1 Áádóó shí, Nephi, Bóhólníihii bił ałchʼįʼ yááłtiʼdę́ę́ʼ nánísdzá, shizhéʼé biníbaal siʼą́ąjįʼ.

2 Áádóó kóníigo, shichʼįʼ yááłtiʼ: Jó neiséyeelgo neiseeł, biyiʼ Bóhólníihii ni dóó nikʼisóó Jerusalemgóó bił ńdííkah shidííniid.

3 Jó háálá, Laban Jew dineʼé baa haneʼę́ę neiʼá dóó dashizhéʼé yę́ę baa haneʼ ałdóʼ, dóó éí éiyá béésh łitsoii bikááʼ nááháasdzo.

4 Ákohgo, Bóhólníihii shichʼįʼ yááłtiʼgo ni dóó nikʼisóó Laban bighangóó doohkah, dóó ndaʼasdzooígíí ńdadidoohʼááł, dóó doo kééhatʼínígi ńdadoohʼááł, shidííniid.

5 Dóó kʼad, nínaaí tʼóó akʼijįʼ yáłtiʼ, ánihidííniidígíí ayóó nanitłʼah níigo; jó ndi doo shí áhodííniid da, Bóhólníihii yeeʼ áhodííniid.

6 Éí bąą yíwohjįʼ yínááł, shiyeʼ, dóó doo akʼijįʼ yáníłtiʼígíí biniinaa, Bóhólníihii nikʼijidlíi dooleeł.

7 Áádóó shí, Nephi, shizhéʼé kóbidííniid: Shí ákǫ́ǫ́ deeshááł dóó Bóhólníihii ádííniidígíí biʼdeeshłííł, háálá shił bééhózin Bóhólníihii baʼáłchíní beehazʼáanii doo łaʼ yeidoolééł da, tʼáá hazhóʼó yá hashtʼehoolaago tʼéiyá tʼáadoo leʼé áyidííniid yę́ę yidaʼdoolííł.

8 Áádóó shizhéʼé díí saad yidiiztsʼą́ąʼgo tʼáá íiyisíí bił hóózhǫǫd, háálá Bóhólníihii shikʼihojisdliʼígíí bił bééhoozin.

9 Dóó shí, Nephi, dóó shikʼisóó nihiníbaal deiyíníijáahgo, doo kééhatʼíní góneʼ dah diikai, ńléí kéyah Jerusalem gódei.

10 Áádóó kéyah Jerusalemgóó néiikahgo, shí dóó shikʼisóó ndahosiitʼą́.

11 Dóó yáʼiiltʼeʼ baa nisiikai—háí Laban baghan góneʼ yił yah adoogááł biniiyé. Áádóó Laman bikʼi hodiikę́ę́z; dóó Laman Laban baghan góneʼ yah ííyá, dóó yighan góneʼ sidáago yił ałchʼįʼ yááłtiʼ.

12 Dóó Laban béésh łitsoii bikáaʼgi naʼasdzooígíí, ałkʼidą́ą́ʼ danihizhéʼé baa haneʼ yę́ę, shaa níʼaah yidííniid ńtʼę́ę́ʼ.

13 Jó dóó, áádóó Laban bá hóóchįįd, dóó bighandę́ę́ʼ chʼíhwiiníłhan; dóó naʼasdzo yę́ę tʼáadoo hainíʼą́ą da. Ákohgo, kóhodííniid: Jó aniʼįįhii nílį́, dóó nidiyeeshhééł.

14 Ndi Laman hatsʼą́ą́ʼ chʼélwod, dóó Laban ádzaaígíí, yee nihił hoolneʼ. Dóó íiyisíí baa yínííł daniidzį́į́ʼ, dóó shínaaí kʼasdą́ą́ʼ doo kééhatʼínígi shizhéʼé yichʼįʼ dah ńdiitʼáázh.

15 Jó ndi kótʼáo bichʼįʼ haasdzííʼ: Tʼáá aaníí Bóhólníihii hináago, dóó nihí dahiniiʼnáago, doo kééhatʼínígóó doo nihizhéʼé bichʼįʼ ńdiikah da tʼáá hazhóʼó Bóhólníihii ánihidííniidígíí bidaʼiilyaago índa.

16 Ákohgo, daʼiiniidlą́ągo Bóhólníihii bibeehazʼáanii bikʼeh dahoniilʼį́į doo; éí bąą ńléí nihizhéʼé bikéyah góyaa ńdiikah, jó háálá tʼáá áadi bibéésh óola dóó bibéésh łigai, dóó ląʼída tʼáadoo leʼé daʼílíinii tʼáá áadi niinínil. Dóó Bóhólníihii ábidííniidígíí biniinaa díí tʼáá ałtsoní yiʼiilaa.

17 Háálá diné bąąhági átʼéii yaa naakaigo biniinaa, Jerusalem ałtso doolchxǫǫłgo bił bééhózin.

18 Jó háálá, Diyin God yá dahalneʼii bizaad yóó adeideezʼą́. Ákohgo shizhéʼé dah didíínééł biʼdooʼniid yę́ę tʼáadoo ádzaagóó, jó éí bí ałdóʼ bidiʼyoolyééł ńtʼę́ę́ʼ. Ákohgo kéyahdóó dah diiná.

19 Jó áádóó, Diyin God tʼéiyá bił bééhózin díí ndaʼasdzo biniiyé shódeidiiltʼeełígíí, áko nihaʼáłchíní ałkʼidą́ą́ʼ danihizhéʼé yę́ę bizaad deididootsʼį́į́ł, biniiyé, tʼahdii díí bá deiyíníitąʼ;

20 Dóó ałdóʼ tʼáá ałtso Diyin God yá dahalneʼii ádílzinii yee hadahasdzíʼę́ę, Diyin God biiʼSizíinii dóó bibee adziilii binahjįʼ, ńléí hodeeyáádą́ą́ʼ dóó kojįʼ, bá hashtʼeʼndootʼááł.

21 Áádóó kótʼáo shínaaí bichʼįʼ yáłtiʼgo shoosdląąd, áko éí Diyin God bibeehazʼáanii yikʼeh hółʼį́į dooleeł biniiyé.

22 Áádóó nihikéyahgóó nániikai, dóó áadi nihiʼóola dóó nihibéésh łigai índa nihinaalyeʼé daʼílíinii ahandahishiijaaʼ.

23 Dóó díí tʼáadoo leʼé ałtso ahandahishiijaaʼgo índa, Laban baghangóó náániikai.

24 Áádóó Laban bichʼįʼ niniikai, nihiʼóola, dóó nihibéésh łigai, dóó tʼáá ałtso nihinaalyeʼé daʼílíinii díí bikʼé, béésh łitsoii bikááʼ naʼasdzo yę́ę nihaa dííʼááł dabidiiʼniid.

25 Áádóó Laban nihinaalyeʼé, tʼóó ahayóígo yiyiiłtsą́ągo, yídanoosniiʼ, áko índa chʼínihininíłkaad, dóó bá ndaalnishii nihikééʼ ayííłʼaʼ, ndanihidoołtsiłgo, nihinaalyeʼé shí dooleeł nízingo biniiyé.

26 Áádóó Laban bá ndaalnishii bitsʼą́ąjigo ahaa dah diikai, dóó nihinaalyeʼé tʼáá ákǫ́ǫ́ silį́į́ʼ nihikééʼ joojahgo biniinaa, áko éí éiyá Laban bílákʼee aníídeeʼ.

27 Áádóó doo kééhatʼínígóó ahaa dah diikai, dóó Laban bá ndaalnishí tʼáadoo nihikʼíníjéeʼ da, dóó tséʼáán léiʼ góneʼ ńdadéetʼį́į́ʼ.

28 Áádóó Laman shichʼįʼ bá hóóchįįd, dóó shizhéʼé yichʼįʼ ałdóʼ; dóó ałdóʼ Lemuel nihichʼįʼ bá hóóchįįd, háálá Laman bizaad yiyíistsʼą́ąʼgo biniinaa. Ákohgo Laman dóó Lemuel, nihí bitsilí niidlínígíí, ląʼída saad yee nihikʼijįʼ yááłtiʼ, dóó tsin yee nánihidííłhaal.

29 Áádóó tsin yee nánihidííłhaalgo, jó, Bóhólníihii bá naalʼaʼí léiʼ bidááhdóó yiizįʼii, dóó yichʼįʼ haadzííʼ, kóbiłníigo: Haʼátʼíí lá biniiyé nihitsilí tsin bee nánółhał? Daʼ doósh nihił bééhózin da, éí yeeʼ bąąhági átʼéii baa naahʼaashígíí biniinaa, nihinaatʼáanii nilį́į dooleeł, Bóhólníihii bikʼidiilniiʼ. Jó Jerusalemgóó éí nínáádoohkah, dóó Bóhólníihii éí Laban nihílákʼee yidoolóós.

30 Diyin yá naalʼaʼii nihichʼįʼ yááłtiʼ dóó bikʼijįʼ, dah ńdiidzá.

31 Dóó diyin yá naalʼaʼii anáádzáago índa, Laman dóó Lemuel akʼijįʼ yánááʼniiłtiʼ, kóníigo: Haashąʼ yitʼáo éí Bóhólníihii Laban nihílákʼee yidoolóós? Jó, diné ayóo bidziilii átʼé, dóó diné ashdladiin yidoołʼaałgo yíighah, aooʼ, índa ashdladiin neidoołtsiłgo ndi yíighah; índa nihíísh éí doo ákónihidoolíił da?