O le a le tulaga o le Ekalesia i le fesuiai o itupa?

“Ua fautua mai taitai o le Ekalesia e tetee i le faia o se taotoga faafoma’i po o se ta’otoga faatino mo le faamoemoe e taumafai e sui i le itupa faafeagai mai le itupa na fanau mai ai se tagata, (“toe suia itutino sa”). Ua fautua mai taitai faapea o le faia o nei faatinoga o le a mafua ai tapuiā’iga o le avea ai ma tagata o le Ekalesia.

“Ua fautua mai foi taitai e tetee i suiga faaagafesootai [e i ai teuga ma vali ma suiga faaletulafono]. O se fesuiaiga faaagafesootai ua aofia ai le suia o le faiga o lavalava po o teuga, pe suia se igoa po o suinauna, e faailoa atu ai se tagata e ese mai le itupa na fanau mai ai. Ua fautua mai taitai faapea o i latou o e faia fesuiaiga faaagafesootai o le a feagai ma nisi o tapuiā’iga o le avea ai ma tagata o le Ekalesia mo le umi o lenei fesuiaiga.

“O tapuiā’iga ua aofia ai le mauaina po o le faaaogaina o le perisitua, mauaina po o le faaaogaina o se pepa faataga o le malumalu, ma le mauaina o nisi o valaauga faale-Ekalesia. E ui o nisi o avanoa o le avea ai ma tagata o le Ekalesia ua tapuiā’ia, ae e talia lava le auai i isi gaoioiga a le Ekalesia.

“O tagata e faafoliga i le itupa faafeagai latou te le’i sailia ni faiga faafomai, taotoga, po o se fesuiaiga faaagafesootai i le itupa faafeagai ma o loo agavaa, e mafai ona maua ni valaauga faale-Ekalesia, pepa faataga o le malumalu, ma sauniga o le malumalu.

“O nisi tamaiti, talavou, ma tagata matutua ua faatonuina togafitiga o mone e se fomai faapolofesa laiseneina e tuumāmāina ai le lagona pagatia faaleitupa pe tuuitiitia ai mafaufauga pule i le ola. A o le’i amataina e se tagata ia ituaiga o togafitiga, e taua le malamalama o ia (ma matua o se tamaitiiti) i tulaga lamatia e ono oo i ai ma mea e manuia ai. Afai e le o taumafai nei tagata o le Ekalesia e fesuiai i le itupa faafeagai ma o loo agavaa, e mafai ona latou maua ni valaauga faale-Ekalesia, pepa faataga o le malumalu, ma sauniga o le malumalu.

“Afai e tonu i se tagata o le Ekalesia e suia lona igoa e manao ai po o suinauna o le tuatusi, o le igoa e manao ai e mafai ona ta’ua i le vaega o le igoa e manao ai i luga o le pepa faamaumau. Atonu e valaau le tagata i le igoa e manao ai i totonu o le uarota” (“Transgender Individuals,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.6.21).

“E leai se tulaga o le Ekalesia e faasaga i mafuaaga a tagata ua faailoaina i latou lava o tagata ua faafoliga i le itupa faafeagai” (Tusitaulima Aoao, 38.6.21).