1 Ket napasamak a kalpasan ti isangnsangpetmi iti let-ang a mapan iti amami, kitaen, napnuan isuna iti ragsak, kasta met ti inak, a ni Saria, a kasta unay ti ragsakna, agsipud ta pudno a nagladingit isuna gapu kadakami.

2 Agsipud ta impagarupna a nataykamin iti let-ang; ket nagreklamo met a kontra iti amak, nga imbagana kenkuana a maysa isuna a managparmata a tao; a kunana: Kitaem, pinasurotmokami manipud iti tinawidtayo a daga, ket awanen dagiti lallaki nga annakko, ket mataytayo iti let-ang.

3 Ket kastoy ti wagas ti pagsasao ti inak iti panagreklamona kontra iti amak.

4 Ket napasamak a nakisarita ti amak kenkuana, a kunana: Ammok a managparmataak a tao; ta no saanko a nakita dagiti bambanag ti Dios iti maysa a parmata saanko koma a naammuan ti kinasayaat ti Dios, ngem nagbatiak koma idiay Jerusalem, ket natayak a kas kadagiti kakabsatko.

5 Ngem kitaem, nagun-odko ti naikari a daga, ket talaga nga agragsakak kadagitoy a bambanag; wen, ken ammok nga isalakan ti Apo dagiti lallaki nga annakko manipud kadagiti ima ni Laban, ket iturongna manen ida kadatayo ditoy let-ang.

6 Ket kastoy ti wagas ti pagsasao ti amak, a ni Lehi, ti panangliwliwana iti inak, a ni Saria, maipapan kadakami, bayat ti panagdaliasatmi iti let-ang nga agturong iti daga ti Jerusalem, tapno gun-odenmi ti kasuratan dagiti Hudio.

7 Ket idi nagsublikami iti tolda ti amak, kitaen, naan-anay ti ragsakda, ket naliwliwa ti inak.

8 Ket nagsao isuna, a kunana: Ammok itan a sigurado a binilin ti Apo ti asawak nga aglibas iti let-ang; wen, ken siguradoak nga ammok met a sinalakniban ti Apo dagiti lallaki nga annakko, ket insalakanna ida manipud kadagiti ima ni Laban, ken inikkanna ida iti bileg tapno matungpalda dagiti banag nga imbilin ti Apo kadakuada. Ket kastoy ti wagas ti talaga a panagsaritana.

9 Ket napasamak a talaga a kasta unay ti ragsakda, ket talaga a nangipaay iti sakripisio ken napuoran a daton iti Apo; ket nagyamanda iti Dios ti Israel.

10 Ket kalpasan iti panagyamanda iti Dios ti Israel, innala ti amak, a ni Lehi, dagiti kasuratan a naikitikit kadagiti pinanid a gambang, ket binasana ida manipud idi punganay.

11 Ket naduktalanna a linaonda dagiti lima a libro ni Moises, a nangted iti salaysay iti pannakaparsua ti lubong, ken kasta met kada Adan ken Eva, nga immuna a nagannaktayo;

12 Ken kasta met ti kasuratan dagiti Hudio manipud idi punganay, uray pay agingga iti panangrugi ti panagturay ni Sedekias nga ari ti Juda;

13 Ken kasta met dagiti padto dagiti nasantuan a propeta, manipud idi punganay, agingga iti panangrugi ti panagturay ni Sedekias; ken kasta met dagiti adu a padpadto a naisao babaen ken ni Jeremias.

14 Ket napasamak a ti amak, a ni Lehi, naduktalanna met kadagiti pinanid a gambang ti kapuonan dagiti ammana; ngarud naammuanna a kapupuonna ni Jose; wen, uray ni Jose nga anak ni Jacob, a nailako iti Egipto, ken napagtalinaed a natalged babaen iti ima ti Apo, tapno isu ti mangsalaknib iti amana, a ni Jacob, ken dagiti amin a sangkabalayanna manipud ti ipapatay iti panagbisin.

15 Ket nayadayoda iti pannakaadipen ken naitalawda iti daga ti Egipto, babaen met laeng iti dayta a Dios a nangisalakan kadakuada.

16 Ket isu a talaga a natakuatan ti amak, a ni Lehi, ti kapuonan dagiti ammana. Ket ni Laban kapuonan met ni Jose, ngarud isu ken dagiti ammada ti nangtalimeng kadagiti kasuratan.

17 Ket ita idi nakita ti amak dagiti amin dagitoy a bambanag, napnuan isuna iti Espiritu, ket rinugianna ti nagipadto maipapan iti kaputotanna—

18 A masapul a maipakaammo dagitoy a pinanid a gambang iti amin a pagilian, puli, pagsasao, ken dagiti tattao a kaputotanna.

19 Ngarud, kinunana a saan pulos a madadael dagitoy pinanid a gambang; ken nasken a saan koma a palidemen ida ti panawen. Ket adu ti impadtona maipapan iti kaputotanna.

20 Ket napasamak nga agingga ita siak ken ti amak ti nangtungpal kadagiti bilin nga imbilin ti Apo kadakami.

21 Ket nagun-odmi dagiti kasuratan nga imbilin ti Apo kadakami, ket binasami ida ket naammuanmi a makaay-ayoda; wen, uray pay a naindaklan ti pategna kadakami, isu a mataginayonmi dagiti bilin ti Apo nga agpaay kadagiti annakmi.

22 Ngarud, sirib daytoy ti Apo a nasken nga itugotmi ida, bayat ti panagdaliasatmi iti let-ang nga agturong iti naikari a daga.