1 Áádóó shínaaí bichʼįʼ haasdzííʼ, kódíshníigo: Jerusalemgóó nínáádiikah, dóó daʼiiniidlą́ągo Bóhólníihii bibeehazʼáanii bikʼeh dahoniilʼį́į dooleeł; jó háálá bí éí nihookááʼ dineʼé tsʼídá yiláahdi bidziil, índa doo hanii Laban dóó beʼashdladiin, aooʼ, éí doodago bineeznádiindi mííl ndi, yiláahdi óbóodziil da?

2 Éí bąą ákǫ́ǫ́ náádiikah; Moses nahalingo danihidziil dooleeł; háálá tʼáá aaníí Tónteel Łichííʼ yichʼįʼ haadzííʼ dóó ałtsʼą́ą́ʼ ąą ádzaa dóó danihizhéʼé yę́ę ąą shijééʼdę́ę́ʼ, łeezh yíłtseiigo, yiyiʼdę́ę́ʼ chʼékai, dóó Pharaoh bá ndaabaahii bikééʼ yijahgo dóó Tónteel Łichííʼ ałchʼįʼ kónádzaago tó ndabistseed.

3 Jó kʼad díí tʼáá aaníí átʼéego nihił bééhózin; dóó diyin yá naalʼaʼii łaʼ nihichʼįʼ haadzíiʼgo ałdóʼ nihił bééhózin; ákohgo haash yitʼáo tʼahdii doo iinohdlą́ą da? Áko ákǫ́ǫ́ diikah; Bóhólníihii éí yisdánihidooʼish, danihizhéʼé yę́ę yisdáyíʼeezhígi átʼáo, dóó Laban bidiʼyoolyééł, Egypt dineʼé ndabiʼdistseedígi átʼáo.

4 Kʼad díí saad bee bichʼįʼ yááłtiʼgo, tʼahdii shichʼįʼ bá háchįʼ, dóó tʼahdii akʼijįʼ yáłtiʼ; ákótʼée ndi Jerusalem tsé binástłʼinjįʼ níʼáázh.

5 Dóó tłʼééʼ hazlį́įʼgo; tłʼóóʼdę́ę́ʼ ńdadidoohtʼį́į́ł bidííniid. Dóó ńdadéestʼį́įʼgo índa, shí, Nephi, ńléí kintah góneʼ yah ííyá, dóó Laban baghan bichʼįʼgóó níyá.

6 Dóó Iiʼsizíinii shinílóóz náásgóó ádeeshníłígíí doo shił bééhózingóó.

7 Ákótʼée ndi ákǫ́ǫ́ éí níyá, dóó Laban baghan bichʼįʼ yisháałgo diné léiʼ yiiłtsą́, dóó niʼjįʼ shidáahjįʼ íítłizh, háálá tódiłhił yee naaʼoʼoodlą́ą́ʼ lá.

8 Dóó baa níyá ńtʼę́ę́ʼ Laban átʼį́įgo shił bééhoozin.

9 Dóó bibééshhał yiiłtsą́, dóó bizis biyiʼdóó háitą́; dóó bitsiin éí óola bee ályaa lá, dóó tsʼídá nizhónígo ałdóʼ ályaa lá, dóó hááhaashchiiʼjígo éí tsʼídá aláahdi béésh ílíinii ntłʼizígíí átʼéé lágo yiiłtsą́.

10 Áádóó Iiʼsizíinii tʼáá íiyisíí Laban síłhé shóʼníí ńtʼę́ę́ʼ; ndi shijéí bee ádíshní: Tsʼídá tʼah doo hádą́ąʼda diné łaʼ séłhį́į da. Dóó tʼą́ą́ʼ ákwíisdzaa dóó doo yidiyeeshéeł da niizį́į́ʼ.

11 Dóó Iiʼsizíinii ánááshiʼdooʼniid: Jó Bóhólníihii yeeʼ éí nílákʼee yíílóóz. Aooʼ, dóó shidiyoołhéełgo ałdóʼ shił bééhózin ńtʼę́ę́ʼ; aooʼ, Bóhólníihii bibeehazʼáanii doo yiistsʼą́ąʼ da ńtʼę́ę́ʼ; dóó nihinaalyeʼé ałdóʼ nihighayíʼnil.

12 Áádóó Iiʼsizíinii ánááshiʼdooʼniid: Síłhé, háálá Bóhólníihii nílákʼee yíílóóz;

13 Jó Bóhólníihii éí diné bąąhági átʼéii yaa naakaiígíí neiłtseed áko biyáʼátʼéehii hólǫ́ǫ doo biniiyé. Éí tʼáá áko diné tʼááłáʼí seesyį́įgo áko bílaʼashdlaʼii dah yíkahgo doo tʼáá ádzaagóó dah didookah da dóó doo daʼoodlą́ągo dadínóonéeł da.

14 Dóó kʼad, shí, Nephi, díí saad disétsʼą́ąʼgo, Bóhólníihii doo kééhatʼínígi saad yee shichʼįʼ haadzíʼę́ę bénááshniiʼ, éí kóníigo: Háálá éí naʼáłchíní danilį́į dooleełígíí shibeehazʼáanii yikʼeh dahółʼį́įgo, kéyah bee ahaʼdeetʼánígíí biyiʼ yáʼátʼéehgo náásgóó dadínóosééł.

15 Aooʼ, dóó Bóhólníihii bibeehazʼáanii éí doo yikʼeh dahółʼį́į da dooleeł, tʼáá hazhóʼó Moses bibeehazʼáanii yę́ę bił béédahózingo tʼéiyá, ałdóʼ náániisdzį́į́ʼ.

16 Dóó beehazʼáanii béésh łitsoii bikáaʼgi nááháasdzogo ałdóʼ shił bééhoozin.

17 Dóó nááná, Bóhólníihii éí díí biniiyé Laban shílákʼe yíílóozgo shił bééhoozin—áshidííniid yę́ę bikʼehgo ndaʼasdzooígíí shóideeshtʼeeł biniiyé.

18 Éí bąą Iiʼsizíinii binééʼ éí bikʼeh hóółʼįįd, dóó Laban bitsiiʼ shéjih dóó tʼáá bí bibééshhał bee bitsiitsʼiin kʼíníkal.

19 Dóó tʼáá bí bibééshhał bee bitsiitsʼiin kʼíníkalgo índa, Laban beʼééʼ ńdiinil dóó bee hadiisdzaa; dóó bibéésh sis éí shinííʼ gónaa bee beʼsétłʼǫ́.

20 Dóó díí ałtso íishłaago índa, Laban bidaʼílíinii yisnilę́ęgo dah diiyá. Dóó Laban bidaʼílíinii yisnilę́ęgóó yisháałgo, jó, Laban bá naalʼaʼii daʼílíinii yisnil góneʼ bibee ąą ńdítį́hí neijaahígíí yiiłtsą́. Dóó Laban yáłtiʼ nahalingo binééʼ yáshtiʼgo, daʼílíinii sinilę́ę góneʼ shił yah adííʼash, bidííniid.

21 Háálá ééʼ dóó bééshhał shinííʼ gónaa shąąh dah sitánígíí yiyiiłtsą́ągo, shinaatʼáanii, Laban átʼį́ niizį́į́ʼ.

22 Dóó binaatʼáanii Laban, Jew hastóí danilínígíí díí tłʼééʼ yitahgóó naayáhígíí bił bééhózingo biniinaa, Jew dineʼé áłtsé yínashídééłkid.

23 Dóó Laban yáłtiʼ nahalingo bichʼįʼ hanáásdzííʼ.

24 Dóó shí ałdóʼ ábidííniid, béésh łitsoii bikááʼ nááháasdzooígíí, shínaaí, tłʼóóʼdę́ę́ʼ naháaztánígíí, bichʼįʼ deeshʼááł.

25 Dóó shí ałdóʼ, shikééʼ yínááł dooleeł, bidííniid.

26 Dóó bí, hastóí sodizin bá hooghan yee dah yikahígíí yaa yáłtiʼ shóʼníigo, dóó Laban séłhínę́ę tʼáá aaníí éí átʼį́ nízingo, ákohgo shikééʼ dah diiyá.

27 Dóó shínaaí, tłʼóóʼdę́ę́ʼ naháaztánígíí bichʼįʼ yiitʼaashgo, Jew dineʼé yilą́ąjįʼ naazínígíí łą́ągo yee shichʼįʼ yááłtiʼ.

28 Áádóó Laman shiiłtsą́ągo tʼáá íiyisíí shinásdzííd, dóó Lemuel dóó Sam ałdóʼ. Laban átʼį́, dóó Nephi yiyiisxį́įgo dóó nihídóʼ nanihidoołtsił daniizį́įʼgo, biniinaa shitsʼą́ąjįʼ dah diijééʼ.

29 Áádóó bichʼįʼ haasdzíiʼgo, dashidiiztsʼą́ą́ʼ; ákohgo tʼáadoo shitsʼą́ą́jí dah náádiijéeʼ da.

30 Áádóó Laban bá naalʼaʼí shikʼis yiyiiłtsą́ągo bitah hodiʼniitłid, dóó kintah Jerusalemgóó kʼasdą́ą́ʼ dah yiiteʼ.

31 Dóó kʼad shí, Nephi, nisneez dóó shitah hótsaago, dóó ałdóʼ Bóhólníihii tʼáá íiyisíí shidziilgo áshiilaa, éí bąą Laban bá naalʼaʼí doo dah didoolwoł da biniiyé sésił, dóó yíníshtąʼ ńtʼę́ę́ʼ.

32 Áádóó bichʼįʼ haasdzííʼ, shííshíníłtsʼą́ąʼgo, índa Bóhólníihii hináago, dóó shí hinishnáago, áko índa nihizaad yísíníłtsʼą́ąʼgo ndi, tʼéí nidóʼ nááhiiniʼnáa doo.

33 Dóó doo ńdooldził da biniiyé, bichʼįʼ yáshtiʼgo, bił ałhadiʼnishtʼą́ ndi; doo kééhatʼíní góyaa nihił dííkah áko nihígi átʼáo tʼáá ni níhólníihgo nanináa dooleeł, bidííniid.

34 Dóó ałdóʼ bichʼįʼ haasdzííʼ, kódíshníigo: Tʼáá aaníí Bóhólníihii ánihiłníigo díí bidaʼiilyaa; dóó ákoósh doo Bóhólníihii bibeehazʼáanii bikʼeh dahoniilʼį́į da dooleeł? Éí bąą, doo kééhatʼínígi shizhéʼé bichʼįʼ díníyáago éí áadi nihił kééhótʼį́į dooleeł.

35 Áádóó Zoram éí saad bee haasdzíʼę́ę yaa oozliʼ. Áko kʼad éí naalʼaʼí éí Zoram wolyéé lá; áádóó doo kééhatʼínígóó shizhéʼé yichʼįʼ doogáałgo nihił ahaʼdeetʼą́. Aooʼ, dóó ałdóʼ náásgóó nihił naashkai dooleeł níigo nihił ahaʼdeetʼą́ áyiilaa.

36 Kʼad díí daniidzin Jew dineʼé doo kééhatʼínígi iikaiígíí doo bił béédahodoozįįł da biniiyé, nihił nanikai dooleeł dabidiiʼniid, háálá bił béédahózingo éí nihikééʼ dookahii ndanihidoołtsił.

37 Áádóó Zoram nihił ahaʼdeetʼą́ áyiilaago, doo bąąh danihíniʼgóó bąąh tsídadeekééz.

38 Áádóó béésh łitsoii dah dadiitʼą́ dóó Laban bá naalʼaʼí bił, doo kééhatʼínígóó dah diikai, dóó shizhéʼé biníbaal siʼą́ąjįʼ nániikai.