1 Tena, neno la Bwana liliniambia: Chukua hati ndefu, na uandike juu yake kwa kalamu ya mwanadamu, kuhusu Maher-shalal-hash-bazi.

2 Na nilichukua mashahidi waaminifu ili waandike, Uria yule kuhani, na Zekaria mwana wa Yeberekia.

3 Na nilimwendea huyo nabii wa kike; na akapata mimba na akazaa mwana wa kiume. Kisha Bwana akaniambia: Muite jina lake, Maher-shalal-hash-bazi.

4 Kwani tazama, kabla ya huyo mtoto hajajua kulia, baba yangu, na mama yangu, utajiri wa Dameski na mateka ya Samaria yatachukuliwa na mfalme wa Ashuru.

5 Bwana alinizungumzia tena, akisema:

6 Kwa vile watu hawa wameyakataa maji ya Shiloa yapitayo polepole, na wanafurahia Resini na mwana wa Remalia;

7 Kwa hivyo sasa, tazama, Bwana ataleta juu yao maji ya huo mto, yenye nguvu, na mengi, hata mfalme wa Ashuru na utukufu wake wote; atakuja na kupita juu ya mifereji yake yote, na kingo zake zote.

8 Na yeye atapita Yuda; atafurika na kuwa zaidi, atafika hata shingoni; na atakaponyosha mabawa yake yatajaa upana wa nchi, Ewe Imanueli.

9 Jiunganishe, Ee ninyi watu, na mtavunjwa vipande vipande; na sikiliza ninyi nyote mtokao nchi za mbali; jiwekeni tayari na silaha, na mtavunjwa vipande vipande; jiwekeni tayari na silaha, na mtavunjwa vipande vipande.

10 Fanyeni shauri pamoja, na hamtafanikiwa; nena neno, na halitatimia; kwani Mungu yu pamoja nasi.

11 Kwani Bwana alinizungumzia hivyo kwa kunionya vikali, na akanishauri kuwa nisitembee katika njia za watu hawa, akisema:

12 Msiseme, Muungano, kwa wale wote ambao hawa watu watasema, Muungano; wala msiogope woga wao, wala kuogopa.

13 Mtakaseni Bwana wa Majeshi mwenyewe, na acheni yeye awe hofu yenu, na acheni yeye awe tisho lenu.

14 Na atakuwa kimbilio; lakini jiwe la kujikwaa, na mwamba wa kuchukiza kwa nyumba zote mbili za Israeli, na mtego na tanzi kwa wakazi wa Yerusalemu.

15 Na wengi miongoni mwao watajikwaa na kuanguka, na kuvunjwa, na kutegwa, na kukamatwa.

16 Ufunge huo ushuhuda, na ufunge sheria miongoni mwa wanafunzi wangu.

17 Na nitamngojea Bwana, ambaye huficha uso wake kutoka kwa nyumba ya Yakobo, na nitamtafuta.

18 Tazama, mimi na watoto ambao Bwana amenipatia ni kwa ishara na maajabu katika Israeli kutoka kwa Bwana wa Majeshi, yule anayekaa katika Mlima Sayuni.

19 Na watakapokuambia: Tafuta ushauri kwa watu wenye pepo wa utambuzi, na kwa wachawi wanaochungulia na kunongʼona—je, haiwapasi watu kutafuta ushauri kutoka kwa Mungu ili wanaoishi wasikie kutoka kwa wafu?

20 Kwa sheria na kwa ushuhuda; na wao wasiponena kulingana na neno hili, ni kwa sababu hakuna nuru ndani yao.

21 Nao wao watapita katikati yake wamedhikika na wakiwa na njaa; na itakuwa kwamba watakapopata njaa, watajikasirisha wenyewe, na kumlaani mfalme wao na Mungu wao na kutazama juu.

22 Na watatazama ardhi na kutazama shida, na giza, kufa moyo, na wataingizwa gizani.