1 Ta napasamak a kalpasan ti panagtarigagayko a mangammo kadagiti banag a nakita ti amak, ken namatiak nga kabaelan ti Apo nga ipakaammona kaniak dagitoy, bayat ti panagtugawko a mangut-utob iti pusok impannak ti Espiritu ti Apo, wen, iti kasta unay ti kangatona a bantay, a saanko pay pulos idi a nakitkita ken saanko pay pulos idi a naad-adakan.

2 Ket kinuna ti Espiritu kaniak: Kitaem, ania ti tartarigagayam?

3 Ket kinunak: Tarigagayak a maimatangan dagiti banag a nakita ti amak.

4 Ket kinuna ti Espiritu kaniak: Mamatika kadi a nakita ti amam ti kayo nga imbagana?

5 Ket kinunak: Wen, ammom a patiek amin dagiti balikas ti amak.

6 Ket idi nasaok dagitoy a balikas, impukkaw ti Espiritu iti napigsa a timek, a kinunana: Hosanna iti Apo, ti kangatuan a Dios; ta isu ti Dios iti amin a daga,wen, uray pay iti amin. Ket nagasatka, Nephi, gapu ta mamatika ti Anak ti kangatuan a Dios; gapuna, maimatangamto dagiti banag a tartarigagayam.

7 Ket kitaem maited daytoy a banag kenka a kas maysa a tanda, ta kalpasan a nakitam ti kayo a nangted ti bunga a naramanan ti amam, makitamto met ti lalaki a bumabbaba manipud iti langit, ket maimatangamto isuna; ket kalpasan a naimatangam isuna paneknekamto nga isu ti Anak ti Dios.

8 Ket napasamak a kinuna ti Espiritu kaniak: Kitaem! Ket kimmitaak ket naimatangak ti kayo; ket kas daytoy iti kayo a nakita ti amak; ket nagsaway ti pintasna, wen, maartapanna iti amin a kinapintas; ken ti kinapurawna daytoy ket artapanna ti kinapuraw ti naiparrais a niebe.

9 Ket napasamak a kalpasan ti pannakakitak iti kayo, kinunak iti Espiritu: Nabigbigko a pinapakitam kaniak ti kayo a kapatgan iti amin.

10 Ket kinunana kaniak: Ania ti tarigagayam?

11 Ket kinunak kenkuana: Maammuak koma ti kaipapananna daytoy—ta nakisaoak kenkuana a kas makisasao iti maysa a tao; ta nakitak a kalanglangana ti tao; ngem nupay kasta, ammok nga isu ti Espiritu ti Apo; ket nakisao kaniak a kas iti pannakisao ti tao iti sabali.

12 Ket napasamak a kinunana kaniak: Kitaem! Ket kimmitaak a kas iti ikikitak kenkuana, ket saanko a nakita isuna; gapu ta nagpukawen isuna iti imatangko.

13 Ket napasamak a kimmitaak ket nakitak ti naindaklan a siudad ti Jerusalem, ken dagiti pay sabali a siudad. Ket naimatangak ti siudad ti Nazaret; ken iti siudad ti Nazaret naimatangak ti birhen, ket kasta la unay ti kinalinis ken kinapudawna.

14 Ket napasamak a nakitak ti langit a naglukat; ket bimmaba ti anghel ken nagtakder iti sangok; ket kinunana kaniak: Nephi, ania ti makitam?

15 Ket kinunak kenkuana: Maysa a birhen, a kapintasan ken kalinisan kadagiti amin a birhen.

16 Ket kinunana kaniak: Ammom kadi ti pannakipulapol ti Dios?

17 Ket kinunak kenkuana: Ammok nga ay-ayatenna dagiti annakna; nupay kasta, saanko nga ammo ti kaipapanan iti amin a banag.

18 Ket kinunana kaniak: Kitaem, ti birhen a naimatangam nga ina ti Anak ti Dios, iti nainlasagan a kasasaad.

19 Ket napasamak a naimatangak ti panangipanaw kenkuana ti Espiritu; ket kalpasan ti panangipanaw kenkuana ti Espiritu iti uneg ti sumagmamano a kanito, nagsao kaniak ti anghel, a kinunana: Kitaem!

20 Ket kimmitaak ket naimatangak manen ti birhen, a mangub-ubba ti maladaga.

21 Ket kinuna ti anghel kaniak: Kitaem ti Kordero ti Dios, wen, isu ti Anak ti Agnanayon nga Ama! Ammom kadin ti kaipapanan ti kayo a nakita ti amam?

22 Ket sinungbatak isuna, a kinunak: Wen, isu daytoy ti ayat ti Dios, a nagwaras kadagiti puso ti sangkataoan; gapuna, isu ti kangrunaan a matarigagayan iti amin a banag.

23 Ket kinasaonak, kinunana: Wen, ken isu ti kangrunaan a makaparag-o iti kaunggan.

24 Ket kalpasan ti panangibagana kadagitoy a balikas, kinunana kaniak: Kitaem! Ket kimmitaak, ket naimatangak ti Anak ti Dios nga agturong iti ayan dagiti annak ti tattao; ket nakitak ti adu a nagparintumeng a nagdaydayaw kenkuana.

25 Ket napasamak a nakitak a ti pagkaptan a landok, a nakita ti amak, ti balikas ti Dios, a nagturong iti ubbog ti nabiag a danum, wenno iti kayo ti biag; a dagitoy a danum ti mangibagi ti ayat ti Dios; ken kasta met a nakitak a ti kayo ti biag ti mangibagi iti ayat ti Dios.

26 Ket kinuna manen kaniak ti anghel: Kitaem ket imatangam ti pannakipulapol ti Dios!

27 Ket kinitak ken naimatangak ti Mannubbot iti lubong, a nasao ti amak; ket naimatangak met ti propeta a mangisagana iti dana a pagnaanna. Ket napan ti Kordero ti Dios kenkuana ket binuniaganna; ket kalpasan ti pannakabuniagna, naimatangak ti panaglukat ti langit, ket bimmaba ti Espiritu Santo manipud iti langit ket napan kenkuana a kalanglanga ti kalapati.

28 Ket naimatangak a napan nagserbi isuna kadagiti tattao, nga addaan iti bileg ken naindaklan a dayag; ket nagtitipon dagiti ummong a dumngeg kenkuana; ket naimatangak a pinapanawda kadakuada.

29 Ket naimatangak met dagiti sabali pay a sangapulo-ket-dua a simmursurot kenkuana. Ket napasamak nga inyadayo ida ti Espiritu manipud iti sangok, ket saanko idan a nakita.

30 Ket napasamak a nagsao manen ti anghel kaniak, a kinunana: Kitaem! Ket kimmitaak, ket naimatangak ti panaglukat manen ti langit, ket nakitak a bumabbaba dagiti anghel kadagiti annak ti tattao; ket nagserbida kadakuada.

31 Ket kinasaonak manen, a kinunana: Kitaem! Ket kimmitaak, ket naimatangak ti Kordero ti Dios makipinpinnulapol kadagiti annak ti tattao. Ket naimatangak ti ummong dagiti tattao a masaksakit, ken agsagsagaba iti nadumaduma a kita ti sakit, ken linukonan dagiti sairo ken dagiti dakes nga espiritu; ket nagsao ti anghel ken impakitana kaniak amin dagitoy a bambanag. Ket naagasanda babaen ti bileg ti Kordero ti Dios; ken napapanaw dagiti sairo ken narugit nga espiritu.

32 Ket napasamak a nagsao manen ti anghel kaniak, a kinunana: Kitaem! Ket kimmitaak ket naimatangak ti Kordero ti Dios, nga innala dagiti tattao; wen, kinedngan iti lubong ti Anak ti agnanayon a Dios; ket nakitak ken paneknekak.

33 Ket siak, ni Nephi, nakitak ti pannakaingatona iti krus ken napapatay gapu kadagiti basol ti lubong.

34 Ket kalpasan ti pannakapapatayna nakitak dagiti ummong iti daga, a naguummong a sangsangkamaysa a mangbusor kadagiti apostol ti Kordero; ta kastoy ti awag ti anghel ti Apo kadagiti sangapulo-ket-dua.

35 Ket nagtitipon dagiti ummong iti daga; ket naimatangak nga addada iti dakkel ken nalawa a pasdek, a kas iti pasdek a nakita ti amak. Ket kinasaonak manen ti anghel ti Apo, a kinunana: Immatangam ti lubong ken ti siribna daytoy; wen, immatangam a nagkaykaysa ti balay ti Israel a manglaban kadagiti sangapulo ket dua nga apostol ti Kordero.

36 Ket napasamak a nakitak ken paneknekkak a ti dakkel ken nalawa a pasdek ti pagtangsit ti lubong; ket natnag daytoy, ket nakaro unay ti pannakatnagna. Ket kinasaonak manen ti anghel ti Apo, a kinunana: Kastanto ti pannakadadael ti amin a pagilian, puli, pagsasao, ken tattao a mangbusor kadagiti sangapulo-ket-dua nga apostol ti Kordero.