O le a le mea e tatau ona ou faia pe a ua ou popolevale pe atuatuvale pe i ai mafaufauga e fia pule i le ola?

Laina Fesoasoani mo Faalavelave

Afai ua e mafaufau atonu o le a e faatamaia oe lava, sue vave loa se fesoasoani. Valaau se laina fesoasoani vilifua mo faalavelave faafuasei i lau eria.

E mafai ona maua ni laina fesoasoani i le “In Crisis? Talk Now.” (ChurchofJesusChrist.org).

O lagona o le popolevale e moni ma e mafai ona lofituina ma faavaivaia ai. Afai ua e lagona le popolevale pe ua i ai ni mafaufauga o le faatamaiaina o oe lava, faamolemole talanoa i se tasi e te talitonuina. Afai o e i ai i le Iunaite Setete, vili le National Suicide Prevention Lifeline. Tagai i punaoa a le Ekalesia mo le pule i le ola, e pei o le Thoughts of Suicide, i le Life Help and Self-Reliance i luga o le ChurchofJesusChrist.org po o le polokalama o le Gospel Library. E mafai foi ona fesoasoani ia faufautua faapolofesa ma le tausiga faafomai.

Popolevale ma le Pule i le Ola

Ua faaalia i sailiiliga e faapea afai ua e aafia i lagona o le fesuiai o itupa, atonu ua e i ai se tulaga lamatia maualuga mo le popolevale po o le pule i le ola. Afai ua e popolevale pe o mafaufau e pule i le ola, faamolemole saili le fesoasoani a se polofesa tomai faapitoa o le mafaufau OAoaoga Faavae ma Mataupu Faavae ma isi punaoa e mafai ona maua i le vaega o le pule i le ola o le Life Help and Self-Reliance i luga o le ChurchofJesusChrist.org po o i le polokalama o le Gospel Library.

I le konafesi aoao ia Oketopa 2019, na faasoa mai ai e Sister Reyna I. Aburto lona lava aafiaga i le tiga na i ai faatasi ma le popolevale ma le pule i le ola. Sa ia faamatala mai e faapea “o le popolevale, atuatuvale, ma isi ituaiga o mafatiaga faalemafaufau ma faalelagona … e mafai ona taufaasese mai ai se ala tatou te vaai ifo ai ia i tatou lava, o isi, ma e oo lava i le Atua …

“ … E pei o soo se vaega o le tino, e aafia foi le faiai i faama’i, mafatiaga ma vailaau le paleni …

“I nisi tulaga, o le mafuaaga o le atuatuvale po o le popolevale e mafai ona iloaina, ae o nisi taimi e ono faigata atu ona iloatino … O togafitiga po o vailaau i lalo o le taitaiga a polofesa ua aoaoina e mafai foi ona manaomiaina.

“O gasegase faalemafaufau pe faalelagona e lē togafitia e mafai ona taitai atu i le faateleina o le faaesea, malamalama sese, mafutaga malepelepe, faamanualia o le tagata lava ia, ma e oo lava i le pule i le ola …

“O le mea e faanoanoa ai, o le toatele o ē mafatia mai le ogaoga o le atuatuvale e faataumamaoina i latou lava mai o latou uso a Au Paia ona latou te lagona e lē fetaui i latou i nisi o uiga latou te mafaufauina. E mafai ona tatou fesoasoani ia latou iloa ma lagona latou te auai moni faatasi ma i tatou. E taua le iloaina o le atuatuvale e le o se taunuuga o vaivaiga, po o se taunuuga masani foi o le agasala. E ‘lauolaola pe a faalilolilo ae solomuli pe a i ai le agaalofa’ [Jane Clayson Johnson, Silent Souls Weeping (2018), 197]” (“I Mala i Manu, Iesu Afio Mai!,” Liahona, Nov. 2019, 57–58).

Faalagolago i le Atua

Na saunoa ma le agaalofa ia Elder Jeffrey R. Holland e uiga i le taulimaina o le popolevale: “Po o a lava ou luitau, o’u uso e ma tuafafine—faalemafaufau pe faalelagona pe faaletino po o le a lava—aua e te filifili e faasagatau i le taua tele o le ola e ala i le faamutaina! Faalagolago i le Atua. Taofimau i Lona alofa. Ia iloa o le a i ai le aso e susulu mai ai se malamalama ma mou atu ai le pogisa o tiga faaletino” (“Peiseai o se Ipu ua Nutililii,” Liahona, Nov. 2013, 42).