24. Kapenaumi

O Kapenaumi, ka tiko ena baravi ena vualiku ni Wasawasa ko Kalili, sai koya na vanua a vakayacori kina vakalevu na nona veiqaravi e Kalili ko Jisu (Maci. 9:1–2; Marika 2:1–5). E dua na vanua ni qoli kei na caka bisinisi bibi ka vuavuai vinaka, ka nodra itikotiko na kai Matanitu tani ka vakakina vei ira na Jiu. Na lewena ena imatai ni senijiuri e sega ni sivia na 1,000. E koto o Kapenaumi ena lomadonu ni dua na sala rogolevu ni nodra veilakoyaki na dauveivoli, ka vakavolivolita na qele bulabula. Era tara eke na sotia ni Roma eso na vale ni sisili kei na vale ni maroroi iyaya. E dina ni levu na cakamana a vakayacori eke, era sega ga ni ciqoma na tamata na nona veiqaravi na iVakabula. Sa cudruva kina na koro ko Jisu (Maci. 11:20, 23–24). Ni sa yaco na gauna sa vakarusai ko Kapenaumi ka lala tu ga.

Na ka e Yaco: A kilai tu ko Kapenaumi me nona “koro sara ga” na iVakabula (Maci. 9:1–2; Marika 2:1–5). A cakava ena vanua oqo e vuqa sara na cakamana. Me vaka oqo, a vakabulai ira e vuqa na tamata (Marika 1:32–34), e okati kina na nona tamata e dua na turaganivalu (Luke 7:1–10), na vugoi Pita (Marika 1:21, 29–31), o koya na tamata tauvi paralase ka tukuci sobu mai dela ni vale (Marika 2:1–12), kei na tamata sa malai na ligana (Maci. 12:9–13). Eke talega a vakasava tani kina ko Jisu e vuqa na yalo velavela (Marika 1:21–28, 32–34), vakatura cake na luvei Jairo goneyalewa mai na mate (Maci. 9:18–19, 23–26; Marika 5:22–24, 35–43), ka solia na ivunau ni madrai ni bula ena valenilotu mai Kapenaumi (Joni 6:24–59). A vakasalataki Pita na Turaga me toboka mai e dua na ika ena Wasawasa ko Kalili, dolava na gusuna, ka raica e dua na ilavo kaukamea me sauma kina e dua na ivakacavacava (Maci. 17:24–27).