Talateu

Naʻe pehē ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá:

“ʻOku tataki ʻe he kau palōfita moʻui ʻa e siasí ni he ʻahó ni. ‘Oku malu taha e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he ako ke fakafanongo mo talangofua ki he ngaahi lea mo e ngaahi fekau ʻa e ʻEikí kuo fakafou mai ʻi he kau palōfita moʻuí. ‘Oku ou fakaʻamu ʻe mahino ki he māmaní e mahuʻinga ʻo e ʻi ai ha palōfita moʻui he māmaní he ʻaho ní” (Robert D. Hales, “Hear the Prophetʻs Voice and Obey,” Ensign, May 1995, 17).

ʻI hoʻo hoko ko e faiako ki he kalasi ko ʻení, ʻokú ke maʻu e faingamālie ke tokoniʻi hoʻo kau akó ke nau fakatokangaʻi e tāpuaki ʻo e moʻui ʻi ha kuonga ʻoku ʻi ai ai e kau palōfita moʻuí ʻi he māmaní. Te ke lava ‘o tokoniʻi kinautolu ke nau ʻiloʻi ʻoku folofola mai e Tamai Hēvaní he ʻahó ni ʻo hangē ko ia kuó Ne fai ʻi he ngaahi kuonga kotoa pē. Ko e taimi ʻoku lea mālohi ai e kau palōfitá ki he kāingalotu ʻo e Siasí, ko e meʻa ʻoku nau lea ʻakí ko e “fakakaukau ʻa e ʻEikí, … leʻo ʻo e ʻEikí, pea mo e mālohi ʻo e ʻOtuá ki he fakamoʻuí” (T&F 68:4).

Ako ʻi he faʻa lotu e ngaahi potufolofolá mo e ngaahi lea ʻo e konifelenisi lahí. Fekumi ki he Laumālie Māʻoniʻoní ʻi hoʻo fili e ngaahi ʻekitivitī ako ke tokoniʻi e kau akó ke tupulaki fakalaumālié. Tokoni‘i e kau akó ke nau ʻiloʻi, mahino, mo moʻui ʻaki e ngaahi moʻoni naʻe fakahā ʻi he ngaahi konifelenisi ʻa e Siasí.

ʻOku tānaki atu e tohi lēsoni ko ʻení ki hoʻo teuteú ʻaki hono ʻoatu ha fakamatala talateu ki he ngaahi vahé, ʻoatu e ngaahi potufolofolá mo e ngaahi tefitoʻi moʻoni ʻo e ongoongoleleí, mo fokotuʻu atu e ngaahi founga te ke lava ai ʻo tokoni ke mahino ki he kau akó e tokāteliné mo fakaʻaongaʻi ia ʻi heʻenau moʻuí.

Anga Hono Fokotuʻutuʻu ʻo e Tohí ni

‘Oku fakataumuʻa ‘a e Kalasi Fakalotu 333 ke akoʻi ʻi ha semesitā pē ʻe taha. ‘Oku ʻi ai ha vahe ʻe fitu ʻi he tohi lēsoni ko ʻení:

Ko ʻEtau Fie Maʻu e Kau Palōfita Moʻuí
Ko e Palōfita Moʻuí: Ko e Palesiteni ʻo e Siasí
Ko e Hokohoko ʻi he Kau Palesitenisií
Ko e Kōlomu ʻo e Kau Palesitenisī ʻUluakí
Ko e Kōlomu ʻo e Kau ʻAposetolo ʻe Toko Hongofulu Mā Uá
Konifelenisi Lahí
Ko Hono Ako e Ngaahi Lea ʻo e Konifelenisi Lahí

ʻOku fakakau ʻi he ʻuluaki vahe ʻe onó e kanotohi mo e ngaahi fakakaukau te ke lava ʻo fakaʻaongaʻi ko ha maʻuʻanga tokoni ʻi hoʻo akoʻi e ngaahi fakavaʻe fakatokāteline ki he kalasi ko ʻení. ʻI hoʻo hoko ko e faiakó te ke lava ʻo akoʻi e ngaahi lēsoni ko ʻení ʻi he ʻuluaki kalasi ʻe ono ʻo e semesitaá pe vahevahe kinautolu he semesitaá kotoa. ʻOku ʻomi ʻe he vahe 7 ha ngaahi fakakaukau ʻi he ngaahi founga lahi ki hono akoʻi e ngaahi lea ʻa e kau Taki Māʻolungá mei he makasini Ensign pe Liahona ʻo e konifelenisi fakamuimuitahá. ‘Oku totonu ke akoʻi e toenga ʻo e ngaahi taimi kalasí mei he makasini ʻo e konifelenisí.

‘Oku fakataumuʻa e ngaahi lēsoni ʻi he tohi lēsoni ko ʻení ke miniti ʻe 50 hono lōloá. Kapau ‘oku fakahoko hoʻo kalasí tuʻo ua he uike, ʻoku totonu ke fakafuofua ki he miniti ʻe 50 e lōloa ʻo e lēsoni takitaha. Kapau ‘oku fakahoko hoʻo kalasí tuʻo taha he uike, ʻoku totonu ke fakafuofua ki he miniti ʻe 90 e lōloa ʻo e lēsoni takitaha. Te ke lava ʻo akoʻi ha taha ʻo e ngaahi lēsoni mei he tohi lēsoni ko ʻení ki ha kalasi miniti ʻe 90 pehē ki ha nāunau mei he Ensign pe Liahona. ʻE fie maʻu ke ke liliu e nāunau ʻo e kalasí ke feʻunga mo hoʻo ngaahi tūkunga fakafaiako fakafoʻituituí. Lolotonga ha semesitā angamaheni, ʻe fakaʻaongaʻi ʻe he fakahinohino mei he Ensign pe Liahona ha peseti nai ʻe 75 ʻo e taimi kalasí.

‘Oku ʻi ai ha konga ʻe tolu ʻo e vahe takitaha ʻi he tohi lēsoni ko ʻení:

Talateu
Ngaahi Tokāteline mo ha Ngaahi Tefitoʻi Moʻoni
Ngaahi Fokotuʻu ki hono Akoʻí

Talateu

ʻOku fakaʻilongaʻi ʻe he konga ki he “Talateu” ha ngaahi kaveinga lahi ʻoku ʻi he vahé pea ʻe tokoni atu ke ke vakai vave ki he kaveingá fakalūkufua.

Ngaahi Tokāteline mo ha Ngaahi Tefitoʻi Moʻoni

‘Oku ʻi he konga ʻoku ui ko e “Ngaahi Tokāteline mo ha Ngaahi Tefitoʻi Moʻoni” ha lisi ʻo e ngaahi tokāteline tefito mo e ngaahi tefitoʻi moʻoni ʻoku fekauʻaki mo e kaveinga ʻo e lēsoni ko iá. Makehe mei he ngaahi tokāteline mo e ngaahi tefitoʻi moʻoni kuo ʻoatu ʻi he tohi lēsoní, mahalo te ke ʻilo ha ngaahi moʻoni mahuʻinga kehe ʻi he folofolá pe makasini Ensign pe Liahona ʻo e konifelenisí ʻokú ke ongoʻi ʻokú ne feau e ngaahi fie maʻu hoʻo kau akó. Ko hoʻo totonu ʻeni ko e faiakó. Ka neongo ia, mahalo te ke fie vakaiʻi e ngaahi vahe kehe ʻi he tohi lēsoní kimuʻa pea akoʻi ha ngaahi tefitoʻi moʻoni makehé. Kapau ‘oku ʻikai fakamatalaʻi ha tefitoʻi moʻoni pe tokāteline ʻi he nāunau fakalēsoni kuo fokotuʻu atú, ʻe malava ke fakamatalaʻi ia ʻi ha vahe kehe ʻokú ne poupouʻi kakato ange e kaveingá.

Ngaahi Fokotuʻu ki hono Akoʻí

‘Oku ʻomi ʻe he konga ki he “Ngaahi Fokotuʻu ki hono Akoʻí” ha fakakaukau pau ki hono akoʻi e ngaahi meʻa takitaha naʻe hā ʻi he “Ngaahi Tokāteline mo ha Ngaahi Tefitoʻi Moʻoni.” ʻE lava foki ke maʻu ʻi he konga ko ʻení ha ngaahi fokotuʻu ki hono akoʻi ʻo ha ngaahi fakakaukau mahuʻinga ʻoku ʻikai ʻoatu ʻi he “Ngaahi Tokāteline mo e Ngaahi Tefitoʻi Moʻoni.” ‘Oku tokoni atu e “Ngaahi Fokotuʻu ki hono Akoʻí” ke ke teuteu e nāunau fakalēsoní mo e ngaahi ʻekitivitī akó. Fulihi e ngaahi fokotu‘u ʻo e lēsoní ke feʻunga mo e ʻātakai ʻo e loki akó, ngaahi fie maʻu ʻa e tokotaha akó, mo e lahi ʻo e taimí.

Ngaahi Tokoni Fakafaiako Kehe

Ko e fakamatala ‘i he tohi lēsoni ʻa e tokotaha akó. ʻOku maʻu ʻi he Tohi Lēsoni ʻa e Tokotaha Akó ki he Ngaahi Akonaki ʻa e Kau Palōfita Moʻuí (Lēsoni Fakalotu 333) ha fakamatala mahu‘inga naʻe fai ʻe he kau Taki Māʻolunga mo e kau ʻŌfisa Māʻolunga ʻo e Siasí. ʻOku tataki koe ʻe he ngaahi fakakaukau lahi ki hono akoʻí ʻi he tohi lēsoni ʻa e faiakó ki he fakamatala ʻoku maʻu ʻi he tohi lēsoni ʻa e tokotaha akó. Poupou‘i e kau akó ke fakaʻaongaʻi e maʻuʻanga tokoni ko ʻení ʻi loto mo tuʻa fakatouʻosi ʻi he kalasí. ʻIkai ngata aí, ʻoku fakaʻosi ʻaki ʻa e vahe takitaha ʻo e tohi lēsoni ʻa e tokotaha akó ha ngaahi konga ʻoku ui ko e “Ngaahi Meʻa ke Fakalaulauloto ki Aí” mo e “Ngaahi Ngāue ke Faí.” ʻOku tokoni e ngaahi fehuʻi ʻi he “Ngaahi Meʻa ke Fakalaulauloto ki Aí” mo e ngaahi ʻekitivitī ʻi he “Ngaahi Ngāue ke Faí” ke fakakaukau lelei ange e kau akó ki he ngaahi fakalahi ʻoku ʻoatu ki he laukongá. Ko e konga lahi ʻo e ngaahi fehuʻi mo e ngaahi ʻekitivitī ko ení ʻe lava foki ke liliu ki he ngaahi fakakaukau ki hono akoʻí ke fakaʻaongaʻi ʻi he kalasí.

Ngaahi lea ʻa e kau palōfita moʻuí, kau Taki Māʻolungá, mo e kau ʻŌfisa Māʻolunga ʻo e Siasí. ‘I hoʻo ako e ngaahi lea lolotonga kuo fai ʻi he konifelenisi lahí mo e ngaahi fakamatala ʻi he makasini ʻa e Siasí, kumi ki ha nāunau ʻe lava ʻo tokoni ki he ngaahi lēsoni ʻi he tohi lēsoni ko ʻení.

Uepisaiti ʻa e Seminelí mo e ʻInisititiuti Fakalotú. ʻOku ʻi ai foki ha uepisaiti ʻa e Seminelí mo e ʻInisititiuti Fakalotú ko e institute.lds.org, mo ha ngaahi ma‘uʻanga tokoni lahi ʻe lava ke tokoni atu.

Founga hono Fakaʻaongaʻi ʻo e Tohi Lēsoni Ko ʻEní

Faka‘aongaʻi e ngaahi lea konifelenisi lahi ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ki he lahi tahá ke tokoni ki he tohi lēsoni ko ʻení ʻi hoʻo teuteu e ngaahi lēsoní mo fakahoko e fakamatalá ʻi he kalasí. Ko e ngaahi pōpoaki ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻoku ʻi he ngaahi makasini ʻa e Siasí, ngaahi lea ʻoku fai ʻi ha ngaahi taimi kehe, pe ko e ngaahi fanongonongo fakamafaiʻi ʻoku faʻa ʻomi ʻe he Kau Taki Māʻolungá ʻe lava foki ʻo fakaʻaongaʻi.

ʻE lava ke fakaʻaongaʻi e tohi lēsoní ʻi ha ngaahi founga lahi, kau ai e ngaahi meʻá ni:

ʻE lava ke ke fili ke muimui ofi ki he fokotuʻu fakafaiakó ʻo hangē ko ia ʻoku fakaikiiki atú.
ʻE lava ke ke fakaʻaongaʻi e tohi lēsoní ko ha fakahinohino ako ke tokoni atu ke ke ʻiloʻi e ngaahi tefitoʻi moʻoni mo e ngaahi kaveinga ke fakatupulaki ʻi hoʻo lēsoní.

Fakakaukau‘i e Meʻa Te Ke Akoʻí

Fili e ngaahi tokāteline, ngaahi tefitoʻi moʻoni, ngaahi meʻa naʻe hoko, mo e ngaahi founga fakaʻaongaʻi ʻoku mahuʻinga taha ke ʻiloʻi mo fakahoko ʻe hoʻo kau akó. Ko e konga lahi taha ʻo e meʻa te ke akoʻí ʻe maʻu ia mei he tohi lēsoni ko ʻení mo e tohi lēsoni ʻa e tokotaha akó; ka neongo ia, fakapapauʻi ʻokú ke fakakaukau ke fakaʻaongaʻi e folofolá ke poupouʻi e ngaahi tefitoʻi moʻoni mei he ongo tohi lēsoní. Tuku ke tataki koe ʻe he ueʻi ʻa e Laumālie Māʻoniʻoní mo e ngaahi fie maʻu hoʻo kau akó ʻi hoʻo fakakaukauʻi e meʻa ke akoʻí. (Ki ha fakahinohino lahi ange ʻi he meʻa ke akoʻí, vakai ki he Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], konga 4.3.3.)

‘Oku ʻikai fie maʻu ia ke ke haʻisia ke akoʻi kotoa e tokāteline mo e ngaahi tefitoʻi moʻoni ʻoku fokotuʻu atu ʻi he vahe takitaha, pea ʻe ngalingali te ke ʻiloʻi ʻoku ʻikai ke ke maʻu ha taimi feʻunga ke fai ia. Naʻe faleʻi mai ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

“Manatu‘i, ko e meʻa mahuʻinga taha ʻokú ke fakamuʻomuʻá ʻoku ʻikai ko hono akoʻi kotoa e nāunaú kapau ʻoku ʻuhinga ia he ʻikai mahino lelei. Fai e meʻa te ke malava ʻo faí ke mahino” (Richard G. Scott, “To Understand and Live Truth” [lea ki he kau faiako fakalotu ʻa e CES, Feb. 4, 2005], 2).

Fakakaukau‘i e Founga Te Ke Faiako Aí

Manatu‘i e fatongia ʻo e tokotaha akó ʻi hoʻo fili e ngaahi founga fakafaiako kehekehe ki ha lēsoni. ʻI he lea ki he kau faiako fakalotú, naʻe pehē ʻe Palesiteni J. Lūpeni Kalake ko e Siʻí (1871–1961), “ʻOku ʻikai fie maʻu ke mou fakaoloolo atu ʻi he tuʻa ʻo e toʻu tupu ʻilo fakalaumālie ko ʻení, ʻo fanafana atu ʻi honau telingá ʻa e lotú” (“Ko e Taumuʻa ke Tulifua ki ai ʻa e Siasí ʻi he Akó” [lea ki he kau taki ʻo e seminelí mo e ʻinisititiuti fakalotú, 8 ‘Aokosi, 1938], 11). ʻE lava ke ke ʻamanaki ʻe matuʻotuʻa fakalaumālie ʻa e kau akó mo fakamātoato ʻenau toʻo honau fatongia ko e kau ako. Ko e taimi ʻoku fokotuʻutuʻu ai hoʻo lēsoní, tokoniʻi hoʻo kau akó ke nau fatongia ʻaki ʻenau akó. ʻE ala ʻaonga ʻa e ngaahi fokotuʻu ko ʻení:

Poupou‘i e kau akó ke lau e ngaahi konga ʻo e tohi lēsoni ʻa e tokotaha akó kuo vahe angé pe ko e ngaahi lea ʻo e konifelenisi lahí mo e ngaahi folofola fakafekauʻakí kimuʻa he lēsoni takitaha.
‘Oange ki he kau akó e faingamālie ke ʻeke mo tali ai e ngaahi fehuʻí. Ko ha me‘angāue mahuʻinga e ngaahi fehuʻi leleí ʻi hono tokoniʻi e kau akó ke fatongia ʻaki ʻenau akó. Mahalo te ke fie fakaafeʻi e kau akó he taimi ʻe niʻihi ke nau omi ki he kalasí mo ha fehuʻi kuo ʻosi hiki. Tokoni ki he kau akó ke nau ʻilo ʻe lava ke mahuʻinga ange ki he founga ʻo e akó ʻa e ngaahi fehuʻi ʻoku nau ʻeke ʻi he kalasí ʻi he ngaahi fehuʻi ʻoku ʻeke ʻe he faiakó. ‘I heʻenau ako e ngaahi akonaki ʻa e kau palōfita moʻuí, poupouʻi e kau akó ke nau ʻiloʻi e ngaahi tefitoʻi moʻoní, fakamatalaʻi e ʻuhingá, vahevahe e ngaahi fakakaukaú, pea fakamoʻoni ki he ngaahi moʻoni ʻoku nau akó. Fokotuʻu ha ʻātakai ʻa ia ʻe ongoʻi ai ʻe he kau akó ʻa e Laumālie ʻo e ʻEikí mo maʻu ʻa e faingamālie pea mo e fatongia ke fakafanongo pea lea ke fefakamaamaʻaki ʻiate kinautolu (vakai, T&F 88:122).
Kumi ha ngaahi faingamālie ke fakaʻaongaʻi ai e ngaahi potufolofola mahuʻingá ko ha fakamoʻoni hono ua mo e tolu ki he ngaahi tefitoʻi moʻoni ʻokú ke akoʻi mei he nāunau fakalēsoní. Tuku ha taimi ki he kau akó ke nau ʻiloʻi ai e ngaahi potufolofola ʻokú ne fakalahi e ʻiló pe fakamoʻoni ki he ngaahi tefitoʻi moʻoni ʻoku akoʻí.
Faka‘ehiʻehi mei hono fakaʻaongaʻi taha pē e fakamatalá ko e founga fakafaiakó. Kae tuku e kau akó ke nau ʻilo e ngaahi moʻoní ʻaki hono tataki kinautolu ki he ngaahi moʻoni kuó ke maʻu mo e niʻihi kehé. Naʻe akoʻi ʻe ‘Eletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku tokoniʻi ʻe he kau faiako leleí e kau akó ke kumi e ngaahi talí ʻiate kinautolu pē:

“Kuó u fakatokangaʻi ha tōʻonga angamaheni ʻi he kau faiako naʻa nau tokoniʻi lahi taha ʻeku moʻuí. Naʻa nau tokoniʻi au ke u feinga ke ʻilo ʻi he tuí. Naʻe ʻikai ke nau fie fai mai ha tali faingofua ki he ngaahi fehuʻi faingataʻá. Ko hono moʻoní, naʻe ʻikai pe ke nau ʻomi ʻe kinautolu ha tali ʻe taha. Ka neongo ia, naʻa nau fakahinohino pē ʻa e halá mo tokoniʻi au ke u fakahoko ʻa e laka ke maʻu ai ʻeku tali pē ʻaʻakú. Naʻe ʻikai ke u fakahoungaʻi maʻu pē ʻa e founga ko ʻení, ka naʻe fakafaingofuaʻi ʻe he meʻa ne hokó ke mahino kiate au, ko e tali ko ia ʻoku fai ʻe ha taha ʻoku ʻikai ke faʻa manatuʻi fuoloa ia, ʻo kapau ʻe manatuʻi. Ka ko ha tali ne tau ʻilo pe maʻu ʻi hono fakaʻaongaʻi ʻo e tuí, ko e angamahení, ʻoku faʻa puke maʻu ia ʻi he toenga ʻo e moʻuí” (David A. Bednar, “Fekumi ki he ʻIló ʻi he Tui,” Liahona, Sepitema 2007, 17).

Kumi ha ngaahi founga fakafaiako ʻe tokoni ki he kau akó ke nau longomoʻui ange ʻi he akó kae ʻikai ko hono ʻoange pē fakamatalá. (Ki ha fakamatala lahi ange ʻi he founga ke faiako aí, vakai ki he Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], konga 4.3.4.)
Fakaafeʻi e kau akó ke fakaʻaongaʻi e faleʻi ʻa e kau palōfita moʻuí. Tokoni‘i kinautolu ke nau hoko ko e kau ākonga ʻo Sīsū Kalaisi kae ʻikai ko ha kau ako pē ʻo e ongoongoleleí. Naʻe toe faleʻi mai ʻe ʻEletā Petinā kiate kitautolu ke tokoniʻi e kau akó ke nau ako ke “ope atu ia ʻi he mahino fakaʻatamaí mo hono pukepuke pea mo hono fakamanatu mai ʻo e fakamatalá” kae lava ʻo tokoniʻi kinautolu ke “liʻaki ʻa e tangata fakakakanó (vakai, Mōsaia 3:19), ke liliu [honau] lotó (vakai, Mōsaia 5:2)” (“Fekumi ki he ʻIló ʻi he Tui,” 20).

Fulihi ʻo e Tohi Lēsoní Maʻanautolu ʻoku Faingataʻaʻia Fakaesinó

Ko e taimi ʻoku akoʻi ai e kau ako ʻoku faingataʻaʻia fakaesinó, ʻe ala fulihi ʻe he kau faiakó ʻa e lēsoní ke fenāpasi mo ʻenau ngaahi fie maʻú. Hangē ko ʻení, ʻoku fie maʻu ki he ngaahi lēsoni lahi ke lau leʻolahi pe fakalongolongo ʻa e kau akó pea tohi ha ngaahi tali ʻi ha pepa. Ke fakafeʻungaʻi maʻá e kau ako ʻoku ʻikai ke nau lava ʻo laukongá, te ke lava ʻo fakakaukau ke ke lau leʻolahi ʻe koe, lau ʻe hano kaungā ako, pe ko hono fakaʻaongaʻi ʻo e ngaahi nāunau tomuʻa hikí ke lau mei ai ʻa e folofolá (hangē ko ha mp3, CD, pe tepi). ʻI he taimi ʻoku fie maʻu ai ʻe he lēsoní ha ngaahi tali ʻoku tohiʻí, ʻe lava ke ke poupouʻi e kau akó ke nau tali ngutu pē.

Ki he ngaahi fakakaukau mo e ngaahi ma‘uʻanga tokoni lahi ange, ʻalu ki he disabilities.lds.org pea mo e konga ʻi he Seminaries and Institutes of Religion Policy Manual ‘i he “Adapting Classes and Programs for Students with Disabilities.”