1 Ao e na riki te bwebwe man boton Iete, ao e na riki te mwanga man wakaana.

2 Ao e tiku i aona Tamnein te Uea, ma tamnein te rabakau ao te atatai, man tamnein te tia ibuobuoki ma korakorana, ma tamnein te atatai ma maakan te Uea;

3 Ao e na waekoa ni karekea nakoina ataan maakan te Uea; ao e na aki motikitaeka n aron are e nooria, ke ni boaia n aron bwaai ake e ongo n taningana.

4 Ma e na motikitaeka nakoia aika a kainnanoa te raoiroi, ao e karaoi ana moti n aki inanonano nakoia aika a nimamannei; ao e orea te aonaba ni mooti aika a rawawata ni wiina, ao e na taekin ni wiina rawawatan katuaeaia aika a buakaka.

5 Ao kabaean nukana te raoiroi, ao kabaean bebeena te kakaonimaki.

6 E na maeka te kameaanti ma te tiibu te teei, ao e na wene te rebari ma te kooti te teei, ao te kao te teei ma te raian ma kao aika a marika; ao e na kairia te ataei ae uarereke.

7 Ao a na botaki n amwarake te kao ma te bea; ao a na botaki ni wene buniia; ao e na kang uteute te raian n aiaron te kao.

8 Ao e na takaakaro te merimeri iaon bwangan te atibi, ao e na katokaa baina te ataei ae e aki toki ni mamma iaon bwangan te kaokateriti.

9 A na bon aki kaikoaki ke n urubwai iaon au maunga ae tabu, bwa e na buta aon te aonaba n ataakin te Uea, n aiaron te ran ae onrake iai marawa.

10 Ao n te bong arei, ao e na reke boton Iete, are e na riki bwa te maniua ibukiia te botannaomata; ao a ukoukoria Tientaire; ao e na mimitong nnena ni motirawa.

11 Ao e na koro bukina bwa n te bong arei, e na manga moana ana mwakuri te Uea n te kauatai bwa e na kaoka nikiraia ana botanaomata ake a tia n reke maiuia, mai Aturia, ao mai Aikubita, ao mai Bateroti, ao mai Kuti, ao mai Eram, ao mai Tiina, ao mai Amata, ao mai aban marawa.

12 Ao e na katea te buraeki ibukiia aaba, ao e na ikotiia aomata ake a tia ni kitana Iteraera, ao e na ikotiia naba Iuta ake a tia ni kamaenakoaki ao a roko man ninginingin te aonaba ake aua.

13 E na toki bakantangin Eberaim, ao a na tiringaki ana kairiribai Iuta; e na aki bakantang Eberaim iroun Iuta, ao Iuta e na aki kamwaninga Eberaim.

14 Ma a na kiba iaon angaia I-Biritia n nako maeao; ao a na uaaia n iraei bwain aban mainiku; a na arori baia n taua taekan Etom ma Moaba; ao a na ongeaba nakoina natin Amon.

15 Ao te Uea e na urua mwangan marawan Aikubita; ao ma angina ae korakora e na ioioa baina i aon te karaanga, ao e na bwenauaia nakon mwakoro aika itiua ni karaanga, ao e na kanakonakoia aomata i aon te tano ae mwau.

16 Ao e na iai te kawai ibukiia nikiran ana botanaomata aika a reke maiuia, mai Aturia, n aron are riki nakon Iteraera n te tai are e otinako iai mai Aikubita.