1 At ito ay nangyari na sinabi sa akin ng anghel: Tingnan, at masdan ang iyong mga binhi, at gayundin ang mga binhi ng iyong mga kapatid. At tumingin ako at namasdan ang lupang pangako; at nakamalas ako ng maraming tao, oo, maging ito ay kasindami ng buhangin sa dagat.

2 At ito ay nangyari na namasdan kong sama-samang nagtipon ang maraming tao upang makidigma, ang isa laban sa isa; at nakamalas ako ng mga digmaan, at alingawngaw ng mga digmaan, at malawakang patayan sa pamamagitan ng espada sa aking mga tao.

3 At ito ay nangyari na namasdan kong lumipas ang maraming salinlahi, alinsunod sa mga digmaan at alitan sa lupain; at namasdan ko ang maraming lungsod, oo, maging hindi ko mabilang ang mga yaon.

4 At ito ay nangyari na nakakita ako ng abu-abo ng kadiliman sa ibabaw ng lupang pangako; at nakakita ako ng mga pagkidlat, at nakarinig ako ng mga pagkulog, at mga paglindol, at lahat ng uri ng malalakas na ingay; at nakita ko ang lupa at ang mga naglalakihang bato, na nabiyak ang mga yaon; at nakita ko ang mga bundok na nangaguho at nagkapira-piraso; at nakita ko ang mga kapatagan ng lupa na nagbitakan ang mga yaon; at nakita ko ang maraming lungsod na nagsilubog ang mga yaon; at nakita ko ang marami na ang mga yaon ay nangasunog ng apoy; at nakita ko ang marami na nangagbuwalan sa lupa, dahil sa mga pagyanig nito.

5 At ito ay nangyari na matapos kong makita ang mga bagay na ito, nakita ko ang ulap ng kadiliman, na ito ay nawala sa balat ng lupa; at dinggin, nakita ko ang maraming tao na hindi nalipol dahil sa mga dakila at kakila-kilabot na paghuhukom ng Panginoon.

6 At nakita kong bumukas ang kalangitan, at ang Kordero ng Diyos na bumababa mula sa langit; at bumaba siya at ipinakita ang kanyang sarili sa kanila.

7 At nakita ko rin at pinatototohanan na ang Espiritu Santo ay napasalabindalawang iba pa; at sila ay inordenan ng Diyos, at pinili.

8 At nangusap ang anghel sa akin, sinasabing: Masdan ang labindalawang disipulo ng Kordero, na mga piniling maglingkod sa iyong mga binhi.

9 At sinabi niya sa akin: Naaalala mo pa ba ang labindalawang apostol ng Kordero? Dinggin, sila ang mga yaong hahatol sa labindalawang lipi ng Israel; kaya nga, ang labindalawang tagapaglingkod sa iyong mga binhi ay hahatulan nila; sapagkat kayo ay kabilang sa sambahayan ni Israel.

10 At ang labindalawang tagapaglingkod na iyong namamasdan ang siyang hahatol sa iyong mga binhi. At, dinggin, sila ay mabubuti magpakailanman; sapagkat dahil sa kanilang pananampalataya sa Kordero ng Diyos, ang kanilang mga kasuotan ay ginawang puti sa pamamagitan ng kanyang dugo.

11 At sinabi sa akin ng anghel: Tingnan! At ako ay tumingin, at namasdan na tatlong salinlahi ang pumanaw sa kabutihan; at ang kanilang mga kasuotan ay puti maging tulad ng sa Kordero ng Diyos. At sinabi sa akin ng anghel: Ang mga yaon ay ginawang puti sa pamamagitan ng dugo ng Kordero, dahil sa kanilang pananampalataya sa kanya.

12 At ako, si Nephi, ay nakita rin na marami sa ikaapat na salinlahi ang pumanaw sa kabutihan.

13 At ito ay nangyari na nakita ko ang maraming tao ng mundo na sama-samang nagtipon.

14 At sinabi ng anghel sa akin: Masdan ang iyong mga binhi, at gayundin ang mga binhi ng iyong mga kapatid.

15 At ito ay nangyari na ako ay tumingin at namasdan ang mga tao ng aking mga binhi na sama-samang nagtipon sa maraming pangkat laban sa mga binhi ng aking mga kapatid; at sila ay sama-samang nagtipon upang makidigma.

16 At nangusap ang anghel sa akin, sinasabing: Masdan ang bukal ng maruming tubig na nakita ng iyong ama; oo, maging ang ilog na kanyang sinabi; at ang kailaliman nito ay kailaliman ng impiyerno.

17 At ang abu-abo ng kadiliman ay ang mga tukso ng diyablo, na bumubulag sa mga mata, at nagpapatigas sa puso ng mga anak ng tao, na umaakay sa kanila palayo patungo sa maluluwang na lansangan, kaya sila nasasawi at naliligaw.

18 At ang malaki at maluwang na gusali, na nakita ng iyong ama, ay mga walang kabuluhang guni-guni at ang kapalaluan ng mga anak ng tao. At isang malalim at kakila-kilabot na look ang naghihiwalay sa kanila; oo, maging ang salita ng katarungan ng Diyos na Walang Hanggan, at ng Mesiyas na Kordero ng Diyos, na pinatototohanan ng Espiritu Santo, mula pa sa simula ng daigdig hanggang sa panahong ito, at mula sa panahong ito at magpakailanman.

19 At habang sinasabi ng anghel ang mga salitang ito, namasdan ko at nakita na ang mga binhi ng aking mga kapatid ay nakipaglaban sa aking mga binhi, alinsunod sa salita ng anghel; at dahil sa kapalaluan ng aking mga binhi, at sa mga tukso ng diyablo, namasdan kong nadaig ng mga binhi ng aking mga kapatid ang mga tao ng aking mga binhi.

20 At ito ay nangyari na namasdan ko, at nakita na ang mga tao ng mga binhi ng aking mga kapatid ay nadaig ang aking mga binhi; at maramihan silang kumalat sa ibabaw ng lupain.

21 At nakita ko silang sama-samang nagtipon nang maramihan; at nakita ko ang mga digmaan at alingawngaw ng mga digmaan sa kanila; at sa mga digmaan at alingawngaw ng mga digmaan ay nakita ko ang paglipas ng maraming salinlahi.

22 At sinabi sa akin ng anghel: Masdan, sila ay manghihina sa kawalang-paniniwala.

23 At ito ay nangyari na aking namasdan, na matapos silang manghina sa kawalang-paniniwala, sila ay naging isang maiitim, at karima-rimarim, at maruruming tao, puno ng katamaran at lahat ng uri ng karumal-dumal na gawain.