1 Dóó kʼad áádóó shí, Nephi shínaaí ałtso bichʼįʼ yááłtiʼgo, jó áshiłní: Tʼáadoo leʼé daniłdzil bee nihił hwíínílneʼígíí, doo bííníigah da.

2 Áádóó ábidííniid diné bąąhági átʼéii yaa naakaiígíí tʼáá aaníinii bikʼehgo, bá daniłdzilígíí bee bikʼijįʼ yááłtiʼ shił bééhoozin; dóó tʼáá ákogi ádaatʼéii doo bá ndanitłʼah da bidííniid, dóó Diyin God nihwiiʼaah bijį́įdi tʼáá aaníí yisdáńdookah dishníigo nabinétą́ą́ʼ; ákohgo, dineʼé tʼáá aaníigo ádánihootʼą́ éí tʼáá aaníinii bá daniłdzil, háálá béésh deiniinii biyiʼjįʼ ndabiiłgéésh nahalingo yikʼee dadiniih.

3 Dóó kʼad shikʼisóó, tʼáá ákogi ánóhtʼéego dóó tʼáá aaníinii yísínóołtsʼą́ąʼgo, dóó bikʼeh honołʼį́įgo, Diyin God binááł yáʼátʼéehiigo wohʼashgo, índa tʼáá aaníinii biniinaa doo akʼijįʼ yáłtiʼ da dooleeł ńtʼę́ę́ʼ, dóó doo kódóhníi da dooleeł ńtʼę́ę́ʼ: Daniłdzilígíí bee nihichʼįʼ yáníłtiʼ.

4 Áádóó shí, Nephi, shikʼisóó, Bóhólníihii bibeehazʼáanii, tʼáá íiyisíí bikʼeh honołʼį́į dooleeł, bidííniid.

5 Áádóó Bóhólníihii yidááhdóó hojoobaʼ ádaʼdiilyaa; binahjįʼ tʼáá íiyisíí yáʼátʼééhjígo iinánígíí yikʼeh yiʼash dooleeł nisingo, áko índa baa shił hóózhǫǫd dóó bá laanaa niizį́į́ʼ.

6 Kʼad, díí tʼáá ałtso ádahodooʼniid dóó baa naʼasdeeʼ shizhéʼé dzígaigi Lemuel yee yiyíízhiʼ yę́ę biníbaal yiiʼ bighanę́ędą́ą́ʼ.

7 Áádóó shí, Nephi, Ishmael bitsiʼ łaʼ sheʼesdzáán íishłaa; dóó shínaaí ałdóʼ Ishmael bitsiʼígíí beʼesdzáán ádayiilaa; dóó Zoram ałdóʼ Ishmael bitsiʼ alą́ąjįʼ naagháhígíí beʼesdzáán áyiilaa.

8 Dóó ákótʼéego shizhéʼé Bóhólníihii bibeehazʼáanii biʼdíílííł biʼdooʼniid yę́ę tʼáá ałtso áyiilaa. Dóó shí, Nephi, ałdóʼ, Bóhólníihii tʼáá íiyisíí shikʼihojisdliʼ.

9 Áádóó shizhéʼé tłʼéeʼgo Bóhólníihii binééʼ bichʼįʼ haadzííʼ, yiską́ągo doo kééhatʼínígi biyiʼdóó dah didíínééł bidííniid.

10 Áádóó shizhéʼé abínígo chʼínádzid, dóó biníbaal bichʼéʼétiingi níyáago, tʼáá íiyisíí biyaa hodeesyiz łeeshtahgi jooł nímazí siʼą́ągo łahgo átʼáo ályaaí yiyiiłtsą́; dóó béésh łitsoii tsʼídá nizhónígíí bee ályaa. Dóó jooł nímazígíi biyiʼdi éí naakigo bitsʼáʼníʼá; dóó łaʼ hááʼáhígíí éí háajigo doo kééhatʼínígi biyiʼ dah didiikahígíí yaa halneʼ.

11 Áádóó tʼáadoo leʼé doo kééhatʼínígi dah dadidiilyéłígíí ahandaheejaaʼ, dóó tʼáá ałtso chʼéédzíʼígíí binahjįʼ dahiniiʼnáa dooleełígíí ałdóʼ Bóhólníihii nihaa yiiznil. Dóó akʼǫ́ǫ́ʼ ałʼąą ádaatʼéhígíí ałdóʼ doo kééhatʼínígóó dah dadiijaaʼ.

12 Áádóó nihiníbaal dah dadiiljid dóó doo kééhatʼínígi biyiʼ, tó nílínígíí Laman bee yíízhiʼę́ę tséʼnaa dah diikai.

13 Áádóó shádiʼááh dóó haʼaʼaah bichʼíjígo yiiʼnéełgo dį́į́ʼ yiską́, dóó nihiníbaal nináádahisiiʼnil; dóó nihiiʼnánígíí Shazer bee deíníijiʼ.

14 Áádóó niheʼałtį́į́ʼ dóó nihikʼaaʼ, doo kééhatʼínígi dah dadiijaaʼ nihaʼáłchíní deidooyį́łígíí bíká ndashiilzheeʼ, áádóó nihaʼáłchíní chʼiyáán bá shódeisiiltʼeʼgo doo kééhatʼínígi Shazer wolyéedi nihaʼáłchíní baa nániikai. Dóó doo kééhatʼínígi yiikahą́ąjígo dah náádiikai, Tónteel Łichííʼ bibąąhgo doo kééhatʼínígi yéigo dahótsoigo yiikahgo.

15 Áádóó yiiʼnéełgo, niheʼałtį́į́ʼ dóó nihikʼaaʼ dóó nihibee aditłʼį́į́h dóó nihitseʼ bee, chʼiyáán shódeiyiltʼeehgo, tʼóó ahayóí yiską́,

16 Dóó doo kééhatʼínígi yéigo dahótsoigo, béésh nímazę́ę nihá dah astsihgo bikʼeh yiikah ńtʼę́ę́ʼ.

17 Dóó tʼáá yiiʼnéełgo tʼóó ahayóí yiską́ índa, nihiníbaal ndaniiʼnil, áko háánáádadiilyįh dóó nihaʼáłchíní chʼiyáán bá shódeidiiltʼeeł biniiyé.

18 Áádóó shí, Nephi, chʼiyáán bíká naashzheeh ńtʼę́ę́ʼ, jó, sheʼałtį́į́ʼ, béésh ntłʼiz bee ályaahą́ą, kʼínítiʼ, dóó sheʼałtį́į́ʼ kʼínítiʼígíí biniinaa, shínaaí shichʼįʼ bá dahóóchįįd, háálá chʼiyáán shódeidiiltʼeełígíí doo bihónéedzą́ą́góó ałdóʼ biniinaa.

19 Áádóó chʼiyáán tʼáá gééd nihighandi nániikai, dóó tʼáá íiyisíí chʼééh daʼdeesdeeʼ, háálá yinéełgo biniinaa, chʼiyáán deinízingo tʼáá íiyisíí tiʼdahoozniiʼ.

20 Áádóó doo kééhatʼínígi yinéełgo bichʼįʼ ndahwiiʼnánígíí dóó yikʼee tiʼdahooníhígíí biniinaa, Laman dóó Lemuel dóó Ishmael dóó beʼashiiké tʼáá íiyisíí akʼijįʼ ayádaʼniiłtiʼ; índa shizhéʼé ałdóʼ Bóhólníihii biDiyin God yikʼijįʼ ayáʼniiłtiʼ; aooʼ, dóó tʼáá íiyisíí tiʼdahooníhígíí biniinaa Bóhólníihii yichʼįʼ saad dahółǫ́ǫ́ ńtʼę́ę́ʼ.

21 Kʼad áádóó shí, Nephi, shichʼįʼ nahwiisnááʼ shínaaí ákódaatʼéii háálá sheʼałtį́į́ʼ kʼínítiʼgo, dóó beʼałtį́į́ʼ doo dabitsxeʼ daazlį́į́ʼgóó biniinaa, chʼiyáán shódeidiiltʼeełígíí tʼáá íiyisíí nihá nahonitłʼah silį́įʼgo, aooʼ, áko índa nihichʼįʼ ndahwiiʼná.

22 Áádóó shí, Nephi, shikʼisóó łą́ągo bichʼįʼ yááłtiʼ, háálá bijéí náádeistłʼisgo biniinaa, wónáásdóó Bóhólníihii biDiyin God yichʼįʼ saad dahółǫ́.

23 Áádóó shí, Nephi, tsin bitsʼą́ą́dóó ałtį́į́ʼ łaʼ íishłaa, dóó tsin kʼézdonígíí bitsʼą́ą́dóó kʼaaʼ íishłaa; ákohgo, ałtį́į́ʼ dóó kʼaaʼ, dóó bee altłʼį́į́h, tsé biłgo, bee hadiisdzaa. Dóó shizhéʼé ábidííniid: Háágóóshąʼ deesháałgo chʼiyáán shóideeshtʼeeł?

24 Áádóó bichʼįʼ yááłtiʼígíí binahjįʼ hojoobaʼ ńdaasdlį́įʼgo biniinaa, Bóhólníihii neiídéełkid; háálá tʼáá átʼéé ńtʼę́ę́ʼ shitsʼíís dóó shiyiʼsizíinii bibee adziilii saad ląʼígo bee bichʼįʼ yááłtiʼ.

25 Áádóó shizhéʼé Bóhólníihii binééʼ yidiiztsʼą́ą́ʼ; dóó Bóhólníihii yichʼįʼ saad hółónę́ę biniinaa bichʼahóóshkeed, áko índa tʼáá íiyisíí yéigo yínííł niizį́į́ʼ.

26 Áádóó Bóhólníihii binééʼ ábidííniid: Béésh nímaz yę́ę biyiʼ díníʼį́į́ʼ dóó tʼáadoo leʼé bikááʼ nááháasdzooígíí níníłʼį́.

27 Áádóó shizhéʼé béésh nímaz yę́ę tʼáadoo leʼé bikááʼ nááháasdzooígíí yiyiiłtsą́ągo, tʼáá íiyisíí násdzííd dóó bitah hoditłid silį́į́ʼ, dóó tʼáá shínaaí dóó Ishmael beʼashiiké dóó danihichʼooní, ałdóʼ ńdaasdzííd.

28 Áádóó shí, Nephi, béésh nímaz yę́ę biyiʼdóó béésh dah atsih yę́ę, éí niheʼoodląʼ dóó haitʼáo baʼííníidlíhígíí índa haitʼáo bikʼeh dahoniilʼínígíí yikʼehgo naalnishgo yiiłtsą́.

29 Dóó ániidígo bikʼeʼeshchínígíí ałdóʼ bikááʼ nááháasdzo, éí doo nanitłʼahgóó wóltaʼgo, díí binahjįʼ Bóhólníihii ííłʼínígíí bikʼidaʼdiitįįh; dóó deiniidlą́ągo dóó tʼáá íiyisíí badaʼííníidlíigo bee, bikʼeʼeshchį́ dóó łahgo ánááʼnííł ńtʼę́ę́ʼ. Dóó ákótʼéego éí baa ákodaniidzin Bóhólníihii éí áłtsʼíísígo áká iilwoʼgo bitsʼą́ą́dóó tʼáadoo leʼé ayóó átʼéego áyiiłʼįįh.

30 Áádóó shí, Nephi béésh nímaz yę́ę bikʼeʼeshchínígíí bikʼehgo, dziłghą́ą́ʼgóó níyá,

31 Áádóó naaldlooshii daʼałchinígíí niséłtseed, áko índa nihaʼáłchíní bá chʼiyáán shóíséłtʼeʼ.

32 Áádóó naaldlooshii niséłtseedígíí, nihiníbaal sinilgóó náníłjid; áádóó chʼiyáán shóíséłtʼeʼígíí dayiiłtsą́ągo tʼáá íiyisíí bił dahóózhǫǫd! Áádóó Bóhólníihii yidááhdóó hojoobaʼ ádaʼdiilyaa, dóó yichʼįʼ ahéheeʼ dadííniid.

33 Áádóó áłtséédą́ą́ʼ yiiʼnéłę́ęjígo, dah náádiikai; dóó tʼáá yiiʼnéełgo ląʼída danihiiską́ índa nihiníbaal nínáádaniiʼnil, nihee dahodidoonaał biniiyé.

34 Áádóó Ishmael náádiilyá, dóó Nahom hoolyéegi łeeh yiltį́.

35 Áádóó Ishmael bitsiʼ tʼáá íiyisíí yínííł daazlį́į́ʼ, háálá bizhéʼé ádin silį́ʼígíí, dóó doo kééhatʼínígi yiyiʼ tiʼdahoozniiʼígíí biniinaa; dóó shizhéʼé Jerusalemdę́ę́ʼ chʼíbiníʼeezhígíí biniinaa, yikʼijįʼ yádaałtiʼ ńtʼę́ę́ʼ, kódaaníigo: Nihizhéʼé éí náádiilyá; aooʼ, dóó doo kééhatʼínígi neiikaigo nízaadgóó hahoolzhiizh, dóó íiyisíí tiʼdahwiisiiʼniiʼ, dóó dichin, dóó dibááʼ, índa chʼééh adidááh éí biiʼ nisiikai; dóó díí tiʼdahosiiʼniiʼígíí ałtsogo doo kééhatʼínígi dichin nihidooghą́ą́ł.

36 Dóó ákótʼéego shí dóó shizhéʼé nihikʼijįʼ yádaałtiʼ ńtʼę́ę́ʼ; dóó Jerusalemgóó nátʼą́ą́ʼ ńdiikah daaníigo.

37 Dóó Laman éí Lemuel dóó Ishmael beʼashiiké yichʼįʼ haadzííʼ: Jó, nihizhéʼé dadiyiilyééł, áádóó nihikʼis Nephi ałdóʼ, nihí bínaaí daniidlį́, ndi nihinaatʼáanii dóó nanihinitiní átʼé nízingo nihąąh tsídeezkézígíí biniinaa.

38 Kʼad, Bóhólníihii shichʼįʼ yááłtiʼ ní, dóó diyin yá naalʼaʼii ałdóʼ shíká adaaswod ní. Jó ndi, nihił béédahózingo éí biyoochʼííd; díí tʼáadoo leʼé yee nihichʼįʼ yáłtiʼígíí, binahjįʼ binaʼadloʼígíí ííłʼį́ tʼóó ahayóí tʼáadoo leʼé ííłʼį́, nihinááʼ bee nihidiʼdoolohígíí, doo kééhatʼínígi doo bééhózin léiʼgi nihodeeshʼish, nízingo ntsékees; áádóó yóó ánihííʼeezhgo, binaatʼáanii dóó bibóhólníihii nishłį́į doo nihóʼní, tʼáá bí íinízin dóó bił yáʼátʼéhígi átʼáo nihinaalnish doo. Dóó díigi átʼéego shikʼis Laman bijéí yá dahóółchįįd.

39 Áádóó Bóhólníihii éí nihił hólǫ́, aooʼ, Bóhólníihii binééʼ hazlį́į́ʼ dóó ląʼígo saad yee yichʼįʼ haadzííʼ, dóó tʼáá íiyisíí yichʼahóóshkeed; dóó Bóhólníihii binééʼ bichʼahóóshkeedgo índa doo bá dahachįʼ da daazlį́į́ʼ, dóó beʼiinaʼ łahgo ádayiilaa, áko índa Bóhólníihii chʼiyáán yee nihikʼijisdliʼgo, tʼáadoo daneeʼnáa da.