nga ang mga sakop sa First Council sa Seventy giorden nga mga high priest aron madugangan ang ilang kamapuslanon ug mahatagan sila’g awtoridad sa paglihok kon walay makatambong nga General Authority, usa ka seventy nga akong nakasugat … nahasol kaayo. Miingon siya nako, ‘Di ba miingon man si Propeta Joseph Smith nga supak sa kamandoan sa langit ang pagtawag sa mga high priest isip mga presidente sa First Council sa Seventy?’ Ug miingon ko, ‘Ah, nasabtan nako nga miingon siya, apan nahunahuna ba pud nimo nga unsay supak sa kamandoan sa langit niadtong 1840 tingali dili supak sa kamandoan sa langit niadtong 1960?’ Wala siya makahuna-huna niana. Nagsunod na usab siya sa usa ka patay nga propeta, ug nakalimtan niya nga dunay buhing propeta karon. Ingon niana kaimportante ang pagpasabut gayud sa pulong nga buhi.

“Mga tuig kaniadto isip batan-ong misyonaryo mibisita ko sa Nauvoo ug sa Carthage kauban sa akong mission president, ug naghimo kami og missionary meeting didto sa kwarto sa bilanggoan diin nasugatan ni Joseph ug Hyrum ang ilang kamatayon. Gisaysay sa mission president ang makasaysayan nga hitabo nga misangput sa pagpatay ug dayon gitapos pinaagi niining makahuluganong pamahayag: ‘Dihang gipatay si Propeta Joseph Smith, daghang mga santos ang nangamatay sa espiritwal nga paagi dungan ni Joseph.’ Mao usab dihang namatay si Brigham Young: mao usab dihang si John Taylor namatay. … Daghang miyembro sa Simbahan sa espiritwal nga paagi namatay dungan ni Wilford Woodruff, ni Lorenzo Snow, ni Joseph F. Smith, ni Heber J. Grant, ni George Albert Smith. Dunay pipila karon nga tinguha ang pagtuo sa tawo nga patay ug wala na ug sa pagdawat sa iyang mga pulong nga mas dako pa og awtoridad kay sa mga pulong sa buhing awtoridad karon” (Stand Ye in Holy Places [1974], 152–53; emphasis gidugang).

Mga Punto nga Pamalandungan

• Nganong importante ang pagsabut nga ang tanang yawe sa priesthood gihuptan ug gidumala sa usa ka tawo sa matag higayon dinhi sa yuta?

• Unsang mga bintaha ang moabut gikan sa mga pulong sa buhing propeta kon duna na kitay mga pulong sa karaang mga propeta?

• Ang Ginoo misaad nga Siya dili gayud motugot sa Iyang propeta nga mopahisalaag sa Simbahan. Sa unsang paagi kini nga kamatuoran makaapekto sa atong pagkadungog, pagbasa, ug pagsunod sa mga pagtulun-an sa buhing propeta?

Gisugyot nga mga Assignment

• Pag-andam og mubo nga leksyon sa family home evening nga gamiton ang (1) imong nakat-unan gikan niini nga kapitulo, (2) ang kasulatan nga gigamit niini nga kapitulo, ug (3) ang mosunod nga pamahayag gikan ni Presidente Gordon B. Hinckley: “Duna kitay gibatunang propeta o kita walay bisan unsa; ug sa pagbaton og propeta, tanan atong mabatunan” (“We Thank Thee, O God, for a Prophet,” Ensign, Ene. 1974, 122).

• Human mabasa ang mosunod nga mga kasulatan, ipasabut sa usa ka higala o sakop sa pamilya sa unsang paagi ang buhing propeta nahisama kang Moises: Doktrina ug mga Pakigsaad 28:2; 107:91–92; Moises 1:3, 6.

Enrichment Material

Katorse ka Mga Sukaranan [Fundamentals] sa Pagsunod sa Propeta

President Ezra Taft Benson, 1980 Devotional Speeches of the Year (1981), 26–30; emphasis gidugang.

Minahal kong mga kaigsoonan, Akong dungog nga maania ko kauban ninyo karon. Kamong mga estudyante kabahin kamo sa pinili nga batan-ong hererasyon—usa ka henerasyon nga tingali makasaksi sa pagbalik sa Ginoo.

Wala lang magtubo ang gidaghanon sa Simbahan karon, nagtubo kini sa kamatinud-anon ug gani mas importante, ang atong batan-ong henerasyon, isip usa ka pundok, mas matinud-anon pa kay sa mas karaang henerasyon. Gitagana kamo sa Dios alang sa ika-onse nga oras—ang talagsaon ug makahahadlok nga adlaw sa Ginoo. Inyong responsibilidad dili lang aron makatabang og dala sa gingharian sa Dios nga magmadaugon apan sa pagluwas sa kaugalingon ninyong kalag ug maningkamot sa pagluwas niadtong sakop sa inyong pamilya ug pagtahud sa mga baruganan sa dinasig natong konstitusyon.

Aron matabangan kamong makalatas sa importanting mga pagsulay nga nagpaabut sa unahan hatagan ko kamo karon og pipila ka aspeto sa importante kaayong yawe nga kon inyo kining tahuron, makoronahan kamo og himaya sa Dios ug mogawas kamong madaugon bisan sa kabangis ni Satanas.

Sa dili madugay pasidunggan nato ang atong propeta si [Spencer W. Kimball] sa iyang ika-otsenta y singko nga birthday. Sa tibuok Simbahan manganta kita og,“Salamat sa Dios, sa Propeta.” Ania ang importanting yawe—sunda ang propeta—ug karon ania ang katorse ka mga sukaranan sa pagsunod sa propeta, ang Presidente sa Ang Simbahan ni Jesukristo sa mga Santos sa Ulahing mga Adlaw.

Una: Ang propeta mao ang bugtong tawo nga mamulong alang sa Ginoo sa tanang butang.

Sa seksyon 132, bersikulo 7, sa Doktrina ug mga Pakigsaad ang Ginoo misulti mahitungod sa Propeta—ang Presidente—ug miingon: “Wala gayud gawas sa usa sa ibabaw sa yuta sa matag higayon kang kinsa kini nga gahum ug mga yawe niini nga pagkapari natugyan.”

Dayon sa seksyon 21, bersikulo 4–6, miingon ang Ginoo:

“Busa, nagpasabut sa simbahan, ikaw maminaw ngadto sa tanan niya nga mga pulong ug mga sugo diin siya mihatag nganha kanimo ingon nga siya nakadawat [niini], maglakaw sa tanan nga pagkabalaan diha sa akong atubangan;

“Kay ang iyang pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo.

“Kay pinaagi sa pagbuhat niini nga mga butang ang mga ganghaan sa impyerno dili makabuntog batok kanimo.”

Nadungog ba ninyo ang gisulti sa Ginoo mahitungod sa mga pulong sa propeta? Kinahanglan nga kita “maminaw sa tanan niya nga mga pulong”—ingon nga gikan sa “kaugalingon nga ba-ba” sa Ginoo.

Ikaduha: Ang buhing propeta mas labaw nga importante ngari nato kay sa mga sumbanan nga kasulatan.

Si Presidente Woodruff misugilon og usa ka maanindot nga insidente nga nahitabo sa kapanahunan ni Propeta Joseph Smith:

“Maghisgot ko kabahin sa usa ka miting nga akong natambungan sa lungsod sa Kirtland sa bata pa ko. Niana nga miting ang ubang mga pakigpulong gihimo nga mao usab ang gihimo dinhi karon, bahin sa buhing mga orakulo ug bahin sa sinulat nga pulong sa Dios. Ang mao gihapong baruganan gipresentar, bisan dili sama kamalukpanon dinhi, sa diha nga ang usa ka lider sa Simbahan mibarug ug naghisgot niini, ug miingon: ‘Nadawat ninyo ang pulong sa Dios karon dinhi nga anaa sa Biblia, sa Basahon ni Mormon, ug sa Doktrina ug mga Pakigsaad; nadawat ninyo ang sinulat nga pulong sa Dios, ug kamo nga naghatag og mga pagpadayag mopadayag sumala niini nga mga basahon, kay ang nasulat niana nga mga basahon pulong sa Dios. Kinahanglan nga kutob ra kita niini.’

“Sa iyang pagtapos, milingi si Brother Joseph kang Brother Brigham Young ug miingon, ‘Brother Brigham gusto kong moadto ka sa atubang ug sultihi kami sa imong mga hunahuna mahitungod sa buhi nga mga orakulo ug sa nasulat nga mga pulong sa Dios.’ Miadto si Brother Brigham sa atubangan, ug gikuha ang Biblia, ug gibutang kini; gikuha ang Basahon ni Mormon, ug gibutang kini; ug gikuha niya ang Basahon sa Doktrina ug mga Pakigsaad, ug gibutang kini sa iyang atubangan, ug miingon siya: ‘Anaa ang mga pulong sa Dios kanato, mahitungod sa buhat sa Dios gikan sa sinugdanan sa kalibutan, kasagaran, hangtud sa atong panahon. Ug karon,’ miingon siya, ‘kon ikumpara sa buhing mga orakulo kana nga mga basahon walay bili kanako; kana nga mga basahon wala maghatag sa direkta nga pulong sa Dios kanato karon, sama sa mga pulong sa Propeta o sa tawo nga naghupot sa Balaang Priesthood sa atong panahon ug henerasyon. Mas maayo nga duna ko sa buhing mga orakulo kay sa tanang sinulat diha sa mga basahon.’ Mao kadto ang pagtulun-an nga iyang gisunod. Dihang nahuman na siya, miingon si Brother Joseph sa kongregasyon: ‘Si Brother Brigham misulti kaninyo sa pulong sa Ginoo, ug gisulti niya kaninyo ang tinuod.’” [Sa Conference Report, Oktubre 1897, pp. 22–23]

Ikatulo: Ang buhi nga propeta mas importante alang kanato kay sa patay nga propeta.

Ang buhi nga propeta dunay gahum sa TNT. Ang buot nakong ipasabut niana “Today’s News Today.” Ang mga gipadayag sa Dios ngadto ni Adan wala magsugo ni Noe kon unsaon sa paghimo sa Arka. Si Noe nagkinahanglan og kaugalingon niyang pagpadayag. Busa, ang labing importante nga propeta, alang ninyo ug nako, mao ang buhi sa atong adlaw ug kapanahunan diin ang Ginoo mopadayag sa Iyang kabubut-on karon alang kanato. Mao nga ang labing importanting pagbasa nga atong mahimo mao ang bisan unsa nga mga pulong sa propeta … nga anaa matag bulan sa atong mga magasin sa Simbahan. Ang giya nga gihatag kanato alang sa matag unom ka bulan makita diha sa mga pakigpulong sa kinatibuk-ang komperensya, nga giimprinta sa [Liahona] nga magasin.

Nagpasalamat kaayo ko nga ang report sa komperensya karon usa nga gitun-an sa inyong mga klase sa religion—ang kurso nga gitawag og “Mga Pagtulun-an sa Buhing mga Propeta,” number 333. Akong irekomendar kaninyo kana nga klase ug mosugyot nga mokuha mo og kopya sa inyong bookstore sa class manual makaeskwela man kamo niini o dili. …

Pagmatngon niadtong mga tawo nga gustong kontrahon ang patay nang propeta ngadto sa buhing mga propeta, kay ang mga buhing propeta kanunay nga maoy importante.

Ikaupat: Ang propeta dili gayud mopahisalaag sa Simbahan.

Si Presidente Wilford Woodruff miingon: “Moingon ko sa Israel, ang Ginoo dili gayud motugot kanako o ni bisan kinsa nga tawo kinsa mobarug ingon nga Presidente niini nga Simbahan sa pagpahisalaag kaninyo. Wala kini sa programa. Wala kini sa hunahuna sa Dios.” (The Discourses of Wilford Woodruff, gipili ni G. Homer Durham [Salt Lake City: Bookcraft, 1946], pp. 212–213.)

Si Presidente Marion G. Romney misugilon niining insidente nga nahitabo kaniya:

“Nahinudom ko mga tuig ang milabay nga ako ang Bishop ug si Presidente [Heber J.] Grant namulong sa among ward. Human sa miting gihatud nako siya sa pagpauli. … Nagbarug tapad nako, iya kong giagbayan ug miingon: ‘Dodong, kanunaya lang ang pagtuman sa Presidente sa Simbahan, ug kon ugaling pabuhaton ka man og butang, ug sayop kini, ug imong gibuhat, ang Ginoo mopanalangin kanimo niini.’ Dayon dungan sa pagkidhat miingon, ‘Apan dili ka angayang mabalaka. Ang Ginoo dili gayud motugot sa Iyang tigpama-ba nga mopahisalaag sa katawhan.’ [Sa Conference Report, Oktubre 1960, p. 78]

Ikalima: Ang propeta wala magkinahanglan nga magbaton og bisan unsang yutan-ong pagbansay o kredensyal aron makapamulong sa bisan unsang hilisgutan o makabuhat sa bisan unsang butang bisan kanus-a.

Usahay dunay mga tawong mobati nga ang ilang yutan-ong kahibalo sa piho nga butang mas labaw kay sa langitnong kahibalo nga gihatag sa Dios ngadto sa Iyang propeta sa mao gihapon nga butang. Abi nila og ang propeta kinahanglan nga dunay susamang yutan-ong mga kredensyal o training nga ilang naangkon sa dili pa nila dawaton ang bisan unsang isulti sa propeta nga mosukwahi sa ilang mga gitun-an sa yuta. Asa man kutob ang naeskwelahan ni Joseph? Sa gihapon nakahatag siya og mga pagpadayag sa tanang matang sa hilisgutan. Wala pa kitay propeta nga usa ka doctorate sa bisan unsang subject, apan sama sa ginaingon sa usa ka tawo, “Ang usa ka propeta tingali walay nakuhang Ph.D. apan siguradong duna siyay LDS.” Nag-awhag kita og kalibutanong kahibalo sa daghang aspeto, apan hinumdumi nga kon duna man gani pagsumpaki tali sa kalibutanong kahibalo ug sa mga pulong sa propeta, dapigi ang propeta, ug mapanalanginan ka ug molaban kanimo ang panahon.

Ikaunom: Ang propeta dili moingon nga “Kini ang giingon sa Ginoo: aron sa paghatag kanato og kasulatan.

Usahay dunay mga tawo nga makiglantugi sa mga pulong. Tingali moingon sila nga ang propeta mitambag kanato apan dili kita obligado nga mosunod niini gawas kon moingon siya nga usa kini ka sugo. Apan ang Ginoo miingon mahitungod kang Propeta Joseph, “Ikaw maminaw ngadto sa tanan niya nga mga pulong ug mga sugo diin siya mihatag nganha kanimo” (D&P 21:4; mga italic gidugang).

Ug sa paghisgot bahin sa tambag gikan sa propeta, diha sa D&P 108:1, miingon ang Ginoo: “Sa pagkatinuod sa ingon miingon ang Ginoo nganha kanimo, akong sulugoon Lyman: Ang imong mga sala napasaylo, tungod kay ikaw nagsunod sa akong tingog nga moanhi niini nga kabuntagon aron modawat og tambag kaniya kinsa Ako mitudlo” (mga italic gidugang).

Miingon si Brigham Young, “Wala pa gayud ako makasangyaw og usa ka wali ug gipadala kini sa mga anak sa katawhan, nga mahimo nilang dili tawagon nga kasulatan” (Journal of Discourses, 26 vols. [London: Latter-day Saints’ Book Depot], 13:95).

Ikapito: Ang propeta mosulti kanato kon unsay angay natong masayran, dili kon unsay gusto natong masayran kanunay.

“Ikaw nagpahayag kanamo og malisud nga mga butang, labaw kay sa kami makalahutay,” maoy reklamo sa mga igsoon ni Nephi. Apan mitubag si Nephi nga nag-ingon, “Ang mga nakasala naghunahuna nga ang kamatuoran malisud, kay kini mopasakit kanila ngadto sa ilang kasingkasing” (1 Nephi 16:1, 3). O, kon sa pulong pa sa lahi nga propeta, “Ang mga langgam mokapa-kapa kon maigo.”

Miingon si Presidente Harold B. Lee:

“Mahimo nga kamo dili makauyon unsay moabut gikan sa awtoridad sa Simbahan. Mahimo nga kini supak sa inyong politikanhong mga panglantaw. Mahimo nga supak kini sa inyong sosyal nga mga panglantaw. Mahimo nga kini mosamok sa inyong sosyal nga kinabuhi. … Ang inyo ug atong kasiguroan mag-agad kon kita mosunod ba o dili. … Itutok nato ang atong panan-aw sa Presidente sa Simbahan.” [Sa Conference Report, Oktubre 1970, p. 152–153]

Ang buhing propeta gayud ang makaukay sa kalibutan. “Bisan sa Simbahan,” miingon si Presidente Kimball, “daghan ang kalagmitang modayan-dayan sa mga pantiyon sa kanhing mga propeta ug sa hunahuna gibato nila ang mga buhi” (Instructor, 95:257).

Ngano kaha? Tungod kay nasayud ang buhing propeta unsay angay natong hibaloan karon, ug kay mas palabihon sa kalibutan ang propeta nga patay na o kaugalingon ra ang hunahunaon. Ang uban nga gitawag og mga eksperto sa political science gustong maghilom lang ang propeta sa politika. Ang uban kinsa nangangkong may awtoridad sa ebolusyon gustong ang propeta maghilom lang sa ebolusyon. Ug duna pay daghan.

Unsaon nato pagsanong ang mga pulong sa buhing propeta kon sultihan kita niya sa unsay kinahanglan natong masayran, apan dili nato ganahang paminawon, maoy usa ka pagsulay sa atong kamatinud-anon.

Miingon si Presidente Marion G. Romney, “Usa ka sayon nga butang ang pagtuo sa patay nang mga propeta.” Ug gihatag dayon niya kini nga paghulagway:

“Usa ka adlaw sa buhi pa si Presidente Grant, didto ko sa akong opisina nga atbang ra sa karsada human sa kinatibuk-ang komperensya. Usa ka tawo miduol sa pakigkita kanako, gulangon nga lalaki. Nasagmuyo kaayo siya mahitungod sa gipamulong sa komperensya sa pipila ka Kaigsoonan, lakip kanako. Mailhan nako sa iyang sinultihan nga gikan siya sa laing nasud. Human nga napahilom nako siya igo nga makapaminaw siya nako, miingon ko, ‘Nganong mianhi ka sa Amerika?’ ‘Mianhi ko tungod kay gisultihan ko sa propeta sa Dios sa pag-anhi.’ ‘Kinsa nga propeta,’ mipadayon ko. ‘Wilford Woodruff.’ ‘Mituo ka ba nga si Wilford Woodruff propeta sa Dios?’ ‘Oo, mituo ko.’ ‘Mituo ka ba nga si Presidente Joseph F. Smith propeta sa Dios?’ ‘Oo, sir.’

“Dayon miabut ang makahuluganon kaayong pangutana. ‘Mituo ka ba nga si Heber J. Grant propeta sa Dios?’ Ang iyang tubag, ‘Siguro angay siyang maghilom bahin sa kwarta sa gobyerno nga itabang sa mga tigulang.’

“Karon sultihan ko kamo nga sa iyang baruganan kanang tawhana padulong na sa apostasiya. Giwagtang niya ang iyang mga kahigayunan alang sa kinabuhing dayon. Mao usab ang tanan kinsa dili makasunod sa buhing Propeta sa Dios.” [Sa Conference Report, Abril 1953, p. 125]

Ikawalo: Ang propeta dili limitado sa pangatarungan sa tawo.

Dunay mga panahon nga kinahanglan kang mopili tali sa mga pagpadayag sa Dios ug sa pangatarungan sa tawo—tali sa propeta ug sa politiko o sa propesor. Miingon si Propeta Joseph Smith, “Bisan unsa ang gimando sa Dios kini matarung gayud, bisan unsa pa kini, bisan tuod mokabat pa og dugay una nato makita ang hinungdan” (Scrapbook of Mormon Literature, vol. 2, p. 173).

Makatarunganon ba sa usa ka doktor sa mata nga sultihan siya sa pag-ayo og tawong buta pinaagi sa pagluwa sa yuta, maghimo og lapok, ug ipahid kini sa mata sa tawo dayon sultihan siyang hugasan kini sa hugaw nga linaw? Apan mao gayud kini ang paagi nga gihimo ni Jesus sa usa ka tawo, ug naayo siya. (Tan-awa sa Juan 9:6–7.) Makatarunganon ba kaha ang pag-ayo sa sanglahon pinaagi sa pagsulti sa tawo nga manghugas og pito ka higayon sa usa ka piho nga suba? Apan mao gayud kini ang gisulti ni propeta Eliseo nga buhaton sa sanglahon, ug naayo siya. (Tan-awa sa 2 Mga Hari 5.)

“Kay ang akong mga hunahuna dili mao ang inyong mga hunahuna, ni ang inyong mga dalan akong mga dalan, nag-ingon ang Ginoo. Kay maingon nga ang mga langit hataas kay sa yuta, mao man ang akong mga dalan labi pang hataas kay sa inyong mga dalan, ug ang akong mga hunahuna kay sa inyong mga hunahuna.” [Isaias 55:8, 9]

Ikasiyam: Ang propeta makadawat og pagpadayag sa bisan unsang butang—temporal o espiritwal.

Miingon si Brigham Young:

“Ang uban sa nangulo nga katawhan sa Kirtland supak kaayo sa Propeta nga si Joseph sa pagpangilabut sa mga temporal nga kalihokan. …

“Sa publiko nga miting sa mga Santos, miingon ko, ‘Kamong mga Elder sa Israel, … ang uban ninyo pweding magdrowing sa linya nga nagbahin sa espiritwal ug temporal nga Gingharian sa Dios, aron makasabut ko niini?’ Walay usa nila ang makahimo. …

“Akong hagiton ang tanang tawo sa kalibutan sa pagtino sa dalan nga subayon sa Propeta sa Dios, o sa pagtino sa iyang katungdanan, ug hangtud asa siya kutob, sa pagdumala sa mga butang nga temporal o espiritwal. Ang mga butang nga temporal ug espiritwal dili gayud magkabulag, ug dili gayud sa hangtud.” [Journal of Discourses, 10:363–364]

Ikanapulo: Ang propeta mahimong mangilabut sa publikong mga butang.

Kon ang mga tawo matarung gusto nila ang pinakamaayong tawo nga mangulo kanila sa gobyerno. Si Alma ang pangulo sa Simbahan ug sa gobyerno diha sa Basahon ni Mormon, si Joseph Smith mayor kaniadto sa Nauvoo, ug si Brigham Young ang gobernador sa Utah. Si Isaias nalambigit kaayo sa paghatag og tambag mahitungod sa mga butang nga politikal ug sa iyang mga pulong ang Ginoo Mismo miingon, “Mahinungdanon ang mga pulong ni Isaias” (3 Nephi 23:1). Kadtong motangtang sa mga propeta gikan sa politika motangtang sa Dios gikan sa gobyerno.

Ika-onse: Ang duha ka grupo nga maglisud kaayo sa pagsunod sa propeta mao ang mga mapahitas-on nga makinaadmanon ug ang mga mapahitas-on nga adunahan.

Ang mga makinaadmanon mobati lang nga dinasig ang propeta kon siya mouyon kanila; kay og dili, ang propeta naghatag lang sa iyang opinyon—namulong nga usa ka tawo. Ang mga adunahan mobati nga wala kinahanglana nga maminaw sila sa ubos nga propeta.

Sa Basahon ni Mormon atong mabasa:

“O kanang maliputon nga laraw sa usa nga dautan! O ang pagkakawang, ug ang pagkahuyang, ug ang kabuang sa mga tawo! Kon sila makinaadmanon sila nagtuo nga sila maalamon, ug sila dili mopatalinghug ngadto sa tambag sa Dios, kay sila misalikway niini, nagdahum nga sila nasayud sa ilang mga kaugalingon, busa, ang ilang kaalam mga binuang ug kini dili mapahimuslan kanila. Ug sila malaglag.

“Apan ang pagkamakinaadmanon maayo kon sila mopatalinghug ngadto sa mga tambag sa Dios.

“Ug kinsa kadto nga motuktok, ngadto kaniya siya moabli; ug ang mga maalamon, ug ang mga makinaadmanon, ug sila nga mga adunahan, kinsa mapagarbuhon tungod sa ilang mga kahibalo, ug mga kaalam, ug ilang mga katigayunan—oo, sila mao ang iyang gipanghimaraut; ug gawas kon sila mosalikway niini nga mga butang, ug maghunahuna sa ilang mga kaugalingon nga mga buang atubangan sa Dios, ug magpaubos ngadto sa kinahiladman sa pagkamapainubsanon, siya dili moabli ngadto kanila.” [2 Nephi 9:28, 29, 42; mga italic gidugang]

Ika-dose: Ang propeta dili kinahanglan nga inila sa kalibutan o sa mga kalibutanon.

Kon ang propeta mopadayag sa kamatuoran mobahin kini sa katawhan. Ang dunay matinuorong kasingkasing mopatalinghug sa iyang mga pulong, apan ang dautan mobaliwala sa propeta o mobatok kaniya. Kon ang propeta maghisgot sa mga sala sa kalibutan, ang kalibutanong mga tawo gustong mopatak-om sa ba-ba sa propeta, o mosanong sama nga walay propeta, kay sa maghinulsol sa ilang mga sala. Ang pagka-popular dili gayud usa ka sukdanan sa kamatuoran. Daghang propeta ang gipatay o gipalayas. Kon magkaduol na kita sa ikaduhang pag-anhi sa Ginoo, makalaum ka nga samtang ang katawhan sa kalibutan magkadautan, dili na kaayo nila ilhon ang propeta.

Ika-trese: Ang propeta ug ang iyang mga magtatambag mao ang Unang Kapangulohan—pinakataas nga korum sa Simbahan.

Sa Doktrina ug mga Pakigsaad, gi-refer sa Ginoo ang Unang Kapangulohan nga maoy “labing taas nga konseho sa Simbahan” (107:80) ug nag-ingon, “bisan kinsa ang modawat kanako, modawat kanila, ang Unang Kapangulohan, kinsa Ako mipadala” (112:20).

Ika-katorse: Ang propeta ug ang kapangulohan—ang buhing propeta ug ang Unang Kapangulohan—sunda sila ug panalanginan ka; isalikway sila ug mag-antus ka.

Si Presidente Harold B. Lee misaysay niini nga insidente gikan sa kasaysayan sa Simbahan:

“Gisugilon kini nga istorya sa nag-unang kapanahunan sa Simbahan—ilabi na, tingali sa Kirtland—diin pipila sa nangulong mga kaigsoonan sa presiding councils sa Simbahan sekretong nagmiting ug gisulayan og plano kon unsaon sa pagtangtang kang Propeta Joseph gikan sa pagkapangulo. Nasayop sila nga ilang gidapit si Young sa usa niining mga sekreto nga miting. Iya silang gibadlong, human niya madungog ang katuyoan sa ilang miting. Usa kini ka bahin sa iyang giingon: ‘Dili ninyo maguba ang pagkapili sa propeta sa Dios, apan pwede ninyong putlon ang hilo nga nagbugkos kaninyo ngadto sa propeta sa Dios ug itambog ang inyong kaugalingon sa impyerno.’” [Sa Conference Report, Abril 1963, p. 81]

Sa kinatibuk-ang komperensya sa Simbahan miingon si Presidente N. Eldon Tanner:

“Klaro kaayo ang gisulti sa Propeta niadtong Biyernes sa buntag, gisulti niya unsay atong mga responsibilidad. …

“Human niana gisultihan ko og usa ka tawo, ‘Abi nimo, dunay mga tawo sa atong nasud nga mituo sa pagsunod sa Propeta sa tanang gituohan nilang eksakto, apan kon sa ilang hunahuna dili na gani eksakto, ug dili madanihon para nila, molahi na dayon.’ Miingon siya, ‘Niana nahimo silang kaugalingon nilang propeta. Pagbut-an nila unsay gusto sa Ginoo ug unsay dili gusto sa Ginoo.’

“Naghunahuna ko kon unsa katinuod, ug unsa ka delikado kon magsugod kita sa pagpili asa sa mga pakigsaad, asa sa mga sugo ang atong tumanon ug sundon. Kon modesisyon kita nga dili nato tumanon o sundon ang uban niini, gibutang nato ang balaod sa Ginoo sa kaugalingon natong mga kamot ug nahimo kitang kaugalingong mga propeta, ug tuohi ko, mahisalaag kita, tungod kay mga mini kitang propeta sa atong kaugalingon kon dili nato sundon ang Propeta sa Dios. Ayaw, dili gyud ta magpili tali niining mga sugo, kon asa niini ang atong tumanon ug dili tumanon.” [Sa Conference Report, October 1966, p. 98; mga italic gidugang]

“Tan-awa ang Kapangulohan ug dawata ang mga instruksyon,” miingon si Propeta Joseph Smith (Mga Pagtulun-an ni Joseph Smith, gipili ni Joseph Fielding Smith [Salt Lake City: Deseret Book Co., 1938], p. 161). Apan wala kini buhata ni Almon Babbitt, ug sa Doktrina ug mga Pakigsaad seksyon 124, bersikulo 84, miingon ang Ginoo: “Ug uban sa akong sulugoon nga si Almon Babbitt, adunay daghan nga mga butang nga Ako wala mahimuot; tan-awa, siya nangandoy sa pagpahimutang sa iyang pulong kay sa pulong diin Ako mi-orden, gani kana nga Kapangulohan sa akong Simbahan.”

Sa pagtapos, atong i-summarize kining mahinungdanon kaayo nga yawe, kining “Katorse ka Mga Sukaranan sa Pagsunod sa Propeta,” kay ang atong kaluwasan nag-agad niini.

Una: Ang propeta mao lang ang tawo nga makapamulong alang sa Ginoo sa tanang butang.

Ikaduha: Ang buhing propeta mas mahinungdanon alang kanato kay sa sumbanang mga kasulatan.

Ikatulo: Ang buhing propeta mas importante alang kanato kay sa patay nga propeta.

Ikaupat: Ang propeta dili gayud mopahisalaag sa Simbahan.

Ikalima: Ang propeta wala magkinahanglan nga magbaton og bisan unsang partikular nga yutan-ong training o mga kredensyal aron makapamulong sa bisan unsang hilisgutan o mobuhat sa bisan unsang butang sa bisan unsang panahon.

Ikaunom: Ang propeta dili moingon nga “Kini ang giingon sa Ginoo” aron sa paghatag kanato og kasulatan.

Ikapito: Ang propeta mosulti kanato kon unsay kinahanglan natong masayran, dili kanunay kon sa unsay gusto natong masayran.

Ikawalo: Ang propeta dili limitado sa pagpangatarungan sa tawo.

Ikasiyam: Ang propeta makadawat og pagpadayag sa bisan unsang butang, temporal man o espiritwal.

Ikanapulo: Ang propeta mahimong mangilabut sa publikong mga butang.

Ika-onse: Ang duha ka grupo nga maglisud kaayo sa pagsunod sa propeta mao ang mga mapahitas-on nga makinaadmanon ug ang mga mapahitas-on nga adunahan.

Ika-dose: Ang propeta dili kinahanglan nga inila sa kalibutan o sa mga kalibutanon.

Ika-trese: Ang propeta ug ang iyang mga magtatambag mao ang Unang Kapangulohan—pinakataas nga korum sa Simbahan.

Ika-katorse: Ang propeta ug ang kapangulohan—ang buhing propeta ug ang Unang Kapangulohan—sunda sila ug panalanginan ka; isalikway sila ug mag-antus ka.

Mopamatuod ko nga kining katorse ka mga sukaranan [fundamentals] sa pagsunod sa buhing propeta tinuod. Kon gusto kitang mahibalo unsa kamaayo ang atong pagbarug uban sa Ginoo, nan pangutan-on nato ang atong kaugalingon unsa kamaayo ang atong pagbarug uban sa Iyang mortal nga kapitan. Unsa ka duol nato napahiuyon ang atong kinabuhi sa mga pulong sa pinili sa Ginoo—sa buhing propeta, sa presidente sa Simbahan, ug sa Korum sa Unang Kapangulohan?

Hinaut nga panalanginan kitang tanan sa Dios nga maminaw sa propeta ug sa kapangulohan atol sa mga kritikal ug mga adlawng malisud nga anaa sa unahan maoy akong pag-ampo. Sa pangalan ni Jesukristo. Amen.