1 Jó áko, áádóó shizhéʼé naʼageeł biyiʼ góneʼé, Bóhólníihii bichʼįʼ haadzííʼ, dóó kóhodííniid: Lehi, háálá íinilaaígíí biniinaa nikʼihojídlí; dóó háálá neʼoodląʼgo biniinaa dóó díí diné tʼáadoo leʼé bee bił hodíílnih nidííniidę́ę bee bił hwíínílneʼgo biniinaa, jó, danidiyiilyééł danízin.

2 Áádóó Bóhólníihii shizhéʼé binaʼiidzeeł biyiʼ, naʼáłchíní doo kééhatʼínígóó bił dah didíínééł, yidííniid.

3 Áádóó Bóhólníihii yee bichʼįʼ haadzíʼę́ę yikʼeh hóółʼįįd, ákohgo Bóhólníihii ábidííniidígíí yiʼiilaa.

4 Áádóó doo kééhatʼínígóó dah diiná. Bighan, dóó bikéyah, dóó bibéésh óola, dóó bibéésh łigai, dóó binaalyeʼé daʼílíinii tʼáá ákǫ́ǫ́ niinínil, dóó tʼáadoo dah yidiiláhí da, tʼáá hazhóʼó baʼáłchíní, dóó chodeidoołʼįįłígíí, dóó níbaal tʼéiyá, doo kééhatʼínígóó yił dah diiná.

5 Dóó Tónteel Łichííʼ yibąąhgóó níyá; dóó Tónteel Łichííʼ bibąąhgóó doo diné kééhatʼínígi níyá; dóó baʼáłchíní doo diné kééhatʼínígi yił níná, éí éí shimá, Sariah, dóó shínaaí, Laman, Lemuel, dóó Sam.

6 Áádóó doo kééhatʼínígi yinéełgo tááʼ yiską́, dzígaigi tó nílį́į́ léiʼ bibąąhgóó biníbaal niiníʼą́.

7 Áádóó tsé ałkʼiiztłʼin, dóó Bóhólníihii yichʼįʼ nááʼiisniiʼ, dóó Bóhólníihii nihiDiyin God ahéheeʼ yidííniid.

8 Áádóó tó nílínę́ę Laman yee yiyíízhiʼ, dóó Tónteel Łichíiʼgo dah siyínígíí biih yílį́; dóó dzígaigi éí tó dah siyínígíí tó biih yílį́ bíighahgi.

9 Dóó shizhéʼé tó nílínę́ę Tónteel Łichíiʼgo dah siyínígíí biih yílį́įgo yiyiiłtsą́ągo, kóníigo, Laman yichʼįʼ haadzííʼ: O tó nílínígi ánítʼée dooleełę́ę, tʼáá áłahjįʼ yáʼátʼéehii bee nííséeł dooleeł.

10 Dóó Lemuel yichʼįʼ hanáánáádzííʼ: O díí dzígaigi ánítʼée dooleełę́ę, doo łahgo ánááʼníił da, dóó níníłdzil dóó náasjįʼ Bóhólníihii bibeehazʼáanii bikʼeh honíłʼį́į doo.

11 Kʼad Laman dóó Lemuel bízhą́ ílínígíí biniinaa díidí yee yichʼįʼ yááłtiʼ; háálá ląʼída tʼáadoo leʼé bizhéʼé yee yikʼijįʼ haadzííʼ, háálá diné bił áhátʼį́ nilínígíí biniinaa, dóó Jerusalemdę́ę́ʼ chʼíbiníʼeezh, bikéyah baa deetʼánígíí bitsʼą́ąjįʼ, dóó biʼóola, dóó bibéésh łigai, dóó binaalyeʼé daʼílíinii tʼáá gééd, doo kééhatʼínígi dínóonéeł da biniinaa. Dóó tʼáá ádzaagóó bijéí biyiʼdóó ntsékeesígíí biniinaa díí yiʼiilaa níigo.

12 Dóó ákótʼéego Laman dóó Lemuel, alą́ąjįʼ naaʼaashígíí, bizhéʼé yikʼijįʼ yááłtiʼ. Diyin God ábiilaaígíí dóó ádooníłígíí doo bił bééhózinígíí biniinaa akʼijįʼ yááłtiʼ.

13 Doo ndóʼ ndi yoodlą́ą da Jerusalem, kintah ayóó átʼéii, doochxǫǫłígíí Diyin God yá dahalneʼii yee hadahasdzíʼę́ęgi átʼáo. Dóó Jew dineʼé Jerusalemdi kéédahatʼínígíí, shizhéʼé deidiyoołhéełgo hadeinitáhą́ągi átʼáo, tʼáá áła kótʼáo ntsékees ńtʼę́ę́ʼ.

14 Áádóó shizhéʼé dzígai Lemuel bee yééjiʼ yę́ę, adziilii, dóó Iiʼsizíinii bił hólǫ́ǫgo, tʼáá áła yichʼįʼ yááłtiʼ bitah hodiʼniitsxiz silį́į́ʼ. Dóó yiidiiłheel, áko tʼáadoo bichʼįʼ hanáánáádzíiʼ da; ákohgo, kótʼáo bikʼeh hółʼį́į́ ńtʼę́ę́ʼ.

15 Dóó shizhéʼé níbaal yiiʼ baghan ńtʼę́ę́ʼ.

16 Áádóó shí, Nephi, tʼahdii tsíłkéí nishłį́į ndi, ákótʼée ndi tʼáá nistsxaaz dóó, nisneez dóó ayóó sidziil, dóó ałdóʼ Diyin God biyáʼátʼéehii íiyisíí shił bééhodoozįįł nisingo, ákohgo, tʼáá íiyisíí Bóhólníihii bichʼįʼ sodeeszin; jó áádóó shaa níyá, dóó shijéí yilzhólígo áyiilaa áko tʼáá ałtso shizhéʼé saad yee yááłtiʼę́ę éí yisisdląąd; ákohgo tʼáadoo shínaaí akʼijįʼ yáłtiʼígi átʼáo akʼijįʼ yááłtiʼ da.

17 Dóó Sam bee bichʼįʼ yááłtiʼ, tʼáá ałtso Bóhólníihii biʼIiʼsizį́ Diyinii binahjįʼ shił ííshją́ą́ áyiilaaígíí bił ííshją́ą́ íishłaa. Áádóó kóhoodzaa shizaad yoosdląąd.

18 Ndi, jó, Laman dóó Lemuel éí shizaad doo yiyíistsʼą́ąʼ da, dóó bízhą́ ílínígíí tʼáá íiyisíí baa yínííł nisingo biniinaa tʼáá íiyisíí Bóhólníihii bichʼįʼ bá sodeeszin.

19 Áádóó Bóhólníihii shichʼįʼ haadzííʼ, kóníigo: Nephi, neʼoodląʼígíí biniinaa, nikʼihojídlí, háálá yéigo nijéí hojoobaʼ íinízingo, hashínínítą́ą́ʼ.

20 Dóó wónáásdóó shibeehazʼáanii bikʼeh honíłʼį́įgo, tʼáadoo leʼé ńdidíílééł, dóó kéyah bee ahaʼdeetʼą́ąjįʼ ndiʼdoodlóós, aooʼ, kéyah nihá hashtʼeʼhooshłaadi ndi; aooʼ, tʼáá ałtso kédaayahígíí biláahdi ánoolninígíí átʼé.

21 Dóó wónáásdóó nínaaí tʼahdii nikʼijįʼ nilį́įgo dooleeł, Bóhólníihii bichʼįʼ dádiʼdoolkał.

22 Dóó wónáásdóó shibeehazʼáanii bikʼeh honíłʼį́įgo, tʼáá áła nínaaí ni binaatʼáanii dóó binaʼnitiní nílį́įgo ánidiʼdoolnííł.

23 Jó háálá, áaji yoołkáałgo éí tʼáá áła nínaaí nikʼijįʼ silį́įʼgo, tsʼídá doo yáʼátʼéehii éí shí bikʼijįʼ kódeeshłííł, dóó náásgóó naʼáłchíní danilį́į dooleełígíí doo yiláahgo ádabóodziil da dooleeł tʼáá hazhóʼó bí ałdóʼ shikʼijįʼ daazlį́įʼgo tʼéiyá.

24 Dóó shikʼijįʼ silį́įʼgo, náásgóó naʼáłchíní danilį́į dooleełígíí atídaalʼį́į dooleeł, yinahjįʼ yéédaalniih dooleeł.