1 Áádóó doo kééhatʼínígi dah náádiikai; dóó éí haʼaʼaah biyaajígo tʼéiyá náániikai. Dóó tʼáá íiyisíí tiʼdahwiiʼníihgo doo kééhatʼínígi biyiʼ yiiʼnééł; dóó nihichʼooní éí doo kééhatʼínígi yiiʼnéełgo baʼáłchíní dahazlį́į́ʼ.

2 Dóó tʼáá íiyisíí Bóhólníihii nihikʼijídlíigo, doo kééhatʼínígi yiiʼnééł atsįʼ tʼáá łichíiʼgo bee dahiniiʼná ndi, nihichʼooní baʼáłchíní ląʼída abeʼ bá dahólǫ́ǫ́ ńtʼę́ę́ʼ, dóó dabidzill ńtʼę́ę́ʼ, aooʼ, tʼáá dinégi átʼáo nahalingo, dóó doo saad dahółǫ́ǫ́góó yinééł daazlį́į́ʼ.

3 Dóó ákótʼéego Diyin God bibeehazʼáanii éí bidaʼdoolnííł. Dóó nihookááʼ dineʼé Diyin God bibeehazʼáanii yikʼeh dahółʼį́įgo éí yiʼiisą́, dóó dabidziilgo áyósin, dóó tʼáadoo leʼé íídííniidígíí yíká adoolwołgo ádeidoolííł; ákohgo, doo kééhatʼį́ hazʼą́ądi yiiʼnéełgo nihíká eelwod.

4 Dóó yiiʼnéełgo tʼóó ahayóí nááhai, aooʼ, doo kééhatʼínígi yiiʼnéełgo éí tseebíí nááhai ndi.

5 Dóó kéyahjįʼ niniiʼná éí éí Kéyah Hwiináago bee deíníijiʼ, háálá ląʼída tsin bineestʼąʼ ałʼąą átʼéii dóó tsísʼná bitłʼizh hólónígíí biniinaa; áádóó doo dadíníiʼnéeł da biniiyé Bóhólníihii díí tʼáá ałtso nihá hashtʼeyiilaa, dóó tónteel siyį́įgo deiiltsánígíí, éí Irreantum wolyéego bee deíníijí, díí éí, tó tʼóó ahayóígo, óolyé.

6 Áádóó tónteel bibąąhgi nihiníbaal ndaniiʼnil; dóó azhááneeʼ tʼóó ahayóígo yéigo tiʼdahwiisiiʼniiʼ dóó nihichʼįʼ ndahwiisnááʼ, aooʼ, áko índa tsʼídá doo ałtso náájiyódzóóh átʼée da, ndi tónteel bibąąhjįʼ niniiʼnáago ayóó átʼáo nihił dahóózhǫǫd; dóó tʼóó ahayóí tsin bineestʼąʼ hólónígíí biniinaa, Kéyah Hwiináago wolyéego bízhiʼ ádeiilyaa.

7 Áádóó shí, Nephi, Kéyah Hwiináago tʼóó ahayóí shiiską́ągo, Bóhólníihii binééʼ shichʼįʼ haadzííʼ, kóníigo: Ńdiiʼnééh dóó dził biyiʼgóó dínááh. Áádóó ńdiishʼnaʼ dóó dził biyiʼgóó níyá, dóó Bóhólníihii bichʼįʼ sodeeszįįd.

8 Áádóó Bóhólníihii shichʼįʼ haadzííʼ, kóníigo: Tsin naaʼeeł ádíílííł, díí nił ííshją́ą́ ádeeshłíłígíí binahjįʼ, áko nidineʼé díí tónteel bee tséʼnaa ndeeshʼish.

9 Dóó shí ádííniid: Bóhólníihii, háágóóshąʼ deesháałgo tsé béésh bitsʼą́ą́dóó álʼínígíí shóideeshtʼeeł dóó dideeshhįh, áko bee naʼanishí ádeeshłííł dóó tsin naaʼeeł shił ííshją́ą́ íinilaagi átʼáo bee ádeeshłííł?

10 Áádóó Bóhólníihii tsé béésh bee álʼínígíí hólónígíí yee shił hoolneʼ, éí bee naʼanishí ádeeshłííł biniiyé.

11 Áádóó shí, Nephi, kǫʼ bee yilzolígíí naaldlooshii bikágí bitsʼą́ą́dóó íishłaa; dóó kǫʼ bee yilzolí íishłaago, áko kǫʼ bee yisołgo bííníshghah, índa kǫʼ ádeeshłííł biniiyé tsé naakigo ahídénił.

12 Háálá Bóhólníihii tʼah nagháídę́ę́ʼ tʼáadoo ląʼígo danihikǫʼí nihidííniid, doo kééhatʼínígi yiiʼnéełgo; kódííniid: Nihichʼiyąʼ éí łikango nihá ádeeshłííł, áko tʼáadoo ndahołtʼeesí dooleeł.

13 Dóó doo kééhatʼínígi nihibee adinídíinii nishłį́į doo; dóó nihilą́ąjįʼ nihá hashtʼehwiinísin doo, shibeehazʼáanii bikʼeh dahonołʼį́įgo; ákohgo, wónáásdóó shibeehazʼáanii bikʼeh dahonołʼį́įgo kéyah ahaʼdeetʼánígíí bichʼįʼ nihideeshʼish; dóó tʼáá aaníí tʼáá shí nihiníʼeezhgo nihił béédahodoozįįł.

14 Aooʼ, dóó Bóhólníihii ałdóʼ ádííniid: Kéyah ahaʼdeetʼánígíí baa nohkaigo, shí, Bóhólníihii, Diyin God nishłį́įgo nihił béédahodoozįįł; dóó shí, Bóhólníihii, éí hóóchxǫʼdę́ę́ʼ yisdánihííʼeezh; aooʼ, áko kéyah Jerusalemdóó éí chʼínihiníʼeezh.

15 Ákohgo, shí, Nephi, Bóhólníihii bibeehazʼáanii bikʼeh honishʼį́į́ ńtʼę́ę́ʼ, dóó shikʼisóó éí tsʼídá iinohdlą́ dóó yéigo bidoołkaal bidishníí ńtʼę́ę́ʼ.

16 Áádóó tsé béésh bitsʼą́ą́dóó álʼínígíí dííłhį́į́ʼ dóó bee naʼanishí íishłaa.

17 Dóó shínaaí tsin naaʼeeł ábiʼniishłaago dayiiłtsą́ągo, shikʼijįʼ ayánáádaʼniiłtiʼ, kódaaníigo: Nihikʼis doo áhályą́ą da, tsin naaʼeeł ádeeshłííł nízin; aooʼ, dóó díí tónteel tséʼnaa ndeeshaał ałdóʼ nízin.

18 Dóó ákótʼéego shínaaí shikʼijįʼ saad dahółǫ́ǫ́ ńtʼę́ę́ʼ, dóó doo ndiilnish da danízin ńtʼę́ę́ʼ, háálá tsin naaʼeeł ádeeshłíiłgo éí doo dayoodlą́ą da ńtʼę́ę́ʼ; dóó Bóhólníihii áshidííniidígíí ałdóʼ doo dayoodlą́ą da ńtʼę́ę́ʼ.

19 Dóó kʼad áádóó shí, Nephi, shínaaí bízhą́ ílínígíí biniinaa tʼáá íiyisíí baa yínííł niizį́į́ʼ; áádóó yínííł nisinígíí yaa ákoniizį́įʼgo bijéí biyiʼdi bił dahóózhǫǫd, áko índa tʼáá íiyisíí bił dahózhǫ́ǫ́ ńtʼę́ę́ʼ, kóníigo: Tsinaaʼeeł doo ádíílííłgóó tʼáá íídą́ą́ʼ nihił bééhózin, háálá doo hazhóʼó ntsíníkeesígíí biniinaa; ákohgo, tsʼídá doo tʼáadoo leʼé ákóníłtsooígíí doo ádíílíił da.

20 Dóó nihizhéʼégi ánítʼé, kóshiʼdooʼniid níigo tʼáá ádzaagóó nanihíʼeesh; aooʼ, Jerusalemdę́ę́ʼ chʼínihiníʼeezh, dóó doo kééhatʼínígi tádiiʼnéehgo tʼóó ahayóí nihee nááhai; dóó niheʼesdzáán ayóo ndaalnish ńtʼę́ę́ʼ, ndi awééʼ bídaaʼnáahgo; dóó doo kééhatʼínígi tiʼdahooʼníihgo ndaʼiishchį́, dóó tʼáá ałtsoní bee bichʼįʼ ndahwiisnááʼ, tʼáá hazhóʼó tʼáadoo náádabiʼdiilyáa da; dóó tʼáá Jerusalemdi daneeznáago éí bá yáʼátʼéeh doo ńtʼę́ę́ʼ áko kʼad tiʼhooʼníhígíí doo yiiʼ ndookah da doo ńtʼę́ę́ʼ.

21 Jó, ląʼí nááhai doo kééhatʼínígi tiʼdahwiiʼníihgo, éí ndááhaiígíí biyiʼ nihinaalyeʼé dóó nihikéyah nihaiyitʼánę́ę baa nihił dahózhǫ́ǫgo; aooʼ, dóó bee ádee ńdaʼiildįįh doo ńtʼę́ę́ʼ;

22 Dóó nihił béédahózingo éí diné Jerusalemdi diné kéédahatʼínę́ę éí yáʼátʼéehgo dahiná; háálá Bóhólníihii bibee ánihwiitʼaahii dóó bibeehazʼáanii dóó Moses bibeehazʼáanii beiyítʼánę́ę, yikʼeh dahółʼį́į́ ńtʼę́ę́ʼ; ákohgo, diné yáʼátʼééh danilį́įgo nihił béédahózin; dóó nihizhéʼé éí yá nihoníʼą́, dóó bizaad deísíníiltsʼą́ąʼgo bitsʼą́ąjigo dah nihidiiʼeezh; aooʼ, dóó nihikʼis éí ałdóʼ tʼáá ákótʼé. Dóó kótʼáo éí shikʼis saad yee nihikʼijįʼ haadzííʼ.

23 Áádóó shí, Nephi, bichʼįʼ haasdzííʼ, kódíshníigo: Daʼ ałkʼidą́ą́ʼ Israel dineʼé, danihizhéʼé yę́ę, Bóhólníihii bibeehazʼáanii doo yikʼeh dahółʼį́įgoósh Egypt dineʼé bílákʼeedóó yisdáyíʼéésh dooleeł ńtʼę́ęʼgo, yinohdlą́?

24 Aooʼ, daʼ ákoósh naalteʼé dajílínę́ędą́ą́ʼ Bóhólníihii Moses chʼídiiʼish yił níigo, chʼíbiʼdootʼeezh dooleeł ńtʼę́ę́ʼ?

25 Kʼad nihił bééhózingo tʼáá aaníí éí Israel bidineʼé naalteʼé danilį́į́ ńtʼę́ę́ʼ; dóó tsʼídá tʼáá íiyisíí naanish dandaazii yikʼee tiʼdahoonííh ńtʼę́ę́ʼ; ákohgo, yisdánábiʼdootʼishgo tʼéí bá yáʼátʼéehgo nihił bééhózin.

26 Kʼad nihił bééhózingo Moses éí Bóhólníihii naanish ayóó átʼéii íidoolíiłgo Bóhólníihii naanish beidiníʼą́; dóó nihił bééhózin bizaad binahjįʼ Tónteel Łichíiʼgo siyínígíí ałtsʼą́ą́ʼ kwíyiilaago, łeezh yíłtseii yiyiʼ chʼékai.

27 Ndi nihił bééhózingo Egypt dineʼé Pharaoh yá ndaabaahí, Tónteel Łichíʼę́ę ałchʼįʼ kónádzaago dabííghą́ą́ʼ.

28 Dóó nihił bééhózingo ałdóʼ doo kééhatʼínígi yiiʼ yinéełgo bááh bee baa áháyą́ągo yikiin yíkai.

29 Aooʼ, dóó ałdóʼ nihił béédahózingo Moses, Diyin God bibee adziilii yinahjįʼ haadzíiʼgo, tsé néidííłhaalgo, áádę́ę́ʼ tó háánaʼgo, áko Israel baʼáłchíní dibááʼ danízinę́ę daʼoodlą́ą́ʼ.

30 Dóó azhą́ bidootʼish ndi, Bóhólníihii, biDiyin God, dóó biNináʼnídláii, bidáahgo yigááł ndi, jį́įgo booʼishgo ndi, dóó tłʼéeʼgo bá adiníłdíín ndi, dóó tʼáadoo leʼé deinízinígíí yee yíká análwoʼ ndi, bijéí deistłʼis dóó bíniʼ doo yee daʼooʼį́į da daazlį́į́ʼ, dóó Moses dóó Diyin God tʼáá aaníí hináanii, yikʼijįʼ hadahaasdzííʼ.

31 Áádóó bizaad binahjįʼ neistseed; dóó bizaad binahjįʼ yooʼish ńtʼę́ę́ʼ; dóó bizaad binahjįʼ tsʼídá tʼáá ałtsoní yee yíká eelwod; dóó tʼáá ałtso ádaalyaaígíí éí bizaad binahjįʼ éí ádaalyaa.

32 Dóó tó Jordan wolyéhígíí tséʼnaa niikaigo índa ayóó dabidziilgo áyiilaa áko ákǫ́ǫ́ diné kéédahatʼínę́ę chʼídeineeskaadgo, aooʼ, ałtso taooskaigo ásdįįd.

33 Dóó kʼad, daʼ ákoósh díí diné, kéyah ahaʼdeetʼání yikááʼ kéédahatʼínę́ę, danihizhéʼé yę́ę diné chʼídeineeskaadígíísh, yáʼátʼéehgo dahináá ńtʼę́ę́ʼ nohsin? Jó, shí ánihidishníigo éí, ndagaʼ.

34 Daʼ ákoósh Diyin God danihizhéʼé yę́ę yił nilį́į doo ńtʼę́ę́ʼ yáʼátʼéehgo dahináago? Shí ánihidishníigo éí, ndagaʼ.

35 Jó, Bóhólníihii tʼáá ałtso diné aheełtʼéego yaa ntsékees; tʼáá háiida yáʼátʼéehgo hinánígíí éí Diyin God bił nilį́į doo. Jó ndi, díí dineʼé tsʼídá tʼáá ałtso Diyin God bizaad yóó adeideezʼą́, dóó bąąhági átʼéii yee neestʼą́; dóó Diyin God tʼáá íiyisíí doo bichʼįʼ bił hózhǫ́ǫ da; dóó Bóhólníihii kéyah doo há yáʼátʼééhgóó hatsʼą́ą́ʼ yá haadzííʼ, dóó danihizhéʼé yee yikʼijisdliʼ; aooʼ, hó éí dootsʼíidgo hahaadzííʼ, dóó danihizhéʼé yę́ę yikʼijisdliʼ dóó shódeidootʼeeł bíighahgo yee yikʼihojisdliʼ.

36 Jó, Bóhólníihii nahasdzáán diné yikááʼ hólǫ́ǫ doo biniiyé áyiilaa; dóó baʼáłchíní daabí doo biniiyé áyiilaa.

37 Dóó dineʼé yáʼátʼéehii yinisé, dóó diné bibąąhági átʼéii yee dah deiíkáhí éí nahjįʼ kwííłʼį́.

38 Dóó yáʼátʼéehgo dahinánígíí éí kéyah daʼílíinii yichʼįʼ ayiiʼéésh, dóó diné bąąhági átʼéii yaa naakaiígíí éí neiłtseed, dóó kéyah doo yáʼátʼéehgo yá hahadziih ádáádzaaígíí biniinaa.

39 Tsʼídá aláahdi yáʼąąshdi bíhólnííh, háálá bí bikááʼdahʼasdáhí átʼé, nááná díí nahasdzáán éí bí bikááʼ dah adéesʼeezí átʼé.

40 Dóó tʼáá háiida shiDiyin God doo nízinígíí ayóó áyóʼní. Jó, danihizhéʼé yę́ę ayóó áyóʼníí ńtʼę́ę́ʼ; aooʼ, Abraham, dóó Isaac, dóó Jacob yił ałhadaʼdeetʼą́; dóó yił ałhadaʼdeetʼánę́ę áyiilaahą́ą yénáálniiʼ; ákohgo, kéyah Egyptdóó chʼíiníʼeezh.

41 Dóó doo kééhatʼínígi iiná tsʼídá yéigo nanitłʼahgo há áyiilaago bąą tsʼídá yéigo hachʼįʼ ndahwiiʼná; háálá nihígi átʼáo, bízhą́ daʼílį́ daazlį́įʼgo bąą; dóó Bóhólníihii bąąhági átʼéii yaa naakaiígíí biniinaa atíyiilaa. Tłʼiish bádahadzidii ndaatʼaʼii hatahgóó yeʼiiłnííh; dóó ahidabíiłghazhgo yee ndaʼdoozihii yá hashtʼeyiilaa; dóó tʼóó dazhdídóoʼįįłgo ńdazhdoodzihgo há áyiilaa; dóó azhą́ doo nanitłʼahgóó há áyiilaaígíí, éí doodago doo tʼáá bééhózinígíí biniinaa, tʼóó ahayóí dazhneezná.

42 Dóó łahda bízhą́ daʼílį́ ndałeehgo, Moses dóó Diyin God yikʼijįʼ yádaałtiʼ ńtʼę́ę́ʼ; ákótʼée ndi, nihił béédahózingo tsʼídá aláahdi beʼadziilii binahjįʼ kéyah bee ahaʼdeetʼánígóó ábiʼdeetʼeezh.

43 Dóó kʼad, kódahotʼį́įgo, kʼad éí bąąhági átʼéii tʼáá íiyisíí yaa ndiikahgo bíiníłką́; aooʼ, kʼadę́ę bidiʼniiłdzíídgi átʼáo, dóó kʼadę́ę ndadootsiłjįʼ baa hoolzhíísh nisin; háálá ndadootsiłjįʼ éí baa hodoolzhish, tʼáá hazhóʼó áłchʼį́į́dígo tʼéiyá, ąą shijééʼgóó ádahoʼdiyootʼish.

44 Ákohgo, Bóhólníihii shizhéʼé doo kééhatʼínígo dah didíínééł yidííniid; dóó Jew dineʼé dahodiyoołhéełgo há ndahazʼą́; aooʼ, dóó nihí ałdóʼ diyoolyéeł nohsin, ákohgo, nihijéí biyiʼdi éí naʼałtseedii nohłį́ dóó éí diné benołtʼé.

45 Bąąhági átʼéii tsxį́įłgo ádaołʼį́ ndi Bóhólníihii nihiDiyin God éi doo hah béédaohłniih da. Diyin yá naalʼaʼii éí woohłtsą́, dóó nihichʼįʼ haadzííʼ; aooʼ, tʼáá ahą́ą́h binééʼ dadohtsʼa ńtʼę́ę́ʼ; dóó iinééʼ áłtsʼíísí bee hazhóʼógo nihichʼįʼ hanádzih, ndi doo nanihiłnáa da dasoolį́į́ʼ, áko éí bizaad doo baa ákonohsingóó; ákohgo, iinééʼ bąąh adiʼní nahalingo nihichʼįʼ haadzííʼ, nahasdzáán yę́ę ałtsʼádootǫł nahalingo nayiisnááʼ.

46 Dóó nihił bééhózingo bizaad ayóó átʼéii bibee adziilii binahjįʼ nahasdzáán nahjįʼ íidoolíiłgo yíighah; aooʼ, dóó nihił béédahózingo bizaad binahjįʼ dahonoojí yę́ęgo dahodilkǫǫhgo íidoolíiłgo yíighah, dóó dahodilkǫǫh yę́ę ndahwiistʼǫʼgo íidoolíiłgo yíighah. O, índa, haʼátʼíísh biniiyé, nihijéí biyiʼdi dasootłʼis?

47 Jó, nihiniinaa shitsʼíís dóó shiyiʼsizíinii tʼáá íiyisíí yínííł nilį́, dóó shijéí yineesgai; hoolʼáágóó nahjįʼ kónihidiʼdoolníłígíí nihá binásdzid. Jó, tʼáá íiyisíí Diyin God biiʼSizíinii shił hólǫ́ǫgo, biniinaa shitsʼíísę́ę doo bidziil da.

48 Kʼad áádóó díí saad bee bichʼįʼ haasdzíiʼgo shichʼįʼ bá dahaschįįd, dóó tónteel biih dahidiilghą́ą́ł daniizį́į́ʼ; áádóó dashiisił ńtʼę́ęʼgo kóbidííniid, dishníigo: Diyin God Ayóó Átʼéii bízhiʼ binahjįʼ, ánihidishní shidadoohłchííd lágo, háálá Diyin God bibee adziilii tʼáá íiyisíí shiiʼ hólǫ́, wónáásdóó tʼáá íiyisíí shitsʼíís kʼadę́ę yidiiłtłáadgo nahalin, dóó háiida shidoolchidgo éí lókʼaaʼ siganígíí nahalingo dínóołnah; dóó Diyin God bibee adziilii bidááhdóó tʼáadoo jílíní da dooleeł, háálá Diyin God atíhoolaa dooleeł.

49 Áádóó shí, Nephi, tʼáadoo nihizhéʼé bikʼijįʼ yádaałtiʼí bidííniid; dóó tʼáadoo tʼóó binaanish shitsʼą́ąjįʼ kódeínóhsiní, háálá Diyin God éí tsin naaʼeeł ádíílííł shidííniid.

50 Dóó ábidííniid: Diyin God tʼáá ałtsoní ádíílííł shidííniidgo ádeeshłííł. Díí tó siyínígíí, nahasdzáán nileeh bidííniidgo, nahasdzáán dooleeł; dóó shí ádííniidgo, éí bikʼeh áhodoonííł.

51 Dóó kʼad, Bóhólníihii bibee adziilii ayóó átʼéego, dóó ląʼída álíleekʼehgo dineʼé yee yíká eelwod, áko haʼátʼíísh biniinaa tsin naaʼeeł ádeeshłíiłgo, doo yínashidínóołtįįł da?

52 Áádóó shí, Nephi, łą́ągo tʼáadoo leʼé shikʼis bee bichʼįʼ haasdzííʼ, wónáásdóó dadiiłheel dóó doo shikʼijįʼ yáłtiʼ daazlį́į́ʼ; dóó dashididoolchiłígíí yichʼįʼ daastiiʼ, áko bílaʼ ndi tʼáadoo yee shidadoolchidgo, ląʼí yiską́ índa. Kʼad Diyin God biiʼSizíinii ayóó átʼáo bidziilígíí biniinaa, dashididoolchiłígíí shidááhdóó nahjįʼ ábidiʼdooʼniłígíí yéédaaldzid átídadooníłígíí biniinaa; dóó ákótʼáo bił ádahoodzaa.

53 Áádóó Bóhólníihii áshidííniid: Nikʼisóó bichʼįʼ dah náádiilnííh, doo éí haadadooníił da, ndi Bóhólníihii áníigo, tʼóó hooshtąąshgo nahwiisxan, dóó díí ádeeshnííł, áko Bóhólníihii hoDiyin God nishłínígíí hoł béédahodoozįįł.

54 Áádóó, shikʼisóó bichʼįʼ dah deeshniiʼ áko tʼáadoo shidááhdóó ndaniiłnaʼ da; ndi bizaad yee haadzíʼę́ę binahjįʼ Bóhólníihii tʼóó nahwiisxan.

55 Dóó kʼad, ádííniid: Tʼáá aaníí nihił bééhózingo Bóhólníihii nił hólǫ́ǫ́ lá, háálá Bóhólníihii bibee adziilii éí nanihiisxan. Dóó shidáahjįʼ ntsidadeesgoʼ, dóó shichʼįʼ sodadiʼniilzingo, ndi dooda bidííniid: Shí éiyá nihikʼis nishłį́, aooʼ, nihitsilí nishłį́ ndi; ákohgo, Bóhólníihii nihiDiyin God bichʼįʼ sodadoołzin, dóó nihizhéʼé dóó nihimá baa dahohniih doo, áko Bóhólníihii nihiDiyin God kéyah nihainíʼánígíí bikáaʼgi nízaadgóó dahinohnáa dooleeł.