Ti Umuna a Libro ni Nephi
Ti Panagturay ken Panagministrona
Ti salaysay ni Lehi, ken ti asawana a ni Saria, ken dagiti uppat a lallaki nga annakna, a maawagan, (mangrugi iti inauna) iti Laman, Lemuel, Sam, ken Nephi. Ballagaan ti Apo ni Lehi a pumanaw iti daga ti Jerusalem, gapu ta mangipadpadto kadagiti tattao ti maipapan kadagiti kinadakesda ket ikagumaanda a papatayen isuna. Agdaliasat isuna iti tallo nga aldaw iti let-ang a kaduana ti pamiliana. Kuyogen ni Nephi dagiti lallaki a kakabsatna ket agsublida iti daga ti Jerusalem tapno alaenda ti kasuratan dagiti Hudio. Ti salaysay dagiti panagsagabada. Asawaenda dagiti babbai nga annak a ni Ismael. Ikuyogda dagiti pamiliada ket agdaliasatda iti let-ang. Dagiti panagsagaba ken panagrigrigatda iti langalang. Ti pagturongan dagiti panagdaliasatda. Madanonda dagiti nalawa a taaw. Agrebelde kontra ken ni Nephi dagiti lallaki a kakabsatna. Pinagulimekna ida, ket mangaramid iti bapor. Nagananda ti lugar iti Bountiful. Ballasiwenda ti nalawa a taaw nga agturong iti naikari a daga, ken dadduma pay. Sigun daytoy iti salaysay ni Nephi; wenno iti sabali a pannao, siak, ni Nephi, insuratko daytoy a kasuratan.
Kapitulo 1
Irugi ni Nephi ti kasuratan dagiti taona—Makita ni Lehi babaen iti parmata ti maysa nga adigi nga apoy ken basaenna ti libro ti padto—Dayawenna ti Dios, ipadlesna ti yaay ti Mesias, ken ipadtona ti pannakadadael ti Jerusalem—Idadanes isuna dagiti Hudio. Agarup 600 B.C.
1 Siak, ni Nephi, gapu ta naipasngayak iti nasayaat a nagannak, ngarud naisuro kaniak ti amin nga adal ti amak; ket gapu ta nakitak ti adu a panagrigrigat kabayatan ti panagbiagko, nupay kasta, gapu ta napaborannak unay ti Apo iti unos ti panagbiagko; wen, gapu ta naaddaannak iti naindaklan a pannakaammo iti kinasayaat ken dagiti misterio ti Dios, ngarud agaramidak iti kasuratan dagiti paspasamak ti panagbiagko.
2 Wen, agaramidak ti maysa a kasuratan iti pagsasao ti amak, a buklen ti adal dagiti Hudio ken ti pagsasao dagiti taga-Egipto.
3 Ken ammok a ti kasuratan nga aramidek ket pudno; ken aramidek babaen ti bukodko nga ima; ken aramidek daytoy sigun iti pannakaammok.
4 Ta napasamak nga iti panangrugi ti umuna a tawen a panagturay ni Sedekias, nga ari ti Juda, (ti amak, a ni Lehi, gapu ta nagnaed iti Jerusalem iti unos ti panagbiagna); ket iti dayta met laeng a tawen immay dagiti adu a propeta, a nangipadpadto kadagiti tattao a masapul nga agbabawida, wenno ti dakkel a siudad a Jerusalem ket nasken a madadael.
5 Ngarud napasamak a nagkararag iti Apo ti amak, a ni Lehi, bayat iti ipapanna, wen, uray iti amin a pusona, iti biang dagiti taona.
6 Ket napasamak a bayat ti panagkararagna iti Apo, adda nagparang a maysa nga adigi ti apuy ket nagdisso iti bato iti sangona; ket adu ti nakita ken nangngegna; ket gapu kadagiti bambanag a nakita ken nangngegna kasta unay ti kintayeg ken tigergerna.
7 Ket napasamak a nagsubli isuna iti balayna iti Jerusalem; ket inyiddana ti bagina iti kamana, gapu ta narimbawan ti Espiritu ken dagiti bambanag a nakitana.
8 Ket gapu ta narimbawan ti Espiritu, naaddaan isuna ti maysa a parmata, uray pay a ti langit ket nakitana a naglukat, ket impagarupna a nakitana ti Dios a nakatugaw iti tronona, a napalawlawan kadagiti saan a mabilang a panagtitipon dagiti anghel iti postura nga agkankanta ken agdaydayaw iti Diosda.
9 Ket napasamak a nakitana ti Maysa a bumabbaba manipud iti tengnga ti langit, ket nakitana a naranraniag ti kinaraniagna ngem ti init iti tengnga ti aldaw.
10 Ket nakitana met ti sangapulo ket dua a dadduma pay a sumursurot kenkuana, ket talaga nga artapanda ti kinalawag dagiti bituen iti tangatang.
11 Ket bimmabada ken nagturong iti rabaw ti daga; ket immay ti immuna ket nagtakder iti sango ti amak, ket nangted kenkuana iti libro, ket imbilinna kenkuana a basaenna.
12 Ket napasamak a bayat iti panagbasana, napno isuna ti Espiritu ti Apo.
13 Ket nabasana, a kunana: Kaasika pay, kaasika pay, Jerusalem, gapu ta nakitak dagiti kinarimonmo! Wen, ket adu a banag ti nabasa ti amak maipapan iti Jerusalem—a madadael daytoy, ken dagiti umili idiay; adu ti matayto iti espada, ket adu ti maalanto kas balud iti Babilonia.
14 Ket napasamak nga idi nabasa ken nakita ti amak dagiti adu a naindaklan ken nakaskasdaaw a bambanag, nangipukkaw isuna ti adu a bambanag maipapan iti Apo; kas iti: Naindaklan ken nakaskasdaaw dagitoy aramidmo, O Apo Dios a Mannakabalin-amin! Nangato ti tronom iti langit, ken ti bilegmo, ken kinasayaatmo, ken kinamanangngaasim adda kadagiti amin nga agnanaed iti daga, ken, gapu ta manangngaasika, saanmo nga ipalubos a mapukaw dagiti umay kenka!
15 Ket iti kastoy a wagas ti pagsasao ti amak iti panangdayaw iti Diosna; gapu ta talaga a nagragsak ti kararuana, ket napno ti intero a pusona, gapu kadagiti bambanag a nakitana, wen, nga impakita ti Apo kenkuana.
16 Ket ita siak, ni Nephi, saanko nga aramiden ti naan-anay a salaysay dagiti banag a naisurat ti amak, gapu ta adu dagiti naisuratna a banag a nakitana kadagiti parmata ken tagtagainepna; ken adu met dagiti naisuratna a banag nga impadtona ken imbagana kadagiti annakna, ket iti daytoy saanko nga aramiden ti naan-anay a salaysay.
17 Ngem mangaramidak iti maysa a salaysay dagiti mapaspasamak iti panagbiagko. Kitaem, agaramidak ti panangyababa ti kasuratan ti amak, kadagiti pinanid nga inaramid dagiti bukodko nga ima; ngarud, kalpasan ti panangyababak iti kasuratan ti amak mangaramidakto iti salaysay ti bukodko a biag.
18 Ngarud, kayatko koma a maammuanyo, a kalpasan ti panangipakita ti Apo kadagiti adu a nakaskasdaaw a bambanag iti amak, a ni Lehi, wen, maipapan iti pannakadadael ti Jerusalem, kitaen napan isuna kadagiti tattao, ket rinugianna ti nangipadto ken nangipakdaar kadakuada maipapan kadagiti bambanag nga agpada a nakita ken nangngegna.
19 Ket napasamak nga inuy-uyaw dagiti Hudio gapu kadagiti bambanag a pinaneknekanna maipanggep kadakuada; gapu ta pudno a pinaneknekanna ti kinadakes ken kinarimonda; ken pinaneknekanna a dagiti bambanag a nakita ken nangngegna, ken kasta met dagiti bambanag a nabasana iti libro, inparangarangda a silalawag ti yaay ti Mesias, ken kasta met ti pannakasubbot ti lubong.
20 Ket idi nangngeg dagiti Hudio dagitoy a bambanag nakapungtotda kenkuana; wen, kas met kadagiti propeta idi ugma, a pinagtalawda, ken binato, ken pinatayda; ken ginandatda a papatayen isuna, tapno gudasenda. Ngem kitaen, siak, ni Nephi, ipakitak kadakayo nga adda dagiti nadungngo nga kinaasi ti Apo kadagiti amin a pinilina, gapu iti pammatida, tapno pagbalinenna ida a nabileg agingga iti bileg ti pakaisalakan.