1 N te ririki are mate iai te uea are Utia, ao I noora naba te Uea bwa e tekateka iaon te kaintokanuea, ae rietata ma n neboaki, ao e buta nanon te tembora n ana kunnikai.

2 A tei i etana anera aika terabim; aika kaka oneai baia ni kiba; ao a rabun mataia ni baia aika uaai, ao a rabun waeia ni baia aika uaai, ao a kiba nako ni baia aika uaai.

3 Ao e takarua temanna nakon are temanna, ni kangai: E tabu, e tabu, e tabu aia Uea Taanga ni Buaka; e onrake te aonaba ni mimitongina.

4 Ao a mwaeiei bouan te mataroa ni bwanaan are takarua, ao e on te auti n te bubu.

5 Ao I taku: E na reke kaiu! Bwa N na tiringaki; bwa te aomata ngai ae bareka riau; ao I maeka i buakoia aomata aika a bareka riaia; bwa a tia matau n noora te Uea, ae aia Uea Taanga ni Buaka.

6 Ao e kiba ana anera ae te terabim nakoiu, ma te mwakoro n ai i nanon baina, are e a tia n anaia ma te kai ni karibai man te baonikarea;

7 Ao e katoka iaon wiiu, ao e kangai: Taraia, e a tia n riinga wiim te bwai aio; ao a na anaaki barekam, ao a na kaitiakaki am bure.

8 Ao I a ongo naba bwanaan te Uea, ae kangai: Antai ae N na kanakoatia, ao antai ae e na mwananga ibukira? Ao I taku: Aio Ngai; kanakoai.

9 Ao E taku: nako tuangiia te botanaomata aio—A na ongo, ma a na aki oota; ao a na noori bwaai, ma aki atai nanoia.

10 Kamatoan nanoia te botanaomata aio, ao a kabonoi taningaia, ao a kain mataia—bwa a na aki nooraba ni mataia, ke n ongo n taningaia, ke n oota inanoia, ke n rairaki ma ni kamaiuaki.

11 Ao I taku: Te Uea, maanra? Ao E taku: Ni karokoa te tai are a na uruaki iai taian kaawa ma n akea kaaia, ao a na akea kaain taian auti, ao e na kamaroa te aba;

12 Ao e a tia te Uea ni kararoaia aomata ni kabane, bwa a na akea kaain nukan te aba aio.

13 Ma iai te katebwi ni mwakoro mai buakoia, aika a na oki, ao a na tiringaki n aiaron te kai ae te terebinta, ke te oke aika iai te maiu ae na reke man botoia e ngae ngke a tia ni kabwakaki; e na reke te maiu aio man te koraa ae tabu.