’Ua here ānei te Atua iā’u ?

’Oia, ’ua here te Atua ia ’oe. ’Ua ’ite ’oia ’e ’ua here ’oia i te tā’āto’ara’a o tāna mau tamari’i, ’e ’ua ’ite ’oia i te mau tāmatara’a tā ’oe e fa’aruru nei. ’Ua fa’ata’a mai te peresideni Thomas S. Monson ē : « E ore roa taua here ra e taui… Tē vai noa ra te reira nō ’outou, ’ia pe’ape’a ’e ’aore rā, ’ia ’oa’oa ’outou, ’ia paruparu te mana’o ’e ’aore rā, ’ia tupu te ti’aturira’a. Tē vai noa ra te here o te Atua nō ’outou noa atu ē, e mana’o ’outou ’ua ti’a ’e ’aore rā ’aita ’ia farii [’outou] i te reira. Tē vai noa ra te reira i te mau taime ato’a » (« ’Aita roa tātou e haere ’o tātou ana’e », Liahona, Novema 2013, 123–24).

’Ua ha’api’i mai te peresideni Russell M. Nelson : « Hau atu i te mau mea ato’a, ’ua hina’aro tō tātou Metua i tāna mau tamari’i ’ia mā’iti e ho’i i te fare i pīha’i iho iāna ra. Te mau mea ato’a tāna e rave, nō roto mai ïa i teie hina’aro rahi tōna » (« Te here ’e te mau ture a te Atua » [purera’a i Brigham Young University, 17 nō Setepa 2019], speeches.byu.edu).

’Aita atu e fa’a’itera’a nō te here o Iesu Mesia maori rā tōna hina’aro ’ia hōro’a i tōna ora ’ei ’aufau nō te hara o te ta’ata nei, ’ei ho’ona i te mau māuiui ato’a ’e te mau mea ti’a ’ore ’e ’ei ’ōfati i te mau tā’amura’a o te pohe nō tātou pā’āto’a nei (hi’o Alama 7:11–13).

’Ua ha’api’i mai te tuahine Sharon Eubank : « Tē faʼaʼite nei au ē, e feiā herehia ’outou. ’Ua ’ite te Fatu tē fa’aitoito nei ’outou i te tāmata noa. Tē haere nei ’outou i mua. ’A tāmau ā. Tē ’ite nei ’oia i tā ’outou mau fa’atusiara’a mo’emo’e ato’a ’e tē tai’o nei ’oia i te reira nō tō ’outou maita’i ’e te maita’i o te feiā ’o tā ’outou i here. ’Aore tā ’outou ’ohipa i faufa’a ’ore. ’Aita ’outou i vai ’o ’outou ana’e » (« Te Mesia : Te māramarama e ’ana’ana i roto i te pōiri », Liahona, Mē 2019, 75–76).