1 Ao ngkai, a mwaiti riki bwaai ake e taekin Iakobwa nakoia au botanaomata n te tai arei; ma e ngae n anne, ao bon ti bwaai aikai ake I a tia n rinei bwa N na koroi, bwa I taku bwa a tau bwaai ake I a tia ni koroi.

2 Ao ngkai Ngai ae Nibwaai, I koroi ana taeka riki tabeua Itaia, bwa tamneiu e kukurei n ana taeka. Bwa N na kabonganai ana taeka bwa bwaai ni kabootau nakoia au botanaomata, ao N na kanakoi nakoia au kariki ni kabane, bwa e a tia n noora au Tia Kaboai, n aron are I a tia n nooria.

3 Ao e a tia naba tariu, ae Iakobwa, n nooria n aron are I a tia n nooria; mangaia ae N na kanakoi aia taeka nakoia aia kariki ni kaotia nakoia bwa au taeka a bon koaua. Mangaia ae n aia taeka aika teniman, e a tia n taku te Atua, N na katea au taeka. E ngae n anne ao a mwaiti riki taan kakoaua ake e a tia ni kanakoia te Atua bwa a na kakoauai ana taeka.

4 Taraia, e kukurei tamneiu ni kakoaua nakoia au botanaomata koauan rokon Kristo; bwa bon ibukin aio are e anga iai ana tua Mote; ao bwaai ni kabane ake a tia n anganaki aomata iroun te Atua man ni moan karikan aonaba, bon taian kanikina ibukina.

5 Ao e kukurei naba tamneiu n taian berita aika a tabu ake e a tia ni karaoi te Uea nakoia ara bakatibu; eng, e kukurei tamneiu n ana akoi, ma ana motiraoi, ma mwaakana, ma ana nanoanga n te babaire are akea tokina are e a tia ni katauraoia ibukin kamaiuara man te mate.

6 Ao e kukurei tamneiu ni kakoaua nakoia au botanaomata ae ngkana e aki roko Kristo ao a na bane ni mate aomata.

7 Bwa ngkana akea Kristo ao a na bon akea naba te Atua; ao ngkana akea te Atua ao a na akea naba ngaira, bwa a na bon akea te karikibwai. Ma bon iai te Atua, ao bon ngaia Kristo, ao e na roko n te tai are e taku bwa e na roko iai.

8 Ao ngkai N nang koroi tabeua mai buakon ana koroboki Itaia, bwa ngkana arona bwa iai mai buakoia au botanaomata are noori taeka aikai ao a na tabekarake nanoia ao a na kimwareirei ibukiia aomata ni kabane. Ao aikai taian taeka, ao kam na kabootaui nakoimi ao nakoia aomata ni kabane.