1 Áádóó doo kééhatʼínígi nihizhéʼé baa nániikaigo, jó, tʼáá íiyisíí bił hóózhǫǫd, dóó shimá, Sariah, ałdóʼ tsʼídá tʼáá íiyisíí bił hóózhǫǫd, háálá éí ayóó átʼáo nihąąh bíniʼ ńtʼę́ę́ʼ.

2 Háálá doo kééhatʼínígidóʼ náádabiʼdiilyáísh łí niizį́į́ʼ; dóó shizhéʼé ałdóʼ yikʼijįʼ haadzííʼ, diné bił áhátʼíinii nílį́; yił níigo: Jó kéyah nihaa deetʼą́ą́dóó dah nihidiníʼeezh, dóó shiyáázh éí ádaadin, dóó nihí ałdóʼ doo kééhatʼínígi náánihidiʼdoolyééł.

3 Dóó díigi átʼáo éí shimá shizhéʼé yikʼijįʼ haadzííʼ.

4 Áádóó shizhéʼé shimá yichʼįʼ haadzíiʼ, kóyidííniidgo: Tʼáá aaníí diné bił áhátʼíinii nishłį́; háálá Diyin God bídéétʼiʼígíí tʼáadoo yiiłtsą́ą́góó éí Diyin God biyáʼátʼéehii doo shił bééhózin da dooleeł ńtʼę́ę́ʼ, ndi tʼahdii Jerusalemdi naasháago, dóó shikʼis bił shiʼdiisxį́į doo ńtʼę́ę́ʼ.

5 Jó ndi, shí éiyá kéyah bee ahaʼdeetʼáanii shóíséłtʼeʼ, éí éiyá íiyisíí baa shił hózhǫ́; aooʼ, tʼáá aaníí shił bééhózingo éí Bóhólníihii shiyeʼ Laban yílákʼeedóó yisdáyidoonił, dóó doo kééhatʼíní góyaa nihaa néidooʼishgo shił bééhózin.

6 Dóó díigi átʼáo shizhéʼé, Lehi, yáłtiʼgo shimá, Sariah yił náhóóshǫǫd, nihí nihiniinaa, doo kééhatʼínígi yiikahgo Jerusalemgóó, béésh łitsoii bikáaʼgi Jew dineʼé baa haneʼę́ę bíká néiikahgo.

7 Dóó shizhéʼé biníbaaldi nániikaigo, jó tʼáá áła ayóó átʼáo bił hóózhǫǫd, dóó shimá biiʼ hááhwiisdoh.

8 Dóó éí yááłtiʼ, kódííniidgo: Kʼad éí tsʼídá tʼáá aaníí Bóhólníihii shahastiin doo kééhatʼínígi dah didíínééł yidííniidígíí shił bééhózin; aooʼ, dóó tsʼídá tʼáá aaníí shił bééhózin Bóhólníihii shaʼáłchíní tʼáá ałtso yaa áhályą́ą́ ntʼę́ę́ʼ, dóó Laban yílákʼeedóó yisdáyíínil, dóó Bóhólníihii bibee adziilii binahjįʼ tʼáá ałtso ábidííniidę́ę yidaʼiilaa. Dóó kótʼáo éí saad yee yááłtiʼ.

9 Áádóó áko tʼáá íiyisíí bił dahóózhǫǫd dóó Bóhólníihii yichʼįʼ naaldlooshii yee náádaʼiisniiʼ, dóó Israel biDiyin God ahéheeʼ deidííniid.

10 Dóó Israel biDiyin God yichʼįʼ ahéheeʼ dadííniidgo índa, shizhéʼé, Lehi, béésh łitsoii bikááʼ naʼasdzo yę́ę néidiiʼą́, dóó hahoolzhiizh dóó wóshdę́ę́ʼ haʼííłtaʼ.

11 Dóó Moses éí naaltsoos ashdlaʼgo áyiilaago biyiʼgo bił bééhoozin, nahasdzáán ályaaígíí yaa halneʼ, dóó Adam dóó Eve áłtsé nihizhéʼé dóó nihimá ałdóʼ yaa hoolneʼ.

12 Dóó ałdóʼ hahoolzhiizhdóó Jew dineʼé baa haneʼ, dóó Judah dineʼé binaatʼáanii, Zedekiah dah neezdáajįʼ baa haneʼ ndi;

13 Dóó Diyin God yá dahalneʼii hodeeyáádą́ą́ʼdóó, ńléí naatʼáanii Zedekiah dah neezdáajįʼ, náásgóó ádahodoonííł haʼníigo hadahasdzíʼę́ę ałdóʼ biyiʼ; dóó Jeremiah bizaad ląʼída náásgóó ádahodoonííł nínę́ę ałdóʼ biyiʼ.

14 Áádóó shizhéʼé, Lehi, béésh łitsoii bikáaʼgi dabizhéʼé yę́ę baa haneʼgo ałdóʼ yiyiiłtsą́; ákohgo Joseph éí yitsʼą́ą́dóó hazlį́įʼgo bił bééhoozin; aooʼ, éí éí Joseph Jacob yiyeʼ ndi, éí Egyptgóó nabiʼdiizniiʼ yę́ę, dóó Bóhólníihii baa áhályą́ągo, áko bizhéʼé, Jacob dóó tʼáá ałtso yił naakai dichin biʼniighą́ąʼgo yisdáyíínil.

15 Dóó Egyptdi ąąh jizhjéeʼgo, tʼáá éí Diyin God háká eelwod yę́ę, chʼínáhoníʼeezh.

16 Dóó shizhéʼé Lehi, dabizhéʼé yę́ę ákótʼáo bił bééhoozin. Dóó Laban ałdóʼ Joseph yitsʼą́ą́dóó hazlį́į́ʼ lá, áádóó bí dóó dabizhéʼé yę́ę díí naʼasdzooígíí yaa áhályą́ą́ ńtʼę́ę́ʼ lá.

17 Dóó kʼad shizhéʼé díí tʼáá ałtso yiyiiłtsą́ągo, Iiʼsizíinii bił hazlį́į́ʼ, dóó náásgóó baʼáłchíní danilį́į dooleełígíí yaa yáʼniiłtiʼ—

18 Áko díí béésh łitsoii bikáʼígíí éí náásgóó dóó adahwiisʼáágóó tʼáá ałtso ałʼąą dineʼé bił dah nahazʼą́ągo, dóó ałʼąą dóoneʼé, dóó bizaad ałʼąą ádaatʼéego, dóó nihookááʼ dineʼé bí bitsʼą́ą́dóó nooséłígíí bitahgóó dooleeł.

19 Ákohgo, díí béésh łitsoii éí tsʼídá doo ndootʼih da; doo ndóʼ hoolʼáágóó yidoobah da níigo yááłtiʼ. Dóó náásgóó baʼáłchíní danilį́į dooleełígíí yaa yááłtiʼ.

20 Áádóó shí dóó shizhéʼé tʼáá ałtso Bóhólníihii ánihidííniidígíí bikʼeh honiilʼį́įgo biʼiilyaa.

21 Dóó Bóhólníihii haneʼ ńdadoohʼááł nihiłnínę́ę ńdadiitʼą́, dóó deiyíníiltaʼ dóó tʼáá íiyisíí ílíinii átʼéii lágo baa ákodaniidzį́į́ʼ; aooʼ, éí éí tʼáá íiyisíí nihá yáʼátʼéehgo nihił béédahoozin ndi, áko índa nihaʼáłchíní Bóhólníihii bibeehazʼáanii bá hashtʼeńdadiitʼááł daniidzį́į́ʼ.

22 Ákohgo, Bóhólníihii biniiyé ńdadiitʼánígíí bił bééhózínígo, doo kééhatʼínígi kéyah bee ahaʼdeetʼánígíí bichʼįʼ yiikah.