1 Áádóó Bóhólníihii yichʼįʼ dahodísin, dóó shił dah diikai; dóó tsin nizhónígo łahgo átʼáo hahasneʼ hahakał dóó álʼį́įgo bindashiilnish. Dóó Bóhólníihii haashį́į́ nízah nináhálzhishgo haitʼéego tsin naaʼeeł bee ádeeshłíiłgo shił ííshją́ą́ ánáyiilʼįįh.

2 Kʼad shí, Nephi, doo diné tsin yindaalnishígi átʼéego binaashnish da, dóó doo tsin naaʼeeł diné ííłʼínígi átʼéego íishłaa da; ndi Bóhólníihii shił ííshją́ą́ áyiilaaígi átʼéego íishłaa; áko doo diné bikʼehgo íishłaa da.

3 Dóó shí, Nephi, tʼáá ahą́ą́h dziłgo ałnánáshdáahgo, Bóhólníihii bichʼįʼ sondíszįįh, ákohgo Bóhólníihii łą́ągo tʼáadoo leʼé ayóó ádaatʼéhígíí shił ííshją́ą́ áyiilaa.

4 Áádóó Bóhólníihii bizaad bikʼehgo, tsin naaʼeeł ałtso íishłaago, shikʼisóó éí tsʼídá yáʼátʼééh dóó tsʼídá nizhónígo ályaa daniizį́į́ʼ; ákohgo, Bóhólníihii yidááhdóó hojoobaʼ ánáádaʼdiilyaa.

5 Áádóó shizhéʼé Bóhólníihii binééʼ yee bichʼįʼ haadzííʼ, daoohsįįh dóó tsin naaʼeeł góyaa biih wohkááh níigo.

6 Áádóó biiskání, ałtso hashtʼeʼadaʼiilyaago, daneestʼáanii dóó atsįʼ doo kééhatʼínídę́ę́ʼ áłah ádeiilyaa, índa tsísʼná bitłʼizh tʼóó ahayóí ádeiilyaa, dóó Bóhólníihii ánihidííniidígíí bikʼehgo tʼáadoo leʼé hashtʼeʼadeiilyaago, tsin naaʼeeł biih yiikai, tʼáá ałtso hashtʼeʼadeiilyaaígíí dóó akʼǫ́ǫ́ʼ ádaatʼéii, dóó tʼáá ałtso nihee dahólónígíí, dóó tʼáá ałtso béédááhaiígíí bikʼehgo; ákohgo, tʼáá ałtso niheʼesdzáán dóó nihadaʼáłchíní bił, tsin naaʼeeł góyaa biih yiikai.

7 Dóó kʼad, doo kééhatʼínígi shizhéʼé ashiiké naakigo bee náhásdlį́į́ʼ; alą́ąjįʼígíí éí Jacob wolyé dóó akéeʼdi naagháhígíí éí Joseph wolyé.

8 Áádóó tʼáá áníiltso tsinaaʼeeł góyaa biih yiikaigo, dóó choideidiilʼįįłígíí dóó tʼáadoo leʼé bee nihichʼįʼ haʼoodzíʼígíí nihiłgo iih dahishiijaaʼ índa, tsin naaʼeeł tónteel biih dah siitʼą́ dóó níyol bee kéyah ahaʼdeetʼánę́ęgóó nihił dah diiʼéél.

9 Dóó ląʼí danihiiską́ níyol bee náás nihił daʼíʼeełgo, jó, shikʼisóó dóó Ishmael beʼashiiké dóó beʼesdzáán danilíní yił hááhgóóshį́į́ ańdaadloh, áko índa idaʼniilzhiizh, dóó adahoʼniitáál, dóó tʼóó baaʼihgo ayádaʼniiłtiʼ, aooʼ, adziilii kojįʼ yee yikahígíí wónáásdóó yaa dayooznah; aooʼ, tʼáá íiyisíí tʼóó baaʼihígíí yaa ńdiikai.

10 Dóó shí, Nephi, tʼáá íiyisíí nísísdzííd tʼáá hazhóʼó Bóhólníihii nihá hodoochįįł ńtʼę́ę́ʼ, dóó atínihóleʼ lágo niizį́į́ʼ háálá bąąhági átʼéii baa ńdiideeʼígíí biniinaa, tónteel biyiʼjįʼ kónihóleʼ lágo; ákohgo shí, Nephi, tʼáá íiyisíí hazhóʼó bichʼįʼ yáʼniiłtiʼ; ndi shichʼįʼ dahaschįįd, kódaaníigo: Nihí éí, nihitsilí doo nihinaatʼáanii nilį́į dooleeł da.

11 Áádóó Laman dóó Lemuel sheʼeztłʼǫ́ dóó tʼáá naʼńleʼdii nashiiłhan ńtʼę́ę́ʼ; ákótʼée ndi, Bóhólníihii bibee adziilii binahjįʼ ííshją́ą́ íidoolíiłgo biniiyé áhóótʼįįd, áko saad doo yáʼátʼéehgo dahináanii yee yá haadzíʼę́ę bidaʼdoolnííł biniiyé.

12 Áádóó shedaʼaztłǫ́ǫgo áko índa doo nahashnáágóó ádashiilaa índa, diikahjígo dah astsihii Bóhólníihii nihainíʼánę́ę, doo naalnish da silį́į́ʼ.

13 Ákohgo, tsin naaʼeeł háajigo deidoolohígíí doo bił béédahózin da ńtʼę́ę́ʼ, áko wónáásdóó tsʼídá ayóó átʼáo deeyol, dóó ahoʼniiłtą́, dóó nátʼą́ą́ʼ nihił nááyołgo tááʼ yiską́; dóó tó ndabidoołtsiłígíí yeedaasdzííd; ákótʼée ndi tʼáadoo kʼedaʼshizʼah da.

14 Dóó nátʼą́ą́ʼ nihił nááyołgo dį́į́ʼ yiską́, dóó wónáásdóó tsʼídá tʼáá íiyisíí nihee deeyol dóó nihee ahoʼniiłtą́.

15 Áádóó, tónteel kʼadę́ę anihiłneeh silį́į́ʼ. Dóó nátʼą́ą́ʼ nihił nááyołgo dį́į́ʼ yiską́, shikʼisóó Diyin God bibee ánihwiitʼaahii yaa ákodaniizį́į́ʼ, dóó nichxǫ́ǫ́ʼígo ntsídaazkééz yę́ę nahjįʼ kóńdayidlaago tʼéiyá, doo dadínóonééłgóó, yaa ákodaniizį́į́ʼ; ákohgo shaa yíkai, shílátsííndóó tłʼóół kʼedaʼizʼah, jó áádóó shílátsíín ayóó neezhchaad lá; dóó shikétsį́įgi ałdóʼ tʼáá íiyisíí daneezhchaad ńtʼę́ę́ʼ, dóó ayóó daneezgai.

16 Ákótʼée ndi, shiDiyin God éí baʼííníshłíí ńtʼę́ę́ʼ, dóó iʼííʼą́ąjįʼ baa hashniih ńtʼę́ę́ʼ; dóó tiʼhwiiséniiʼ ndi tʼáadoo Bóhólníihii bikʼijįʼ haasdzíiʼ da.

17 Kʼad shizhéʼé, Lehi, tʼóó ahayóídi tʼáadoo leʼé yee yichʼįʼ haadzííʼ, nááná Ishmael beʼashiiké ałdóʼ bichʼįʼ; jó, ndi, tʼáá háiida shichʼą́ą́h hadoodzihígíí tʼáá íiyisíí yikʼijįʼ saad adayiinííł; dóó shimá dóó shizhéʼé haastihgo, baʼáłchíní yąąh bíniʼgo biniinaa, aooʼ, wónáásdóó tsáskʼeh bikááʼjí tiʼhoonííh, nááʼábíínil.

18 Tʼáá íiyisíí yínííł yikʼee tiʼhoozniiʼígíí biniinaa, dóó shikʼis bąąhági átʼéii yaa naazhʼázhígíí ałdóʼ biniinaa, biDiyin God kʼasdą́ą́ʼ náábidiinil; aooʼ, bitsiiʼ yiibaʼígíí kʼasdą́ą́ʼ łeeh bíinil; aooʼ, índa kʼasdą́ą́ʼ yínííł bee táyiʼjįʼ kólyaa.

19 Dóó Jacob dóó Joseph ałdóʼ, tʼahdii awééʼ nilį́įgo biniinaa, dichin nízingo, bimá tiʼhooníihgo yaa yínííł niizį́į́ʼ; dóó sheʼesdzáán, dóó shaʼáłchíní ałdóʼ, sodazdilzin dóó dajichago, kʼenáʼóʼaad chʼééh dajiníigo shaa bee ńdaʼjookąąh ákondi doo éí shikʼisóó bidééłníi da.

20 Dóó tʼáá hazhóʼó Diyin God bibee adziilii, nabidoołtsiłgo bił ííshją́ą́ ályaago índa, hazhóʼó ntsíńdoohkos; ákohgo, kʼadę́ę tónteel abiłnéehgo índa ádáádzaa yę́ę yąąh bíniʼ dóó beʼiinaʼ łahgo áńdayiidlaa, wónáásdóó shéédadeezhchid.

21 Áádóó kʼédaʼshizʼah doo, jó, dah atsihii bikʼehgo yiikah yę́ę ńdiiʼą́, dóó íinisinígíí yikʼehgo ndiilnish. Áádóó Bóhólníihii bichʼįʼ sodeeszin; dóó sodeeszingo índa doo níyol da silį́į́ʼ, dóó nahałtinę́ę áhodiilzeeʼ, dóó doo íitsʼaʼí da hazlį́į́ʼ.

22 Áádóó shí, Nephi, tsin naaʼeeł dah náádiiłʼéél, kéyah ahaʼdeetʼánę́ę bichʼįʼ.

23 Áádóó tʼáá nihił daʼíʼeełgo tʼóó ahayóí náánéiską́ kéyah ahaʼdeetʼánę́ędi nihił daʼníʼéél; áádóó kéyah bikááʼgóó dadiikai, dóó nihiníbaal ndaniiʼnil; dóó kéyah ahaʼdeetʼánígíí wolyéego bee deíníijiʼ.

24 Áádóó kéyah hashtʼeʼadeiilyaa, dóó akʼǫ́ǫ́ʼ yę́ę kʼidadiilyéego baa ńdiikai; aooʼ, Jerusalemdę́ę́ʼ akʼǫ́ǫ́ʼ tʼáá ałtso ndahiijaaʼą́ą kʼidadiilyá. Áádóó éí ayóó ndaʼneeltʼą́; ákohgo, tʼáá íiyisíí nihikʼihojisdliʼ.

25 Áádóó kéyah bee ahaʼdeetʼánígíí bikáaʼgi, doo kééhatʼínígi neiikaigo, naaldlooshii ałʼąą átʼáo deiiltsą́, béégashii dóó bedaałtʼéhígíí, tʼáá áła, índa télii dóó łį́į́ʼ, índa tłʼízí dóó tłʼízí daʼałchinígíí, dóó naaldlooshii ałʼąą ádaatʼéii, diné choodoołʼįįłígíí bikʼídaniitą́ą́ʼ. Dóó tʼáá ałtso tsé béésh bee ádaalʼínígíí, óola dóó béésh łigai tʼáá áła, índa béésh łichíiʼii bikʼídaniitą́ą́ʼ.