1 E ngae n anne, aki ootana e na aki titebo ma aron are n ana tai ni bwainikirinaki, n te moan tai, e kataenikaia ma e aki urubwaia aon aban Teburun, ma aban Nabetari, ao I mwiina e a korakora riki ana urubwai iaon aban Nabetari ni kawaina ae e rirarikin Taari are Uraura riaon Ioretan rinanon Kariraia, ae abaia reeti aika mwaiti.

2 Aomata ake a nakonako i nanon te roo a tia n noora te oota ae moan te korakora; aika aomata ake a maeka n aban nuun te mate, are e a tia n roko te ota iaoia.

3 Ko a tia ni kamwaita te botanaomata, ao ni karikirakea te kimwareirei—a kimwareirei imatam n aiaron kimwareireia n tain te tai, ao n aron kimwareireia aomata n tain tibwatibwaan bwaai aika a iraei.

4 Bwa ko a tia n urua amon karawawataana, ma te amo are toka iaon angana, ma ana kai ana kairiribai.

5 Bwa e korakora te karongoa ni katoa tain te buaka i marenaia taan buaka, ao a na onrake kunnikaia n te raraa; ma e na kabuekaki ao e na riki bwa kanaan te ai.

6 Bwa e na bungiaki te teei nakoira, ao ti na anganaki te nati te mwaane; ao e na mwiokoaki bwa e na tautaeka; ao e na aranaki bwa Moan te Raoiroi, Te Tia Reirei, te Atua ae Mwaaka, te Tama ae e Akea Tokina, Uean te Raoi.

7 Akea tokin rikiraken ana tautaeka ma ana rau, iaon ana kaintokanuea Tawita, ao iaon ueana ngkana e babaireia, ao e na kateia ma te motikitaeka ao te motiraoi man te tai arei ao n aki toki. E na karaoa aio aia Uea Taanga ni Buaka ibukin ingaingan nanona.

8 Te Uea e kanakoa ana taeka nakon Iakobwa, ao e a tiku iaon Iteraera.

9 Ao a na ataia aomata ni kabane, ma Eberaim ma kaain Tamaria, aika a taku ma te kamoamoa ma te karietata i nanoia:

10 A bwaka taian buriki, ma ti na kateitei ma atiibu aika tataaki; a koreaki kaai aika tukumorea, ma ti na onea mwiia ni kaai aika tiira.

11 Mangaia ae e na kateirakeia ana kairiribai Retin te Uea bwa a na kaaitaraa, ao ni botiia ana kairiribai;

12 I-Turia i moa ao I-Biritia i buki; ao a na kabwauta Iteraera ni wiia aika uki. Bwa e aki toki unin nanona, ngkai e teimatoa n aroraki baina.

13 Bwa a aki nakoina aomata ake e katuaeia, ke n ukoukora aia Uea Taanga ni Buaka.

14 Mangaia ae te Uea e na anaa te atu ma te buki mai Iteraera, ma te mwanga ao te maunei n teuana te bong.

15 Te unimwaane bon te atu; ao te burabeti are e reireia te kewe bon te buki.

16 Bwa aia mataniwi te botanaomata aio a kairiia nakon te kaairua; ao a na kamaunaki aomata ake a kairiia.

17 Mangaia ae e aki kukurei nanon te Uea irouia aia ataeinimwaane, ao a na akea naba ana nanoanga nakoia aika akea tamaia ma aika mate buuia; bwa ngaiia ni kabane taan mwaamwana te aba ma taani karaoa ae buakaka, ao wiia ni kabane a tataekina ae e aki riai. Bwa e tuai n toki unin nanona, ngkai e teimatoa n aroraki baina.

18 Bwa e na bue te buakaka n aiaron te ai; ao e na kana te kateketeke ma te akanta, ao e na kabuekaki naba buakoako ma buakonikai, ao a na waerake ni kabane n aiaron waeraken te bubu.

19 E na karooaki te aba n unin nanon aia Uea Taanga ni Buaka, ao a na riki aomata n aiaron kanoan te ai; ao akea te aomata ae e na kamaura tarina.

20 Ao e na iraa ni baina are te atai ao e na baki; ao e na amwarake ni baina are te maing ao a na aki rauaki; ao a na bane aomata ni kabane ni kang irikon baia—

21 Manate, Eberaim; ao Eberaim, Manate; a na uaia ni buakana Iuta. Bwa e tuai n toki unin nanona, ngkai e teimatoa n arora baina.