Pe alofa ea le Atua ia te a’u?

Ioe, e alofa le Atua ia te oe. Na te silafia ma alofa i Ana fanau uma, ma e silafia foi e Ia luitau o loo outou feagai. Na faamatala mai e Peresitene Thomas S. Monson: “E le suia lava lena alofa. … Ua i ai iina mo oe pe a e faanoanoa pe fiafia, lotovaivai pe tumu i le faamoemoe. O le alofa o le Atua ua i ai iina mo oe e tusa lava pe e te manaomiaina pe leai. O loo i ai lava iina i taimi uma” (“Ou te Le Tuua Lava Oe,” Liahona, Nov. 2013, 123–24).

Na aoao mai Peresitene Russell M. Nelson: “E sili atu nai lo se isi lava mea, e finagalo lo tatou Tama i Ana fanau e filifili e toe foi atu i le aiga ia te Ia. O mea uma e faia e Ia e faaosofia e Lona finagalo naunautai” (“The Love and Laws of God” [Brigham Young University devotional, Sept. 17, 2019], speeches.byu.edu).

E leai se isi mea e sili atu ona faailoa ai le alofa o Iesu Keriso nai lo Lona finagalo ia foai mai Lona soifua e togiola mo agasala a tagata, ia totogi mo mafatiaga ma amioletonu uma, ma motusia ai noataga o le oti mo tagata uma (tagai i le Alema 7:11–13).

Na aoao mai e Sister Sharon Eubank: “Ou te molimau atu e alofagia outou. Ua silafia e le Alii le malosi o loo outou taumafai ai. O loo outou agai i luma. Ia faaauau pea. Na te silafia a outou osigataulaga uma lē mavaaia ma faitauina i latou mo lo outou lelei ma le lelei o i latou e te alofa i ai. E le o faia fua la outou galuega. E le o tuua na o outou” (“O Keriso: O Le Malamalama e Susulu i le Pogisa,” Liahona, Me 2019, 75–76).