Wóltaʼii 7
Lehi biyeʼ Jerusalemgóó nákai dóó Ishmael dóó baʼáłchíní nihił díínééł deidííniid—Laman dóó łaʼ akʼijįʼ daazlį́į́ʼ—Nephi bikʼis Bóhólníihii tʼáá íiyisíí yinohdlą́ yidííniid—Tłʼóół yee bidaʼaztłʼǫ́ʼ dóó deidiyoołhéełgo daaníigo yindahazʼą́—Oodląʼ bee adziilii yee tłʼóół kʼíiníłdláád—Bikʼis shaa ndiníʼaah bidííniid—Lehi dóó yił yikahígíí kǫʼ yee náádaʼiisniiʼ. Díí tʼah doo Jesus biʼdichíhę́ędą́ą́ʼ 600–592 yihahą́ądą́ą́ʼ nahalzhiishgo ádahóótʼįįd.
1 Dóó kʼad díí nihił bééhózin doo nisin, Shizhéʼé, Lehi, ałtso náásgóó baʼáłchíní danilį́į dooleełígíí yaa yááłtiʼgo, áádóó Bóhólníihii bichʼįʼ hanáánáádzííʼ: Lehi, baʼáłchíní dóó beʼesdzáán doo tʼáá sáhí doo kééhatʼínígi dah yididooʼish da níílá; ndi beʼashiiké éí náánáłahdę́ę́ʼ atsiʼ danilínígíí bichʼooní ádeidoolííł, áko kéyah bee ahaʼdeetʼánídi baʼáłchíní Bóhólníihii deidoodląąłgo deidínóosééł.
2 Áádóó Bóhólníihii ábiłníigo, shí, Nephi, dóó shikʼisóó, Jerusalemgóó ńdookah, dóó áádę́ę́ʼ Ishmael dóó baʼáłchíní dóó bichʼooní, doo kééhatʼínígi yił ńdookah.
3 Áádóó shí, Nephi, dóó shikʼisóó, doo kééhatʼínígi Jerusalem bichʼįʼ nínáániikai.
4 Áádóó Ishmael bighandi niikai, dóó Ishmael yáʼátʼéehgo nihaa ntsízkéezgo, áko índa éí Bóhólníihii bizaad bee bichʼįʼ yádasiiltiʼ.
5 Áádóó Bóhólníihii Ishmael dóó bichʼooní, dóó baʼáłchíní tʼáá ałtso, dóó doo nihikʼijįʼ nilį́į́góó áyiilaa, áko índa doo kééhatʼínígi shizhéʼé biníbaal bichʼįʼ nihił nákai.
6 Áádóó doo kééhatʼínígi yiikahgo, Laman dóó Lemuel, dóó Ishmael bitsiʼ naakigo, dóó beʼashiiké naakigo, índa baʼáłchíní, nihikʼijįʼ daazlį́į́ʼ; aooʼ, shí, Nephi, dóó Sam, dóó bizhéʼé, Ishmael, dóó beʼesdzáán, índa bitsiʼ táaʼgo.
7 Áádóó éí éí nihikʼijįʼ daazlį́įʼgo, nátʼą́ą́ʼ Jerusalemgóó ńdiikai daaníí ńtʼę́ę́ʼ.
8 Dóó kʼad shí, Nephi, Laman dóó Lemuel bijéí yitłʼis tʼáá íiyisíí baa yínííł niizį́įʼgo, éí bąą bichʼįʼ yááłtiʼ, kódíshníigo: Jó nihí éí shilą́ąjįʼ naahʼaash, dóó haash yitʼáo éí nihijéí biyiʼ hastłʼis, dóó nihíniʼ doo ooʼį́į da, áko shí, nihitsilí nishłínígíí kodóó nihichʼįʼ yáshtiʼ, aooʼ, dóó yáʼátʼéehgo nihá sézį́?
9 Haash yitʼáo Bóhólníihii bizaad doo bikʼeh honołʼį́į da?
10 Haash yitʼáo éí Bóhólníihii yá naalʼaʼii woohłtsánę́ę beisoonah?
11 Aooʼ, haash yitʼáo Bóhólníihii ayóó átʼéego nihíká eelwodę́ę beisoonah, Laban bílákʼeedóó yisdánihííʼeezh, dóó béésh łitsoii bikááʼ naʼasdzooígíí shódeisiiltʼeʼ.
12 Aooʼ, haash yitʼáo díí beisoonah Bóhólníihii nihookááʼ dineʼé, daboodlą́ągo, tʼáá bí bíhólníihgo tʼáá ałtsoní yá ííłʼį́? Ákohgo, hazhóʼó bikʼeh dahoniilʼį́į dooleeł.
13 Dóó bikʼeh dahoniilʼį́įgo, kéyah bee ahaʼdeetʼánígíí shódeidiiltʼeeł; dóó haaʼíshį́į́ náás náhodeeshzhiizhgo Bóhólníihii Jerusalem doolchxǫǫł nínę́ę biʼdoolnííł; háálá tsʼídá tʼáá ałtso Bóhólníihii Jerusalem atídoolnííł níigo yee haadzíʼę́ę éí bidaʼdoolnííł.
14 Jó háálá, Bóhólníihii biiʼSizíinii doo bił dahólǫ́ǫ da dooleełgo bichʼįʼ hoolzhish; jó háálá, Diyin God yá dahalneʼii yóó adeideezʼą́, dóó Jeremiah éí awáalyaa góneʼ yah adeistʼeʼ. Dóó shizhéʼé eí deidiilyééł daaníigo hadeinitá ńtʼę́ę́ʼ, áko índa kéyahdóó chʼídeineeshchą́ą́ʼ.
15 Jó kʼad, ánihidishní Jerusalemgóó nánookaigo éí nihídóʼ dadínóohnééł. Áko kʼad, tʼah ádeínóhsingo, ákǫ́ǫ́ kéyahgóó ńdoohkah, dóó saad bee nihichʼįʼ yáshtiʼígíí béédaohłniih, ákǫ́ǫ́ nánoohkaigo nihí ałdóʼ atah dínóohnééł; háálá Bóhólníihii biiʼSizíinii áshiłníigo éí yáshtiʼ.
16 Áádóó shí, Nephi, díí saad shikʼisóó bee bichʼįʼ yááłtiʼgo, shichʼįʼ bá dahazhchįįd. Jó áko, tʼáá íiyisíí bá dahachįʼ, áádóó dashiisił, dóó tłʼóół yee sheʼdaʼáztłʼǫ́, háálá dadiiyiilyééł daniizį́į́ʼ, doo kééhatʼínígi tʼáá sáhí ndaadiilteełii naaldlooshii daʼałchinii dabidoolghał daniizį́į́ʼ.
17 Ndi áádóó Bóhólníihii bichʼįʼ sodeeszin, kódíshníigo: O Bóhólníihii, níinishdlánígíí binahjįʼ, shínaaí bílákʼeedóó yisdáshíłteeh, aooʼ, índa sidziilgo áshílééh binahjįʼ díí tłʼóół bee sheʼastłʼónígíí kʼídeeshdlał.
18 Áádóó díí saad bee haasdzíiʼgo, jó, tłʼółę́ę shílaʼ dóó shikeeʼ bąąhdóó nahjįʼ kódzaago ályaa, dóó shínaaí bidááhdóó náánéisdzįʼ, dóó bichʼįʼ hanáánáásdzííʼ.
19 Áádóó, shichʼįʼ bá náádahóóchįįd, dóó náádashiisił ńtʼę́ę́ʼ; jó ndi, łaʼ Ishmael bitsiʼ, aooʼ, dóó bimá ałdóʼ, dóó łaʼ Ishmael biyeʼ, shínaaí ńdeiyooskan, áko índa ádahodiilzeeʼ; dóó shizééʼ yíká deideezʼánę́ę niʼkwídayiilaa.
20 Áádóó yínííł daniizį́į́ʼ, bąąhági átʼé yaa naaskaiígíí biniinaa, áko índa shichʼįʼ ntsidadeesgoʼ, dóó tsʼídá tʼáá ałtso atídaniilyaaígíí tʼáá shǫǫdí bee nihaa ndiʼdííʼááł, daaníigo ńdasooskan.
21 Áádóó tʼáá ałtso yee shikʼijįʼ ádáátʼįįdę́ę bee baa ńdinishtʼą́, dóó Bóhólníihii nihiDiyin God bichʼįʼ sodadidoołzįįłii shaa ńdiníʼaah dabididoohniił bidííniid. Áádóó éí yidaʼiilaa. Dóó ałtso Bóhólníihii yichʼįʼ sodadoolzingo índa shizhéʼé biníbaal bichʼįʼ dah náádiikai.
22 Áádóó shizhéʼé biníbaaljįʼ nániikai. Dóó shí dóó shikʼisóó dóó Ishmael dóó tʼáá átʼé bighan hazʼáanii shizhéʼé biníbaaljįʼ bił náníshkaigo índa, Bóhólníihii biDiyin God ahéheeʼ dadííniid; dóó naaldlooshii kǫʼ yee yichʼįʼ náádaʼiisniiʼ.