E aha te mana’o o te ’Ēkālesia nō ni’a i te tauira’a i tōna ihota’ata ?

« Rātou e mana’o ’o roto nō te hete ’aita e tū’ati nei i tō rātou mero ’āpeni i te fānaura’a […] e mea pinepine tō rātou mau fifi ’ātitirau. ’Ia ravehia rātou—nā reira ato’a tō rātou ’utuāfare ’e te mau hoa—ma te vai ara noa, ma te marū, ma te aumihi ’e ma te here huru Mesia […]

« Nō te ta’ata ti’a mā ’aita e rave i te tauira’a ihota’ata mai tō rātou mero ’āpeni i te fānaura’a, nā roto i te tāpū, te rāpa’aura’a ’aore rā i te pae tōtiare, e nehenehe rātou e fāna’o i te mau fāna’ora’a ato’a nō te ti’ara’a melo o te ’Ēkālesia.

« E a’o te feiā fa’atere o te ’Ēkālesia ’eiaha e tītau i te tauira’a ihota’ata mai tō rātou mero ’āpeni i te fānaura’a, nā roto i te tāpū, te rāpa’aura’a ’aore rā i te pae tōtiare. (Te tauira’a ihota’ata i te pae tōtiare, te aura’a ra, e parau te hō’ē ta’ata ’e e fa’ahōho’a ho’i iāna i te ’āpeni ’ē atu i tōna mero ’āpeni i te fānaura’a, mai te tauira’a i tōna huru ’ahu, te fa’anehenehera’a, te i’oa ’e te mono i’oa.) E fa’aara te feiā fa’atere ē, mai te mea e ravehia te reira, e mau ’ōpanira’a ti’ara’a melo o te ’Ēkālesia te hope’a. I roto i teie mau ’ōpanira’a, tē vai nei te ’orera’a e fāri’i ’aore rā e fa’a’ohipa i te autahu’ara’a, te ’orera’a e fāri’i ’e e fa’a’ohipa i te parau fa’ati’a nō te hiero, nā reira ato’a te ’orera’a e fāri’i i te tahi mau pi’ira’a i roto i te ’Ēkālesia […]

« Nō te mau melo tei rave i te mau ta’ahira’a nō te taui i te ihota’ata ’e i muri iho ’ua fa’aho’i i ni’a i tō rātou mero ’āpeni i te fānaura’a, ’e ’ua ti’a mā ’e ’ua parau fafau e ha’apa’o i te mau fa’auera’a a te Atua, e nehenehe tā rātou e fāna’o i te mau fāna’ora’a ato’a nō te ti’ara’a melo o te ’Ēkālesia.

« E mea ta’a ’ē roa te vaira’a o terā ’e terā ta’ata, ’e e nehenehe e taui i roto i te tau. Nō te mau melo e mana’o ’o roto nō te hete ’aita e tū’ati nei i tō rātou mero ’āpeni i te fānaura’a, ’aore rā ’o tē parau nei ia rātou ’ei huriāhete, nā reira ato’a nā metua ’aore rā nā tīa’i tamari’i tauti’a ’ore e fa’aruru nei i teie huru ’ohipa, tē fa’aitoitohia nei rātou ’ia tītau i te parau a’o mai roto mai i tō rātou ’episekōpo. E ’āpo’o te mau ’episekōpo ’e te peresideni titi nō te hi’o i te vaira’a o te ta’ata tāta’itahi ma te vai ara ’e te here huru Mesia. E tītau te mau peresideni titi ’e misiōni i te parau a’o a te peresidenira’a ārea » (General Handbook: Serving in The Church of Jesus Christ of Latter-day Saints, 38.6.23).